དེ་རིང་འཛམ་གླིང་ཕྱི་བཅོས་གསོ་ཐབས་ཉིན་མོ་དང་བསྟུན་ཏེ། གངས་སྐྱིད་བདེ་ལེགས་སྨན་ཁང་གི་ཉེ་འཁྲིས་སུ་ཡོད་པའི‘བོད་མིའི་ལུས་ཁམས་གསོ་བཅོས་ཁང’གིས་ཉིན་གཅིག་རིང་ལུས་ཕུང་གི་ཤ་གནད་དང་རྩ་རྒྱུས། རུས་ཚིགས་སོགས་ན་མཁན་དང་། གློ་བའི་སྙུང་གཞི་ཕོག་པའི་ནད་པ་བཅས་ལ་རིན་མེད་ཐོག་སྨན་བཅོས་བྱེད་བཞིན་ཡོད་འདུག
བོད་མིའི་ལུས་ཁམས་གསོ་བཅོས་ཁང་གི་སྨན་པ་བསྟན་འཛིན་འཇིགས་མེད་ལགས་ཀྱིས་བརྗོད་དོན། དེ་རིང་ནི་འཛམ་གླིང་ཕྱི་བཅོས་གསོ་ཐབས་ཉིན་མོ་ཡིན་སྟབས། བོད་མིའི་ལུས་ཁམས་གསོ་བཅོས་ཁང་གིས་ཉིན་གཅིག་རིང་རིན་མེད་ཐོག་བསྐུ་མཉེ་དང་སྦྱོར་རྫས་ (kinesio tape)། སྐམ་ཁབ་དང་གློག་བཀོལ་གསོ་ཐབས་ (electrotherapy) བཅས་ལ་བརྟེན་ནས་དྷ་ས་ཁུལ་དུ་གཟུགས་པོའི་རྩ་རྒྱུས་དང་ཤ་གནད། སྒལ་ཚིགས་དང་པུས་ཚིགས། སྐེ་ཚིགས་དང་ལག་ཚིགས་སོགས་རུས་ཚིགས་ཁག་ན་མཁན་དང་། ལྷག་པར་དུ་བདེ་ལེགས་སྨན་ཁང་དུ་སྡོད་པའི་གློ་བའི་སྙུང་གཞི་ཕོག་མཁན་ཚོའི་གཟུགས་ཁམས་གསོ་བཅོས་བྱེད་ཀྱི་ཡོད་པ་དང་། སྤྱིར་གཟུགས་པོའི་རྩ་རྒྱུས་དང་རུས་ཚིགས། ཤ་གནད་སོགས་ན་མཁན་མང་ཆེ་བ་ལོ་ལོན་རྒན་རྒོན་དང་ལས་ཁུངས་ཀྱི་རྐུབ་སྟེགས་སྟེང་ལས་ཀ་བྱེད་མཁན། དེ་བཞིན། རྩེད་མོ་རྩེ་མཁན་དང་ལུས་པོ་རྒྱག་པ་ཆགས་ཡོད་མཁན། ལྷག་པར་དུ་གློ་བའི་སྙུང་གཞི་ཕོག་མཁན་ཚོར་འབྱུང་གི་ཡོད་པ་དང་། ང་ཚོའི་སྤྱི་ཚོགས་ནང་ད་དུང་སྒལ་ཚིགས་དང་སྐེ་ཚིགས། དཔུང་རུས་དང་བཞིན་རས་སོགས་ཡོན་པ་དང་སྒུར་བ་བཅས་ཀྱི་དཀའ་ངལ་ཡོང་གི་ཡོད་སྟབས། ལུས་ཁམས་གསོ་བཅོས་ཁང་གིས་དམིགས་བསལ་དཀའ་ངལ་དེའི་རིགས་གསོ་བཅོས་གནང་གི་ཡོད་སྐོར་བརྗོད་སོང་།
ཁོང་གིས་བོད་མིའི་ལུས་ཁམས་བཅོས་ཁང་གི་ལས་གཞིའི་སྐོར་ལ། སྤྱིར་བཏང་ལུས་ཁམས་གསོ་བཅོས་སྨན་ཁང་དེ་འདྲ་ཞིག་སྒོ་ཕྱེས་པར། གསོ་དཔྱད་སྐོར་ལ་སློབ་སྦྱོང་བྱས་པ་ཙམ་གྱིས་མི་ཆོག་པར། ལག་ལེན་དང་ཉམས་མྱོང་གསོག་རྒྱུ་གལ་ཆེན་པོ་ཡིན་པ་དང་། ཉམ་ཐག་ནད་པ་མང་པོས་སྨན་ཁང་ལ་སྐྱབས་བཅོལ་ཡོད་སྟབས། སྨན་ཁང་གིས་ཉམ་ཐག་ནད་པའི་དཀའ་སྡུག་སེལ་དགོས་རྒྱུ་ཡོད་པ་དང་། བོད་མི་མང་པོ་ཞིག་གིས་ང་ཚོའི་སྤྱི་ཚོགས་ནང་སྨན་བཅོས་ལྟ་སྐྱོང་གི་ཞབས་ཞུ་སྒྲུབ་འདོད་ཡོད་ནའང་། མཐུན་རྐྱེན་དང་རྒྱུ་རྐྱེན་དུ་མའི་དབང་གིས། ཁོང་ཚོས་ཞབས་ཞུ་སྒྲུབ་ཐུབ་ཀྱི་མེད་པ་དང་། བོད་མིའི་ལུས་ཁམས་གསོ་བཅོས་ཁང་གིས་ཉིན་རེའི་ཞོགས་པའི་ཆུ་ཚོད་ ༡༠ ནས་ཕྱི་དྲོའི་ཆུ་ཚོད་ ༥ བར་མཐུན་འགྱུར་རོགས་རམ་མ་རག་པའི་ཉམ་ཐག་ནད་པ་ཚོའི་ལུས་ཁམས་གསོ་བཅོས་ཀྱི་ཞབས་ཞུ་སྒྲུབ་བཞིན་པ་དེ་སོ་སོའི་སྐལ་བ་བཟང་པོ་ཞིག་ཏུ་ངོས་འཛིན་བྱེད་ཀྱི་ཡོད་པ་དང་། གངས་སྐྱིད་བདེ་ལེགས་སྨན་ཁང་དུ་གཙོ་བོ་གཟུགས་པོའི་ནང་ལོགས་ཀྱི་ནད་རིགས་གསོ་བཅོས་བྱེད་ཀྱི་ཡོད་པ་དང་། ལུས་ཁམས་གསོ་བཅོས་ཁང་གིས་གཟུགས་པོའི་ཕྱི་ལོགས་ཀྱི་སྙུང་གཞི་གསོ་བཅོས་བྱེད་ཀྱི་ཡོད་སྟབས། བདེ་ལེགས་སྨན་ཁང་གིས་གཟུགས་པོའི་རྩ་རྒྱུས་དང་ཤ་གནད། རུས་ཚིགས་ན་མཁན་ཚོ་ལུས་ཁམས་གསོ་བཅོས་ཁང་དུ་གཏོང་གི་ཡོད་སྐོར་སོགས་བརྗོད་སོང་།
མཇུག་ཏུ་ཁོང་གིས། བོད་མི་ཚོས་ནད་ཚ་ཆུང་ཆུང་རིགས་སྣང་མེད་དུ་མི་གཏོང་བར་དུས་ཐོག་སྨན་བཅོས་བྱས་ན། དེ་ལ་གསོ་ཐབས་ཡོད་པ་དང་། སོ་སོའི་ལུས་ཁམས་གསོ་བཅོས་ཐུབ་པ་བྱུང་ན། ལུས་ཁམས་བདེ་ཐང་ཡིན་པའི་མི་གཞན་པ་ནང་བཞིན། ཁོ་ཚོར་ཡང་འགྲོ་འདུག་གི་དཀའ་ངལ་མེད་པར་ལས་ཀར་ཞུགས་ཐུབ་པ་དང་། དེ་ལྟར་བྱུང་ན་ནི་མི་ཚེས་སྐྱིད་པོ་ཡོང་གི་ཡོད་སྐོར་བརྗོད་བྱུང་།
བོད་མིའི་ལུས་ཁམས་གསོ་བཅོས་ཁང་ནི་ཕྱི་ལོ་ ༢༠༡༣ ལོར་གཟུགས་ཁམས་གསོ་དཔྱད་སྨན་པ་བསྟན་འཛིན་འཇིགས་མེད་ལགས་དང་སྨན་པ་པན་ཆེན་བཟང་པོ་ལགས་རྣམ་གཉིས་སྒེར་ཐོག་ནས་བཙུགས་པ་ཞིག་ཡིན་ཞིང་། སྨན་ཁང་དེས་བསྐུ་མཉེ་དང་སྦྱོར་རྫས་ (kinesio tape)། སྐམ་ཁབ་དང་གློག་བཀོལ་གསོ་ཐབས་ (electrotherapy) སོགས་ལ་བརྟེན་ནས་བཙན་བྱོལ་བོད་མིའི་སྤྱི་ཚོགས་ཁྲོད་གཟུགས་པོའི་རྩ་རྒྱུས་དང་རུས་ཚིགས། ཤ་གནད་སོགས་ན་མཁན་དང་། ལྷག་པར་དུ་གློ་བའི་སྙུང་གཞི་ཕོག་མཁན་ཚོའི་གཟུགས་ཁམས་གསོ་བཅོས་བྱེད་བཞིན་ཡོད་འདུག
གསར་འགོད་པ། པདྨ་རྒྱལ།
