དེ་རིང་གྲོས་ཚོགས་ནང་བོད་རྒྱ་ཞི་མོལ་གྱི་ལམ་ནས་བོད་དོན་བདེན་མཐའ་གསལ་ཐུབ་པར་ཡིད་ཆེས་དང་གདེང་ཚོད་ཡོད་མེད་བཀའ་འདྲི་ཞུས་པར་སྲིད་སྐྱོང་མཆོག་ནས་སྔར་བཞིན་རེ་བ་གནང་གི་ཡོད་པ་མ་ཟད། རེ་བ་གསར་པའང་གནང་གི་ཡོད་སྐོར་གསུངས་སོང་།
དེ་རིང་སྐབས་བཅུ་དྲུ་པའི་གྲོས་ཚོགས་ཚོགས་དུས་གཉིས་པའི་ལས་ཉིན་གཉིས་པའི་སྔ་དྲོར། བོད་རྒྱ་ཞི་མོལ་གྱི་ལམ་ནས་དུས་ཡུན་རིང་པོ་མ་འགོར་བར་བོད་དོན་བདེན་མཐའ་གསལ་ཐུབ་པར་ཡིད་ཆེས་དང་གདེང་ཚོད་ཡོད་མེད་དང་། ༧གོང་ས་མཆོག་བོད་ལ་གདན་འདྲེན་ཞུ་རྒྱུའི་འབད་བརྩོན་གནང་རྒྱུ་ཡིན་སྐོར་གསུངས་བ་དེ་གནས་གཟིགས་ཙམ་ལ་གོ་བ་ཡིན་ནམ། ཡང་ན་བོད་དོན་བདེན་མཐའ་གསལ་ནས་བོད་ལ་གདན་འདྲེན་ཞུ་རྒྱུ་ཡིན་པར་གོ་དགོས་པ་ཡིན་དང་། ད་ལྟ་གནད་དོན་དེ་འགྲུབ་པར་རེ་བ་ཅུང་ཙམ་རེ་གཟིགས་ཀྱི་ཡོད་མེད་སྐར་རྟགས་ཅན་གྱི་དྲི་བ་ཕུལ་བར་སྲིད་སྐྱོང་བློ་བཟང་སེང་གེ་མཆོག་གིས། སྔ་ཕྱིར་ཞུས་པ་བཞིན་རང་ཕྱོགས་ནས་གྲ་སྒྲིག་ཡོད་ལ་རེ་བའང་བྱེད་ཀྱི་ཡོད་ཀྱང་། དེ་ལྟར་ཡོང་བར་རྒྱ་ནག་གཞུང་གི་མགོ་འཁྲིད་ཚོའི་ཆོད་སེམས་ལ་རག་ལུས་ཡོད་སྐོར་དང་། བོད་དོན་བདེན་མཐའ་གསལ་ནས་༧གོང་ས་མཆོག་བོད་དུ་ཕྱིར་ཕེབས་གནང་རྒྱུ་གཞིས་བྱེས་བོད་མི་ཡོངས་ཀྱི་མངོན་འདོད་ཡིན་ལ། བོད་མིའི་སྒྲིག་འཛུགས་ཀྱི་ལས་འགན་ཡང་ཡིན་པ་དང་། རྒྱ་ནག་ནང་གནས་གཟིགས་སུ་ཕེབས་འདུན་ཡོད་སྐོར་༧གོང་ས་མཆོག་ནས་སྔ་ཕྱིར་བཀའ་གནང་ཡོད་པ་ལྟར་དེ་དག་ལའང་རེ་བ་བྱེད་ཀྱི་ཡོད་སྐོར་གསུངས་སོང་།
འཕྲོས་དོན་དྲི་བ་དྲིས་ལན་སྐབས། སྤྱི་འཐུས་ཤིག་ནས་སྲིད་སྐྱོང་མཆོག་གི་བཀའ་ལན་ནང་རེ་བ་ཡོད་སྐོར་གསུངས་ཡོད་པ་དང་། རེ་བ་གསར་པ་དེར་བདེན་ལུགས་ཡོད་མེད་དང་། རེ་བ་དེ་རྒྱ་ནག་ལ་རག་ལུས་པའི་རེ་བ་ཞིག་ཡིན་ནམ། ཡང་ན་ང་རང་ཚོར་ཡོད་པའི་རེ་བ་གསར་པ་ཞིག་ཡིན་མིན་དང་། དེ་བཞིན་༧གོང་ས་མཆོག་བོད་ལ་གདན་འདྲེན་ཞུ་ཐབས་སུ་འབད་བརྩོན་ག་རེ་གནང་དགོས་ཀྱི་ཡོད་པ་དང་། བོད་རྒྱ་འབྲེལ་གྱི་སྐུ་ཚབ་དེ་རྒྱལ་བ་རིན་པོ་ཆེའི་སྐུ་ཚབ་ཀྱི་མཚན་ཐོག་ནས་རེ་བ་རྒྱག་གི་ཡོད་དམ། ཡང་ན་བོད་མིའི་སྒྲིག་འཛུགས་ཀྱི་སྐུ་ཚབ་ཀྱི་མཚན་ཐོག་ནས་རྒྱ་ནག་གཞུང་ལ་སྐད་ཆ་བཤད་པའི་གྲ་སྒྲིག་ཨང་གསར་བྱེད་ཀྱི་ཡོད་མེད་སྐོར་དོགས་འདྲི་ཞུས་པར་སྲིད་སྐྱོང་མཆོག་གིས།
བཀའ་ཤག་སྐབས་ ༡༤ དང་ ༡༥ སྐབས་སུ་ཞུས་པ་དེ་ག་རང་ཡིན། རེ་བ་ཡོད་ཅེས་ཞུས་ཡོད་པ་ནང་བཞིན་ད་ལན་ཡང་རེ་བ་ཡོད་ཅེས་ལན་རྒྱག་རྒྱུ་མ་གཏོགས་ཐ་སྙད་གཞན་བེད་སྤྱོད་གཏོང་དགོས་མི་འདུག ངས་རེ་བ་གསར་བ་གཉིས་རང་བཏོན་པ་ཡིན་ལ། གཞི་རྩའི་ང་ཚོ་འདིར་གྲོས་ཚོགས་ར་བར་བཞུགས་མཁན་སུ་ཡིན་ནའང་། རེ་བ་དེའི་ཐོག་ལ་འབད་བརྩོན་བྱས་ནས་རེ་བ་དེ་འགྲུབ་དགོས་ཀྱི་འདུག་བསམ་པའི་ཐོག་ནས། སོ་སོའི་ནུས་སྟོབས་དང་བསམ་ཚུལ་གཞིར་བཟུང་གིས་འབད་བརྩོན་བྱེད་སྡོད་ཀྱི་ཡོད་ལ། ང་ཚོས་རེ་བ་གསར་བའང་བྱེད་ཀྱི་ཡོད་པ་དང་། ༧གོང་ས་མཆོག་བོད་ལ་གདན་འདྲེན་ཞུ་རྒྱུའི་སྐོར་སྐབས་དེར་ཞུས་པ་ཡིན་ལ། དེ་ཞུ་དགོས་དོན་ཚང་མས་དེ་ལ་མོས་མཐུན་གནང་གི་ཡོད་པ་དང་། དེ་ཁ་སང་རང་ལ་གདུང་སེམས་མཉམ་སྐྱེད་ཀྱི་གྲོས་ཆོད་གྲོས་འཆར་ནང་གསལ་པོ་ཞེ་དྲགས་ཡིན་པ་ལྟར། ༧གོང་ས་མཆོག་བོད་ལ་གདན་འདྲེན་ཞུ་དགོས་ཀྱི་འདུག་ཟེར་བ་དེ་བོད་ནང་གི་བོད་མི་ཚོའི་མངོན་འདོད་རེད། དེ་བོད་ནང་གི་བོད་མི་ཚོའི་མངོན་འདོད་ཡིན་པ་ངོས་ཟིན་པའི་ཐོག་ནས། མངོན་འདོད་དེ་འོས་བསྡུའི་སྔོན་ལ་ཞུས་ཡིན་ལ། འོས་བསྡུའི་སྐབས་ལ་ཞུས་ཡིན། ད་ལྟའང་ཞུ་ཡི་ཡོད། དེ་ང་ཚོའི་འགན་རེད། དེ་ཡང་གོམ་པ་ཆུང་ས་ནས་གོམ་པ་ཆེ་སར་སྤོ་བའི་འཆར་གཞི་ཡོད་པ་ལྟར། ད་ཆར་གོམ་པ་ཆུང་ས་ནས་ཏན་ཏན་སྤོས་ཡོད་ལ། གོམ་པ་ག་རེ་ག་རེ་སྤོས་ཡོད་ཟེར་བ་དེ་ཞིབ་ཕྲ་ཞུ་རྒྱུ་མེད་པ་དང་། གལ་ཏེ་ཞིབ་ཕྲ་ཞུས་པ་ཡིན་ན། དེས་ཕན་པ་ལས་གནོད་པ་ཆེར་ཡོང་གི་ཡོད་སྟབས། ཚང་མས་མཁྱེན་གསལ་ལྟར། བོད་རྒྱ་ཞུ་མོལ་གྱི་འགྲོ་སྟངས་དེ་ག་རང་ཡིན་པ་དང་། དེའི་ཐོག་ལ་༧གོང་ས་མཆོག་ནས་ཕྱི་ལོ་ ༢༠༠༦ ལོའི་སུམ་བཅུའི་དུས་དྲན་སྲུང་གཙིའི་སྐབས་དང་། ཕྱི་ལོ་ ༢༠༡༢ ལོར་ཡང་གསུངས་ཡོད་པ་དང་། དེ་༧གོང་ས་མཆོག་ཕྱི་ལོ་ ༡༩༥༤ ནས་ ༡༩༥༥ ལོར་རྒྱ་ནག་རི་བོ་རྩེ་ལྔར་ཕེབས་མ་ཐུབ་པ་དང་། ཁོང་དེ་སྔ་ནས་རྒྱ་ནག་ནང་གནས་གཟིགས་སུ་ཕེབས་རྒྱུ་ཐུགས་སུ་ཡོད་སྐོར་གསུངས་ཡོད་པ་རེད། གནས་ཚུལ་དེ་ཕྱི་གསལ་གནང་གསལ་རེད་མ་གཏོགས། ཉེ་ཆར་ང་ཚོ་བཀའ་ཤག་གིས་བཏོན་པའི་ཐབས་ཇུས་གང་ཡང་མ་རེད། དེ་ཡང་ཆབ་སྲིད་ཀྱི་ཐབས་ཇུས་ཟེར་ན་འདྲ། གང་སྔོན་དང་གང་རྗེས་ལ་བྱ་དགོས་པ། དེ་ལ་ཁེ་ཕན་ག་རེ་ཡོང་གི་འདུག་མི་འདུག དེའི་ཐོག་ཞིབ་ཕྲར་བགྲོ་གླེང་ལྷུག་པོ་གནང་དགོས་ཀྱི་ཡོད་པ་དང་། དེ་ལ་འཆར་གཞི་བཟོས་ནས་འགྲོ་རྒྱུ་མ་གཏོགས། ད་ལྟ་ནས་དེ་ཡོང་གི་རེད་དང་མ་རེད། དེ་སྲིད་དང་མི་སྲིད་ཟེར་རྒྱུ་སྔ་དྲགས་པ་རེད་བསམ་གྱི་འདུག བོད་མིའི་སྒྲིག་འཛུགས་ཀྱི་སྐུ་ཚབ་གཏོང་ཐབས་མེད་པ་གསལ་བོ་ཡིན་སྟབས། དེ་སྔ་༧གོང་ས་མཆོག་གི་སྐུ་ཚབ་དང་རྒྱ་ནག་གཞུང་གི་སྐུ་ཚབ་བར་བཀའ་མོལ་གནང་བ་ལྟར། མ་འོངས་པར་ཡིན་ནའང་༧གོང་ས་མཆོག་གི་སྐུ་ཚབ་དང་རྒྱ་ནག་གཞུང་གི་སྐུ་ཚབ་བར་བཀའ་མོལ་ཡོང་རྒྱུ་ཡིན་པ་ལྟར། ང་ཚོས་དེའི་ཐོག་འབད་བརྩོན་གནང་གི་ཡོད་ལ། བོད་མིའི་སྒྲིག་འཛུགས་ཀྱི་འགན་གཙོ་བོ་གྲོས་གཞིའི་ཐོག་འབད་བརྩོན་བྱེད་རྒྱུ་དང་། རྒྱ་གར་ནང་ལ་ཡིན་ནའང་བོད་དོན་གོ་རྟོགས་སྤེལ་རྒྱུ། གནད་ཡོད་མི་སྣར་མཇལ་འཕྲད་སྐབས་སུ་བོད་དོན་ཞུ་གཏུག་བྱེད་རྒྱུ་བཅས་ཡིན་དང་། སྐུ་ཚབ་རྣམ་པའི་སྐབས་སུའང་དེ་སྔའི་བཀའ་ཤག་གིས་འགན་ཁུར་ཡོད་པ་རེད་ལ། མ་འོངས་པའི་བཀའ་ཤག་ཡིན་ནའང་འགན་འཁུར་དགོས་པ་ཞིག་ཆགས་ཀྱི་ཡོད་པ་རེད། ཅེས་གསུངས་སོང་།
གསར་འགོད་པ། པདྨ་རྒྱལ།
གྲོས་ཚོགས་ནང་དུ་རྐང་རྩེད་སྤོ་ལོ་ཕར་གཡུག་ཚར་གཡུག་བྱས་དང་བྱེད་བཞིན་ཡོད་འདུག
ཉེ་ལམ་ཨ་རིར་བཞུགས་པའི་ཤེས་ཡོན་ཅན་བཅུ་གྲངས་ཅིག་རྒྱ་ནག་དབུས་འཐབ་ཕྱོགས་གཅིག་གྱུར་ཁང་གི་མཐུན་འགྱུར་འོག་བོད་ནང་དུ་གཟིགས་སྐོར་བྱས་པ་དང་ཁོང་རྣམ་པའི་གཟིགས་སྐོར་དེ་དབུས་བོད་མིའི་སྒྲིག་འཛུགས་ཀྱིས་ལམ་སྟོན་གནང་ཡོད་མེད་སྐོར་ད་ཐེངས་གྲོས་ཚོགས་ནང་ཁ་གསལ་ཡོང་བའི་རེ་བ་ཡོད།
ཁ་བཤད་ལག་ལེན་མ་མཚུངས་པར་གྲོས་ཚོགས་ར་བའི་ནང་ན་ཡང་བསྐྱར་དགུ་བསྐྱར་གྱི་དྲི་བ་ཅི་ཙམ་དྲིས་ཀྱང་ལན་གསལ་ཁ་མེད་པ་གཅིག་རང་ལས་གཞན་ཅི་ཡང་འདེབས་རྒྱུ་མི་འདུག
བོད་རྒྱ་གྲོས་མོལ་སྐོར་ལ་ག་རེ་གསུངས་སོང་། ངས་གཅིག་ཀྱང་གོ་མ་སོང་།