དུས་འཁོར་དབང་ཆེན་ཞུས་ནས་ངའི་མི་ཚེ་ལ་འགྱུར་བ་ཕྱིན་སོང་ཟེར་བ་ཞིག་དགོས་པ་རེད།

༧གོང་ས་མཆོག་གིས་དུས་འཁོར་དབང་ཆེན་གྱི་སྔོན་འགྲོ་ས་ཆོག་དང་བསྟུན་ཏེ་ཁྱེད་རང་ཚོས་དཀའ་ལས་ཆེན་པོ་བརྒྱབ་སྟེ་འགྲོ་སོང་ཆེན་པོ་བཏང་ནས་འདིར་འདུས་པ་རེད། བདུན་ཕྲག་གཉིས་མ་ཟིན་ཙམ་ལ་འདིར་སྡོད་པའི་རིང་ག་ཚོད་ཐུབ་ཐུབ་ཀྱིས་བསམ་བློར་འགྱུར་བ་གཏོང་བའི་དམིགས་ཡུལ་བཟུང་སྟེ། དུས་འཁོར་དབང་ཆེན་ཞུས་ཏེ་ངའི་མི་ཚེ་འདིར་འགྱུར་བ་ཕྱིན་སོང་ཟེར་བ་ཞིག་དགོས་པ་རེད་ཅེས་གསུངས།

དེ་རིང་ཞོགས་པའི་ཆུ་ཚོད་ ༧ ཙམ། ༧གོང་ས་མཆོག་གནས་མཆོག་རྡོ་རྗེ་གདན་གྱི་དཔལ་དུས་ཀྱི་འཁོར་ལོའི་གསུང་ཆོས་ར་བའི་བཞུགས་ཁྲིར་ཞབས་སོར་འཁོད་དེ། དུས་འཁོར་ཆོ་ག་སློབ་མ་རྗེས་འཛིན་སོགས་ཀྱི་སྒྲུབ་བྱ་རྣམས་གསུངས་ཡོད་པ་དང་། ཐེངས་འདིའི་དུས་དབང་སྐབས་ཨ་རི་དང་ཡུ་རོབ། རྒྱ་ནག་སྐམ་ཆེན་མོའི་གཙོས་ཨེ་ཤ་ཡའི་རྒྱལ་ཁབ་ཁག་བཅས་ཁྱོན་འཛམ་གླིང་གི་རྒྱལ་ཁབ་ ༦༩ ནས་མདང་དགོང་བར་དུ་དད་ལྡན་ཆོས་ཞུ་བ་འབུམ་གཅིག་ལས་བརྒལ་བ་འབྱོར་ཡོད་འདུག

སྔོན་འགྲོའི་བཀའ་ཆོས་དབུ་འཛུགས་སྐབས་༧གོང་ས་མཆོག་གིས་ཁོང་ཉིད་ཀྱིས་དུས་འཁོར་དབང་ཆེན་ཚར་མང་པོ་གསུངས་པར་སྟབས་བདེ་བོ་ཡོད་པ་དེ་སྔར་ཕན་བདེ་ལེགས་བཤད་གླིང་དུ་རྒྱལ་དབང་བདུན་པ་སྐལ་བཟང་རྒྱ་མཚོའི་ཁ་ཐུག་ནས་རྒྱུན་བཟང་པོ་ཞིག་ཡོད་པ་དེར་ཐུག་ཡོད་པ་དང་། ཁོང་ཐོག་མ་རྒྱ་གར་དུ་ཕེབས་ཏེ་དུས་འཁོར་དབང་ཆེན་དང་པོ་དྷ་རམ་ས་ལར་བསྐུར་གནང་མཛད་སྐབས། དབང་གི་མཇུག་ཏུ་རྨི་ལམ་ནང་ཁོང་ཉིད་དཀྱིལ་འཁོར་གྱི་དབུས་སུ་བཞུགས་པ་སོགས་རྨས་ཏེ་དབང་མང་པོ་གསུང་པའི་རྟགས་དང་མཚན་མ་བྱུང་སྐོར་སོགས་གསུངས་སོང་།

སྐབས་དེར་༧གོང་ས་མཆོག་གིས་བཀའ་གནང་དོན། དེ་རིང་གནས་ཁྱད་པར་ཅན་འདིར་ཁྱེད་རང་ཚོ་ཡུལ་ལུང་མི་འདྲ་བ་མང་པོ་ཞིག་ནས་དོན་གཉེར་ཞེ་དྲགས་ཆེན་པོའི་ཐོག་ནས་ཡོང་བ་རེད་ལ། གནས་ཁྱད་པར་ཅན་ཆགས་བསྡད་ཡོད་པ་རེད། མཐུན་རྐྱེན་འཛོམས་པོ་ཅི་གང་ཡོད་པ་མ་རེད། དེ་རིང་ཁ་སང་གནམ་གཤིས་ཀྱང་སྐྱོ་པོ་ཞེ་དྲགས་སྟོན་གྱི་འདུག ཁྱེད་རང་ཚོས་དཀའ་བ་དྭང་དུ་བླངས་ཏེ་མང་ཆེ་བ་ཞིག་ཆོས་དོན་གཉེར་བྱས་ཏེ་བསླེབས་པ་རེད། ཁ་ཤས་ཁ་ཤས་ཚོང་འདུས་ཆེད་ཡོང་བ་དེ་འདྲ་ཡོད་སྲིད་པ་རེད།

མང་ཆེ་བ་ནི་ཆོས་དོན་གཉེར་བྱས་ནས་ཡོང་བར་བརྟེན་ཆོས་ཆོས་སུ་ཕྱིན་པ་ཞིག་དགོས་པ་གལ་ཆེན་པོ་རེད། སྤྱིར་བཏང་སྒྲ་ཡང་བ་བྱས་ན་ཆོས་ཟེར་དུས་འཛམ་གླིང་ཐོག་(Religion)ཟེར་བ་ཚང་མར་ཕལ་ཆེར་གོ་ཐུབ་ཀྱི་ཡོད་པ་དང་། ཆོས་བརྒྱུད་རིས་སུ་མ་ཆད་པ་གང་ཡིན་ནའང་སོ་སོའི་ཆོས་བརྒྱུད་དེ་དངོས་གནས་ཆོས་རྣམ་དག་ཅིག་ཡོང་བར་བློ་ཆོས་སུ་སོང་བ་ཞིག་དགོས་པ་རེད། ཁ་ཆེ་ཡིན་ན་རེད། ཡེ་ཤུ་ཡིན་ནའང་རེད། ཧིན་རྡུ་དང་ཇེའུ་ཡིན་ནའང་འདྲ། དེ་དང་དེ་འདྲ་བའི་ཆོས་བརྒྱུད་མི་འདྲ་བ་མང་པོ་ཞིག་ཡོད་པ་རེད། ངའི་ཕ་མེས་དང་ཁྱིམ་ཚང་གི་ཆོས་བརྒྱུད་འདི་དང་དེ་ཡིན་ཟེར་བ་དང་། ང་ཡེ་ཤུ་ཆོས་པ་ཡིན། ང་ཁ་ཆེ་ཆོས་པ་ཡིན་ཞེས་ལབ་པ་ཙམ་གྱིས་འགྲིག་གི་ཡོད་པ་མ་རེད། དཔེར་ན། ཡེ་ཤུའི་ཆོས་པ་ཞིག་ཡིན་ན། དངོས་གནས་སྟོན་པ་མ་ཤི་ཀས་ལམ་སྟོན་གནང་སྟེ་གསུང་བཞག་པ་རྣམས་སོ་སོས་ལག་ལེན་བྱེད་དགོས་པ་དང་། སྟོན་པ་མོ་ཧཱ་མཱ་ཌ་ཡིས་ལམ་སྟོན་གནང་བཞག་པ་རྣམས་དང་། དེའི་ནང་ནས་ཀྱང་གཙོ་བོ་བྱམས་བརྩེའི་མཚོན་པའི་གཞན་ཕན་སྒྲུབ་པའི་བསླབ་བྱ་ཡོད་པ་རྣམས་སོ་སོས་ལག་ལེན་དུ་འཁེལ་ནས་འགྲོ་རྒྱུ་བྱུང་ན། ཆོས་ཆོས་སུ་སོང་བ་རེད། ཆོས་ཞེས་ལབ་ན་སོ་སོའི་ལམ་དང་ལུགས་སྲོལ་འདྲ་པོ་བྱས་ཏེ་ལག་ལེན་ངོ་མའི་ཐོག་ནས་ཞེ་དྲགས་མེད་པ་ཡིན་ན། ཆོས་ཆོས་སུ་སོང་བ་ཞིག་ཡོང་གི་ཡོད་པ་མ་རེད། ཅེས་གསུངས་སོང་།

ཡང་ཁོང་གིས། ཆོས་ཆོས་སུ་སོང་བ་ཞིག་མ་བྱུང་ན་ཁག་པོ་རེད། དཔེར་ན། རྡོ་རྗེ་གདན་དུ་ཕྱིན་པ་ཡིན། ༧རྒྱལ་བ་རིན་པ་ཆེའི་མདུན་ནས་དུས་འཁོར་དབང་ཆེན་ཐོབ་སོང་ཞེས་དེ་གཅིག་པུ་རང་བཞག་སྟེ། སེམས་རྒྱུད་ལ་འགུལ་སྐྱོད་ཐེབས་པ་ཞིག་དང་། སེམས་ལ་འགྱུར་བ་ཐེབས་པ་ཞིག་མ་བྱུང་ན་ད་ལན་གནས་སྐོར་ཞིག་བྱུང་བ་རེད་མ་གཏོགས་གཞན་ཞེ་དྲགས་བྱིན་རླབས་ཐོབ་རྒྱུ་ཡོད་པ་མ་རེད། ངས་ནམ་རྒྱུན་གྲོགས་པོ་ཚོར་སྨོན་ལམ་བརྒྱབ་ནས་དོན་དག་འགྲུབ་རྒྱུ་ཡོད་པ་མ་རེད། སོ་སོས་ལག་ལེན་འཁེལ་ཏེ་དོན་དག་འགྲུབ་པ་ཞིག་བྱེད་དགོས་པ་རེད་ཅེས་ལབ་ཀྱི་ཡོད། སྐབས་འདིར་ལག་ལེན་འཁེལ་ཟེར་དུས་སངས་རྒྱས་པའི་ཆོས་ཀྱི་ཐུན་མོང་མ་ཡིན་པའི་འགྲོ་སྟངས་དེ་སོ་སོའི་བློ་ལ་འགྱུར་བ་བཏང་སྟེ། བསམ་བློའི་འཁྱེར་སོར་འགྱུར་བ་ཕྱིན་པ་དང་། བསམ་བློའི་འཁྱེར་སོར་འགྱུར་བ་བཏང་བའི་ཐོག་ནས་ངག་གི་སྤྱོད་ལམ་དེའང་བཟང་པོ་ཞིག་ཡོང་ཐུབ་པ་དང་། དེ་དང་འབྲེལ་བའི་ལུས་ཀྱི་སྤྱོད་པའང་བཟང་པོ་ཞིག་ཡོང་ཐུབ་པ་བཅས་ལུས་ངག་ཡིད་གསུམ་གྱི་སྤྱོད་པ་ཞི་ཞིང་འདུལ་བ། གཞན་ཕན་གྱི་རང་བཞིན་ཅན་ཞིག་བྱུང་བ་ཡིན་ན། ཆོས་ཀྱི་དགོས་དོན་དེ་ཆོས་ཆོས་སུ་སོང་བ་དང་། ཐེག་ཆེན་གྱི་ཆོས་ཐེག་ཆེན་གྱི་ཆོས་སུ་སོང་བ་ཞེས་པ་དེ་འདྲ་ཞིག་ལ་གོ་དགོས་པ་རེད། ཤེས་སོང་ང་། ཁྱེད་རང་ཚོས་དཀའ་ལས་ཆེན་པོ་བརྒྱབ་སྟེ་འགྲོ་སོང་ཆེན་པོ་བཏང་ནས་འདིར་འདུས་པ་དང་། བདུན་ཕྲག་གཉིས་མ་ཟིན་ཙམ་ལ་འདིར་སྡོད་པའི་རིང་ག་ཚོད་ཐུབ་ཐུབ་ཀྱིས་བསམ་བློར་འགྱུར་བ་གཏོང་བའི་དམིགས་ཡུལ་བཟུང་སྟེ། དུས་འཁོར་དབང་ཆེན་ཞུས་ཏེ་ངའི་མི་ཚེ་འདིར་འགྱུར་བ་ཕྱིན་སོང་ཟེར་བ་ཞིག་དགོས་པ་རེད། ཅེས་སོགས་གསུངས་སོང་།

ཕྱི་ཚེས་ ༥ ཉིན་གྱི་ཉིན་བརྒྱབ་ནས་ཉིན་བཞིའི་རིང་སློབ་དཔོན་ཀརྨ་ལེགས་བཤད་ཀྱིས་མཛད་པའི་སྒོམ་རིམ་བར་མ་གཙོ་བོ་མཛད་དེ་སློབ་དཔོན་ཞི་བ་ལྷས་མཛད་པའི་སྤྱོད་འཇུག་བཀའ་འཁྲིད་གནང་རྒྱུ་ཡིན་འདུག

གནས་མཆོག་རྡོ་རྗེ་གདན་ནས་པདྨ་མཚོས་སྤེལ།