རྒྱ་ནག་གཞུང་གིས་རིག་གསར་བསྐྱར་སློང་བྱེད་བཞིན་པའི་རྣམ་པར་མཐའ་གཅིག་ཏུ་ངོ་རྒོལ་ཡོད།

༧གོང་ས་མཆོག་ལ་ཞི་བདེ་གཟེངས་རྟགས་འབུལ་བཞེས་དང་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཉིན་མོར། བོད་མིའི་སྒྲིག་འཛུགས་ཀྱིས་རྒྱ་གཞུང་གིས་བོད་པའི་དགོན་སྡེ་ཁག་གཏོར་བཤིག་དང་བོད་རིགས་མི་མང་ཚོའི་ཕྱི་སྐྱོད་ཐོག་དམ་དྲག་བྱེད་བཞིན་པའི་སྲིད་བྱུས་ལ་ངོ་རྒོལ་བསྒྲགས་གཏམ་སྤེལ་སོང་།

དེ་རིང་སྔ་དྲོའི་ཆུ་ཚོད་ ༡༠།༣༠ སྟེང་བཞུགས་སྒར་དྷ་ས་ཐེག་ཆེན་ཆོས་གླིང་གཙུག་ལག་ཁང་དུ་༧གོང་ས་རྒྱལ་བ་རིན་པོ་ཆེ་མཆོག་ལ་ནོ་བྷེལ་ཞི་བདེ་གཟེངས་རྟགས་འབུལ་བཞེས་མཛད་དེ་ལོ་ངོ་ ༢༧ འཁོར་བའི་ཉིན་མོ་སྲུང་གཙི་ཞུས་ཡོད་པ་དང་། དུས་སྟོན་མཛད་སྒོའི་སྟེང་བོད་མིའི་སྒྲིག་འཛུགས་ཀྱི་དམངས་གཙོའི་ཀ་བ་གསུམ་གྱི་མཛད་གཙོ་རྣམ་པ་དང་གཞུང་ཞབས་ལས་བྱེད་ཆེ་ཕྲ། དེ་བཞིན། བཞུགས་སྒར་ཁུལ་གྱི་དགོན་སྡེ་ཁག་གི་གྲྭ་བཙུན་དང་སློབ་གྲྭ་ཁག་གི་སློབ་ཕྲུག་བཅས་འཛོམས་འདུག

མཛད་སྒོའི་ཐོག་མར་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་བོད་མི་མང་སྤྱི་འཐུས་ཀྱི་གསུང་བཤད་སྒྲོག་སྦྱངས་གནང་བའི་ནང་། སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གིས་བོད་རྒྱ་གཉིས་བར་ཞི་འགྲིག་ཡོང་ཐབས་སུ་ལྷག་བསམ་རྣམ་དག་གིས་རྒྱུན་སྐྱོང་མཛད་པ་དང་། བོད་མིའི་དམངས་གཙོའི་སྒྲིག་འཛུགས་ཀྱི་ཁྲིམས་བཟོ་ལྷན་ཚོགས་ཀྱིས་གཏན་ལ་ཕབ་པའི་དབུ་མའི་ལམ་གྱི་སྲིད་བྱུས་ནི་རྒྱ་ནག་གི་རྩ་ཁྲིམས་ཀྱི་སྒྲོམ་གཞིའི་འོག་ཁྲིམས་མཐུན་གྱི་ཐོབ་ཐང་ཡོད་པའི་བོད་རིགས་ཡོངས་ལ་མི་རིགས་ས་གནས་རང་སྐྱོང་གི་གནས་བབ་ཚད་ལྡན་མིང་དོན་མཚུངས་པ་ཞིག་དགོས་ཞེས་ཁ་བྲལ་མིན་པ་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་ཀྱི་སྒྲོམ་གཞིའི་ནང་གནས་རྒྱུ་ཡིན་པ་གསལ་པོར་ཤེས་བཞིན་དུ། རྒྱ་ནག་གཞུང་གིས་དུས་སྐབས་ནམ་བྱུང་ལ་ཁ་བྲལ་བ་ཅེས་ཡང་ནས་བསྐྱར་དུ་བཤད་དེ་རེ་སྟོང་ཞིག་འགྲུབ་རེའི་མཁྲེགས་འཛིན་གྱི་སྲིད་བྱུས་དེར་འགྱུར་བ་བཏང་སྟེ་བོད་རྒྱ་གཉིས་ཀའི་འཕྲལ་ཕུགས་གཉིས་ཕན་གྱི་ཞི་འགྲིག་ལ་འཕྲལ་ནས་མྱུར་དུ་བསམ་ཤེས་ཀྱིས་༧གོང་ས་མཆོག་གི་སྐུ་ཚབ་དང་རྒྱ་གཞུང་བར་འབྲེལ་མོལ་གང་མྱུར་ཡོང་ཐབས་གནང་དགོས་པའི་འབོད་སྐུལ་བྱ་རྒྱུ་ཡིན།” ཞེས་འཁོད་འདུག

ཚོགས་གཙོ་མཆོག་གིས་མུ་མཐུད་དུ། དེ་རིང་ཉིན་རྒྱབ་ནས་ཉིན་གཉིས་རིང་བཞུགས་སྒར་དྷ་རམ་ས་ལར་ཧི་མ་ལ་ཡའི་དུས་སྟོན་སྲུང་བརྩི་དང་འབྲེལ། ས་གནས་ཡུལ་མི་རྣམས་ནས་ཀྱང་༧གོང་ས་སྐྱབས་མགོན་ཆེན་པོའི་མཛད་འཕྲིན་ལ་ཆེ་བསྟོད་ཞུ་བ་དང། ཧིན་བོད་མི་མང་བར་མཛའ་བརྩེའི་ལར་ཞེན་གཡོ་བ་མེད་པའི་རྣམ་པ་མཚོན་གྱི་ཡོད་སྟབས། ཧི་མ་ལ་ཡའི་དུས་སྟོན་གོ་སྒྲིག་འགན་བཞེས་གནང་མཁན་ཚང་མར་ཐུགས་རྗེ་ཆེ་ཞུ་རྒྱུ་ཡིན། རྒྱ་གར་དབུས་སའི་གཞུང་དང་། མི་མང་གིས་ང་ཚོར་ཕན་གྲོགས་གནང་བའི་བཀའ་དྲིན་ནི་དུས་ནམ་ཡང་བརྗེད་ཐབས་མེད་པས། ད་ལན་སླར་ཡང་ཐུགས་རྗེ་བཀའ་དྲིན་ཆེ་ཞེས་ཞུ་རྒྱུ་དང་། ད་དུང་ཧིན་བོད་གཉིས་ཀྱི་མི་མང་བར་མཛའ་མཐུན་གོང་འཕེལ་མུ་མཐུད་གནས་རྒྱུར་ཚང་མས་མཉམ་རུབ་རྒྱུན་སྲིང་གནང་རྒྱུའི་འབོད་སྐུལ་ཞུ་བཞིན་ཡོད། ཅེས་སོགས་འཁོད་ཡོད་པ་སྒྲོགས་སྦྱང་གནང་སོང་།

སྲིད་སྐྱོང་བློ་བཟང་སེང་གེ་མཆོག་གིས་བཀའ་ཤག་གི་གསུང་བཤད་སྒྲོགས་སྦྱང་གནང་བའི་ནང་། “ལོ་རེ་བཞིན་༧གོང་ས་སྐྱབས་མགོན་ཆེན་པོའི་མཚན་སྙན་མཛད་འཕྲིན་ཡར་ངོའི་ཟླ་བ་ལྟར་འཕེལ་བཞིན་པའི་དབང་གིས། འཛམ་གླིང་ཤར་ནུབ་རྒྱལ་ཁབ་དང་ཚོགས་སྡེ་མང་པོས་ཀྱང་གཟེངས་བསྟོད་དང་ཕྱག་འཁྱེར་གྲངས་ ༡༥༠ ལྷག་འབུལ་བཞེས་བྱུང་ཡོད་པ་བཅས་ནས། སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་ནི་འཛམ་གླིང་ནང་གུས་བཀུར་ཆེ་ཤོས་ཞུ་ཡུལ་གྱི་དབུ་འཁྲིད་ཅིག་ལ་ངོས་འཛིན་ཞུ་བཞིན་ཡོད་པ་གསལ་པོ་མཚོན་ཐུབ།” ཅེས་འཁོད་འདུག

སྲིད་སྐྱོང་མཆོག་གིས་༧གོང་ས་རྒྱལ་བ་རིན་པོ་ཆེ་མཆོག་ལ་འཛམ་གླིང་ཞི་བདེ་གཟེངས་རྟགས་འབུལ་བཞེས་གནང་པའི་ཉིན་མོ་སྲུང་གཙི་དང་འབྲེལ་ཏེ། དེ་རིང་གི་ཉིན་མོ་འདི་མཉམ་འབྲེལ་རྒྱལ་ཚོགས་ཀྱིས་ཡོངས་ཁྱབ་འགྲོ་བ་མིའི་ཐོབ་ཐང་གསལ་བསྒྲགས་སྤེལ་ནས་མི་ལོ་ ༦༨ འཁོར་བའི་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཉིན་མོར་ཡང་སྲུང་གཙི་བྱེད་ཀྱི་ཡོད་རུང་། བློ་ཕམ་པ་ཞིག་ལ་ད་ལྟའང་བོད་ཀྱིས་གཙོས་འཛམ་གླིང་ཡུལ་གྲུ་མང་པོའི་ནང་འགྲོ་བ་མིའི་ཐོབ་ཐང་ལ་བརྡལ་བཤིག་ཚབས་ཆེ་གཏོང་མུས་ཀྱི་གནས་སྟངས་སོགས་ལ་གཞིགས་ཚེ། དེ་འདྲའི་ཉིན་མོ་ཞིག་ཏུ་སྲུང་གཙི་བྱེད་འོས་མ་མཐོང་ནའང་། བཙན་གནོན་དང་དམ་དྲག་འོག་སྡུག་གཅོང་མནར་གཅོད་མྱོང་བཞིན་ཡོད་པ་དེ་དག་དྲན་གསོ་ཞུ་རྒྱུའི་དུས་ཚིགས་ཤིག་ལ་ངོས་འཛིན་གྱིས་མཉམ་འབྲེལ་རྒྱལ་ཚོགས་དང་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་སོགས་ནས་ཐུགས་ཁུར་བཞེས་ཏེ་འགྲོ་བ་མིའི་ཐོབ་ཐང་གི་སྲིད་བྱུས་མིང་དོན་མཚུངས་པ་ཞིག་ལག་ལེན་ཡོང་བའི་འབོད་སྐུལ་ཞུ་རྒྱུ་ཡིན། ཞེས་གསུངས་སོང་།

སྲིད་སྐྱོང་མཆོག་གིས་རྒྱ་ནག་གི་དབང་སྒྱུར་སྲིད་ཇུས་ཐད་ལ། རྒྱ་ནག་གི་རིག་གནས་གསར་བརྗེ་ཟེར་བའི་གཡོན་ཐལ་ཅན་གྱི་སྲིད་བྱུས་དེ་མཇུག་སྒྲིལ་ནས་ད་ཆ་ལོ་ ༤༠ ཧྲིལ་པོ་སོང་ཡོད་ནའང་། བོད་ནང་ལ་མཚོན་ན་ལོ་རེ་བཞིན་དྲག་གནོན་དང་དམ་དྲག་ཇེ་ཆེར་བཏང་སྟེ་དེ་སྔའི་རིག་གནས་གསར་བརྗེའི་སྐབས་ཀྱི་སྲིད་བྱུས་སླར་ཡང་ལག་བསྟར་བྱེད་པ་བཞིན་ཆགས་ཡོད། བོད་མིའི་ཆོས་དད་རང་དབང་ལ་བརྩི་མེད་རྡོག་རོལ་ཚབས་ཆེན་གཏོང་བཞིན་པ་ནི། འདི་ལོར་གསེར་རྟ་ལྔ་རིག་ནང་བསྟན་སློབ་གླིང་གི་ཆོས་བྱེད་གྲྭ་བཙུན་ཁྲི་ཚོ་བརྒལ་བའི་གྲྭ་ཤག་གཏོར་བཤིག་དང་། བཙན་དབང་གི་སྒོ་ནས་གྲྭ་བཙུན་ཕྱིར་ཕུད་བཏང་དང་གཏོང་བཞིན་པའི་གནས་ཚུལ་རྣམས་འཛམ་གླིང་ཡོངས་ལ་ཁྱབ་ཡོད། རྒྱ་གཞུང་གིས་འཆར་གཞི་ལྡན་པའི་སྒོ་ནས་གཏོར་བཤིག་དང་བཙན་གནོན་གྱི་སྲིད་བྱུས་ལག་བསྟར་བྱེད་བཞིན་པར་འདོད་མོས་མེད་པ་གསལ་འདོན་བྱ་ཆེད། བཙུན་མ་གསུམ་ནས་རང་སྲོག་བཅད་ཡོད་པ་དང་། གྲྭ་བཙུན་ཕྱིར་ཕུད་བྱས་པ་ཚོ་ཕྱིར་ལོག་མི་ཆོག་པའི་བཙན་བཀའ་བཏང་བར་ཡིག་ཐོག་ཁས་ལེན་བྱེད་དུ་བཅུག་འདུག དེ་མཚུངས་ཡ་ཆེན་སྒར་ནས་འདི་ལོའི་ཕྱི་ཟླ་ ༤ པ་ཙམ་ནས་འགོ་བཙུགས་ཏེ་བཙུན་མ་ཆིག་སྟོང་ཙམ་ཕྱིར་ཕུད་བཏང་གནས་འགྲོ་བ་མིའི་ཐོབ་ཐང་ལྟ་རྟོག་ཚོགས་པའི་སྙན་ཐོའི་ནང་བཀོད་ཡོད། དེ་ཡང་བཙུན་མ་དེ་དག་གི་ནང་མི་ཚོར་འཇིགས་སྐུལ་དང་། ཐོབ་ཐང་མེད་པ་བཟོ་རྒྱུས་མཚོན་ཉེས་ཆད་ནན་པོ་གཅོད་རྒྱུ་ཡིན་སྐོར་བཙན་བཀའ་བཏང་ཡོད། བླ་རུང་སྒར་དང་ཡ་ཆེན་སྒར་གཉིས་ནས་ཕྱིར་འབུད་བཏང་བའི་བཙུན་མ་རྣམས་རང་ཁྱིམ་དུ་ལོག་རྗེས་དགོན་སྡེ་གཞན་ནང་འཛུལ་ཞུགས་མི་ཆོག་པ་དང་། ཆོས་ཕྱོགས་ཀྱི་བྱེད་སྒོ་གང་ཡང་སྤེལ་མི་ཆོག་པའི་དམ་དྲག་བྱས་ཡོད་པ་དེས། དོན་དམ་གྱི་ཆོས་དད་རང་དབང་ཞིག་མེད་པ་ཀུན་གྱིས་ཤེས་གསལ་རེད། དེ་ཙམ་མ་ཟད། བཙུན་མར་དམག་ཆས་གཡོགས་ནས་འདོད་པ་མེད་བཞིན་དུ་རྒྱལ་གཅེས་ཀྱི་གླུ་གཞས་གཏོང་བཅུག་པ་དང་། ཡང་སེར་མོ་བ་ཚོར་སྡིངས་ཆའི་ཐོག་བཙན་དབང་གིས་ཞབས་བྲོ་འཁྲབ་སྟོན་བྱེད་བཅུག་པ་ནི་འདུལ་ཁྲིམས་ལ་ཁྱད་གསོད་བྱེད་པའི་ཐ་ཤལ་གྱི་བྱ་སྤྱོད་དེ་ལྟ་བུའི་སྒོ་ནས་རྒྱལ་གཅེས་ཆོས་གཅེས་ཟེར་བའི་སློབ་གསོ་སྤེལ་བཞིན་པ་བརྒྱུད་ལམ་ཁག་ནང་མཐོང་རྒྱུ་ཡོད། བླ་རུང་སྒར་དང་ཡ་ཆེན་སྒར་གཉིས་ཐོག་ལག་བསྟར་བྱེད་བཞིན་པའི་སྲིད་བྱུས་ནི་རིག་གནས་གསར་བརྗེའི་སྐབས་ཀྱི་གནས་སྟངས་དྲན་གསོ་དང་བསྐྱར་སློང་ཡོང་རྒྱུའི་འཇིགས་སྣང་སྐྱེ་དགོས་པ་ཆགས་ཡོད། ཅེས་གསུངས་སོང་།

སྲིད་སྐྱོང་མཆོག་གིས། རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་སྤྱི་འབངས་གཞན་དང་མི་འདྲ་བར་བོད་མི་ཚོར་ཕྱིའི་རྒྱལ་ཁབ་ཁག་ཏུ་གནས་མཇལ་དང་ཡུལ་སྐོར་སོགས་སུ་འགྲོ་བར་དམ་དྲག་གིས་ཕྱི་བསྐྱོད་ལག་འཁྱེར་སྤྲོད་རྒྱུར་ཚོད་འཛིན་བྱེད་པ་དང་། ད་བར་ཕྱི་བསྐྱོད་ལག་འཁྱེར་ཉུང་ཤས་སྤྲད་ཟིན་པ་རྣམས་ཀྱང་བཙན་པོ་དབང་ཤེད་ཀྱིས་ཕྱིར་བསྡུ་བྱེད་བཞིན་ཡོད། དེའི་ནང་ནས་ཀྱང་ཉུང་ཤས་ཤིག་བལ་ཡུལ་དུ་འགྲོ་རྒྱུའི་ཐོངས་མཆན་ཐོབ་ནས་ད་ལྟ་བལ་ཡུལ་དང་རྒྱ་གར་གཉིས་སུ་ཡོད་པའི་ནང་པའི་གནས་ཆེན་ཁག་ལ་ཆོས་མཇལ་ཞུ་བར་ཡོང་བ་རྣམས་འཕྲལ་དུ་ཕྱིར་ལོག་མ་བྱས་ཚེ་ཉེས་ཆད་འགེལ་རྒྱུ་དང་། ཐོབ་ཐང་ཇི་ཡོད་མེད་པ་བཟོ་རྒྱུའི་ཉེན་བརྡ་དང་འཇིགས་བསྐུལ་བྱེད་པ་སོགས་ནི། རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་ཀྱི་མདུན་སར་མི་རིགས་འདྲ་མཉམ་མེད་པ་མངོན་གསལ་དང་། ལྷག་པར་དུ་བོད་མི་ཚོའི་ཐུན་མོང་མ་ཡིན་པའི་ངོ་བོར་མཐོང་ཆུང་ཁྱད་གསོད་བྱེད་པ་ཞིག་ཀྱང་རེད་ཅེས་ཞུ་འདོད་བྱུང་།

མདོ་དོན་རྒྱ་ནག་གཞུང་གིས་བོད་བཙན་བཟུང་བྱས་པ་ནས་བཟུང་ད་བར་བོད་མིའི་ཐོག་དྲག་གནོན་དང་གཡོན་ཐལ་ཅན་གྱི་སྲིད་བྱུས་རིམ་པ་ལག་བསྟར་བྱས་དང་བྱེད་མུས་ཡིན་པ་དང་། ཡང་ཕྱོགས་གཞན་ནས་དཔལ་འབྱོར་ལྷུག་གཏོང་གི་སྲིད་བྱུས་ཤིག་ཀྱང་འཛིན་ཁུལ་བྱེད་ཀྱི་ཡོད་ནའང་། ཇི་སྲིད་བོད་དོན་ཐག་གཅོད་མ་བྱུང་གི་བར་དུ། བོད་མི་ཚོའི་བློ་སེམས་ནམ་ཡང་འགུག་ཐབས་བྲལ་བ་ཞིག་ཡིན་པ་དེ་རྒྱ་གཞུང་གི་འགོ་འཁྲིད་ཚོས་ངོ་གསལ་པོ་འཕྲོད་པའི་ཐོག་༧གོང་ས་སྐྱབས་མགོན་ཆེན་པོ་མཆོག་གིས་བཏོན་གནང་མཛད་པའི་གཉིས་སྨན་དབུ་མའི་ལམ་གྱི་སྲིད་བྱུས་གཞིར་བཟུང་གིས་བོད་དོན་དཀའ་རྙོག་སེལ་དགོས་པར་འབོད་སྐུལ་བྱེད་རྒྱུ་ཡིན། སྲིད་འཛིན་ཞི་ཅིན་ཕིན་ལ་ཏང་སྲིད་དམག་གསུམ་གྱི་དབང་ཆ་ཆ་ཚང་ཡོད་ཐོག་ཉེ་ཆར་དམར་ཤོག་ཚོགས་ཆེན་ཐེངས་དྲུག་པའི་ཐོག་དབུ་འཁྲིད་གོང་མ་དང་མི་འདྲ་བར“ཏང་དང་རྒྱལ་ཁབ་ཀྱི་སྲོག་ཤིང”ཞེས་པར་ངོས་འཛིན་བྱས་ཡོད། དེར་བརྟེན་ཆབ་སྲིད་ཀྱི་ཆོད་སེམས་ཤིག་ཡོད་ན་དབང་ཆ་དང་གོ་སྐབས་གཉིས་ཀ་ཡོད་པས། ང་ཚོའི་ངོས་ནས་དབུ་མའི་ལམ་གྱི་སྲིད་བྱུས་གཞིར་བཞག་བོད་དོན་འགྲིག་མཐུན་ཡོང་ཐབས་སུ། རྒྱ་གཞུང་གི་འགོ་འཁྲིད་དང་གྲོས་མོལ་ཞུ་རྒྱུའི་ཆོད་སེམས་བརྟན་པོ་ཡོད་ཅེས་རྒྱ་གཞུང་གི་འགོ་འཁྲིད་ཚོར་སླར་ཡང་ནན་བརྗོད་བྱེད་འདོད་བྱུང་། ཞེས་དང་། སྐུ་ཞབས་ཨེན་ཊོ་ནིའོ་གུ་ཊེར་རེ་སི་ (Mr. Antonio Guterres) མཆོག་མཉམ་འབྲེལ་རྒྱལ་ཚོགས་ཀྱི་སྤྱི་ཁྱབ་དྲུང་ཆེར་འོས་འདེམས་བྱུང་བར་དགའ་བསུའི་འཚམས་འདྲི་ཞུ་རྒྱུ་དང་། ཉེ་སྔོན་རྒྱ་ནག་གི་རྒྱལ་ས་པེ་ཅིང་དུ་འགྲོ་བ་མིའི་ཐོབ་ཐང་སྐོར་གླེང་སློང་གནང་བར་བསྔགས་བརྗོད་ཞུ་རྒྱུ་ཡིན། ཞེས་སོགས་གསུངས་སོང་།

མཛད་སྒོའི་མཇུག་ཏུ་བཙན་བྱོལ་གཞུང་མང་གཉིས་ནས་གསེར་རྟ་བླ་རུང་སྒར་དང་ཡ་ཆེན་སྒར། དེ་བཞིན། བོད་བསྟན་སྲིད་ཀྱི་ཆེད་དུ་སྐུ་གྲོངས་པའི་རྒྱལ་གཅེས་དཔའ་བོ་དཔའ་མོ་རྣམས་ལ་གདོང་སེམས་མཉམ་སྐྱེད་ཆེད་དུ། རྒྱ་ནག་གཞུང་གིས་གཏོར་བཞིན་པའི་བླ་རུང་སྒར་དང་ཡ་ཆེན་སྒར་གྱི་འདྲ་པར་སོགས་བཤམས་ནས་ཞལ་འདོན་དང་མར་མེ་མཆོད་འབུལ་གནང་རྗེས། སྲིད་སྐྱོང་བློ་བཟང་སེང་གེ་མཆོག་གིས། ད་ལྟའི་བར་བོད་ནང་གི་བོད་ཀྱི་བདག་པོ་དཔའ་པོ་དཔའ་མོ་མང་པོ་ཞིག་བོད་རྩ་དོན་གྱི་ཆེད་དུ་རང་སྲོག་བློས་གཏོང་མཁན་ཚང་མ་དང་། དམིགས་བསལ་རང་ལུས་མེར་བསྲེགས་གནང་མཁན་ ༡༤༥ ཆགས་ཡོང་གི་ཡོད་པ་རེད། ཁོ་ཚོ་ཚང་མའི་ཆེད་དུ་ཐུགས་སྨོན་གནང་རོགས་གནོངས་ཞུ་རྒྱུ་ཡིན་ལ། དམིགས་བསལ་བླ་རུང་སྒར་ལྟ་བུ་ཡིན་ན། ཉེ་ཆར་རྒྱ་ནག་གཞུང་གིས་བླ་རུང་སྒར་གཏོར་བཤིག་བཏང་ནས་ད་ཆར་གྲྭ་བཙུན་ཆིག་ཁྲི་ལྷག་ཡོད་པ་ནས་སྟོང་ཕྲག་ལྔ་ལ་ཉུང་རུ་གཏོང་ཐབས་སོགས་འཆར་གཞི་ལྡན་པའི་སྒོ་ནས་ལག་བསྟར་བྱེད་མུས་རེད། ཡ་ཆེན་སྒར་ཡིན་ནའང་། གོས་ཐོས་སུ་དེ་གར་བཙུན་མ་ཁྲི་ལྷག་ཡོད་པའི་ནང་ནས་བཙུན་མ་སྟོང་ཕྲག་གཅིག་ཙམ་ཞིག་ཕྱིར་ཕུད་བཏང་ཚར་བ་རེད་ཟེར། དེའི་མི་ཚད་བླ་རུང་སྒར་དང་ཡ་ཆེན་སྒར་གཉིས་ནས་ཕྱིར་ཕུད་བཏང་བའི་གྲྭ་བཙུན་ཚོ་དམིགས་བསལ་སོ་སོའི་ས་གནས་ས་ཐོག་ཏུ་འབྱོར་བའི་སྐབས་སུ། དགོན་སྡེ་ཁག་ནང་འཛུལ་ཞུགས་བྱ་ཆོག་གི་མེད་པ་དང་ཆོས་ལུགས་བྱེད་སྒོ་ཁག་ནང་ཆ་ཤས་ལེན་ཆོག་མེད་པ་བཟོས་ཡོད་པ་དང་། དམིགས་བསལ་བླ་རུང་སྒར་ནང་ཕྱིར་ལོག་མི་ཆོག་པའི་བཙན་བཀའ་བཏང་བར་ཡིག་ཐོག་ཁས་ལེན་བྱེད་དུ་བཅུག་པ་དང་བཅས། གྲྭ་བཙན་རྣམས་བཙོན་ཁང་དུ་བཏང་བ་ལྟ་བུའི་གནས་ཚུལ་འཐོན་ཡོང་གི་ཡོད་དུས། བཙན་བྱོལ་ནང་ཡོད་པའི་བོད་མི་ཚོ་བོད་ནང་གི་གཞིས་ལུས་མི་མང་གི་མགྲིན་ཚབ་པ་བྱས་ཏེ། ང་ཚོ་ཐུན་མོང་ལ་འགན་ཡོད་པའི་ཐོག་ལ་སེམས་ནས་མ་བཟོད་པའི་ཐོག་ནས་གདོང་སེམས་མཉམ་སྐྱེད་ཆེད་དུ་མཆོད་འབུལ་སྨོན་ལམ་རྒྱག་དགོས་ཀྱི་ཡོད་པ་རེད། ད་ཆར་རྒྱ་ནག་གཞུང་གིས་རིག་གནས་གསར་བརྗེ་སྐབས་ཀྱི་བྱེད་སྟངས་བྱེད་ལུགས་དེ་བསྐྱར་སློང་བྱེད་ཀྱིན་ཡོད་པའི་རྣམ་པ་ཞིག་འཐོན་ཡོང་གི་སྟབས། བོད་མིའི་སྒྲིག་འཛུགས་ཀྱི་ངོས་ནས་དེ་ལ་སེམས་འཚུབ་ཆེན་ཡོད་པ་ལ་མཐའ་གཅིག་ཏུ་ངོ་རྒོལ་ཡོད། ཅེས་སོགས་གསུངས་སོང་།

གསར་འགོད་པ། པདྨ་རྒྱལ།