རྒྱ་ནག་གཞུང་གིས་ ༢༠༡༦ ལོར་སེར་རྟ་བླ་རུང་དགོན་པའི་གྲྭ་བཙུན་ ༢༢༠༠ ཕྱིར་འཕུད་བཏང་སྟེ་ ༢༠༡༧ ལོར་དགོན་པའི་གྲྭ་བཙུན་གྱི་བསྡོམས་གྲངས་ ༥༠༠༠ ལ་ཚོད་འཛིན་བྱ་རྒྱུ་ཡིན་ཟེར།
མདང་དགོང་དྷ་ས་མག་གྷན་བོད་ཁྱིམ་ཉིན་སློབ་ཀྱི་རྩེད་ཐང་དུ་གཞུང་འབྲེལ་མིན་པའི་ཚོགས་པ་ ༥ ཐུན་མོང་གི་གོ་སྒྲིག་འོག་རྒྱ་ནག་གཞུང་གིས་གསེར་རྟ་བླ་རུང་སྒར་གཏོར་བཤིག་གཏོང་བཞིན་པའི་ཛ་དྲག་གི་གནས་བབ་ལ་གདུང་སེམས་མཉམ་སྐྱེད་ཀྱི་ལས་འགུལ་ཞིག་སྤེལ་སོང་། ལས་འགུལ་ཐོག་གཞུང་འབྲེལ་མིན་པའི་ཚོགས་ལྔ་ཡི་ཚོགས་གཙོ་རྣམ་པ་དང་དྷ་ས་ཁུལ་གྱི་སེར་སྐྱ་མང་ཚོགས་ ༡༥༠ ཙམ་འཛོམས་འདུག
བོད་མི་མང་སྤྱི་འཐུས་རྡོ་རྗེ་ཚེ་བརྟན་ལགས་ཀྱིས་ལས་འགུལ་སྐོར་ངོ་སྤྲོད་གནང་དོན། ཉེ་ལམ་ནས་རྒྱ་ནག་གཞུང་གིས་དྲག་པོའི་ཐོག་ནས་བོད་ནང་གི་གསེར་རྟ་བླ་རུང་སྒར་གཏོར་བཤིག་གཏོང་བཞིན་པར་དཀའ་ངལ་ཤུགས་ཆེན་འཕྲད་ཀྱིན་ཡོད་པ་ལྟར། དེ་རིང་འདིར་གཞུང་འབྲེལ་མིན་པའི་ཚོགས་པ་ལྔ་ཐུན་མོང་གི་གོ་སྒྲོག་འོག་དྷ་ས་ཁུལ་གྱི་སེར་སྐྱ་མང་ཚོགས་ཚང་མས་རྒྱ་ནག་གཞུང་གིས་གསེར་རྟ་བླ་རུང་སྒར་གཏོར་བཤིག་གཏོང་བཞིན་པ་མྱུར་དུ་མཚམས་འཇོག་དགོས་པ་དང་། ད་དུང་མུ་མཐུད་དུ་གཏོར་བཤིག་བཏང་བ་ཡིན་ན། དེས་བོད་རྒྱ་གཉིས་ཀྱི་དཀའ་རྙོག་ཆེ་རུ་འགྲོ་ཡི་ཡོད་པ་རྒྱ་ནག་གཞུང་གིས་ཤེས་དགོས་པ་དང་། དེ་རིང་གི་ལས་འགུལ་འདི་བརྒྱུད་ནས་རྒྱལ་སྤྱིའི་སྤྱི་ཚོགས་དང་མི་མང་། རྒྱལ་སྤྱིའི་རང་དབང་ཚོགས་སྡེ་དང་བོད་དོན་རྒྱབ་སྐྱོར་ཚོགས་སྡེ་ཁག་ཚང་མས་རྒྱ་ནག་གཞུང་ལ་གསེར་རྟ་བླ་རུང་སྒར་གཏོར་བཤིག་གཏོང་བཞིན་པ་མྱུར་དུ་མཚམས་འཇོག་དགོས་པའི་གནོན་ཤུགས་སྤྲོད་དགོས་པའི་ཛ་དྲག་གི་འབོད་སྐུལ་ཞུ་ཡི་ཡོད། ཅེས་དང་། ཨ་རི་དང་ཁེ་ན་ཊ། ཨིན་ཡུལ་དང་ཧྥ་རན་སི། ལ་ཊེན་ཨ་མི་རི་ཀ་དང་སི་པན་སོགས་རྒྱལ་སྤྱིའི་གྲོང་ཁྱེར་ཆེ་ཁག་ ༢༠ ལྷག་ནང་གསེར་རྟ་བླ་རུང་སྒར་གཏོར་བཤིག་གཏོང་བཞིན་པའི་ཛ་དྲག་གི་གནས་བབ་ལ་གདུང་སེམས་མཉམ་སྐྱེད་ལས་འགུལ་སྤེལ་བཞིན་ཡོད་པ་དང་། ལས་འགུལ་དེ་ནི་བོད་མི་དང་བོད་དོན་རྒྱབ་སྐྱོར་ཚོགས་པ་ཐུན་མོང་གི་ངོས་ནས་གོ་སྒྲིག་གནང་བ་ཞིག་ཡིན་པ་རེད། ཅེས་བརྗོད་སོང་།
གཞུང་འབྲེལ་མིན་པའི་ཚོགས་པ་ལྔའི་གསར་འགོད་གསལ་བསྒྲགས་ནང་། ཕྱི་ལོ་ ༢༠༠༡ ནས་བཟུང་རྒྱ་ནག་གཞུང་གིས་གསེར་རྟ་བླ་རུང་སྒར་བཅོས་སྒྲིག་བྱེད་པའི་མིང་ཐོག་ནས་གྲྭ་བཙུན་ཕྱིར་ཕུད་དང་། གྲྭ་ཤག་གཏོར་བཤིག ཆོས་ཕྱོགས་ཀྱི་བྱེད་སྒོ་ཁག་བཀག་བསྡོམས་བྱེད་པའི་ལས་འགུལ་དེ་ཚ་ཚ་འུར་འུར་གྱི་སྒོ་ནས་མགོ་བཙུགས་བྱས་པ་དང་། གནས་ཚུལ་དེ་འདྲའི་འོག་གྲྭ་བཙུན་འགའ་ཤས་རང་ཤི་བརྒྱབ་པ་དང་། སེམས་སྡུག་གིས་མནར་ནས་འདས་གྲོངས་ཕྱིན་པ། འགའ་ཤས་སེམས་པ་ཐང་ཐང་མེད་པར་གྱུར་བ། ཐ་ན་དགོན་པ་དེའི་མཁན་པོ་འཇིགས་མེད་ཕུན་ཚོགས་མཆོག་ཀྱང་སྙུང་གཞིས་རྐྱེན་པས་འདས་གྲོངས་སུ་གྱུར་བ་སོགས་ཡིད་སྐྱོ་བའི་གནས་ཚུལ་ཞིག་བྱུང་ཡོད།
འབྲེལ་ཡོད་ཞིབ་འཇུག་གི་སྙན་ཐོ་ལྟར་ན། རྒྱ་གཞུང་གིས་གསེར་རྟ་བླ་རུང་སྒར་གཏོར་བཤིག་བྱ་རྒྱུའི་ལས་འཆར་བཀའ་ཁྱབ་ནང་དགོན་པའི་གྲྭ་བ་དང་བཙུན་མ། དགེ་བསྙེན་བཅས་གྲངས་འབོར་ཉུང་འཕྲི་བྱ་རྒྱུ་ཡིན་པ་དང་། ཕྱི་ལོ་ ༢༠༡༦ ལོར་གྲྭ་བཙུན་གྲངས་འབོར་ ༢༢༠༠ ཕྱིར་འཕུད་གཏོང་རྒྱུ་ཡིན། དེའི་ནང་དགེ་བསྙེན་གྲངས་ ༡༠༢༩ དགོན་པ་ལས་ལོགས་སུ་བགར་རྒྱུ་དང་། གྲྭ་བ་དང་བཙུན་མ་གྲངས་ ༡༢༠༠ དགོན་པ་ནས་ཕྱིར་འཕུད་གཏོང་རྒྱུ། དེའི་ཁྲོད་དུ་ཞིང་ཆེན་གཞན་ནས་ཡིན་པའི་གྲྭ་བཙུན་གྲངས་ ༦༠༠ ཚུད་ཡོད། ཕྱི་ལོ་ ༢༠༡༧ ལོར་དགོན་པའི་གྲྭ་བཙུན་སོགས་ཀྱི་ཁྱོན་བསྡོམས་མི་གྲངས་ ༥༠༠༠ ལ་ཚོད་འཛིན་བྱ་དགོས། གལ་སྲིད་ཕྱི་ལོ་ ༢༠༡༧ ཟླ་ ༩ ཚེས་ ༣༠ སྔོན་ལ་མི་གྲངས་ ༥༠༠༠ དུ་ཚོད་འཛིན་མ་ཐུབ་པ་ཡིན་ན། ༢༠༡༧ ལོར་དགོན་པའི་མི་གྲངས་ཀྱི་མིང་ལྟར་ཕྱིར་འཕུད་གཏོང་བའི་མི་གྲངས་ཇེ་མང་དུ་གཏོང་རྒྱུ་ཡིན། ཞེས་དང་། གསེར་རྟ་བླ་རུང་སྒར་གཏོར་གཤིག་གི་འགན་འཁུར་མཁན་འགྲོ་ཁྲིད་ནི་རྒྱ་རིགས་ཀྲང་ཕེན་སུན་དང་ཏན་ནས་ཁེ། ཚས་ཡས་པང་གསུམ་དང་། འགན་ལེན་མཁན་ཁུལ་འཐབ་ཕྱོགས་གཅིག་གྱུར་ཁང་དང་ཁུལ་མི་རིགས་ཆོས་ལུགས་ལས་དོན་ཁང་། ཁུལ་སློབ་གསོ་སྡེ་ཁག་དང་ཁུལ་སྤྱི་བདེ་ལས་ཁུངས། ཁུལ་མི་དམངས་སྲིད་ལས་ཁུངས་དང་གསེར་རྟ་རྫོང་སྲིད་གཞུང་། ཕྱི་ཡོང་གྲྭ་བཙུན་རྣམས་དང་འབྲེལ་ཡོད་རྫོང་དང་ས་གནས་སྲིད་གཞུང་བཅས་ཡིན་ཞེས་སོགས་བརྗོད་ཡོད་སྐོར་བཀོད་འདུག
གསར་འགོད་པ། པདྨ་རྒྱལ།
༅༅། བླ་རུང་སྒར་གཏོར་བཤིག་བཏང་པ་དང་ཆོས་བྱེད་སློབ་གཉེར་རྣམས་བཙན་དབང་གིས་ཕྱིར་ཕུད་བཏང་བར་
འཛམ་རྒྱལ་ཁབ་ནང་རྒྱ་མི་ལ་ངོ་རྒོལ་བྱེད་དགོས་པ་ལས་མཆོད་མེད་ཕུལ་ནས་ངོ་རྒོལ་བྱེད་ནས་ཅི་ལ་ཕན།
དྲ་ཐག་འདི་བརྒྱུད་ནས་ཚང་མས་ཞུ་གཏུགས་བྱ་རོགས།
https://www.change.org/p/united-nations-human-rights-council-stand-with-larung-gar-now-world-s-largest-buddhist-monastery-home-to-10-000-facing-demolition