སྐབས་ ༡༦ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་གཉིས་པ་ཟླ་འདིའི་ཕྱི་ཚེས་ ༢༠ ནས་ ༢༩ བར་འཚོགས་རྒྱུ་ཡིན་འདུག
ཟླ་འདིའི་ཕྱི་ཚེས་ ༢༠ ནས་ཉིན་གྲངས་ ༩ རིང་སྐབས་ ༡༦ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་གཉིས་པ་འཚོགས་རྒྱུ་ཡིན་པ་ལྟར། དེ་རིང་འདི་གའི་གསར་འགོད་པས་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་དྲུང་སྟོབས་རྒྱལ་ལགས་སུ། ཐེངས་འདིའི་ཚོགས་དུས་ཐོག་ལས་རིམ་གཙོ་བོ་ག་རེ་ཡོད་སྐོར་བཅར་འདྲི་ཞུས་པར། གྲོས་ཚོགས་ཚོགས་དུས་གཉིས་པའི་ལས་ཉིན་དགུའི་རིང་གི་ལས་རིམ་གཙོ་བོ་དེ། བོད་མིའི་སྒྲིག་འཛུགས་ཀྱི་ལས་ཁུངས་མ་ལག་ཁྱབ་ཁོངས་དང་བཅས་པའི་ལོ་འཁོར་ལས་བསྡོམས་རྒྱས་པར་ཟླ་བ་ཁ་ཤས་ཀྱི་སྔོན་ནས་སྤྱི་འཐུས་རྒྱུན་ལས་ནས་ཞིབ་འཇུག་གནང་བ་དེའི་ཐོག་དྲི་བ་དྲིས་ལན་དང་བགྲོ་གླེང་གནང་རྒྱུ། དེ་བཞིན། གྲོས་ཚོགས་རང་གི་ནང་བློན་ཆེན་ལས་ཁུངས་བདུན་ནས་ལས་བསྡོམས་སྙིང་བསྡུས་རེ་སྙན་སྒྲོན་ཞུས་པ་དེར་དྲི་བ་དྲིས་ལན་དང་བགྲོ་གླེང་གནང་རྒྱུ་དང་། སྲིད་སྐྱོང་མཆོག་དང་ཕྱག་རོགས་བཀའ་བློན་རྣམ་པར་སྐར་རྟགས་ཅན་གྱི་དྲི་བ་ཁག་ཅིག་ཡོང་རྒྱུ་ཡིན་ལ། དེའི་ཐོག་འཆར་ཅན་ལྟར་དེ་རིང་རང་སྤྱི་ཟུར་བསྟན་འཛིན་མགོན་པོ་ལགས་སྐུ་གྲོངས་ཡོད་པས་ཐེངས་འདིའི་ཚོགས་དུས་ཐོག་མྱ་ངན་གུས་འདུད་ཀྱི་གྲོས་གཞི་གྲོས་འཆར་ཞིག་དང་། བོད་ནང་གི་གནས་སྟངས་ཛ་དྲག་ཏུ་འགྲོ་ཡི་ཡོད་པ་དང་གཞིས་ལུས་བོད་མིའི་དཀའ་ངལ་ཆེ་རུ་ཆེ་རུང་འགྲོ་བཞིན་ཡོད་སྟབས། དེའི་ཐོག་ལ་གདུང་སེམས་མཉམ་སྐྱེད་ཀྱི་གྲོས་ཆོད་ཅིག་འཇོག་རྒྱུ་དང་། སྤྱི་འཐུས་སྒེར་གྱི་གྲོས་གཞི་གྲོས་འཆར་དང་གཞུང་འབྲེལ་གྱི་གྲོས་གཞི་གྲོས་འཆར་ཡོང་གི་རེད་ལ། སྒྲིག་གཞི་བསྐྱར་བཅོས་དེ་འདྲ་ཡང་ཁ་ཤས་བསླེབ་ཡོང་གི་ཡོད་སྐོར་བརྗོད་བྱུང་།
འོས་བསྡུའི་སྒྲིག་གཞི་བསྐྱར་བཅོས་དང་འབྲེལ་བའི་ལས་རིམ་འདྲ་ཡོད་མེད་དྲིས་པར་ཁོང་གིས། དེའི་ཐོག་གྲོས་ཚོགས་སྔོན་མའི་ནང་གྲོས་ཆོད་བཞག་པ་གཞིར་བཟུང་འོས་བསྡུའི་སྒྲིག་གཞི་བསྐྱར་བཅོས་སྐོར་ལ་བཀའ་བསྡུར་དེ་འདྲ་ཐེངས་འདིའི་ལས་རིམ་ནང་བསླེབ་ཀྱི་མེད་པ་དང་། ཟུར་དུ་ཆེད་འཛུགས་གནང་བའི་ཚོགས་ཆུང་ནས་འོས་བསྡུའི་སྒྲིག་གཞི་བསྐྱར་བཅོས་སམ་ཡར་རྒྱས་གཏོང་ཕྱོགས་སྐོར་ལ་སྒྲིག་འཛུགས་དང་མི་མང་མི་རེ་ངོ་རེ་ནས་དགོངས་འཆར་ག་རེ་ཡོད་པ་ཚང་མ་རུག་རུག་བྱས་ཏེ། ཚོགས་ཆུང་ནང་བཀའ་སྡུར་ཞིབ་ཕྲ་གནང་རྗེས། མཐའ་མའི་གྲུབ་དོན་དེ་གྲོས་ཚོགས་ཚོགས་དུས་གསུམ་པའི་ཐོག་སྙན་སྒྲོན་ཞུས་ཏེ་བཀའ་སྡུར་གཏན་འབེབས་གནང་རྒྱུ་ཡིན་སྐོར་བརྗོད་བྱུང་།
ཡང་ཆེད་འཛུགས་ཚོགས་ཆུང་གི་སྙན་ཐོ་དེ་འདྲ་བསྣམ་ཡོང་གི་ཡོད་མེད་བཀའ་འདྲི་ཞུས་པར། ད་ལན་དམིགས་བསལ་གྱིས་སྙན་ཐོ་དེ་འདྲ་བསྣམ་ཕེབས་ཀྱི་མ་རེད་བསམ་གྱི་འདུག ཡིན་ནའང་། མང་ཚོགས་རྩིས་ཁྲའི་ཚོགས་ཆུང་སྐབས་ ༧ པའི་སྙན་ཐོ་དེ་སྔོན་ཕུལ་ཟིན་པ་དང་། འཛིན་སྐྱོང་བཀའ་ཤག་གི་ངོས་ནས་སྙན་ཐོ་དེའི་ནང་ཡོད་པའི་སྐྱོན་ཆ་རྣམས་གཙང་སེལ་དང་ཞིབ་འཇུག་གནང་བའི་མཐའ་མའི་ལས་བསྡོམས་འདྲ་བོ་ཞིག་ཚོགས་དྲུང་ལས་ཁུངས་སུ་འབྱོར་ཚར་ཡོད་པ་རེད། འོན་ཀྱང་། ཐེངས་འདིའི་གྲོས་ཚོགས་ཐོག་བཀའ་ཤག་གི་ལས་བསྡོམས་སྙན་སྒྲོན་ཞུ་བའི་འཆར་གཞི་ད་ལྟའི་ཆར་མེད་པ་དང་། སྤྱི་འཐུས་རྒྱུན་ལས་དང་མང་ཚོགས་རྩིས་ཁྲའི་ཚོགས་ཆུང་ནས་བཀའ་ཤག་གི་ལས་བསྡོམས་ལ་ཞིབ་འཇུག་གནང་དགོས་ལ། ཐེངས་འདིའི་གྲོས་ཚོགས་ཐོག་མང་ཚོགས་རྩིས་ཁྲའི་ཚོགས་ཆུང་སྐབས་ ༨ པ་འཛུགས་པའི་དགོངས་གཞི་ཡོད་སྐོར་བརྗོད་བྱུང་།
མཇུག་ཏུ་གསར་འགོད་པས་ཚོགས་དུས་འདིའི་ཐོག་ཕྱི་དྲིལ་བཀའ་བློན་འོས་འདེམས་གནང་བའི་ལས་རིམ་ཡོད་མེད་བཀའ་འདྲི་ཞུས་པར། ད་ལྟ་གྲོས་ཚོགས་ཀྱི་ལས་རིམ་རྣམས་རགས་ཟིན་འགྲོ་བཞིན་ཡོད་པས་མ་འོངས་པར་རྒྱས་པ་ཡོང་རྒྱུ་ཡིན་ལ། འཛིན་སྐྱོང་ནས་ཚོགས་དྲུང་ལས་ཁུངས་ལ་བཀའ་བློན་འོས་འདེམས་གནང་རྒྱུའི་ལས་རིམ་ཡོད་མེད་སྐོར་ད་ལྟའི་ཆར་གང་ཡང་གསུང་མེད་སྐོར་བརྗོད་བྱུང་།
གསར་འགོད་པ། པདྨ་མཚོ།
ད་བསྟན་སྲུང་དམར་ནག་གཉིས་དཔང་ལ་བཙུགས་ནས་མང་ཚོགས་ལ་འཐོམ་ཞྭ་གཡོག་མཁན་ཚོས་ཡང་བསྐྱར་གྲོས་ཚོགས་ནང་ཟློས་གར་ག་རེ་འཁྲབ་རྩིས་ཡོད་མེད་མགྱོགས་པོར་མཐོང་ཡོང་གི་རེད།
༅༅།་གྲོས་ཚོགས་མགྱོགས་པོ་འཚོགས་གནང་རྒྱ་རེད་ཤག་ ཐུགས་རྗེ་གཟིགས་་་ད་ཡག་པོ་ཐུགས་ལ་བཞག་རོགས
སྔོན་མ་ནང་བཞིན་སྲིད་སྤྱི་ཁྲིམས་ཞིབ་ནས་ཞབས་འདྲེན་མ་བཞག་རོགས་གནང།
ཕྲན་བུ་ཐུགས་སྣང་གནང་དགོས་། མང་ཚོགས་ལ་ངོ་ཡང་ཚ་།
ཁྲིམས་སྒྲིག་ལས་མ་བརྒལ་བ་ངེས་པར་ཟབ་དགོས།
སྲིད་སྐྱོང་ནས་སླར་ཡང་ཟླ་སྒྲོན་ལགས་སྤྱི་འཐུས་ནས་མནའ་མ་གོ་ལོག་པ་དེ་བསུ་འཆར་ཡོད་ངེས་རེད།
ད་དངོས་གནས་སྤྱི་འཐུས་ནས་ཐུགས་སེམས་ཡག་པོ་བཞེས་དགོས། སྒྲིག་གཞི་ལས་མ་བརྒལ་བ་ངེས་པར་གནང་
དགོས་པ་ཡིན། དང་པོ་སྲིད་སྤྱི་གཉིས་ནས་བསྟན་པ་དང་པོ་དེ་བཤིགས། བསྟན་པ་གཉིས་པ་དེ་སྲིད་སྤྱི་ཁྲིམས་ཞིབ་
བཤིགས་། ད་བསྟན་པ་གསུམ་པ་དེ་མ་བཤིགས་རོགས་གནང། ༧གོང་ས་མཆོག་གི་སྙན་ལ་གསན་ན་གང་འདྲ་
ཡོང་ས་རེད།
བོད་ཀྱི་དུས་བབ་ནས་སྔོན་བཞིན་སྒྲིག་གཞིའི་ནང་གསལ་བཞིན་ལག་བསྟར་བྱེད་ཀྱི་ཡོད་མེད་ངེས་པར་གཟིགས་་རོགས་
སྒུག་ནས་བསྡད་ཀྱི་ཡིན། བཀྲིས་བདེ་ལེགས་ཡོད།