དཔལ་ས་སྐྱའི་འཇིགས་རྟེན་ཞི་བདེའི་སྨོན་ལམ་ཆེན་མོའི་སྐབས་༧གོང་མ་བདག་ཁྲི་རིན་པོ་ཆེ་མཆོག་ནས་སྤྱིན་བདག་ངོ་སྲུང་དང་དཔལ་འབྱོར་འདུ་འགོད་ཆེད་བསྟན་པ་བློས་གཏོང་མཁན་ཡོད་ཚོད་འདུས་པས་དེ་འདྲ་བྱས་ནས་དོན་ངོ་མའི་དམིགས་ཡུལ་དང་རྒྱབ་འགལ་དུ་སོང་ཡོད་སྐོར་གསུངས་འདུག
འདི་གར་བོད་མི་མང་སྤྱི་འཐུས་སློབ་དཔོན་ཐུབ་བསྟན་རྒྱལ་མཚན་ལགས་ཀྱིས་གནས་ཚུལ་མཁོ་གཏོང་གནང་བ་ལྟར་ན། ཕྱི་ལོ་ ༢༠༡༦ ཟླ་ ༡༢ ཚེས་ ༢༥ ནས་ཉིན་གྲངས་བཅུ་རིང་། དཔལ་ས་སྐྱའི་འཇིག་རྟེན་ཞི་བདེའི་སྨོན་ལམ་ཆེན་མོ་སྐབས་ ༢༥ པ་གནས་མཆོག་ལུམྦི་ནིར་འཚོགས་གནང་ཡོད་པ་དང་། ཚོགས་མགོན་དུ་ྋགོང་མ་བདག་ཁྲི་རྡོ་རྗེ་འཆང་ཆེན་པོ་ཆེ་མཆོག་དང་། ༧སྐྱབས་རྗེ་འཁོན་གདུང་སྐུ་བགྲེས་རིན་པོ་ཆེ་མཆོག་གིས་དབུས་པའི་འཁོན་གདུང་རྣམ་པ། ༧སྐྱབས་རྗེ་ངོར་ཐར་རྩེ་མཁན་རིན་པོ་ཆེ་མཆོག་གིས་གཙོས་པའི་ཞབས་དྲུང་རིན་པོ་ཆེ་རྣམ་པ། གཞན་ཡང་མཁན་པོ་བླ་སྤྲུལ། དགེ་འདུན་པ་དང་བཙུན་མ་བཅས་ཁྱོན་འདུས་པ་བཞི་སྟོང་ལས་རྒལ་བ་དང་། རྒྱལ་ཕྱི་ནང་ཡུལ་གྲུལ་གང་སར་ནས་ཕེབས་པའི་འཚོགས་བཅར་བ་དད་ལྡན་སྐྱེ་བོ་ཕོ་མོ་སུམ་སྟོང་ལས་བརྒལ་བ་འཛོམས་ཡོད་པ་དང་། ཕྱི་ཟླ་ ༡༢ ཚེས་༣༠ ཉིན་དཔལ་ས་སྐྱའི་འཇིག་རྟེན་ཞི་བདེ་སྨོན་ལམ་ཆེན་མོ་དབུ་འཛུགས་གནང་སྟེ་ལོ་ངོ་ཉེར་ལྔ་འཁོར་བའི་དུས་དྲན་སྲུང་རྩི་གནང་ཡོད་པ་དང་དང་། ཕྱི་ཚེས་༣༡ ཉིན་༧གོང་མ་བདག་ཁྲི་རིན་པོ་ཆེ་མཆོག་ནས་དད་ལྡན་སྐྱ་སེར་ཕོ་མོ་བདུན་སྟོང་བརྒལ་བ་ལ་རྡོ་རྗེ་སེམས་པའི་བཀའ་དབང་བསྩལ་ཡོད་པ་རེད།
དེ་བཞིན་ཕྱི་ཟླ་བ་དང་པོའི་ཚེས་ ༡ ཉིན་ ༸གོང་མ་རིན་པོ་ཆེ་མཆོག་དབུ་བཞུགས་ཐོག དཔལ་ས་སྐྱའི་འཇིག་རྟེན་ཞི་བདེའི་སྨོན་ལམ་ཆེན་མོའི་ཚོགས་བཅར་བ་ཡོངས་ཀྱིས་བདེ་བར་གཤེགས་པ་༸གོང་མ་བདག་ཆེན་འཇིགས་བྲལ་རིན་པོ་ཆེའི་དགོངས་རྫོགས་མཆོད་འབུལ་རྡོ་རྗེ་སེམས་དཔའི་བླ་མཆོད་འཚོགས་གནང་བ་དང་། ཕྱི་ཚེས་ ༢ ཉིན་ྋགོང་མ་བདག་ཁྲི་རིན་པོ་ཆེ་མཆོག་ལ་བརྟན་བཞུགས་ཕུལ་ཡོད་པ་དང་སྟབས་བསྟུན། ལུམྦི་ནིའི་ཡུལ་མི་ཚོས་༧གོང་མ་རིན་པོ་ཆེ་མཆོག་ལ་ཆེ་མཐོང་གི་གཟེངས་རྟགས་ཞིག་ཀྱང་ཕུལ་ཡོད་པ་རེད།
ཕྱི་ཚེས་༣༡ ཉིན་གྱི་བཀའ་དབང་སྐབས། ༧གོང་མ་རིན་པོ་ཆེ་མཆོག་ནས་མཁན་པོ་བླ་སྤྲུལ་དང་མི་མང་བཅས་ལ་སྤྱིར་སངས་རྒྱས་ཀྱི་བསྟན་པ་མི་ཉམས་གོང་འཕེལ་དང་ཉམས་པ་སླར་གསོའི་ཆེད་དུ། ་དང་དཔལ་འབྱོར་འདུ་འགོད་གལ་ཆེན་ཡིན་ཡང་། དཔལ་འབྱོར་འདུ་འགོད་དང་སྦྱིན་བདག་ངོ་སྲུང་གི་ཆེད་དུ་སངས་རྒྱས་ཀྱི་བསྟན་པ་བློས་གཏོང་མཁན་དེ་འདྲ་ཡོད་ཚོད་འདུག དེ་ལྟར་བྱས་ན་དོན་ངོ་མའི་དམིགས་ཡུལ་དང་རྒྱབ་འགལ་དུ་སོང་བས། ལས་གང་བྱས་ཀྱང་སངས་རྒྱས་ཀྱི་བསྟན་པ་ལ་རྒྱབ་འགལ་དུ་མ་སོང་བར་ཐུགས་ཁུར་གཙོར་བཞེས་ཅི་ནས་ཀྱང་གནང་རྒྱུ་གལ་ཆེན་ཡིན་པ་དང་། སྤྱིར་སངས་རྒྱས་ཀྱི་བསྟན་པ་ལུང་རྟོགས་གཉིས་ཀྱི་སྒོ་ནས་འཛིན་དགོས་དུས། ལུང་སྡེ་སྣོད་གསུམ་ལ་འཆད་ཉན་མཐར་ཕྱིན་པ་གནང་རྒྱུ་གལ་ཆེན་ཡིན་པ་དང་། ཁྱད་པར་དུ་ཕྱིའི་ཀུན་སྤྱོད་ན་བཟའ་མནབ་སྟངས་ཡན་ཆད་བསྟན་པ་སྤྱི་ལ་རྨ་མི་འབྱིན་པར་ཐུགས་སྣང་གནང་རྒྱུ་གལ་ཆེན་ཡིན་པའི་བླངས་དོར་བཀའ་སློབ་བསྩལ་ཡོད་པ་རེད།
གནས་མཆོག་རྡོ་རྗེ་གདན་ནས་པདྨ་མཚོས་སྤེལ།
![Ren Quanniu said the Henan Provincial Justice Department revoked his licence over comments he made in court in a 2018 case [File: Leo Ramirez/ AFP]](https://tibettimes.net/wp-content/uploads/2025/07/Untitled-2-360x180.jpg)
