དེ་རིང་སྔ་དྲོའི་ཆུ་ཚོད་ ༡༠ ། ༤༠ སྟེང་། ༧གོང་ས་རྒྱལ་བ་རིན་པོ་ཆེ་མཆོག་ཉི་ཧོང་དང་སོག་ཡུལ་སོགས་ཀྱི་མཛད་འཕྲིན་ཁག་གྲུབ་སྟེ། ཕྱིར་བཞུགས་སྒར་དྷ་རམ་ས་ལའི་གཟིམ་ཆུང་ཕོ་བྲང་ལ་ཆིབས་ཞབས་བསྒྱུར་ཡོད་པ་རེད།
ཟླ་འདིའི་ཕྱི་ཚེས་ ༢༧ ཉིན་༧གོང་ས་མཆོག་དྷ་རམ་ས་ལ་ནས་ཆིབས་འཐོན་གནང་སྟེ་ཚེས་ ༨ ཉིན་ཉི་ཧོང་ཊོག་ཁེའོ་གནམ་ཐང་དུ་ཞབས་སོར་བཀོད་ཡོད་པ་དང་། ཐེངས་འདིར་ཉི་ཧོང་གི་སློབ་གྲྭ་ཆེན་མོ་དང་ནང་པའི་ཆོས་ཚོགས། དེ་བཞིན། ཚན་རིག་ཞིབ་འཇུག་ཁང་དང་རིག་གཞུང་བསྟི་གནས་ཁག་ཅིག་བཅས་སུ་མཛད་འཕྲིན་དང་བཀའ་སློབ་གནང་ཡོད།
ཐེངས་འདིར་༧གོང་ས་མཆོག་གིས་རྒྱ་རིགས་ཁག་ཅིག་ལ་བཀའ་སློབ་གནང་སྐབས། སོ་སོ་ཕ་མེས་ཀྱི་ཆོས་ལུགས་གང་ཡིན་པ་དེར་འགྱུར་བ་མ་བཏང་ན་ལེགས་པའི་སྐོར་གསུངས་ཡོད་པ་མ་ཟད། ཚེས་ ༩ ཉིན་ཉིན་ཉི་ཧོང་རྒྱལ་སའི་ཧོན་གན་ཇི་ Honganji Temple ནང་པའི་དགོན་པར་བཀའ་སློབ་གནང་སྐབས། “ཉི་ཧོང་ཆོས་གྲོགས་མང་པོ་ཞིག་གིས་ང་ཚོ་བོད་ཀྱི་དགོན་སྡེ་རིགས་མང་པོ་ཞིག་གིས་ཆོ་ག་བཏོན་ནས་འགྲོ་བཞིན་ཡོད་པ་ལྟར་བྱེད་བཞིན་ཡོད་བཟོ་འདུག ཆོ་ག་འདོན་ནས་འགྲོ་རྒྱུའི་ལམ་སྲོལ་དེ་སྔ་མོའི་ལམ་སྲོལ་ཞིག་ཆགས་ཡོད། ད་ཆ་ང་ཚོས་དུས་རབས་ ༢༡ ནང་པ་བྱེད་དགོས་པ་བརྗོད་སྐབས། སངས་རྒྱས་པའི་ཆོས་པ་རེད། ཅེས་བརྗོད་སྐབས་སངས་རྒྱས་དཀོན་མཆོག ཆོས་དཀོན་མཆོག དགེ་འདུན་དཀོན་མཆོག བཅས་ངོ་ཤེས་པ་བྱེད་དགོས། དཀོན་མཆོག་གསུམ་ངོ་ཤེས་པར་ཆོས་དཀོན་མཆོག་ངོ་ཤེས་དགོས། ཆོས་དཀོན་མཆོག་ངོ་ཤེས་པར་འགོག་བདེན་དང་ལམ་བདེན་གྱི་རྣམ་གཞག་ཤེས་དགོས་པ་རེད། དེར་བརྟེན་སློབ་སྦྱོང་ཕྲན་བུ་མ་བྱས་ན། འགོག་བདེན་ལམ་བདེན། ཞེས་ཚིག་ཙམ་བརྗོད་ན་ཕན་རྒྱུ་མེད།” ཅེས་གསུངས་ཡོད།
སོག་ཡུལ་དགའ་ལྡན་ཐེག་ཆེན་གླིང་གིས་གདན་འདྲེན་ཞུས་པ་ལྟར། ཕྱི་ཚེས་ ༡༨ ཉིན་༧གོང་ས་མཆོག་ཉི་ཧོང་ནས་ཐད་ཀར་སོག་ཡུལ་དུ་ཕེབས་ཡོད་པ་དང་། སོག་ཡུལ་གྱི་སློབ་གྲྭ་ཆེན་མོ་ཁག་ཅིག་དང་རིག་གཞུང་བལྟི་གནས་ཁག་ཅིག་བཅས་ལ་བཀའ་སློབ་གནང་ཡོད་ལ། ནང་ཆོས་དང་ཚན་རིག་སྐོར་ལ་རྒྱལ་སྤྱི་རང་བཞིན་གྱི་བགྲོ་གླེང་། དེ་བཞིན། ཚེས་ ༢༠ ཉིན་རྒྱལ་ས་ཨུ་ལན་པ་ཋིར་ཚོགས་ཁང་ཆེན་མོའི་ནང་མི་མང་ ༡༠༠༠༠ ལྷག་ལ་རྟེན་འབྲེལ་བསྟོད་པའི་བཀའ་ཆོས་སྩོལ་སྐབས། བཀའ་ཆོས་གསན་པར་སོག་ཡུལ་གྱི་མངའ་སྡེ་མང་པོ་ནས་ཕེབས་ཡོད་པ་མ་ཟད། ཨུ་རུ་སུའི་ཁོངས་གཏོགས་བྷོ་རུ་ཡ་ཐི་དང་ཏུ་ཝ། ཁཱལ་མུག་སོགས་ནས་ཀྱང་ཕེབས་ཡོད་འདུག
ཚེས་ ༢༢ ཉིན། ༧གོང་ས་མཆོག་གིས་སོག་ཡུལ་རྒྱ་ས་ཨུ་ལན་བྷ་ཋིར་གྱི་རིག་གཞུང་ལྟེ་གནས་ཁང་དུ། སོག་རིགས་གཞོན་སྐྱེས་ཚོར་བཀའ་སློབ་གནང་སྐབས། སོག་པོའི་གོང་མ་ཇི་གྷི་སི་ཁཱེན་གྱི་སྙིང་སྟོབས་རྒྱུན་འཛིན་བྱེད་དགོས་སྐོར་དང་། མ་འོངས་པར་ཡང་ཁོང་ཉིད་བསྐྱར་དུ་སོག་ཡུལ་ནང་ཆིབས་བསྒྱུར་བསྐྱང་རྒྱུའི་ཐུགས་རེ་ཡོད་སྐོར་སོགས་བཀའ་གནང་ཡོད་པ་རེད། ༧གོང་ས་མཆོག་གིས་བཀའ་གནང་དོན། “ བོད་དང་ཆེན་པོ་ཧོར་གྱི་ཡུལ་གཉིས་ལོ་ངོ་སྟོང་ཕྲག་རིང་ནས་མཛའ་བརྩེའི་འབྲེལ་བ་ཡོད། ལྷག་པར་དུ་སོག་ཡུལ་དུ་ནང་ཆོས་དར་ཁྱབ་བྱུང་རྗེས་ཡུལ་གཉིས་བར་ཆོས་ཡོན་གྱི་འབྲེལ་བ་བྱུང་བ་རེད།” ཅེས་སོགས་གསུངས་ཡོད་པ་རེད།
ཉིན་འགའི་རྗེས་སུ་བོད་ནས་ཕེབས་པའི་ཆོས་ཞུ་བ་རྣམས་པར་མཇལ་ཁ་འཇོག་གནང་མཛད་རྒྱུ་ཡིན་པ་དང་། དེའི་རྗེས་སླར་ཡང་རྒྱ་གར་ལྷོ་ཕྱོགས་སུ་ཆིབས་ཞབས་བསྒྱུར་རྒྱུ་ཡིན་པ་རེད།
