རྒྱ་གཞུང་གིས་མཛོད་དགེ་རྫོང་ཐང་སྐོར་སོག་ཚང་དགོན་པའི་དགེ་འདུན་པ་གཉིས་བཙན་འཁྲིད་བྱས་ཏེ་ཟླ་གཉིས་ལྷག་ཕྱིན་ཡོད་ཀྱང་གར་ཡོད་ཅི་བྱུང་ཙམ་ཡང་ཤེས་རྟོགས་ཐུབ་ཀྱི་མེད་པ་རེད།
བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་གནས་ཚུལ་སྤེལ་བ་ལྟར་ན། འདི་ལོའི་ཕྱི་ཟླ་ ༨ པའི་ཚེས་ ༢༤ ཉིན་གྱི་མཚན་གུང་ཙམ་ལ། མཛོད་དགེ་རྫོང་ཐང་སྐོར་སོག་ཚང་དགོན་པའི་གྲྭ་གྲགས་པ་ལགས་དང་བློ་བཟང་ཤེས་རབ་ལགས་གཉིས་རང་ཤག་ཏུ་ཡོད་སྐབས། གློ་བུར་ཏུ་དྲག་ཆས་ཉེན་རྟོག་པ་ཡོང་སྟེ་རྒྱུ་མཚན་གང་ཡང་མ་བཤད་པར་ཁོང་གཉིས་བཙན་འཁྲིད་བྱས་ཡོད་པ་དང་། གྲྭ་བློ་བཟང་ཤེས་རབ་ལགས་འཛིན་བཟུང་བྱེད་སྐབས་ཁོང་གི་ཤག་རོགས་དགེ་འདུན་པ་ཞིག་ལ་འཇིགས་སྐུལ་བྱས་པ་མ་ཟད། གཅར་རྡུང་བཏང་སྟེ་རྨས་སྐྱོན་ཡང་བཟོས་ཡོད་འདུག
ཁོང་གཉིས་བཙན་འཁྲིད་བྱས་ཏེ་ཟླ་གཉིས་དང་ཉིན་འགའ་འགོར་བའི་རིང་ཁྱིམ་མི་ཚོས་རྩད་གཅོད་མང་པོ་བྱས་ཡོད་ཀྱང་། ཁོང་གཉིས་གང་དུ་ཡོད་མེད་དང་གནས་སྟངས་ག་འདྲ་ཡོད་པ་ཙམ་ཡང་ཤེས་རྟོགས་མ་ཐུབ་པར་ལྷག་ཡོད་པ་དང་། བརྒྱུད་ལམ་དུ་གནས་ཚུལ་ཐོན་པ་ལྟར་ན། རང་ལོ་ ༣༩ ཡིན་པའི་དགེ་འདུན་པ་གྲགས་པ་ལགས་སོག་ཚང་དགོན་གྱི་གཉེར་བ་ཡིན་ཞིང་། དེ་སྔོན་ཁྲིམས་དང་འགལ་བའི་གནས་ཚུལ་གང་ཡང་བྱུང་མྱོང་མེད་པ་དང་། དགེ་འདུན་པ་བློ་བཟང་ཤེས་རབ་ལགས་རང་ལོ་ ༣༥ དང་དགོན་པའི་ལས་བྱེད་ཅིག་ཡིན་འདུག
ཉེན་རྟོག་ཕྱོགས་ནས་ཁོང་གཉིས་འཛིན་བཟུང་བྱེད་དོན་ཅི་ཡིན་གསལ་བཤད་གང་ཡང་བྱས་མེད་ཀྱང་། དེ་སྔོན་ས་གནས་སྲིད་གཞུང་གིས་ཐང་སྐོར་གྲོང་རྡལ་གྱི་རྐ་བར་མ་སྡེ་བའི་ས་ཆ་བཙན་འཕྲོག་བྱས་པར་བརྟེན། ས་གནས་འབྲོག་པ་མང་ཚོགས་ཀྱིས་ཐེངས་མང་ཞུ་གཏུག་བྱས་པ་དང་། ཞི་བའི་ལས་འགུལ་སྤེལ་བའི་གནས་ཚུལ་རྣམས་ཕྱི་ཕྱོགས་སུ་བཏང་བའི་དོགས་གཞིའི་འོག ཁོང་གཉིས་བཙན་འཁྲིད་བྱས་ཡོད་པའི་ཚོད་དཔག་བྱེད་ཀྱི་ཡོད་འདུག
དགེ་འདུན་པ་ཁོང་གཉིས་གར་ཡོད་ཅི་བྱུང་མེད་པར་གྱུར་བའི་གནད་དོན་ཐད་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས། དགེ་འདུན་པ་ཁོང་གཉིས་དང་ནང་མིའི་བར་ཐུག་འཕྲད་གང་ཡང་མེད་པའི་སྒོ་ནས་བཀག་ཉར་བྱེད་བཞིན་པའི་ངོ་བོ་འདི་ནི། དགེ་འདུན་པ་ཁོང་གཉིས་དྲག་རྡུང་དང་མནར་གཅོད་བཏང་ཡོད་པའི་དོགས་པ་དང་། ཡང་དེ་ནི་རྒྱ་གཞུང་གི་དྲག་ཆས་ཉེན་རྟོག་པས་དུས་རྒྱུན་བོད་མི་འཇུ་བཟུང་གིས་གསང་བའི་ཐོག་བཀག་ཉར་དང་ཁྲིམས་མཐུན་གྱི་བྱེད་བབ་ཁག་ཚང་མ་རྩིས་མེད་རྡོག་རོལ་བཏང་རྐྱང་བྱས་པའི་རྒྱུན་ལྡན་གྱི་བྱེད་བབ་ལྟ་བུ་ཆགས་ཡོད་ན། རྒྱ་གཞུང་གི་གོང་རིམ་དབང་ཡོད་མི་སྣར། དགེ་འདུན་པ་ཁོང་གཉིས་གང་དུ་བཀག་ཉར་བྱས་ཡོད་མེད་གསལ་ཁ་བཟོ་རྒྱུ་དང་། ནང་མི་རྣམས་ལ་ཁོང་གཉིས་ཀྱི་ལུས་སེམས་གཉིས་ཀྱི་གནས་སྟངས་ར་སྤྲོད་བྱེད་རྒྱུའི་འགན་དབང་ཡོད་པ་གསལ་འདེབས་དང་སྦྲགས། དགེ་འདུན་པ་ཁོང་གཉིས་འཇུ་བཟུང་བྱེད་དོན་གྱི་རྒྱུ་མཚན་ཡོངས་བསྒྲགས་གསལ་བཤད་དང་འབྲེལ་ནས་ཁྲིམས་ཁ་བརྒྱུད་ནས་ར་སྤྲོད་བྱེད་རྒྱུ་ལས། དེ་མུར་གང་ཡིན་འདི་ཡིན་མེད་པར་ཉར་འདུག་རྒྱུ་མཚམས་འཇོག་བྱེད་དགོས་པའི་འབོད་སྐུལ་ཞུ་ཡི་ཡོད། ཅེས་བརྗོད་འདུག
ཕྱི་ལོ་ ༢༠༡༠ ལོར་མཛོད་དགེ་རྫོང་ཐང་སྐོར་གྲོང་རྡལ་ས་གནས་སྲིད་གཞུང་གིས་མཁར་གྲོང་སྔོ་ལྗང་ཅན་དུ་བསྒྱུར་བ་ཞེས་པའི་ལས་གཞི་ལ་ཁ་གཡར་ཏེ། ཐང་སྐོར་གྲོང་རྡལ་རྐ་བར་མ་སྡེ་བའི་དུད་ཁྱིམ་ ༢༠ ལྷག་གི་ས་ཆ་བཙན་འཕྲོག་བྱས་ཡོད་སྟབས། ས་གནས་མང་ཚོགས་ཀྱིས་གོང་རིམ་ལ་གནད་དོན་དེ་ཐག་གཅོད་དགོས་པའི་རེ་སྐུལ་ཐེངས་མང་ཞུས་ཡོད་ཀྱང་། སྲིད་གཞུང་གིས་ཉིན་བཅོ་ལྔ་ཙམ་གྱི་ནང་ཐག་གཅོད་རྒྱུ་ཡིན་ལུགས་སོགས་བརྗོད་དེ་ནར་འགྱངས་དང་མུ་མཐུད་དུ་ཞུ་གཏུག་བྱེད་མི་ཆོག་པའི་འཇིགས་སྐུལ་སོགས་བྱས་ཡོད་པར་བརྟེན། འདས་ལོའི་ཕྱི་ཟླ་ ༡ ཚེས་ ༢༨ ཉིན། སི་ཁྲོན་ཞིང་ཆེན་མི་མང་འཐུས་མི་ཚོགས་ཆེན་དང་ཞིང་ཆེན་སྲིད་གྲོས་གཉིས་འཚོགས་བསྡད་ཡོད་པའི་སྐབས་དང་བསྟུན། ཚོགས་ཁང་ཕྱི་ལོགས་ཀྱི་གཞུང་ལམ་སྟེང་དུ་རྐ་བར་མ་སྡེ་བའི་ས་ཆ་འཕྲོག་པའི་དུད་ཁྱིམ་ ༢༠ ཡི་འཐུས་མི་ ༡༠ ཡིས། “སྲོག་ལ་བབ་ཀྱང་ས་ཆ་སྲུང་སྐྱོབ་བྱ་རྒྱུ་ཡིན། ཁྲིམས་འགལ་གྱིས་ས་ཆ་འཕྲོག་པར་ངོ་རྒོལ་བྱ་རྒྱུ་ཡིན།”ཞེས་པ་དང་། “ས་ཆ་བཙན་འཕྲོག་བྱས་པས་ང་ཚོ་རང་ཁྱིམ་ལ་ལོག་ས་མེད།” ཞེས་བྲིས་པའི་འཕྲེད་དར་འཕྱར་ཏེ་ངོ་རྒོལ་ཞུ་གཏུག་གི་ལས་འགུལ་སྤེལ་ཡོད་པ་དང་། སྐར་མ་བཅུ་ཙམ་ལས་མ་འགོར་བར་ཉེན་རྟོག་པ་མང་པོ་བསླེབས་ཏེ་ཞི་བའི་ལས་འགུལ་བ་རྣམས་བཙན་ཁྲིད་བྱས། ས་གནས་མང་ཚོགས་ཀྱིས་ཞུ་གཏུག་ཐེངས་མང་བྱས་པའི་ཁྲོད་རྒྱ་གཞུང་གིས་འཇིགས་སྐུལ་རིམ་པ་བྱས་ཏེ། སྔ་གཞུག་ཏུ་བོད་མི་མང་པོ་ཞིག་དུས་ཡུན་ངེས་མེད་ཀྱིས་འཛིན་བཟུང་བཀག་ཉར་བྱས་ཡོད་པ་མ་ཟད། སྤྱི་ཚོགས་ནང་ཟིང་ཆ་བསླངས་བའི་ཉེས་མིང་འོག་བོད་མི་བཞི་ལ་ལོ་ ༣ ནས་ ༢ བར་གྱི་བཙོན་འཇུག་ཁྲིམས་ཐག་བཅད་ཡོད་པའི་གནས་ཚུལ་ཐོན་ཡོད་པ་རེད།
གསར་འགོད་པ། པདྨ་མཚོ།
