ཨ་རིའི་སྲིད་འཛིན་འོས་ཐོན་པ་སྐུ་ཞབས་ཊི་རུམ་ཕི་ཡིས་དེ་སྔའི་སྲིད་འཛིན་བྷུ་ཤུའི་སྐབས་ཀྱི་ནང་སྲིད་སློབ་སྟོན་པ་གཞོན་པ་སྐུ་ཞབས་ཐོ་མ་སི་བྷོ་སིར་ཊི་ལགས་འཇིགས་སྐུལ་དྲག་སྤྱོད་པར་འགོག་རྒོལ་བྱེད་ཕྱོགས་སྐོར་གྱི་སློབ་སྟོན་པར་མིང་འདོན་བྱས་འདུག
རོའུ་ཊར་གསར་ཁང་གིས་གནས་ཚུལ་སྤེལ་བ་ལྟར་ན། ཁ་སང་ཨ་རིའི་སྲིད་འཛིན་འོས་ཐོབ་པ་སྐུ་ཞབས་ཊི་རུམ་ཕི་ཡིས་ཁྲིམས་རྩོད་པ་དང་ཕོ་བྲང་དཀར་པོའི་སྤྱི་མཐུན་ཚོགས་པའི་ལས་བྱེད་སྐུ་ཞབས་ཐོ་མ་སི་བྷོ་སིར་ཊི་ (Thomas Bossert) ཞུ་བ་མ་འོངས་པའི་ཁོ་རང་གི་སྲིད་གཞུང་གསར་པའི་འཇིགས་སྐུལ་དྲག་སྤྱོད་པར་གདོང་ལེན་བྱེད་ཕྱོགས་ཀྱི་སློབ་སྟོན་པར་མིང་འདོན་བྱས་ཡོད་པ་དང་། ཐོ་མ་སི་བྷོ་སིར་ཊི་ལགས་ནི་ཨ་རིའི་སྲིད་འཛིན་བྷུ་ཤུའི་སྐབས་སུ་ཨ་རིའི་ནང་སྲིད་སློབ་སྟོན་པ་གཞོན་པ་ཡིན་འདུག
ཨ་རིའི་སྲིད་དབང་བརྒྱུད་སྤྲོད་དང་འཕོ་འགྱུར་ཚན་པས། སྐུ་ཞབས་བྷོ་སིར་ཊི་ཡིས་དྲ་ལམ་བདེ་འཇགས་སྲིད་ཇུས་དང་། འཇིགས་སྐུལ་དྲག་སྤྱོད་པ་གདོང་ལེན་བྱེད་ཕྱོགས་ཐད་སྐུ་ཞབས་ཊི་རུམ་ཕི་ལ་རོགས་འདེགས་བྱ་རྒྱུ་ཡིན་སྐོར་བརྗོད་འདུག
ཨ་རིའི་རྒྱལ་ཡོངས་བདེ་འཇགས་ལྷན་ཁང་གི་དམིགས་བསལ་སློབ་སྟོན་པ་ཟུར་བ་ཕི་ཊིར་ཧྥི་ཝིར་ (Peter Feaver) ཟེར་བ་ཞིག་གིས། ཊི་རུམ་ཕི་ཡིས་སྐུ་ཞབས་ཊི་རུམ་ཕི་ཡིས་འཇིགས་སྐུལ་དྲག་སྤྱོད་པར་གདོང་ལེན་བྱེད་ཕྱོགས་ཀྱི་སློབ་སྟོན་པར་མིང་འདོན་བྱས་པ་དེ་ནི་རྨ་བཅོས་རིང་ལུགས་ཀྱི་བྱ་སྤྱོད་ཅིག་མ་ཡིན་པར། དེ་ནི་ནམ་རྒྱུན་ཨ་རིའི་དབུས་གཞུང་ལ་འབྱུང་བཞིན་པའི་གསར་རྗེ་རིང་བཞིན་གྱི་འགྱུར་བ་ཞིག་ཡིན་ཚུལ་བཤད་འདུག
གནས་ཚུལ་ལྟར་ན། མ་འོངས་པར་སྐུ་ཞབས་བྷོ་སིར་ཊི་ལགས་ཀྱིས་ཨ་རིའི་རྒྱལ་ཡོངས་བདེ་འཇགས་ལྷན་ཁང་མ་བརྒྱུད་པར་ཐད་ཀར་སྐུ་ཞབས་ཊི་རུམ་ཕི་ཡི་སྲིད་འཛིན་ལས་ཁུངས་དང་ཁོང་གི་ལས་བྱེད་ཚོར་གནས་ཚུལ་སྙན་གསེང་ཞུས་ཆོག་གི་ཡོད་པ་དང་། འགྲོ་སྟངས་དེ་ནི་སྲིད་འཛིན་བྷུ་ཤུའི་སྲིད་དབང་སྐབས་ཀྱི་སྲིད་ཇུས་འགྲོ་སྟངས་ཤིག་ཡིན་འདུག
སྔོན་ཆད་སྲིད་འཛིན་བྷུ་ཤུ་ཡིས་ ༢༠༡༡ ཟླ་ ༩ ཚེས་ ༡༡ ཉིན་ཝ་ཤིན་ཊོན་དང་ནེའུ་ཡོག་གྲོང་ཁྱེར་གཉིས་ནང་འཇིགས་སྐུལ་དྲག་སྤྱོད་པའི་འཇབ་རྒོལ་གྱི་དོན་རྐྱེན་བྱུང་རྗེས། ཁོང་གིས་ཨ་རིའི་རྒྱལ་ཡོངས་བདེ་འཇགས་ལྷན་ཁང་ཟེར་བ་དེ་་ཟུར་དུ་བཙུགས་ཡོད་འདུག་ཀྱང་། རྗེས་སུ་སྲིད་འཛིན་ཨོ་བྷ་མས་ཨ་རིའི་རྒྱལ་ཡོངས་བདེ་འཇགས་ལྷན་ཁང་དང་ནང་སྲིད་ལྷན་ཁང་ཟླ་སྦྲེལ་བཏང་ཡོད་འདུག
གསར་འགོད་པ། པདྨ་རྒྱལ།
