ཞི་ཅིན་ཕིན་གྱིས་རྒྱལ་སྤྱི་ལ་རྒྱ་ནག་མེད་མི་རུང་སྟབས་སྲིད་འཛིན་ཨོ་བྷ་མའི་བྱེད་སྟངས་ལྟར་སོང་ན་ཕྱོགས་གཉིས་ཀར་ཁེ་ཕན་ཡོད་ཚུལ་བཤད་དེ་ཊི་རུམ་ཕི་ཡི་བཤད་སྤྱོད་ཁག་ཅིག་ལ་མ་དགའ་བའི་རྣམ་འགྱུར་བསྟན།
སུད་སིར་འཚོགས་བཞིན་པའི་རྒྱལ་སྤྱིའི་དཔལ་འབྱོར་གླེང་སྟེགས་དང་འབྲེལ་ཏེ། ཁ་སང་རྒྱ་ནག་གི་སྲིད་འཛིན་ཞི་ཅིན་ཕིན་དང་ཨ་རིའི་སྲིད་འཛིན་གཞོན་པ་རྗོང་བྷ་ཌིན་ (Joe Biden) གཉིས་ཟུར་དུ་ཐུག་འཕྲད་བྱས་སྐབས། ཞི་ཅིན་ཕིན་གྱིས་རྗོང་བྷ་ཌིན་ལ་བརྗོད་རྒྱུར། ཁོས་ཨ་རྒྱ་གཉིས་བར་གྱི་འབྲེལ་ལམ་ཡར་རྒྱས་དང་ཕྱོགས་གཉིས་བར་ཕན་ཚུན་ཐུན་མོང་གི་བསམ་ཤེས་ཡོང་ཐབས་ལ་འབད་བརྩོན་བྱེད་ཀྱིན་ཡོད་པ་དང་། འདས་པའི་ལོ་ངོ་ ༣༨ རིང་གི་ཕྱི་འབྲེལ་ལ་བརྟེན་ཏེ། ཕྱོགས་གཉིས་བར་གྱི་འབྲེལ་ལམ་དེ་གནམ་ངོ་རུབ་རྗེས་ཀྱི་ཆར་རླུང་ལྟར་འགྱུར་ལྡོག་ཕྱིན་ཡོད་ནའང་། སྤྱི་ཡོངས་ནས་མུ་མཐུད་མདུན་སྐྱོད་བྱེད་ཀྱིན་ཡོད་པ་དང་། རྒྱལ་ཁབ་གཉིས་ཀྱི་མི་མང་གཙོ་བྱས་པའི་རྒྱལ་སྤྱིའི་མི་མང་ལ་ནམ་ཡང་རྒྱ་ནག་མེད་མི་རུང་བ་ཆགས་ཡོད་སྟབས། ཨ་རིའི་ཕྱོགས་ནས་རྒྱལ་ཁབ་གཉིས་བར་གྱི་འབྲེལ་ལམ་རྒྱུན་འཁྱོངས་དང་མཉམ་ལས་སྲ་བརྟན་ཡོང་ཐབས་ལ་འབད་བརྩོན་བྱེད་དགོས་པ་དང་། སྲིད་འཛིན་ཨོ་བྷ་མའི་སྲིད་དབང་འོག་ཨ་རྒྱ་གཉིས་བར་གྱི་འབྲེལ་ལམ་ཐད་ཕྱོགས་ཡོངས་ནས་གལ་ཆེན་རང་བཞིན་གྱི་འཕོ་འགྱུར་བྱུང་ཡོད་པ་མ་ཟད། རྒྱལ་ཁབ་གཉིས་ཀྱི་སྤྱི་མང་ཕན་ཚུན་བར་སྲིད་འབྱོར་རིག་གསུམ་བརྗེ་རེས་བྱས་ཏེ། ཚད་མཐོ་བའི་རྣམ་པ་གསར་བ་ཞིག་ཏུ་བསླེབས་ཡོད། ཅེས་སོགས་བཤད་འདུག
སྐབས་དེར་རྗོང་བྷ་ཌིན་གྱིས་ཞི་ཅིན་ཕིན་ལ་བཤད་རྒྱུར། ཨ་རིའི་གཞུང་གིས་ཕྱོགས་གཉིས་བར་གྱི་འབྲེལ་ལམ་ལ་ཐུན་མོང་གི་ཡིད་ཆེས་གཏིང་ཟབ་ཡོང་བ་དང་དཔལ་འབྱོར་མཉམ་ལས་གཞི་རྒྱ་ཇེ་ཆེར་འགྲོ་བར་རེ་བ་བྱེད་ཀྱིན་ཡོད་སྐོར་སོགས་བཤད་ཡོད་འདུག
ཨོ་བྷ་མའི་རྒྱལ་ཡོངས་བདེ་འཇགས་སློབ་སྟོན་པ་བྷིན་རའོ་ཌི་ (Ben Rhodes) ལགས་ཀྱིས། རྒྱ་ནག་གཅིག་གི་སྲིད་ཇུས་དེ་ཨ་རྒྱ་གཉིས་བར་གྱི་འབྲེལ་ལམ་གྱི་རྨིང་གཞི་ཆགས་ཡོད་སྟབས། ཨ་རིའི་གཞུང་གསར་བས་རྒྱ་ནག་གཅིག་གི་སྲིད་ཇུས་ཐད་བསྐྱར་དུ་གྲོས་མོལ་བྱ་རྒྱུ་མེད་པ་དང་། ཨ་རྒྱ་གཉིས་བར་གྱི་ཕྱི་འབྲེལ་གྲོས་ཆོད་ (Shanghai Communiqué) ལ་མིང་རྟགས་བཀོད་པའི་ནང་། ཐའེ་ཝན་མཚོ་འགག་དེ་རྒྱ་ནག་གི་ཆ་ཤས་ཤིག་ཡིན་པར་ངོས་འཛིན་བྱས་ཡོད་པ་མ་ཟད། གྲོས་ཆོད་དེ་ལ་བརྟེན་ནས་ཨ་རིས་འཛམ་གླིང་སྟེང་གི་སྟོབས་ཆེན་རྒྱལ་ཁབ་ཆེས་ཤོས་དེ་ལ་སྙོབ་ཐུབ་ཡོད་པ་དང་། གྲོས་ཆོད་དེའི་འོག་ཨ་རིས་ཚོང་དོན་མང་པོ་སྒྲུབ་བཞིན་ཡོད་སྟབས། ཊི་རུམ་ཕི་ཡིས་ཐའེ་ཝན་ཐོག་འཛིན་པའི་སྲིད་ཇུས་དེ་ཉེན་ཁ་ཆེན་པོ་ཅན་ཞིག་ཡིན་པ་དང་། ཨ་རིའི་གཞུང་གིས་རྒྱལ་སྤྱིའི་སྟེང་རྩོད་རྙོག་ཆེན་པོ་ཆགས་པའི་ཐའེ་ཝན་གྱི་གནད་དོན་ལ་ཐེ་གཏོགས་བྱེད་ཀྱི་མེད་པ་དང་། ཨ་རྒྱ་གཉིས་བར་གྱི་དུས་ཡུན་རིང་བོའི་འབྲེལ་ལམ་ལ་འགྱུར་བ་བཏང་ཚེ། ཨ་རི་ལ་ཁེ་ཕན་གང་ཡང་མེད་པ་དང་། གནད་དོན་དེའི་ཐོག་རྒྱ་ནག་གིས་གྲོས་མོལ་བྱེད་མི་སྲིད་སྟབས། ཨ་རིའི་གཞུང་གསར་བས་ཨ་རྒྱ་གཉིས་བར་གྱི་འབྲེལ་ལམ་ལ་འགྱུར་བ་བཏང་ཚེ། དེ་ནི་ཛ་དྲག་ཆེ་ཞིང་ཁེ་ཕན་མེད་པའི་ད་ལྟའི་ཐའེ་རྒྱ་གཉིས་བར་གྱི་འབྲེལ་ལམ་ལྟ་བུ་ཆགས་རྒྱུ་ཡིན་སྐོར་བརྗོད་འདུག
འདས་པའི་ཟླ་ངོ་འདི་དག་རིང་། ཨ་རིའི་བདམས་ཐོན་སྲིད་འཛིན་ཊི་རུམ་ཕི་ཡིས། པེ་ཅིན་གཞུང་གིས་ཐའེ་ཝན་ཐོག་འཛིན་པའི་རྒྱ་ནག་གཅིག་གི་སྲིད་ཇུས་ལ་ངོས་ལེན་བྱེད་ཐབས་མེད་པ་དང་། ཨ་རིའི་ནང་རྒྱ་ནག་གི་ཚོང་ཟོག་ནང་འདྲེན་བྱེད་པའི་ཚོང་ཁྲལ་ཇེ་ལྕིར་གཏོང་རྒྱུ་ཡིན་སྐོར་སོགས་བཤད་པར་བརྟེན་ཏེ། ཨ་རྒྱ་གཉིས་བར་གྱི་འབྲེལ་ལམ་དེ་ཛ་དྲག་གི་ངོ་བོར་འགྱུར་བཞིན་ཡོད།
གསར་འགོད་པ། པདྨ་རྒྱལ།
