འདི་ལོའི་འཛིན་རིམ་བཅུ་གཉིས་ཀྱི་རྒྱ་གར་རྒྱལ་ཡོངས་ཡིག་རྒྱུགས་ཆེན་མོའི་ཁྲོད་སློབ་བུ་བསྟན་འཛིན་རྡོ་རྗེ་ལགས་ཀྱིས་བརྒྱ་ཆ་ ༩༦.༧༩ དང་སློབ་བུ་ཚེ་རིང་སྙན་གྲགས་བླ་མ་ལགས་ཀྱིས་བརྒྱ་ཆ་ ༩༦ བླངས་འདུག
དེ་རིང་སྔ་དྲོར་དྷ་ས་ཐེག་ཆེན་གཙུག་ལག་ཁང་དུ་བཙན་བྱོལ་བོད་མིའི་དམངས་གཙོ་དབུ་བརྙེས་ནས་ལོ་ངོ་ ༥༦ འཁོར་བའི་དུས་དྲན་གྱི་གཞུང་
འབྲེལ་མཛད་སྒོའི་ཐོག ཆེད་ལས་རིགས་གཅིག་རྐང་འཛིན་པའི་སྲིད་སྐྱོང་གཟེངས་རྟགས་ཐོབ་མཁན་ཆེད་ལས་བ་ ༥ དང་། འདི་ལོའི་འཛིན་རིམ་བཅུ་གཉིས་ཀྱི་རྒྱལ་ཡོངས་ཡིག་རྒྱུགས་ཁྲོད་བརྒྱ་ཆ་ ༩༥ ཡན་ལེན་མཁན་སློབ་མ་གཉིས། དེ་བཞིན་འཛིན་རིམ་བཅུ་གཉིས་ཀྱི་ཡིག་རྒྱུགས་ཁྲོད་ཚན་རིག་དང་སྒྱུ་རྩལ། ཚོང་རིག་བཅས་ཀྱི་རྩེ་ཕུད་སློབ་མ་ ༡༡ ལ་གཟེངས་རྟགས་གནང་སོང་ལ། གཞན་ཡང་། བོད་རིགས་ཚོང་པ་ཁག་ཅིག་གིས་གཉེར་བའི་གནའ་དེང་བོད་ཆས་བཟོ་ཚོང་ཁང་སྐེ་རགས་དང་རྐང་འཁོར་གཡར་གླ་ཚོང་གཉེར་ཁང་གཉིས་ལ་གཟེངས་རྟགས་གནང་སོང་།
དེ་ཡང་མཛད་སྒོའི་ཐོག་སྲིད་སྐྱོང་གཟེངས་རྟགས་ཆེད་ལས་རིགས་གཅིག་རྐང་འཛིན་པ་སློབ་མ་ ༥ ལ་ལག་འཁྱེར་དང་བྱ་དགའ་ཧིན་སྒོར་ཁྲི་ ༢ རེ་གནང་སོང་བ་དང་། གཟེངས་རྟགས་ཐོབ་མཁན་བསྟན་འཛིན་ནམ་མཁའ་ལགས་ནི་སྦེལ་ཀོབ་གཏན་སློབ་ནས་གཞི་རིམ་སློབ་གྲྭ་ཐོན་པ་དང་། St Joseph མཐོ་སློབ་ཏུ་ཉེ་བའི་གཙུག་ལག་རབ་འབྱམས་པ་ཐོན་པ་དང་། དེ་ནས་སྦེང་ལོར་Christ University ནས་གཙུག་ལག་རམ་འབྱམས་པ་ཐོན་ཞིང་། རྒྱ་གར་ནང་གི་བཙན་བྱོལ་བོད་མིའི་གནས་སྤོས་བྱེད་མཁན་ཁྱིམ་ཚང་ཐོག་དངུལ་བསྐུར་གཏོང་བྱེད་པའི་སྤྱི་ཚོགས་ཀྱི་དཔལ་འབྱོར་དལ་ཤུགས་རྐྱེན་ཇི་བྱུང་ཐད་དཔྱད་ཞིབ་གནང་ཡོད་འདུག
བདེ་ཆེན་རྡོ་རྗེ་ལགས་ཨོ་རི་ས་གཏན་སློབ་ནས་གཞི་རིམ་སློབ་གྲྭ་ཐོན་པ་དང་། ཝ་ཎ་དབུས་བོད་ཀྱི་གཙུག་ལག་སློབ་གཉེར་ཁང་ནས་མཐོ་སློབ་ཐོན་ཏེ། ད་ལྟ་སློབ་གཉེར་ཁང་དེ་རུ་སྐུ་མགྲོན་སློབ་དཔོན་ཚུལ་དུ་ཕྱག་ལས་གནང་བཞིན་ཡོད་པ་དང་། ཁོང་གིས་བོད་ཀྱི་བརྡ་སྤྲོད་རིག་པའི་ཡིག་ཆ་དང་ནང་དོན་རིག་པའི་ཚད་གཞུང་དག་ལ་གཞི་བཅོལ་ཏེ། བོད་སྐད་ཀྱི་བརྗོད་པའི་རྣམ་གཞག་སྟོན་པའི་རིག་པ་ལ་དཔྱད་ཞིབ་གནང་ཡོད་འདུག
རིག་འཛིན་རྡོ་རྗེ་ལགས་ལ་དྭགས་དང་དྷ་སྟེང་བོད་ཕྲུག་ཁྱིམ་སྡེ་ནས་གཞི་རིམ་སློབ་གྲྭ་ཐོན་པ་དང་། མཱ་དྷ་ར་སི་གཙུག་ལག་སློབ་ཆེན་ནས་མཐོ་སློབ་ཐོན་ཞིང་། ད་ལྟ་བོད་ཀྱི་སྲིད་བྱུས་ཉམས་ཞིབ་ཁང་དུ་ཉམས་ཞིབ་པའི་ཕྱག་ལས་གནང་བཞིན་ཡོད་པ་དང་། ཁོང་གིས་བཙན་བྱོལ་བོད་གཞུང་གི་སྲིད་དོན་དང་འཛིན་སྐྱོང་གི་ནུས་པའི་ཐོག་ཆབ་སྲིད་རིག་པས་དཔྱད་ཞིབ་གནང་ཡོད་འདུག
བྱམས་པ་ཆོས་འཕེལ་ལགས་ཝ་ཎ་དབུས་བོད་ཀྱི་གཙུག་ལག་སློབ་གཉེར་ཁང་ནས་མཐོ་སློབ་ཐོན་པ་དང་། ད་ལྟ་གཙུག་ལག་སློབ་གཉེར་ཁང་དེ་རུ་སློབ་དཔོན་ལས་རོགས་ཐོག་ཕྱག་ལས་གནང་བཞིན་ཡོད་ཅིང་། ཁོང་གིས་དཔལ་དུས་ཀྱི་འཁོར་ལོའི་དགོངས་དོན་ཉི་མ་དང་འཛམ་གླིང་གཉིས་ཀྱི་འཁོར་གཞི་ལ་ས་རིས་ཀྱི་ལམ་ནས་དཔྱད་ཞིབ་གནང་ཡོད་འདུག
བསྟན་འཛིན་བདེ་གསལ་ལགས་ལ་དྭགས་དང་དྷ་སྟེང་བོད་ཕྲུག་ཁྱིམ་སྡེ་ནས་གཞི་རིམ་སློབ་གྲྭ་ཐོན་པ་དང་། མེ་སོར་གཙུག་ལག་སློབ་ཆེན་ནས་མཐོ་སློབ་ཐོན་ཏེ་ད་ལྟ་བོད་ཀྱི་སྲིད་བྱུས་ཉམས་ཞིབ་ཁང་དུ་ཉམས་ཞིབ་པའི་ཕྱག་ལས་གནང་བཞིན་ཡོད་པ་དང་། ཁོང་གིས་རྒྱ་གར་ལྷོ་ཕྱོགས་ཁུལ་གྱི་བོད་མིའི་གཞིས་ཆགས་ཁག་གི་སྤྱི་ཚོགས་ཀྱི་དཔལ་འབྱོར་དང་གསར་སྐྱེས་གྲངས་ཚད་ཀྱི་གནས་བབ་སྐོར་དང་། གནས་ཡུལ་སྤོ་བཤུད་བྱས་པའི་ཤུགས་རྐྱེན་སྐོར་ལ་དཔྱད་ཞིབ་གནང་ཡོད་འདུག
འདི་ལོའི་འཛིན་རིམ་ ༡༢ ཀྱི་རྒྱ་གར་རྒྱལ་ཡོངས་མཐའ་མའི་རྒྱུགས་སྤྲོད་ནང་ཕྱོགས་བསྡོམས་བརྒྱ་ཆ་ ༩༥ ཡན་ལེན་མཁན་སློབ་མ་བསྟན་འཛིན་རྡོ་རྗེ་ལགས་ཀྱིས་རྒྱ་གར་མངའ་སྡེ་ཊཱ་ལིན་གྷ་ནཱ་Talangana ཡི་རྒྱལ་ས་ ཧི་ཌི་ར་པཱ་ཌི་Hyderabad ཡི་(Narayan Junior College) སློབ་གཉེར་ཁང་དུ་སློབ་སྦྱོང་གནང་ཡོད་པ་དང་། ད་ལྟ་བྷང་ལོར་ཇེན་མཐོ་སློབ་ཁང་དུ་གནམ་གྲུ་བཟོ་བསྐྲུན་རིག་གནས་(Aerospace Engineering )ཐོག་སློབ་སྦྱོང་གནང་བཞིན་ཡོད་ལ། ད་ལོའི་འཛིན་རིམ་བཅུ་གཉིས་ཀྱི་ཡིག་རྒྱུག་ཁྲོད་བརྒྱ་ཆ་ ༩༦.༧༩ བླངས་ཏེ། ད་ལྟའི་བར་གྱི་སྲིད་སྐྱོང་གཟེངས་བསྟོད་ལག་འཁྱེར་ལེན་མཁན་གྱི་ནང་ནས་བརྒྱ་ཆ་མཐོ་ཤོས་དེ་ཆགས་ཡོད་པ་རེད།
སློབ་མ་ཚེ་རིང་སྙན་གྲགས་བླ་མ་ལགས་ཀྱིས་Wynberg-Allen School Mussorrie ནང་སློབ་སྦྱོང་གནང་ཡོད་པ་དང་། ད་ལོའི་འཛིན་རིམ་བཅུ་གཉིས་ཀྱི་ཡིག་རྒྱུགས་ཁྲོད་བརྒྱ་ཆ་ ༩༦ བླངས་ཡོད་ལ། ད་ལྟ་མ་ནི་པལ་མཐོ་སློབ་དུ་སྨན་པའི་སློབ་སྦྱོང་(MBBS)བྱེད་བཞིན་ཡོད་འདུག
འདི་ལོའི་རྒྱལ་ཡོངས་འཛིན་རིམ་བཅུ་གཉིས་ཀྱི་ཚན་རྩལ་ཚོང་གསུམ་གྱི་གྲུབ་འབྲས་རྩེར་སོན་སློབ་མ་ ༡༡ ལ་དགའ་ལྡན་ཕོ་བྲང་གི་གཟེངས་རྟགས་གནང་ཡོད་པ་ལྟར། ཚན་རིག་སྡེ་ཚན་གྱི་ཨང་དང་པོ་སེ་ལ་ཀུའི་བོད་ཁྱིམ་གྱི་སློབ་མ་བསྟན་འཛིན་མཚོ་མོ་ལགས་ལ་བརྒྱ་ཆ་ ༩༤.༢ ཐོབ་པ་དང་། ཨང་གཉིས་པ་ཀ་སྦུག་གཏན་སློབ་ཀྱི་སློབ་མ་བསྟན་འཛིན་བདེ་ཆེན་ལགས་ལ་བརྒྱ་ཆ་ ༩༡། ཨང་གསུམ་པ་སེ་ལ་ཀུའི་བོད་ཁྱིམ་གྱི་སློབ་མ་ཚེ་རིང་བསོད་ནམས་ལ་བརྒྱ་ཆ་ ༨༩.༦ ཐོབ་ཡོད་པ་རེད།
སྒྱུ་རྩལ་སྡེ་ཚན་གྱི་ཨང་དང་པོ་མ་སུ་རི་བོད་ཁྱིམ་གྱི་སློབ་མ་བསྟན་འཛིན་ཕུན་ཚོགས་ལ་བརྒྱ་ཆ་ ༩༢.༨ ཐོབ་པ་དང་། ཨང་གཉིས་པ་སུ་ཇཱ་བོད་ཁྱིམ་གྱི་སློབ་མ་བསྟན་འཛིན་བུ་འཁྲིད་ལགས་ལ་བརྒྱ་ཆ་ ༩༡.༦། ཨང་གསུམ་པ་སྦེལ་ཀོབ་གཏན་སློབ་ཀྱི་སློབ་མ་ཟླ་བ་ཆོས་སྒྲོན་ལགས་སུ་བརྒྱ་ཆ་ ༩༡ ཐོབ་ཡོད་པ་རེད།
ཚོང་རིག་སྡེ་ཚན་གྱི་ཨང་དང་པོ་དྷ་སྟེང་བོད་ཁྱིམ་གྱི་སློབ་མ་བསྟན་འཛིན་ནོར་སྒྲོན་ལགས་ལ་བརྒྱ་ཆ་ ༨༨ ཐོབ་པ་དང་། ཨང་གཉིས་པ་མོན་གྷོ་གཏན་སློབ་ཀྱི་སློབ་མ་བསྟན་འཛིན་རྣམ་སྒྲོལ་ལགས་ལ་བརྒྱ་ཆ་ ༨༣.༦། ཨང་གསུམ་པ་དྷ་སྟེང་བོད་ཁྱིམ་གྱི་སློབ་མ་ཡིད་དགའ་ལགས་ལ་བརྒྱ་ཆ་ ༨༢.༤། ཨང་གསུམ་པ་དྷ་སྟེང་བོད་ཁྱིམ་གྱི་སློབ་མ་འཕྲིན་ལས་དབང་མོ་ལགས་ལ་བརྒྱ་ཆ་ ༨༢.༤། བཅས་ཐོབ་སྟེ། ཨང་དང་པོ་རྣམས་ལ་ཧིན་སྒོར་ཁྲི་ ༢ རེ་དང་། ཨང་གཉིས་པ་རྣམས་ལ་ཧིན་སྒོར་ ༡༥༠༠༠ རེ། ཨང་གསུམ་པ་རྣམས་ལ་སྒོར་ཁྲི་ ༡ རེ་བཅས་གནང་སོང་།
གཞན་ཡང་། བོད་མིའི་སྒྲིག་འཛུགས་དཔལ་འབྱོར་ལས་ཁུངས་ཀྱི་ཚོང་ལས་ཡར་རྒྱས་རམ་འདེགས་ཚན་པའི་ལས་གཞིའི་འོག་ཚོང་པ་གསར་པའི་མ་དངུལ་རོགས་སྐྱོར་གཟེངས་རྟགས་ཐོབ་མཁན་ཏེ། བོད་རིགས་ཚོང་པ་བསྟན་འཛིན་རྒྱལ་པོ་ལགས་ཀྱིས་བཙུགས་པའི་རྐང་འཁོར་གཡར་གླ་ཚོང་གཉེར་ཁང་དང་། དེ་བཞིན་བོད་རིགས་ཚོང་པ་ཡེ་ཤེས་དཔལ་འབྱོར་ལགས་དང་ལྷ་མོ་བཀྲ་ཤིས་ལགས། བྱམས་པ་བསྟན་དར་ལགས་བཅས་ཀྱིས་བཙུགས་པའི་གནའ་དེང་ཟུང་འབྲེལ་གྱི་བོད་ཆས་བཟོ་ཚོང་ཁང་སྐེ་རགས་གཉིས་ལ་ཧིན་སྒོར་འབུམ་གཉིས་དང་ཕྱེད་ཀ་རེ་གནང་སོང་།
གསར་འགོད་པ། པདྨ་མཚོ།
འདི་ལོའི་འཛིན་རིམ་བཅུ་གཉིས་ཀྱི་ཡིག་རྒྱུགས་གྲུབ་འབྲས་དོན་སྐབས་ཤེས་རིག་ལས་ཁུངས་ཀྱིས་འདི་ལོར་སྲིད་སྐྱོང་སློབ་ཡོན་ལེན་མཁན་མི་འདུག་ལབ་སོང་། ད་ཡང་སློབ་མ་གཉིས་འདུག་ལབ་ནས་གཟེངས་རྟགས་སྤྲད་པ་འདྲ། ད་དེ་སུ་ལ་ཀྱག་ཀྱག་རེད།
མ་གཞི་ནས་སློབ་ཕྲུག་འདི་གཉིས་ཀས་འཛིན་རིམ་བཅུ་གཉིས་སྐབས་བོད་ཡིག་སློབ་ཚན་བླངས་མི་འདུག བོད་ཡིག་ལ་བརྒྱ་ཆ་༦༠ དགོས་ཟེར་བའི་སྒྲིག་གཞི་དེ་རྩིས་མེད་ཕྱིན་པ་འདྲ། ལོ་རེ་རེ་ལ་རྒྱུ་མཚན་རེ་རེ་དང་གཟེངས་རྟགས་ཀྱི་མིང་མི་འདྲ་བ་རེ་རེ་འདུག
ད་གང་ཤེས། སྲིད་སྐྱོང་གཟེངས་རྟགས་ཀྱིས་ང་མགོ་ན་བཅུག་སོང་།
གཞུང་ལ་དངུལ་མང་པོ་དེ་འདྲ་ཡོད་ན་རང་བཙན་ལག་དེབ་ཀྱི་དངུལ་བསྡུ་མཚམས་བཞག་ན་ཏག་ཏག་རེད།
བོད་ཀྱི་སྲིད་སྐྱོང་གིས་སྲིད་སྐྱོང་བྱ་དགའ་ཐོབ་པར་བོད་ཡིག་ལ་བརྒྱ་ཆ་མཐོན་པོ་ལེན་མི་དགོས་པ་བཟོས་པ་ནས། སྲིད་སྐྱོང་བྱ་དགའ་ཐོབ་མཁན་གྱི་གྲངས་འབོར་ཡང་འཕར་ཡོང་གི་ཡོད་པའི་སྣང་ཚུལ་འབྱུང་གི་ཡོད། དེས་ག་རེ་མཚོན་ནམ། དེས་བཙན་བྱོལ་བོད་མིའི་སྤྱི་ཚོགས་སུ་བོད་ཀྱི་སྐད་ཡིག་མི་ཤེས་མཁན་གྱི་གྲངས་ཇེ་མང་དུ་འགྲོ་ཡི་ཡོད་པའི་ཉེན་ཁ་ཞིག་མཚོན་གྱི་ཡོད་དམ། མ་གཞི་ཤེས་ཡོན་གྱི་ཚད་གཞི་དངུལ་སྒོར་གྱིས་གཞལ་བའི་ལུགས་སྲོལ་དང་བོད་སྐད་ཡིག་ལ་གདེངས་འཇོག་ཆུང་དུ་གཏོང་ཐབས་འདི་ཚང་མ་བཙན་བྱོལ་བོད་མིའི་ཤེས་ཡོན་སྲིད་ཇུས་ཀྱི་དགོངས་དོན་ཡིན་ནམ།
མ་གཞི་སྲིད་སྐྱོང་དབུས་བཙན་བྱོལ་བོད་མིའི་ཁྲོད་ཀྱི་མཐོ་རིམ་མི་སྣ་མང་པོ་ཞིག་རྒྱལ་ཁབ་གཞན་གྱི་མི་སེར་ཆགས་ཡོང་གི་ཡོད་དང་། ཁྲག་རྒྱུད་ཙམ་ལས་ཁོ་ཚོའི་མི་རབས་ཚ་རྒྱུད་ཚོའང་རྒྱལ་ཁབ་གཞན་གྱི་མི་སེར་ཆགས་འགྲོ་ཡི་ཡོད་པ་འདིས་མ་འོངས་བོད་ཀྱི་རྩ་དོན་རྩོད་ཕྱོགས་ཐད་ཤུགས་རྐྱེན་ལེགས་ཉེས་གང་ཞིག་ཐེབས་གྲབ་ཡོད་དམ།
བོད་ཀྱི་མི་སེར་དཀྱུས་མ་ཚོས་བོད་ཀྱི་ཐུན་མིན་རིག་གཞུང་རྒྱུན་འཛིན་དང་། བོད་ཀྱི་ལ་རྒྱ་དམ་སྲུང་། རྩ་དོན་ཐད་ལུས་སྲོག་ལོངས་སྤྱོད་དང་བཅས་བ་ཕུལ་དང་འབུལ་བཞིན་པ་འདི་སྲིད་དོན་པ་ཁ་ཤས་ཀྱི་ཁེ་ཕན་དང་འབྲེལ་བའི་རྩེད་ཆས་ལྟ་བུ་ཞིག་ཏུ་འགྱུར་ཉེན་ཡོད་དམ།