ཕྱི་དྲིལ་དྲུང་ཆེ་དྭགས་
ཟླ་འདིའི་ཕྱི་ཚེས་ ༣ ཉིན་ནས་བཟུང་ཕྱི་དྲིལ་དྲུང་ཆེ་དྭགས་པོ་བསོད་ནམས་ནོར་བུ་ལགས་ནས་བོད་མིའི་སྒྲིག་འཛུགས་ཀྱི་མགྲིན་ཚབ་པའི་ལས་འཁུར་ཞུ་དགོས་པའི་བཀོད་ཁྱབ་གནང་བ་ལྟར་ཕྱག་ལས་དབུ་འཛུགས་གནང་ཡོད་པ་དང་། དྭགས་པོ་བསོད་ནམས་ནོར་བུ་ལགས་ཕྱི་ལོ་ ༡༩༨༨ ལོར་ལྡི་ལོ་སྐུ་ཚབ་དོན་གཅོད་ཀྱི་ཆབ་སྲིད་སྡེ་ཚན་གྱི་རྒན་དྲུང་དུ་ཐོག་མར་བསྐོ་བཞག་གནང་ཡོད་པ་དང་། ཕྱི་ལོ་ ༡༩༩༠ ལོར་གནས་རིམ་སྤར་ཏེ་བཀའ་དྲུང་ཡིག་ཚང་གི་དྲུང་གཞོན་དང་ཟུང་དྲུང་གི་ཕྱག་ལས་གནང་། ཕྱི་ལོ་ ༡༩༩༣ ལོར་ཨ་རིར་གཞུང་འབྲེལ་སློབ་སྦྱོང་དུ་ཕེབས།
ཕྱི་ལོ་ ༡༩༩༤ ལོར་ཕྱི་དྲིལ་ལས་ཁུངས་ཀྱི་རྒྱ་གར་དང་ཕྱི་སྡོད་རྒྱ་རིགས་འབྲེལ་མཐུད་འགན་འཛིན་དུ་བསྐོས་ཡོད་པ་དང་། ཕྱི་ལོ་ ༡༩༩༨ ལོར་ལྡི་ལི་སྐུ་ཚབ་དོན་གཅོད་ཀྱི་དྲུང་ཆེ་དང་། ཕྱི་ལོ་ ༡༩༩༩ ལོ་ནས་ ༢༠༠༤ བར་ཕྱི་དྲིལ་ལས་ཁུངས་ཀྱི་དྲུང་འཕར་དང་དྲུང་ཆེའི་ཕྱག་ལས་གནང་། ཕྱི་ལོ་༢༠༠༩ ལོར་ཨོ་སི་ཊོ་ལི་ཡའི་སྐུ་ཚབ་དོན་གཅོད་དུ་བསྐོས་བ་དང་། ཕྱི་ལོ་ ༢༠༡༤ ལོ་ནས་བཟུང་ཕྱི་འབྲེལ་དྲུང་ཆེ་ཡི་ཕྱག་ལས་གནང་ཡོད་པ་བཅས། བོད་མིའི་སྒྲིག་འཛུགས་ནང་ལོ་ངོ་ ༢༥ ཙམ་གྱི་རིང་ཕྱག་ལས་གནང་ཡོད་པ་དང་། དེ་སྔོན་བོད་རྒྱ་ཞི་མོལ་ཆེད་སྐུ་ཚབ་ཚོགས་ཆུང་གི་ཚོགས་མི་གནང་སྟེ་རྒྱ་ནག་ཏུའང་ཕེབས་མྱོང་ཡོད་འདུག
པདྨ་མཚོས་བོད་མིའི་སྒྲིག་འཛུགས་ཀྱི་དྲ་བ་ནས་བཏུས།
