༧གོང་ས་མཆོག་སོག་ཡུལ་དུ་ཕེབས་པར་རྒྱ་གཞུང་ཁོང་ཁྲོ་ལངས།

སོག་ཡུལ་དགའ་ལྡན་ཆོས་གླིང་གིས་གདན་འདྲེན་ཞུས་པ་ལྟར་༧གོང་ས་མཆོག་གིས་སོག་ཡུལ་ནང་མཛད་འཕྲིན་སྐྱོང་གི་ཡོད་པ་དེ་སོག་ཡུལ་གཞུང་གིས་ཆབ་སྲིད་དང་འབྲེལ་བ་མེད་པར་ཆོས་ཕྱོགས་ཀྱི་མཛད་འཕྲིན་ཡིན་ཟེར།

ཟླ་འདིའི་ཕྱི་ཚེས་ ༡༨ ཉིན་ནས་བཟུང་༧གོང་ས་རྒྱལ་བ་རིན་པོ་ཆེ་མཆོག་སོག་ཡུལ་དུ་ཆིབས་སྒྱུར་སྐྱོང་གི་ཡོད་པ་ལྟར། ཁ་སང་སོག་ཡུལ་ཕྱི་སྲིད་ལྷན་ཁང་གི་བློན་ཆེན་མུན་ཀ་ཨོར་གྷེལ་ (Munkh-Orgil)གྱིས་གཞུང་འབྲེལ་གསལ་བསྒྲགས་ཤིག་སྤེལ་ཏེ། ༧གོང་ས་ཏཱ་ལའི་བླ་མ་མཆོག་སོག་ཡུལ་དུ་ཕེབས་པ་དེ་སོག་ཡུལ་གཞུང་དང་འབྲེལ་བ་མེད་པ་དང་། ད་ལྟའི་བར་༧གོང་ས་ཏཱ་ལའི་བླ་མ་མཆོག་སོག་ཡུལ་དུ་ཐེངས་དགུ་ལ་ཆིབས་སྒྱུར་བསྐྱངས་ཡོད་པ་དང་། ཐེངས་འདིར་ཡང་སོག་ཡུལ་གྱི་ནང་པའི་དགོན་པ་དགའ་ལྡན་ཐེག་ཆེན་གླིང་གིས་གདན་ཞུ་ལྟར་ཆོས་ཕྱོགས་ཀྱི་མཛད་འཕྲིན་བསྐྱངས་ཡོད་པ་རེད། ཅེས་བརྗོད་འདུག

རྒྱ་ནག་ཕྱི་སྲིད་ལྷན་ཁང་གི་མགྲིན་ཚབ་པ་གིང་ཧྲང་ (Geng Shuang) ཟེར་བས། ཏཱ་ལའི་བླ་མ་རྒྱ་གར་ལ་སྐྱབས་བཅོལ་དུ་ཕྱིན་པ་ནས་ཆོས་ལུགས་ཀྱི་མིང་ཐོག་ནས་བོད་རྒྱ་གཉིས་ཁ་བྲལ་གཏང་ཐབས་ཀྱི་བྱ་འགུལ་སྤེལ་གྱིན་ཡོད། ང་ཚོས་སོག་ཡུལ་དང་རྒྱ་ནག་གཉིས་བར་གྱི་བཟང་ཕྱོགས་ཀྱི་འབྲེལ་ལམ་བརྟན་ལྷིང་ཡོང་ཆེད་ཏཱ་ལའི་བླ་མ་སོག་ཡུལ་དུ་ཕེབས་པར་མཐའ་གཅིག་ཏུ་ངོ་རྒོལ་ཡོད་ལ། སོག་ཡུལ་ནས་ཏཱ་ལའི་ཤོག་ཁག་ལ་རྒྱབ་སྐྱོར་དང་ཁེ་ཕན་བསྒྲུབ་པར་ཡང་མཐའ་གཅིག་ཏུ་ངོ་རྒོལ་ཡོད། ཅེས་བཤད་ཡོད་པ་རེད།

རྒྱ་གར་ཧིན་རྡི་ (the hindu) གསར་ཁང་གིས་གནས་ཚུལ་སྤེལ་བའི་ནང་། ༧གོང་ས་མཆོག་གིས་སོག་ཡུལ་གནམ་ཐང་དུ་ཞབས་སོར་འཁོད་རྗེས། ཁོང་གིས་གསར་འགོད་པར། བོད་སོག་མི་རིགས་གཉིས་བར་གནའ་སྔ་མོ་ནས་དགེ་སློབ་ཀྱི་མཛའ་འབྲེལ་ཐུན་མོང་མ་ཡིན་པ་ཞིག་ཡོད་པ་དང་། ཁོང་ཉིད་ནས་སོག་ཡུལ་མི་མང་གིས་དེང་དུས་ཚན་རིག་དང་ཤེས་ཡོན་སློབ་གསོར་བརྟེན་ནས་སོ་སོའི་ཡུལ་ལུང་ཡར་རྒྱས་གཏང་བ་དང་། འགྲོ་བ་མིའི་རིགས་ཕན་ཚུན་ལ་བརྩི་བཀུར་བྱེད་པ་དང་ལྷག་པར་དུ་རྒན་པར་བརྩི་བཀུར་བྱེད་པའི་སྲོལ་རྒྱུན་བཟང་པོ་དེ་རྒྱུན་འཛིན་ཐུབ་པའི་རེ་བ་ཡོད། ཅེས་གསུངས་ཡོད་སྐོར་འཁོད་འདུག

རྒྱ་གར་བང་ཆེན་གསར་ཁང་ (indian express) གིས་གནས་ཚུལ་ཞིག་སྤེལ་བའི་ནང་། སོག་ཡུལ་མི་མང་གིས་རྒྱ་ནག་གི་གནོན་ཤུགས་ལ་མ་བལྟས་པར་༧གོང་ས་ཏཱ་ལའི་བླ་མ་མཆོག་སོག་ཡུལ་དུ་གདན་འདྲེན་ཞུས་པ་དེས་པེ་ཅིན་གཞུང་ལ་ཕོག་ཐུག་ཆེན་པོ་བཟོས་ཏེ། ༧གོང་ས་མཆོག་སོག་ཡུལ་དུ་ཞབས་སོར་འཁོད་རྗེས་རྒྱ་ནག་གཞུང་གིས་པེ་ཅན་ནས་སོག་ཡུལ་རྒྱལ་ས་ཨོ་ལན་བྷ་ཊར་ (Ulaanbaatar) བར་འཕུར་སྐྱོད་བྱེད་བཞིན་པའི་སྐྱེལ་འདྲེན་གནམ་གྲུ་གནས་སྐབས་རིང་ཕྱིར་འཐེན་བྱས་ཡོད་སྐོར་འཁོད་འདུག

སོག་ཡུལ་དད་ལྡན་མི་མང་གིས་རྒྱ་ནག་གཞུང་གི་གནོན་ཤུགས་ལ་མ་བལྟས་བར་༧གོང་ས་རྒྱལ་བ་རིན་པོ་ཆེ་མཆོག་སོག་ཡུལ་དུ་གདན་འདྲེན་ཞུས་ཡོད་པ་ལྟར། ༧གོང་ས་རྒྱལ་བ་རིན་པོ་ཆེ་མཆོག་ནས་ཕྱི་ཚེས་ ༡༩ ནས་ ༢༢ ཉིན་བར་སོག་ཡུལ་གྱི་མངའ་སྡེ་ཁག་གི་ནང་པའི་དགོན་པ་དང་ཆོས་ཚོགས་ཁག་གི་དབུ་ཁྲིད་དང་མཁན་པོ་ཚོར་མཇལ་འཕྲད་གནང་བ་དང་། སོག་པོའི་རྒྱལ་ས་ཨོ་ལན་བྷ་ཊར་གྱི་སློབ་གྲྭ་ཆེན་མོ་ཁག་ཅིག་ནང་བཀའ་སློབ་གནང་བ་བཅས་ཀྱི་མཛད་འཕྲིན་སྐྱོང་བཞིན་ཡོད་པ་རེད།

གསར་འགོད་པ། པདྨ་རྒྱལ།