ལྕམ་ཧེ་ལ་རེ་ཡིས་ཨ་རིའི་གསར་འགྱུར་བརྒྱུད་ལམ་ཁག་ལ་ལྐོག་རྔན་སྤྲད་དེ་སྐུ་ཞབས་ཊི་རུམ་ཕི་ལ་ངོ་རྒོལ་དང་སྐྱོན་བརྗོད་བྱེད་དུ་བཅུག་པ་དང་། འོས་བསྡུའི་གསང་བ་ཕྱིར་བསྒྲགས་བྱས་ཏེ་འོས་བསྡུ་འཕྲོ་བརླག་ལ་བཏང་སོང་ཟེར།
དེ་རིང་ཧྥ་རན་སིའི་གསར་ཁང་ (AFP) གིས་གནས་ཚུལ་སྤེལ་བའི་ནང་། ཨ་རིའི་སྤྱི་མཐུན་ཚོགས་པའི་སྲིད་འཛིན་འོས་མི་སྐུ་ཞབས་ཊི་རུམ་ཕི་མཆོག་གིས། ཕྱི་ཚེས་ ༩ ཉིན་ཨ་རིའི་སྲིད་འཛིན་འོས་མིའི་བགྲོ་གླེང་ཐེངས་གཉིས་པའི་སྟེང་། ཐོག་མ་བགྲོ་གླེང་མགོ་བཙུགས་དུས་ཧེ་ལ་རེ་ལ་གདེང་སྤོབས་ཆེན་པོ་ཡོད་ནའང་། མཐའ་གཞུག་ཁོང་མོ་ཐང་ཆད་ནས་ཕྱིར་རླངས་འཁོར་ཡོད་སར་ཡང་འགྲོ་ཐུབ་ཀྱི་མི་འདུག རྩེད་མོ་རྩེ་མཁན་རེ་ཟུང་གིས་རྩེད་འགྲན་ཐོག་ཞུགས་དུས་མྱོས་རྫས་སྤྱོད་ཀྱིན་ཡོད་པ་ལྟར། ངས་བསམ་ན། ཐེངས་འདིའི་བགྲོ་གླེང་མགོ་མ་བཙུགས་སྔོན་ལ་ང་ཚོས་ལྕམ་ཧེ་ལ་རེ་ཡིས་མྱོས་རྫས་སྤྱད་ཡོད་མེད་ལ་བརྟག་དཔྱད་བྱེད་དགོས་པ་རེད། ཅེས་དང་། ལྕམ་ཧེ་ལ་རེ་ཡིས་འོས་བསྡུ་མགོ་མ་ཚུགས་སྔོན་ནས་འཆར་གཞི་བཟོས་ཏེ་གསར་འགྱུར་བརྒྱུད་ལམ་ཁག་ལ་ལྐོག་རྔན་སྤྲད་དེ་ངའི་ཆབས་སྲིད་ལངས་ཕྱོགས་ལ་ངོ་རྒོལ་དང་སྐྱོན་འཛུགས་བྱེད་དུ་བཅུག་པ་སོགས་ཀྱིས་ཨ་རིའི་སྲིད་འཛིན་འོས་བསྡུ་འཕྲོ་བརླག་ལ་བཏང་སོང་། ཞེས་བརྗོད་འདུག
སྐབས་དེར་ཨ་རིའི་བུ་མེད་བཅུས་སྔོན་ཆད་སྐུ་ཞབས་ཊི་རུམ་ཕི་ཡིས་ཁོང་མོ་ཚོར་འདོད་པ་མེད་བཞིན་དུ་འཐམ་འཁྱུད་དང་འོ་བྱས་པ་སོགས་ཆགས་སྲེད་ཀྱི་བརྙས་བཅོས་བྱས་སོང་ཞེས་བརྗོད་ཡོད་ནའང་། སྐུ་ཞབས་ཊི་རུམ་ཕི་ཡིས་ཨ་རིའི་སྤྱི་ཚོགས་བརྒྱུད་ལམ་ (tweet) དུ་གནས་ཚུལ་དེ་འདྲ་ཞིག་བྱུང་མྱོང་མེད་པ་དང་། དེ་ནི་བུད་མེད་དེ་ཚོས་འོས་བསྡུའི་སྐབས་དང་བསྟུན་ནས་ཁོང་ལ་སྐྱོན་བརྗོད་དང་འགོག་རྐྱེན་བཟོ་ཐབས་ཤིག་ཡིན་པ་དང་། ཁོང་གིས་སྐྱེས་པ་གཞན་དག་ལས་ཀྱང་བུད་མེད་ལ་བརྩི་བཀུར་བྱེད་ཀྱི་ཡོད་སྐོར་བརྗོད་འདུག
ཆབ་སྲིད་བགྲོ་གླེང་ཐེངས་གཉིས་པའི་ཐོག་ལྕམ་ཧེ་ལ་རེ་མཆོག་གིས། ང་ཚོ་ཚང་མ་མཉམ་འབྲེལ་དང་མཉམ་ལས་བྱེད་པར་ངས་རེ་འདུན་བཅངས་ཡོད་ལ། ངའི་འོས་བསྡུའི་དྲིལ་བསྒྲགས་འབོད་ཚིག་ལའང་མཉམ་འབྲེལ་གྱི་སྟོབས་ཤུགས་ཞེས་བྲིས་ཡོད། ང་ཚོས་ཕན་ཚུན་བར་འཁོན་འཛིང་གི་རྙོག་ཟིང་མི་བཟོ་བར། ང་ཚོ་ཚང་མ་མཉམ་འབྲེལ་དང་མཉམ་ལས་བྱེད་དགོས་པར་ངས་ཡིད་ཆེས་བྱེད་ཀྱིན་ཡོད། ང་ཚོས་ཤེས་ཡོན་སྲིད་ཇུས་དང་དཔལ་འབྱོར་སྲིད་ཇུས། འཕྲོད་བསྟེན་སྲིད་ཇུས་སོགས་ཡར་རྒྱས་བཏང་ནས་མི་ཚང་མར་ཤེས་ཡོན་སློབ་གསོ་དང་འཕྲོད་བསྟེན་ལྟ་སྐྱོང་། དཔལ་འབྱོར་ལས་གནས་སོགས་འཐོབ་པའི་དམིགས་འབེན་འཛིན་དགོས། གལ་ཏེ་ང་ཚོས་དམིགས་འབེན་དེ་དག་བསྐྱུར་ནས་མཉམ་འབྲེལ་བྱས་པ་ཙམ་གྱིས། ང་ཚོས་བྱ་གཞག་གང་ཡང་མི་འགྲུབ་པས། ང་ཚོ་ཚང་མ་སྲིད་འཛིན་འོས་བསྡུའི་བྱ་འགུལ་ནང་མཉམ་ཞུགས་བྱེད་པའི་རེ་བ་ཡོད་ལ། ལྷག་པར་དུ་ཕྱི་ཟླ་ ༡༡ ནང་རྒྱ་ཆེའི་མི་མང་གིས་ང་ལ་འོས་ཤོག་ལྡུག་པའི་རེ་བ་ཡོད། མ་འོངས་པར་ངས་ཨ་རིའི་མི་རེ་རེའི་ཆེད་དུ་ལས་དོན་བསྒྲུབ་པར་ངས་ཁག་ཐག་བྱེད་ཀྱིན་ཡོད། ང་ཨ་རིའི་སྲིད་འཛིན་བྱེད་འདོད་ཡོད། ཆབ་སྲིད་ཀྱི་གནས་བབ་ལ་མ་ལྟོས་པར། ངས་ཁྱེད་རང་ཚོའི་རྒྱལ་ཁོངས་དང་མི་རིགས། ཆོས་ལུགས་སོགས་ལ་མི་བལྟ་བར། ང་ཚོ་ཚང་མ་མཉམ་འབྲེལ་སྟོབས་ཤུགས་ལ་བརྟེན་ནས། ངས་ང་ཚོའི་རྒྱལ་ཁབ་འདི་ལེགས་ལམ་དུ་སྣེ་འཁྲིད་བྱེད་འདོད་ལ། འདི་ནི་ང་ཚོའི་མི་རབས་གསར་བའི་མ་འོངས་མདུན་ལམ་དང་འཚམ་པའི་བགྲོད་ལམ་ཡག་ཤོས་དེ་རེད་བསམ་གྱི་ཡོད། ཅེས་སོགས་བརྗོད་འདུག
སྲིད་འཛིན་ཨོ་བྷ་མས་སྲིད་འཛིན་འོས་མི་གཉིས་ཀྱི་ཆབ་སྲིད་བགྲོ་གླེང་དང་འབྲེལ་ཏེ་ཨ་རིའི་དམངས་གཙོའི་ལམ་ལུགས་ལ་ཉེན་ཁ་ཆེ་བའི་སྐོར་ལ། གལ་ཏེ་སྤྱི་མཐུན་ཚོགས་པའི་སྲིད་འཛིན་འོས་མིར་ཁོ་རང་གི་ཆབ་སྲིད་ལངས་ཕྱོགས་དང་གཏམ་བཤད་ཀྱི་ནང་དོན་ལྟར་སྲིད་འཛིན་རྒྱལ་ཁ་མ་ཐོབ་པ་ཡིན་ན། ཁོས་གནད་དོན་དེ་ནི་རང་ཉིད་ཀྱི་ཕམ་ཁར་ངོས་འཛིན་མི་བྱ་བར། དེ་ནི་དམངས་གཙོ་ཚོགས་པས་ཁོང་ལ་སྐྱོན་འདོགས་དང་འོས་བསྡུ་འཕྲོ་བརླག་ལ་བཏང་བའི་རྐྱེན་དུ་འགྲེལ་བཤད་རྒྱག་སྲིད་པ་དང་། དམངས་གཙོའི་ལམ་ལུགས་ཀྱི་སྲིད་འཛིན་འོས་འགྲན་ཁྲོད་དུ། གལ་ཏེ་ཁྱེད་རང་ཕམ་པ་ཡིན་ན། ཁྱེད་ཀྱིས་ཕ་རོལ་བོའི་རྒྱལ་ཁར་འཚམས་འདྲི་ཞུས་ནས་འགྲོ་དགོས་པ་ལས། སྐྱོན་འཛུགས་ཀྱི་རྙོག་ཟིང་བཟོ་མི་འོས། ཞེས་བརྗོད་འདུག
རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཁང་གི་འགན་འཛིན་ཨལ་ཧུ་སེན་ (al-Hussein) ལགས་ཀྱིས། ཊི་རིམ་ཕི་ཡི་ཆབ་སྲིད་ལངས་ཕྱོགས་དང་ཁོང་གི་གཏམ་བཤད་ལ་གཞིགས་ན། གལ་ཏེ་ཁོ་ཨ་རིའི་སྲིད་འཛིན་དུ་བདམས་ཐོན་བྱུང་ཚེ། རྒྱལ་སྤྱིའི་ཆབ་སྲིད་ཀྱི་ལྟ་ཚུལ་ཐད་ལ་ཉེན་ཁ་ཆེ་སྐོར་བརྗོད་འདུག
སེ་ཨན་ཨན་གསར་ཁང་གི་ཞིབ་འཇུག་གྲུབ་འབྲས་ལྟན་ན། ཆབ་སྲིད་བགྲོ་གླེང་ཐེངས་གཉིས་པའི་ཐོག་སྐུ་ཞབས་ཊི་རུམ་ཕི་མཆོག་ལ་རྒྱལ་ཁ་ཐོབ་ཡོད་པར་ངོས་འཛིན་བྱེད་མཁན་མི་མང་བརྒྱ་ཆ་ ༣༤ དང་། ལྕམ་ཧེ་ལ་རེ་མཆོག་ལ་རྒྱལ་ཁབ་ཐོབ་ཡོད་པར་ངོས་འཛིན་གནང་མཁན་བརྒྱ་ཆ་ ༥༧ ཡོད་པ་དང་། ཐེངས་དང་པོའི་བགྲོ་གླེང་ཐོག་ལྕམ་ཧེ་ལ་རེ་མཆོག་ལ་རྒྱལ་ཁ་ཐོབ་ཡོད་པར་ངོས་འཛིན་མཁན་མི་མང་བརྒྱ་ཆ་ ༦༢ ཟིན་ཡོད་འདུག
ཨ་རིའི་བདུན་རེའི་གསར་དེབ་ཁང་ (US Weekly) ཁང་གིས། སྤྱི་མཐུན་ཚོགས་པའི་སྲིད་འཛིན་འོས་མི་སྐུ་ཞབས་ཊི་རུམ་ཕི་དང་དམངས་གཙོ་ཚོགས་པའི་སྲིད་འཛིན་འོས་མི་ལྕམ་ཧེ་ལ་རེ་མཆོག་གཉིས་བར་གྱི་ཆབ་སྲིད་བགྲོ་གླེང་མཐའ་མ་དེ་ཟླ་འདིའི་ཕྱི་ཚེས་ ༡༩ ཉིན་ནི་བ་ཌ་ (Nevada) གཙུག་ལག་སློབ་ཆེན་དུ་འཚོགས་རྒྱུ་ཡིན་པ་དང་། སྐབས་དེར་ཨ་རིའི་སྲིད་འཛིན་འོས་གཉིས་ནས་ཨ་རིའི་བུན་དངུལ་གྱི་དཀའ་ཁག་སེལ་ཐབས་དང་། ཨ་རིའི་རྒྱལ་ནང་གི་གནས་སྤོར་མི་མང་དང་དེའི་ཐོབ་དབང་། དེ་བཞིན། ཨ་རིའི་རྒྱལ་ཁབ་ཀྱི་དཔལ་འབྱོར་འཚོལ་སྒྲུབ་དང་ཁྲིམས་ལུགས། ཕྱི་འབྲེལ་སྲིད་ཇུས་ཐད་ཀྱི་དཀའ་རྙོག་དང་སྲིད་འཛིན་འོས་མི་གཉིས་ཀྱི་སྲིད་དབང་འཛིན་སྐྱོང་གི་ཤེས་འཇོན་བཅས་ཀྱི་སྐོར་ལ་བགྲོ་གླེང་གནང་རྒྱུ་ཡིན་སྐོར་བརྗོད་འདུག
གསར་འགོད་པ། པདྨ་རྒྱལ།
སྤྱི་མཐུན་ཚོགས་པའི་འོས་མི་གྲོ་ནལ་མཆོག་ལ་འོས་ཐོབ་ན་ཨ་མི་རི་ཀ་དཀོན་མཆོག་གིས་གཟིགས་པ་ཤོག སྤྱིར་བཏང་སྤྱི་མཐུན་ཚོགས་པ་དང་མང་གཙོ་ཚོགས་པ་གཉིས་སུ་ལ་སྲིད་འཛིན་འོས་ཐོབ་ཀྱང་བོད་དོན་ཐོག་དེ་ཙམ་གྱི་ཁྱད་པར་བཟོ་མི་སྲིད་ འོན་ཀྱང་དུས་བབས་ནས་འདི་ལྟར་དོ་སྣང་གནང་བར་ཐུགས་རྗེ་ཆེ་བཞུ་རྒུ་ཡིན་
གསར་འགོད་པ་པདྨ་རྒྱལ་ལགས། དེང་སྐབས་སྤྱི་ཚོགས་བརྒྱུད་ལམ་ཁག་ཏུ་ཨ་རིའི་སྲིད་འཛིན་འོས་མི་གཉིས་ཀྱིས་ཁ་རྩོད་རྒྱག་བཞིན་པ་དང་། ཞབས་བྲོ་འཁྲབ་བཞིན་པ་ཞིག་ཀྱང་ཁྱབ་བརྡལ་འགྲོ་བཞིན་འདུག དེ་དག་དངོས་ཡོད་རེད་དམ་རྫུན་མ་རེད། ད་དུང་ཊིར་ཕུ་ཡིས་ཆགས་སྤྱོད་སྣ་ཚོགས་བྱས་པ་དང་། ནག་ཚོང་དང་ཁྲིམས་འགལ་ཚོང་མང་པོ་བརྒྱབ་པ་དང་། ཧེ་ལ་རི་ཡིས་སྐབས་སྔོན་མའི་དྲུང་ཆེའི་གནང་བའི་རིང་རྒྱལ་དོན་ཐོག་ནོར་འཁྲུལ་དང་འཐུས་ཤོར་མང་པོ་ཕྱིན་པའི་སྐོར་སོགས་ཀྱང་བཤད་སྟངས་འདུག་པས་དེ་དག་རེ་རེ་བཞིན་བོད་སྒྱུར་གནང་སྟེ་དུས་ཐོག་ཏུ་གསར་འགྱུར་སྤེལ་ཐུབ་ན་ཧ་ཅང་ཡག་པོ་འདུག་ཐུགས་རྗེ་ཆེ།
དུས་བབ་ཚང་གིས་ཨ་རིའི་འོས་བསྡུ་ཆེན་མོའི་སྐོར་ལ་དོ་སྣང་གནང་བར་ཐུགས་རྗེ་ཆེ། གསར་འགྱུར་གྱི་གནད་ཀ་འཇུས་ཏེ་ཆབ་སྲིད་ཀྱི་གཏིང་ས་སྔོག་དགོས།
གསར་འགྱུར་ཚ་བོ་ཚ་བོ་རེད། ཆབ་སྲིད་གོ་རྟོགས་སྤེལ་ཐུབ་པར་ཕན་ཐོག་ཆེན་པོ་འདུག
ཏྲི་རམ་ཕི་ཡིས་མཐའ་མའི་སྲིད་འཛིན་བགྲོ་གླེང་ཐེངས་གསུམ་པ་མ་བྱས་པའི་སྔོན་དུ་ཁོ་རང་དང་ལྕམ་ཧེད་ལཱ་རེ་གཉིས་ཀྱིས་ལུས་སྟོབས་སྨན་རྫས་བེད་སྤྱོད་བྱས་ཡོད་མེད་བརྟག་དཔྱད་བྱས་རྗེས་བགྲོ་གླེང་མགོ་འཛུགས་བྱེད་དགོས་པའི་རེ་འདུན་བཏོན་ཡང་འབྲས་མེད་རེད། དེ་འདྲའི་སྒྲིག་གཞི་གསར་བ་མེད་ལ་སྲིད་འཛིན་འོས་མི་གཉིས་ཀྱི་ལུས་ཁམས་བདེ་ཐང་ཡོད་མེད་ཀྱི་གནས་ཚུལ་ཧ་ཅང་གསང་བ་རེད། དོན་དངོས་ལྟར་ན།ལྕམ་ཧེད་ལཱ་རེའི་ལུས་ཁམས་བདེ་ཐང་མེད་པ་མངོན་གསལ་ཡིན་ཡང་ཨ་རིའི་སྲིད་འཛིན་འོས་མིའི་ཆ་རྐྱེན་དེའི་སྐོར་ཁ་གསལ་མེད།སྔོན་མ་ཨ་རིའི་སྲིད་འཛིན་རོབ་ཟིད་བུལ་གྱིས་རང་ཉིད་ཀྱི་ལུས་ཁམས་བདེ་ཐང་མེད་པ་གསང་བ་བྱས་ཏེ་འོས་བསྡུ་ཐོབ་པ་དང་སྲིད་འཛིན་གྱི་དུས་ཡུན་མ་རྫོགས་པའི་སྔོན་ཨ་རིའི་ཕོ་བྲང་དཀར་པོའི་ནང་སྐུ་གཤེགས་ཡོད། ་་་་་: