ཊི་རུམ་ཕིའི་ཁ་པར་ནང་གི་ཁ་བརྡའི་རྩོད་ཉོག

སྐུ་ཞབས་ཊི་རུམ་ཕི་ཡིས་ལྕམ་ཚའེ་ཡེན་ཝན་ལ་ཁ་པར་ཞིག་བཏང་བ་དེས་ཨ་རྒྱ་གཉིས་བར་གྱི་འབྲེལ་ལམ་ལ་དོ་ཕོག་འགྲོ་རྒྱུ་ཡིན་པ་མ་ཟད་གནད་དོན་དེར་རྐྱེན་བྱས་ཏེ་རྡུལ་ཕྲན་མཚོན་ཆ་དང་གནམ་གཤིས་འགྱུར་ལྡོག་སོགས་ཀྱི་རྒྱལ་སྤྱིའི་མཉམ་ལས་ཁག་ཅིག་ལའང་དོ་ཕོག་འགྲོ་སྲིད་པ་རེད་ཟེར།

དེ་རིང་རོའུ་ཊར་གསར་ཁང་གིས་གནས་ཚུལ་སྤེལ་བ་ལྟར་ན། ཟླ་འདིའི་ཕྱི་ཚེས་ ༢ ཉིན་ཐའེ་ཝན་སྲིད་འཛིན་ལྕམ་ཚའེ་ཡེན་ཝན་དང་གསར་དུ་བདམས་ཐོན་བྱུང་བའི་ཨ་རིའི་སྲིད་འཛིན་སྐུ་ཞབས་ཊི་རུམ་ཕི་རྣམ་གཉིས་ཀྱིས་ཁ་པར་སྐུད་ལམ་ནས་ཕན་ཚུན་འཚམ་འདྲི་དང་རྒྱལ་ཁབ་གཉིས་བར་གྱི་ཆབ་སྲིད་དང་དཔལ་འབྱོར། བདེ་འཇགས་སོགས་ཀྱི་སྐོར་ལ་གླེང་མོལ་བྱུང་བ་དེར། རྒྱ་ནག་གཞུང་གིས་སྐྱོན་བརྗོད་ཤུགས་ཆེན་བྱེད་བཞིན་ཡོད་པ་མ་ཟད། ཐའེ་ཝན་མཚོ་འགག་གི་སྲུང་དམག་ཉུང་དུ་གཏོང་དགོས་པ་དང་། ཐའེ་ཝན་གྱིས་འབྲེལ་ཡོད་རྒྱལ་ཁབ་ཁག་ཅིག་གི་འབྲེལ་ལམ་གཅོད་དགོས་ལུགས་སོགས་བཤད་ཡོད་འདུག

གནས་ཚུལ་དེའི་ཐོག་པེ་ཅིན་མི་རིགས་སློབ་ཆེན་གྱི་རྒྱལ་སྤྱིའི་འབྲེལ་ལམ་ཞིབ་འཇུག་ལྟེ་གནས་ཀྱི་འགན་འཛིན་ཧྲི་ཡེན་ཧོང་ (Shi Yin Hong)གིས། རྒྱ་ནག་གཞུང་གིས་སྐུ་ཞབས་ཊི་རུམ་ཕི་ཡི་ཕྱི་འབྲེལ་སྲིད་བྱུས་ལ་རེ་ལྟོས་བྱས་བཞིན་ཡོད་པ་དང་། གལ་སྲིད་སྐུ་ཞབས་ཊི་རུམ་ཕི་ཡིས་མ་འོངས་པར་སྲིད་འཛིན་ལས་ཁུངས་ནས་ཀྱང་མུ་མཐུད་འདི་ལྟར་བྱས་པ་ཡིན་ན། རྒྱ་ནག་ཕྱོགས་ནས་ཕྱོགས་གཉིས་ཀྱི་འབྲེལ་ལམ་ཐད་ཀྱི་སྲིད་ཇུས་ལ་འགྱུར་བ་གཏོང་སྲིད་པ་དང་། སྐུ་ཞབས་ཊི་རུམ་ཕི་ཡིས་སྔོན་མའི་ཨ་རིའི་སྲིད་འཛིན་ཁར་ཊིར་ (Carter) ལགས་ཀྱི་སྐབས་ནས་རྒྱུན་འཁྱོངས་བྱས་ཡོང་བའི་རྒྱ་ནག་རྒྱལ་ཁབ་གཅིག་གི་ལམ་ལུགས་ཐད་རྩོད་གླེང་བྱས་པ་ཡིན་ན། དེ་ལ་རྒྱ་ནག་གཞུང་གིས་ཧ་ཅང་ནུས་པ་ལྡན་པའི་ཡ་ལན་བསློག་སྲིད་པ་རེད། རྩོད་རྙོག་དེའི་ནང་ཨ་རིའི་བདེ་འཇགས་དང་འབྲེལ་བའི་བྱང་ཀོ་རི་ཡའི་རྡུལ་ཕྲན་ཚོན་ཆའི་གནད་དོན་ཐོག་འཛིན་པའི་རྒྱ་ནག་གི་སྲིད་ཇུས་དང་། རྒྱལ་སྤྱིའི་མཚོ་འགྲུལ་རང་དབང་དང་འབྲེལ་བའི་རྒྱ་ནག་ལྷོ་བརྒྱུད་མཚོ་ཁུལ་གྱི་བདག་དབང་རྩོད་གླེང་སོགས་ཀྱང་ཚུད་ཡོད་པ་རེད། ཅེས་བཤད་འདུག

པེ་ཅིན་སློབ་ཆེན་གྱི་རྒྱལ་སྤྱིའི་འབྲེལ་ལམ་ཞིབ་འཇུག་ཚན་པའི་སློབ་སྟོན་པ་ཅ་ཆིན་གོ་ (Jia Qingguo)ཞུ་བས། ཐེངས་འདིའི་གནད་དོན་དེས་སྐུ་ཞབས་ཊི་རུམ་ཕི་ཡིས་མ་འོངས་པར་ཕྱོགས་གཉིས་ཀྱི་འབྲེལ་ལམ་ཐད་ལྡོག་ཕྱོགས་ཀྱི་སྲིད་ཇུས་ཤིག་འཛིན་རྒྱུ་ཡིན་པ་ར་སྤྲོད་བྱས་ཡོད་པ་དང་། དེས་ཨ་རྒྱ་གཉིས་བར་གྱི་འབྲེལ་ལམ་ལ་དོ་ཕོག་བཟོས་པ་མ་ཟད། ད་དུང་ཨ་རིའི་ཁེ་ལས་ཁག་ལའང་དོ་ཕོག་བཟོས་ཡོད་པ་དང་། གལ་ཏེ་ཊི་རུམ་ཕི་ཡིས་མ་འོངས་པར་ཨ་རིའི་སྲིད་འཛིན་ལས་ཁུངས་ནས་ཀྱང་འདི་ལྟར་བྱས་པ་ཡིན་ན། རྒྱ་ནག་དང་ཐའེ་ཝན་མཚོ་འགག་བར་གྱི་གནད་དོན་དང་། ཨ་རི་དང་རྒྱ་ནག་གཉིས་བར་གྱི་ཁེ་ལས་ལའང་དོ་ཕོག་བཟོ་ངེས་ཡིན་པ་དང་། གནད་དོན་དེ་དང་འབྲེལ་ཏེ་ཕྱོགས་གཉིས་དཔལ་འབྱོར་ཁེ་ལས་དང་རྒྱལ་ཁབ་བདེ་འཇགས་ལ་ཐབས་གདུག་གི་གནས་ཚུལ་འབྱུང་སྲིད་སྐོར་སོགས་བཤད་འདུག

གནས་ཚུལ་འདིའི་ནང་། ཝ་ཤིན་ཏོན་དང་པེ་ཅིན་གཉིས་ཀྱིས་བྱང་ཀོ་རི་ཡ་དང་ཨེ་རན་གྱི་རྡུལ་ཕྲན་ཚོན་ཆའི་གནད་དོན། དེ་བཞིན། སའི་གོ་ལའི་གནམ་གཤིས་འགྱུར་ལྡོག་སོགས་ཀྱི་མཉམ་ལས་ཁག་ལའང་སྐུ་ཞབས་ཊི་རུམ་ཕི་ཡིས་དེ་སྔའི་གྲོས་ཆོད་དེ་དག་ལ་བསྐྱར་ཞིབ་བྱས་ཏེ་ཨ་རིའི་ཁེ་ཕན་གཙོ་བོར་འཛིན་རྒྱུ་ཡིན་པ་དང་། ཐའེ་ཝན་མཚོ་འགག་གི་གནད་དོན་དེ་ནི་ཕྱི་ལོ་ ༡༩༥༩ ལོར་གོ་གུང་གཉིས་ཁ་གྱེས་པ་ནས་བཟུང་ད་བར་སེལ་མ་ཐུབ་པའི་རྙོག་གླེང་ཞིག་ཡིན་པ་དང་། རྒྱ་ནག་གཞུང་གིས་དྲག་ཤུགས་ལ་བརྟེན་ནས་ཐའེ་ཝན་མཚོ་འགག་ཚུར་ལེན་རྒྱུ་གསལ་བསྒྲགས་བྱས་མེད་ནའང་། ཐའེ་ཝན་གྱིས་རྒྱ་ནག་གི་དྲག་ཆས་མཚོན་ཆའི་ཁ་ཐའེ་ཝན་ཕྱོགས་ལ་གཏད་ཡོད་པར་དོགས་གཞི་བྱེད་ཀྱིན་ཡོད་པ་དང་། ལྕམ་ཚའེ་ཡེན་ཝན་གྱིས་རྒྱ་ནག་སྐམ་ས་ཆེན་མོ་དང་ལྷན་དུ་ཞི་བདེ་བརྟན་ལྷིང་གི་འབྲེལ་ལམ་རྒྱུན་འཁྱོངས་བྱེད་འདོད་ཡོད་ནའང་། རྒྱ་ནག་ཕྱོགས་ནས་ལྕམ་ཚའེ་ཡེན་ཝན་གྱིས་ཐའེ་ཝན་རང་བཙན་བྱེད་ཐབས་སུ་འབད་བརྩོན་བྱེད་བཞིན་ཡོད་པར་དོགས་གཞི་བྱེད་ཀྱིན་ཡོད་སྐོར་སོགས་འཁོད་འདུག

ཨེ་ཕེ་གསར་གསར་ཁང་གིས་སྤེལ་བའི་གནས་ཚུལ་ཞིག་གི་ནང་། དེ་རིང་རྒྱ་ནག་ཕྱི་འབྲེལ་ལྷན་ཁང་གི་མགྲིན་ཚབ་པ་ལུ་ཀང་གིས། སྐུ་ཞབས་ཊི་རུམ་ཕི་ཡིས་ཁོང་གི་ཊི་ཝིར་ཊི་ (tweet) ཐོག་ཀུན་སློང་ག་འདྲ་ཞིག་བསྟན་ཡོད་ནའང་། རྒྱ་ནག་གིས་ཕྱོགས་གཉིས་བར་གྱི་འབྲེལ་ལམ་བརྟན་ལྷིང་ལ་མུ་མཐུད་རྒྱབ་སྐྱོར་ཡོང་བར་ཡིད་ཆེས་བྱེད་ཀྱིན་ཡོད་ལུགས་དང་། ཨ་རྒྱ་གཉིས་ཀྱི་སུ་ལ་མཚོན་ནའང་། ཁོང་ཚོས་སྐུ་ཞབས་ཊི་རུམ་ཕི་སྒེར་དོན་ལ་བརྡ་ལན་སྤྲོད་ཀྱི་མེད་པར། ཁོང་ཚོས་སྐུ་ཞབས་ཊི་རུམ་ཕི་ཡིས་རྒྱ་ནག་ཐོག་འཛིན་པའི་སྲིད་ཇུས་ལ་དོ་སྣང་བྱེད་ཀྱིན་ཡོད་ཚུལ་བཤད་འདུག

གཞན། རྒྱ་ནག་གཞུང་འབྲེལ་གོ་ལའི་དུས་བབ་དྲ་ཚིགས་སྟེང་། ཐའེ་ཝན་ལ་ཉེས་ཆད་གཅོད་ཐབས་ལེགས་ཤོས་དེ་སྐུ་ཞབས་ཊི་རུམ་ཕི་ལ་ཉེན་བརྡ་གཏོང་རྒྱུ་དེ་ཡིན་པ་དང་། ཊི་རུམ་ཕི་ལ་ཕྱི་འབྲེལ་སྲིད་ཇུས་ཐད་ཉམས་མྱོང་མེད་པ་དང་། ཁོས་མ་འོངས་པའི་ཨ་རྒྱ་གཉིས་བར་གྱི་འབྲེལ་ལམ་དང་དེའི་མཇུག་འབྲས་གང་འདྲ་ཡིན་པ་ཤེས་ཀྱི་མེད་ལུགས་སོགས་བཤད་ཡོད་འདུག

གསར་འགོད་པ། པདྨ་རྒྱལ།