ཁ་ཆེ་བའི་དམར་མཆོད་དུས་ཆེན་ཉིན་སྒོ་ཕྱུགས་སེམས་ཅན་འབུམ་གཅིག་ལྷག་དམར་མཆོད་བྱས་ཏེ་བྷིང་ལ་ཌེ་ཤིའི་རྒྱལ་སའི་སྲང་ལམ་དང་སྤྱི་གླིང་གང་སར་ཟུངས་ཁྲག་གིས་ཁེངས་ཡོད་འདུག
འདས་པའི་ཉིན་ཤས་རིང་བྷིང་ལ་ཌེ་ཤིའི་རྒྱལ་ས་ཌ་ཀ་ (Dhaka)ཞེས་པའི་གྲོང་ཁྱེར་ནང་ཁ་ཆེ་ཆོས་ལུགས་ཀྱི་དམར་མཆོད་དུས་ཆེན་ (Eid al-Adha) ཉིན་ར་ལུག་དང་བ་གླང་། མ་ཧེ་དང་རྔ་མོང་སོགས་ཁྱོན་སྒོ་ཕྱུགས་སེམས་ཅན་ ༡༠༠༠༠༠ ལྷག་དམར་མཆོད་བྱས་ཏེ་གྲོང་ཁྱེར་གྱི་སྲིང་ལམ་དང་སྤྱི་གླིང་ཁག་ཆར་ཆུར་འདྲེས་པའི་ཟུངས་ཁྲག་གིས་ཁེངས་པ་དང་། ཡུལ་མི་དང་ཕྱོགས་ཡོང་འགྲུལ་བ་མང་པོ་ཆར་ཆུར་འདྲེས་པའི་སེམས་ཅན་གྱི་ཟུངས་ཁྲག་ནང་འགྲོ་འདུག་བྱེད་དགོས་ཆགས་ཡོད་འདུག
རྒྱལ་སྤྱིའི་སེམས་ཅན་སྲུང་སྐྱོབ་ཚོགས་སྡེ་ཁག་གིས་བརྒྱུད་ལམ་ཁག་ཏུ་ཌ་ཀ་གྲོང་ཁྱེར་ནང་སེམས་ཅན་མང་པོ་དམར་མཆོད་ཀྱི་ཟུངས་ཁྲག་གིས་ཁེངས་པའི་འདྲ་པར་དང་བརྙན་ཐུང་མང་པོ་བརྒྱུད་བསྐུར་བྱས་ཏེ་གནས་ཚུལ་དེ་གླེང་སློང་ཤུགས་ཆེན་བྱེད་བཞིན་ཡོད་ནའང་། བྷང་གྷ་ལའི་ཁ་ཆེ་མི་མང་གིས་དེ་ནི་ཁོ་ཚོའི་ཆོས་ལུགས་རིག་གནས་ཀྱི་དུས་ཆེན་ཁྱད་པར་བ་ཞིག་ཏུ་ངོས་འཛིན་གྱི་ཡོད་འདུག
ཁ་ཆེ་བའི་དམར་མཆོད་དུས་ཆེན་དེ་ནི་ལོ་རེའི་ཕྱི་ཟླ་ ༩ ཚེས་ ༡༠ ཉིན་གྱི་ཐོ་རངས་ནས་ཚེས་ ༡༡ ཉིན་གྱི་ས་དགོང་མོའི་བར་སྲུང་གཙི་བྱེད་སྲོལ་ཡོད་པ་དང་། དེ་ནི་ཁ་ཆེ་ཆོས་ལུགས་ལ་དུས་ཆེན་རྩ་ཆེ་ཤོས་གཉིས་ཡོད་པ་ལས་གཅིག་ཡི་པ་དང་། ཉིན་མོ་དེར་སྔོན་ཆད་ཁ་ཆེ་བའི་སྟོན་པ་ཨེ་བྷ་ར་ཧམ་ (Ibrahim) ཟེར་བ་ཞིག་གིས་རང་ཉིད་ཀྱི་བུ་ཨེ་ཤཱ་མཱལ་ (Ishmael) ལགས་ཁ་ཆེ་དཀོན་མཆོག་ (Allah) ལ་དམར་མཆོད་བྱེད་སྐབས། དཀོན་མཆོག་གིས་སྙིང་རྗེ་གཟིགས་ཏེ་བྱིས་པ་དེ་སྲོག་ཐར་བཏང་བར་བརྟེན་ནས། ཁ་ཆེ་དད་ལྡན་མི་མང་གིས་དཀོན་མཆོག་གི་བཀའ་དྲིན་རྗེས་དྲན་མཚོན་ཆེད་སྒོ་ཕྱུགས་མང་པོ་དམར་མཆོད་བྱེད་པ་ཞིག་ཡིན་འདུག
ཕྱོགས་གཞན་ཞིག་ནས། ཁ་ཆེ་བས་ཉིན་མོ་དེར་སེམས་ཅན་མང་པོ་དམར་མཆོད་བྱེད་པ་ནི་ཁ་ཆེ་བའི་ཆོས་ལུགས་རིག་གནས་རྒྱུན་འཛིན་ཡོང་ཆེད་དང་། འཚོ་བའི་ཐད་ནས་སྒོ་ཕྱུགས་འཚོང་མཁན་ཚོར་དངུལ་ལོར་དང་ཉམས་ཐག་དབུལ་བོ་ཚོར་ཤ་སྦྱིན་རག་པའི་དགེ་ཕན་ཆེན་པོ་ཞིག་ཏུའང་ངོས་འཛིན་སྲོལ་ཡོད་འདུག
གསར་འགོད་པ། པདྨ་རྒྱལ།
ད་དཀོན་མཆོག་མཁྱེན། སེམས་ཅན་ལས་ངན་འདི་ཚོ། ཆོས་ལུགས་འདི་ནི་ཅི་མ་རུང་། ངོས་ནང་པ་སངས་རྒྱས་པའི་ཆོས་ལུགས་ནང་དམར་མཆོད་ཕྲན་བུ་ཡོད་པ་དེ་དག་རྩ་བརླག་ཏུ་བཏང་ཐུབ་པ་བསམས་ཀྱི་མི་ཁྱབ་པས་ལས་འགན་ཆེན་པོ་ཞིག་ཏུ་འགྱུར་ཐུབ་ཡོད།