ཞི་ཡི་མཚོ་འགྲམ་གྱི་ཉིན་མོ།

དཔལ་འབྱོར་རིག་པ་བའི་(The Economist)དུས་དེབ་ཀྱི་གསར་གནས།

ཚེ་རིང་དོན་གྲུབ་ཀྱིས་བསྒྱུར།

དཔོན་རིགས་རྣམས་ཀྱི་ལོ་རེའི་འདུ་ཚོགས་དེ་ནི་ལྷོད་དུ་འབབ་པ་ཞིག་མེད་པ་རེད།

མ་བྱན་ཆེན་མོའི་ཞ་མོ་ལྟེབ་མ་ཞིག་གི་འོག་གཟི་འོད་འཕྲོ་བའི་ཡཱང་ཙི་སྦིན་གྱིས་སྦེའི་རྡའི་ཡི་སྤྲོ་སྐྱིད་གླིང་གྲོང་ཚོའི་ཀེ་སེ་ལིང་གསོལ་ཚིགས་ཁང་གི་གསོལ་ཐབ་ནང་ལྟ་ཞིབ་བྱེད་བཞིན་མཆིས། གསོལ་ཚིགས་ཁང་དེའི་ནང་ཁོང་གིས་ ༡༩༧༡ ལོ་ནས་བཟུང་སྟེ་ལས་ཀ་བྱས་ཡོད། འདིར་ལོ་ལྟར་ཕྱི་ཟླ་ ༨ པར་རྒྱ་ནག་གི་ཆབ་སྲིད་ཀྱི་མཐོ་རིམ་དཔོན་རིགས་རྣམས་ཆེས་གསང་བ་ལྡན་པའི་ཚོགས་འདུ་ཞིག་གི་དོན་དུ་འདུ་བཞིན་ཡོད་པ་རེད། ད་ཆ་མ་བྱན་ཆེན་མོའི་མགོ་གཙོ་ཡིན་སྟབས། སྐུ་ཞབས་ཡཱང་གིས་སྤྲོ་སྐྱིད་གླིང་གི་སྤྲོས་པ་ཆེ་ཤོས་ཀྱི་གསོལ་ཚིགས་ཁང་དེར་འགྱུར་ལྡོག་ཅུང་ཟད་ཙམ་ཞིག་ལས་མི་འགྲོ་བར་ངེས་བརྟན་བཟོ་རྒྱུར་ནུས་ཤུགས་འདོན་བཞིན་ཡོད། ཁོང་གིས་ “འདིར་ཟས་ཐོའི་ནང་དུ་ཟས་སྣ་ ༢༠ ལས་བརྒལ་བ་ཡོད་ཅིང་། དེ་དག་ནི་ང་ཚོས་ལོ་ངོ་ ༡༠༠ རིང་གཡོ་སྦྱོར་བྱས་ཡོད་པ་རེད།” ”ང་ཚོས་སྲོལ་རྒྱུན་གྱི་རྣམ་པ་དེའི་རྒྱུན་སྐྱོང་འདོད།”ཅེས་བརྗོད། ཧོའུ་ཙི་(གོ་དོན་སྤྲེའུ་)ཞེས་པའི་མིང་སྨོས་པའི་ཟ་མ་བཟའ་མཁན་ཞིག་གིས་” ང་རང་ལོ་ངོ་ ༣༠ གོང་དུ་ཀེ་སེ་ལིང་གསོལ་ཚིགས་ཁང་དུ་ཐེངས་དང་པོར་ཡོང་བ་ཡིན། རིན་གོང་གཅིག་པུར་འགྱུར་ལྡོག་ཕྱིན་འདུག” ཅེས་བརྗོད།

པེ་ཅིན་ཤར་ངོས་ཀྱི་མེ་ལེ་ ༡༧༥ (ཀི་ལོ་མི་ཊར་ ༢༨༠) སར་ཡོད་པའི་མཚོ་གྲམ་གྱི་སྤྲོ་སྐྱིད་གླིང་ཞིག་ཡིན་པ་སྦེའི་རྡའི་ཡི་གྲོང་ཁྱེར་དེས་སྔ་ནས་ད་བར་དུ་འགྱུར་ལྡོག་ཅི་ཡང་བྱུང་མེད་པའི་ཚོར་སྣང་ཞིག་སྦྱིན། དེ་ནའང་ལོ་རེའི་ཆབ་སྲིད་ཀྱི་འདུ་ཚོགས་དེ་སྤྱི་ཟླ་ ༨ ཚེས་ ༡༦ ལ་འཇུག་སྒྲིལ་སྐབས་སྦེའི་རྡའི་ཡི་ཞི་འཇམ་དང་བག་ཕེབས། འགྱུར་ལྡོག་མེད་པའི་རྣམ་པ་དེ་ནི་བསླུ་བའི་ཆོས་ཅན་ཞིག་ཡིན་པའི་རང་མདོག་མངོན་གི་ཡོད། རྒྱལ་ཁབ་དེའི་ཆབ་སྲིད་ནི་རྒྱུན་ལྡན་མ་ཡིན་པའི་ངེས་མེད་དང་དོགས་མི་བདེ་བའི་དུས་རིམ་ཞིག་གི་ནང་ཞུགས་ཡོད། འོང་འཆར་གྱི་ཟླ་བ་དག་གི་ནང་སྲིད་འཛིན་ཞི་ཅིན་ཕིན་གྱིས་གནས་རིམ་སྣ་ཚོགས་སུ་གནས་པའི་ཏང་གི་དཔོན་རིགས་རྣམས་ཀྱི་གོ་གནས་ལ་འགྲོ་ངེས་པའི་གཞི་རྒྱ་ཆེ་བའི་འགྱུར་ལྡོག་ལ་ལྟ་སྐུལ་བྱེད་རྒྱུ་དེ་ཡིན་ཞིང་། དེ་ནི་སང་གི་ལོ་འཇུག་ཏུ་ཏང་གི་ཆབ་སྲིད་ཅུས་གསར་པ་ཞིག་(དེ་ལ་ཁོས་མུ་མཐུད་དེ་སྣེ་འཁྲིད་རྒྱུ་ཡིན་པ་རེད་)ངོ་སྤྲོད་བྱེད་སྐབས་མངོན་རྒྱུ་རེད། ལོ་ལྔ་རེའི་བརྒྱུད་རིམ་འདི་ནི་སྲིད་འཛིན་དང་། ཁོའི་ཁ་གཏད་སྲིད་འཛིན་གོང་མའི་ཉེ་འཁོར་རྣམས་ཀྱི་དབར་རྣོ་ངར་ཆེ་བའི་འཐབ་རྩོད་དང་། རྒྱལ་ཁབ་དེའི་དཔལ་འབྱོར་གྱི་བདེ་ཐང་ཐོག་ལ་འཕེལ་བཞིན་པའི་དོ་ཁུར་བཅས་ཀྱིས་མོག་མོག་པོར་གཏོང་ངེས་ལ། དཔོན་རིགས་རྣམས་ལ་རང་རང་གི་མཚོ་གྲམ་སྤྲོ་སྐྱིད་ཁང་དུ་ཐུགས་སྤྲོ་གཏོང་འདོད་ཀྱི་སེམས་ཁམས་དེ་ཡང་མེད་ངེས།

སྦེའི་རྡའི་རུ་ནང་མོལ་གྱི་ཚོགས་འདུ་བསྡུ་སྐོང་བྱེད་པའི་སྲོལ་རྒྱུན་དེ་ནི་མཱའོ་ཙེ་ཏུང་གིས་མགོ་བཙུགས་པ་ཞིག་རེད། དམིགས་ཡུལ་ནི་པེ་ཅིན་གྱི་ཚ་གདུང་ཆེ་བའི་དབྱར་ཁ་དང་ཉིན་རེའི་ངལ་དུབ་ཀྱི་ཕྱི་རོལ་དུ་འདས་དང་ད་ལྟའི་དཔོན་རིགས་རྣམས་འདུ་འཛོམས་ཀྱི་གླེང་སྟེགས་ཤིག་མཁོ་སྤྲོད་བྱེད་རྒྱུ་དེ་རེད། ༡༩༨༠ དང་ ༡༩༩༠ ནང་གླེང་སྟེགས་དེ་ནི་ཏིན་ཞཱའོ་ཕིན་ལ་གོ་ཆོད་པོ་ཞིག་བྱུང་ཡོད། ཁོས་སྐབས་འདིར་རྒྱབ་ལྗོངས་ནས་ལྟ་སྐུལ་བྱས་ཏེ། ཐ་སྙད་ཙམ་གྱི་དབང་ལྡན་འགན་ཁུར་བ་དག་གི་སྟེང་དུ་རང་ཉིད་ཀྱི་ལྟ་ཚུལ་སྤུངས་ཡོད། འོན་ཀྱང་ཞི་ཅི་ཕིན་གྱིས་ཐེ་བྱུས་ཆེ་བའི་ཏང་གི་རྒན་རབས་པ་རྣམས་མཐའ་ལ་འཕུད་ཐབས་བྱེད་བཞིན་ཡོད།(དེ་ནི་ཁོའི་ལས་འཛིན་གོང་མ་ཅཱང་ཛི་མིན་གཅིག་པུ་ཡིན་པ་རེད། ཅཱང་ནི་ཕྱི་ཟླ་ ༨ ཚེས་ ༡༧ ཉིན་ལོ་ ༩༠ སླེབ་ཀྱི་ཡོད་ཅིང་། ད་དུང་ཡང་དབང་ཤུགས་ཆེན་པོ་ཡོད་པ་རེད།) འདས་མ་ཐག་པའི་ལས་འཛིན་གོང་མ་ཧུའུ་ཅིན་ཐཱའོ་དང་མ་འདྲ་བར། ཞི་ཡིས་རང་ཉིད་ཀྱི་རྒན་རབས་པ་རྣམས་ལ་གུས་བརྩི་དེ་ཙམ་མེད་པའི་རྣམ་འགྱུར་མངོན་བཞིན་ཡོད།

དབང་ཚད་ཀྱི་རྩེད་མོ།

བརྟག་པ་མཐའ་བཟུང་གི་སྒོ་ནས་བཤད་ན་དབང་ཚད་བསྐྱར་སྒྲིག་སྐབས་ཞི་ཡིས་རང་གི་རྗེས་འབྲང་པ་རྣམས་དབང་ཚད་ལྡན་པའི་གོ་སར་འཇོག་རྒྱུར་ཧ་ཅང་སྟབས་བདེ་པོ་ཡོད་དགོས། སྲིད་འཛིན་དེ་ནི་ཧུའུ་ལས་ལྡབ་གྱུར་གྱིས་དབང་ཤུགས་ཆེ་བའི་མི་ཞིག་རེད། ཁོས་ཏིང་གི་ “ཐུན་མོང་གིས་སྐྱོང་བའི་” དབུ་ཁྲིད་ཀྱི་ལམ་ལུགས་གཏོར་བཤིག་བཏང་སྟེ། རང་ཉིད་ཀྱི་ལས་འཛིན་གོང་མ་རྣམས་ལས་ལྷག་པའི་གཞུང་གི་དབང་ཚད་མང་དག་ཅིག་རང་ཉིད་ཀྱིས་ལེན་བཞིན་ཡོད། ཧུའུ་དང་ཅཱང་གཉིས་དང་འདྲ་བར་ཞི་ནི་ཏང་གི་སྤྱི་ཁྱབ་དྲུང་ཆེ་དང་། རྒྱལ་ཁབ་ཀྱི་སྲིད་འཛིན། དམག་དཔུང་གི་མགོ་གཙོ་བཅས་ཡིན་པའི་ཐོག་ད་དུང་དེ་དག་ལས་བརྒལ་བའི་དབང་ཚད་ལྡན་ཡོད། ཁོས་རང་ཉིད་ཀྱི་གཙོ་སྐྱོང་འོག་ “སྣེ་འཁྲིད་པའི་སྡེ་ཁག་ཆུང་བ་” ཞིག་གི་ལམ་ལུགས་ཤིག་རྒྱ་བསྐྱེད་བཏང་ཏེ་ཁོང་ཚོར་སྲིད་གཞུང་དང་ཏང་གི་དཔོན་རིགས་གཙོ་གྲས་རྣམས་ཀྱི་ཁེ་དབང་ལ་ངོས་འཛིན་པའི་སྲིད་བྱུས་ལག་བསྟར་གྱི་ཁྱབ་ཁོངས་ནང་ཐེ་བྱུས་བྱེད་པའི་དབང་ཚད་སྤྲོད་བཞིན་ཡོད།

ཞི་ཡིས་ད་དུང་ལྐོག་ཟ་རུལ་སུངས་ལ་རྒོལ་བའི་དྲག་རྩུབ་ཅན་གྱི་ལས་འགུལ་ཞིག་སྤེལ་ཏེ་སྲིད་གཞུང་གི་དབང་འཛིན་པ་ཡོངས་ཀྱི་བརྒྱུད་ལ་འཇིགས་སྣང་ཞིག་ཁྱབ་གདལ་དུ་བཏང་ཡོད་ལ། ཁོང་རང་གི་ཁ་གཏད་རྣམས་ནི་གནོད་འཚེ་ཕོག་མཁན་གྱི་མི་སྣ་གཙོ་བོ་རྣམས་ཀྱི་ཁོངས་སུ་གཏོགས་ཡོད།(ལཱིན་ཅི་ཧྭ་ནི་ཆེས་ཉེ་དུས་ཀྱི་གནོད་འཚེ་མཁན་དེ་ཡིན་ཞིང་། ཁོས་དེ་སྔོན་ཧུའུ་ཡི་སྐུ་བཅར་ལས་རོགས་ཀྱི་སྲི་ཞུ་བསྒྲུབས་ཡོད། ཕྱི་ཟླ་ ༧ པའི་ནང་ཁོ་ལ་ཚེ་བཙོན་གྱི་ཉེས་ཆད་བཀལ།) ༢༠༡༢ ལོའི་ནང་ཞི་ཡིས་དབང་ཚད་བཟུང་བ་ནས་བཟུང་དྲག་གནོན་དེའི་ཆ་ཤས་ཀྱི་ཚུལ་དུ་ཁྱོན་བློན་ཆེན་གཞོན་པའི་གནས་རིམ་མམ། ཡང་ན་དེ་ལས་མཐོ་བའི་གནས་རིམ་ལྡན་པའི་མི་སྣ་ ༡༧༧ ལ་དྲི་རྩད་བྱས་ཡོད། ཝ་ཤིན་ཊོན་ཌི་སི་ནང་གི་གྲོས་འདྲི་བྱ་ཡུལ་ཞིག་ཡིན་པ་སྦུག་ཀི་ལིང་གཙུག་ལག་སློབ་གཉེར་ཁང་གི་ཁྲེན་ལི་ཡིས་བརྗོད་ན་ཞི་ཡིས་ལྐོག་ཟ་བྱས་པའི་ཉེས་མིང་འོག་དམག་སྤྱི་ ༥༠ ལས་བརྒལ་བ་འཛིན་བཟུང་བྱས་ཏེ་ཁོང་ཚོའི་གོ་སར་རང་ཉིད་ཀྱི་མི་བསྐོ་གཞག་བྱས་ཡོད།

དེ་ལྟར་ནའང་ཞི་ཡི་དབང་ཚད་ནི་ཚད་བཀག་འོག་གནས་ཡོད། ཁོའི་གོ་ས་ནི་རིམ་པ་མཐོ་ཤོས་དེའི་སྟེང་དུ་བརྟན་པོར་གནས་ཡོད་པར་མཐོང་བཞིན་པ་ནི་བདེན་པ་རེད། འོན་ཀྱང་མཐོ་རིམ་གྱི་རིམ་པ་འོག་མའི་ཁྲོད་དུ་ཧང་སངས་དགོས་པ་ནི་ཁོང་ལ་རྒྱབ་སྐྱོར་བྱེད་མཁན་ཉུང་ཤས་ཤིག་ལས་མེད། སཱན་ཌིའི་གོ་ཡི་ཁཱ་ལི་ཕོ་ནི་ཡའི་གཙུག་ལག་སློབ་ཆེན་གྱི་ཝིག་ཊར་ཤཱི་ཡིས་ཏང་གི་ཀྲུང་དབྱངས་ཨུ་ཡོན་ལྷན་ཁང་གི་ཚོགས་མི་ ༢༠༥ ཡོངས་རྫོགས་ཀྱི་ཕན་ཚུན་བར་གྱི་ལས་དོན་དང་། སྒེར་གྱི་འབྲེལ་བ་རྣམས་རྩད་ཞིབ་བྱས་ཡོད། ཀྲུང་དབྱངས་ཨུ་ཡོན་ལྷན་ཁང་གིས་ཞི་ཡི་ཐག་གཅོད་ཡོངས་རྫོགས་ལ་སྤྱི་མོས་ཀྱི་རྒྱབ་སྐྱོར་བྱེད་ཀྱི་ཡོད་མོད།(ཉེ་བའི་ཆར་ཀྲུང་དབྱངས་ཨུ་ཡོན་ལྷན་ཁང་ནང་དུ་མངོན་གསལ་ཅན་གྱི་འགལ་ཟླ་བྱུང་ཡོད་པའི་འཁྱར་གཏམ་གང་ཡང་མེད་པ་རེད་) འོན་ཀྱང་སྲིད་འཛིན་ལ་དགོས་པ་ནི་ཆེས་དགོས་གལ་ཆེ་བའི་དཔལ་འབྱོར་གྱི་བཅོས་སྒྱུར་ལྟ་བུ་ཁོའི་སྲིད་བྱུས་རྣམས་ལག་བསྟར་དུ་འཇུག་བྱེད་དུ་སྤྱི་མོས་དང་ཆ་མཚུངས་པའི་དགའ་ཞེན་ཅན་གྱི་རྒྱབ་སྐྱོར་དགོས་ཀྱི་ཡོད། ཤཱི་ལྟར་ན་སྲིད་འཛིན་གྱི་ཕྱོགས་གཏོགས་ཀྱིས་ཨུ་ཡོན་ལྷན་ཁང་དེའི་བརྒྱ་ཆ་ ༦ ཙམ་ལས་ཟིན་གྱི་མེད་པས། དེས་ཕན་ཐོགས་ཀྱི་མེད་པ་རེད།

ངེས་པར་དུ་གསལ་བཤད་ཞུ་དགོས་པ་ཞིག་ནི། བརྒྱ་ཆ་དེ་ནི་ཚིག་ཟིན་གྱིས་བསྟན་པར་ལྟར་ཁས་བླང་མི་རུང་། དེ་ནི་ཀྲུང་དབྱངས་ཨུ་ཡོན་ལྷན་ཁང་གི་ཚོགས་མི་མང་དག་ཅིག་ཕྱོགས་ཁག་གང་དུ་གཏོགས་པའི་དབྱེ་མཚམས་འབྱེད་ཁག་པོ་ཆགས་ཡོད། དེ་བཞིན། ཐེ་ཚོམ་མི་དགོས་པ་ཞིག་ནི་ཞི་ཡི་ཕྱོགས་ཁག་གི་ཁོངས་སུ་མི་གཏོགས་པའི་ཚོགས་མི་མང་དག་ཅིག་གིས་དམིགས་ཡུལ་ངེས་ཅན་ཞིག་གམ། ཡང་ན་འཇིགས་སྣང་གི་དབང་གིས་སྲིད་འཛིན་ལ་རྒྱབ་སྐྱོར་བྱེད་བཞིན་ཡོད་པ་རེད། དེ་ནའང་ཞི་ཡིས་ཀྲུང་དབྱངས་ཨུ་ཡོན་ལྷན་ཁང་དུ་ཡོད་པའི་ལར་ཞེན་ཅན་གྱི་རྒྱབ་སྐྱོར་བ་ཆེས་ཉུང་ཤས་ཤིག་ལ་བརྟེན་དགོས་ཀྱི་ཡོད། གང་ལགས་ཞེས་ན་དེའི་ཚོགས་མི་རྣམས་ནི་ཁོས་འདེམས་བསྐོ་བྱས་པ་ཞིག་མ་ཡིན་པས་རེད། ཁོང་ཚོ་ནི་ ༢༠༡༢ ནང་ཞི་རང་ཉིད་ཏང་གི་དབུ་འཁྲིད་དུ་བདེམས་བསྐོ་བྱུང་སྐབས་དང་དུས་མཚུངས་པར་བསྐོས་པ་ཞིག་ཡིན་ཞིང་། དེ་ནི་སྐབས་འདིའི་དབང་ཤུགས་ཆེ་བའི་མི་སྣ་ཧུའུ་དང་ཡུན་རིང་བགྲེས་ཡོལ་དུ་གནས་ཡོད་པའི་ཅཱང་གིས་བདེམས་བསྐོ་བྱས་པ་ཞིག་ཆགས་ཡོད།

རྗེས་ལོར་ཏང་གི་རྒྱུན་ལྡན་གྱི་ལོ་ལྔ་རེའི་ལྷན་ཚོགས་སྐབས་ཏང་གིས་ཀྲུང་དབྱངས་ཨུ་ཡོན་ལྷན་ཁང་གསར་པ་ཞིག་བསྐོ་གཞག་བྱ་རྒྱུ་ཡིན་པ་རེད། སྐབས་འདིར་ཞི་ནི་ལས་རིམ་དེའི་གཙོ་སྐྱོང་བ་ཞིག་ཡིན་པ་ཙམ་དུ་མ་ཟད། ད་དུང་ཁོ་ལ་རྒྱུན་ལྡན་ལས་མང་བའི་ས་མིག་མང་དག་ཅིག་བསྐང་རྒྱུའི་གོ་སྐབས་ཡོད་པ་རེད། སྤྱིར་བཏང་གི་ཆ་ནས་ཨུ་ཡོན་ལྷན་ཁང་དེའི་བགྲེས་ཡོལ་གྱི་ལོ་ཚད་རང་ལོ་ ༦༥ (ཆབ་སྲིད་ཅུས་ཀྱི་བགྲེས་ཡོལ་ལོ་ཚད་ནི་ ༦༨ ཡིན་པ་རེད་) ཟིན་སྐབས་རྒྱུན་དུ་ལོ་ལྔ་རེའི་མཚམས་སུ་ཚོགས་མི་ ༤༠ ནས་ ༦༠ བར་དུ་བགྲེས་ཡོལ་དུ་འགྲོ་གི་ཡོད་པ་རེད། བགྲེས་ཡོལ་གྱི་ལོ་ཚད་ལ་འགྱུར་བ་མ་ཕྱིན་ཚེ་ ༢༠༡༧ ནང་ཀྲུང་དབྱངས་ཨུ་ཡོན་ལྷན་ཁང་གི་ཚོགས་མི་ ༨༥ བགྲེས་ཡོལ་དུ་འགྲོ་རྒྱུ་ཡིན་ཞིང་། ལྐོག་ཟ་རུལ་སུངས་ཀྱི་དོན་རྐྱེན་འོག་ཨུ་ཡོན་བདུན་ཕྱིར་འཕུད་བཏང་ཡོད་སྟབས། ཞི་ཡིས་བསྐང་ཐུབ་པའི་ས་མིག་གི་ཁྱོན་བསྡོམས་པའི་ཁ་གྲངས་ནི་ ༩༢ ཡིན་པ་རེད། སྦེའི་རྡའི་རུ་འདི་ལོའི་དབྱར་ཁར་མཐོ་རིམ་དཔོན་རིགས་རྣམས་ཀྱིས་ཁོང་ཚོའི་གྲལ་འཛིན་པ་གསར་པ་རྣམས་ཐེངས་དང་པོར་མཐོང་ཡོད་པར་ཚོད་དཔག་བྱེད་བཞིན་ཡོད།

ས་མིག་འགའ་ཞིག་ནི་སྦག་གིན་གྱི་བང་རིམ་*གྱི་རྩ་འཛིན་གཞིར་བཟུང་བསྐང་རྒྱུ་ཡིན་ངེས། འོན་ཀྱང་། གལ་ཏེ་ཞི་ཡིས་ཚོགས་མི་གྲངས་ཕྱེད་ཀ་ཙམ་འདེམས་བསྐོ་བྱེད་ཐུབ་ཚེ་ཨུ་ཡོན་ལྷན་ཁང་དེའི་ནང་ཁོའི་རྒྱབ་སྐྱོར་གྱི་ཚད་གཞི་ནི་ཤིན་ཏུ་ནས་རྒྱ་ཆེར་འཕེལ་རྒྱུ་ཡིན་པ་རེད། དེ་ལྟར་ནའང་སྐབས་དེ་འདྲ་ཞིག་གི་ནང་དུའང་ཞི་ཡིས་ཚོགས་མི་མང་ཆེ་བ་ནི་རང་ཉིད་ལ་ལར་ཞེན་ཅན་གྱི་རྒྱབ་སྐྱོར་བ་ཡིན་པར་ཡིད་རྟོན་བྱེད་མི་ཐུབ་ལ། དེས་ཁོའི་དབང་ཚད་རྒྱ་ཆེ་རུ་གཏོང་ངེས་ཀྱང་། དབང་ཚད་དེ་ནི་ལྟོས་པ་མེད་པ་ཞིག་ཏུ་འགྱུར་མི་ཐུབ་སྟབས། དེས་ཁོ་ལ་འདོད་བློ་མི་ཁེངས་ཤིང་ཞེ་སུན་པའི་ཚོར་སྣང་ཞིག་སྦྱིན་སྲིད། ཁོའི་ལས་འཛིན་གོང་མ་ཧུའུ་ཡིས་ལས་གནས་ནས་ཐོན་མཁན་གྱི་དབུ་ཁྲིད་ཚོས་བསྐོ་གཞག་བྱས་པའི་ཚོགས་མི་ལས་གྲུབ་པའི་ཀྲུང་དབྱངས་ཨུ་ཡོན་ལྷན་ཁང་ཞིག་རྒྱུན་འཛིན་བྱས་ཡོད། འོན་ཀྱང་། འཁོ་ནི་ཧ་ཅང་གི་ནུས་ཤུགས་ཞན་པའི་དབུ་ཁྲིད་ཅིག་ཡིན་ཞིང་། དཀའ་ཚེགས་ཅན་གྱི་དཔལ་འབྱོར་གྱི་བཅོས་སྒྱུར་ལ་བློ་མོས་ཡོད་པའི་རྣམ་གྱུར་ཅུང་ཟད་ཙམ་ལས་བསྟན་མེད། ཞི་ནི་མ་མཐར་ཡང་ཆེ་འདོད་ཀྱི་བསམ་བློ་དྲག་པོ་ཞིག་ཡོད་པ་མངོན་བཞིན་ཡོད་པ་རེད། (སྤྱིར་ཞི་ནི་ ༢༠༢༢ ལ་ལས་གནས་ནས་ཕྱིར་ཐོན་དགོས་ཀྱང་། སྤྱི་ཚོགས་ནང་ཁོས་ ༢༠༢༢ རྗེས་སུའང་ལས་གནས་བཟུང་འདོད་ཡོད་པའི་གཏམ་ཡན་ཁྱབ་བཞིན་ཡོད།)

སྒེར་གྱི་འཐབ་རྩོད་དེ་དག་ནི་རྗེས་ལོར་གསང་སྒོའི་ཡོལ་བའི་རྒྱབ་ཏུ་འཐབ་རྒྱུ་རེད་ལ། མ་བྱན་ཆེན་མོ་ཡཱང་ནི་བྲེལ་འཚུབ་ངང་གནས་ངེས། དེ་སྔོན་མཐོ་རིམ་གྱི་དཔོན་རིགས་རྣམས་ཁོང་གི་གསོལ་ཚིགས་ཁང་དུ་ཟས་བཟའ་བར་འོང་གི་ཡོད། ད་ཆ་ཁོང་གིས་བརྗོད་ན་སྐབས་ཕལ་མོ་ཆེར་ཁོང་ཚོའི་མཚོ་འགྲམ་གྱི་སྡོད་ཁང་དུ་ཁོང་ཟས་གཡོ་སྦྱོར་བྱེད་པར་སྐད་གཏོང་བཞིན་ཡོད་པ་རེད། རྟོག་དཔྱོད་རང་བཞིན་གྱི་ཚོད་དཔག་ཅིག་བྱས་ན། སྐབས་འདིར་ཁོང་ཚོས་ཕན་ཚུན་དབར་གྱི་གུང་ཟས་བཟའ་རྒྱུའི་ཇུས་ངན་ཤོམ་བཞིན་ཡོད་རྒྱུ་རེད།

*སྒྱུར་མཆན། སྦག་གིན་གྱི་བང་རིམ་(Buggins’ turn)ཞེས་པའི་དོན་ནི་སྐྱེ་བོ་ཞིག་ལས་གནས་སམ་གོ་ས་ཞིག་ཏུ་བསྐོ་བཞག་བྱེད་སྐབས་སྐྱེ་བོ་དེའི་འཇོན་ཐང་དང་དགེ་མཚན་ལ་ལྟོས་པ་མ་ཡིན་པར་སྒྲིག་འཛུགས་སམ། ཡང་ན་ཚོགས་པ་ཞིག་གི་ཚོགས་མི་ཡིན་པ་ཙམ་མམ། ཡང་ན་དེར་ལས་ཀ་ཡུན་རིང་བྱས་པའི་དབང་གིས་བསྐོ་གཞག་བྱེད་ཚུལ།

ཨིན་ཡིག་གི་མ་རྩོམ་ནི་དྲ་གནས་ཁ་བྱང་ http://tibet.net/2016/08/xis-day-at-the-beach/ ཐོག་གཟིགས་པར་འཚལ།