གཟའ་སྐར་བདུན་ལས་གྲུབ་པའི་ཉི་མའི་ཁྱིམ་རྒྱུད་ཆུང་བ་ཞིག་གསར་དུ་རྙེད།

འོད་ལོ་ ༤༠ (light Years)ལྷག་གི་བར་ཐག་ཏུ་ཉི་མ་ལྟ་བུའི་སྐར་མ་(Star)གཅིག་ལ་སའི་གོ་ལའི་ཆེ་ཆུང་དང་མཉམ་པའི་གཟའ་སྐར་བདུན་གྱིས་སྐོར་བ་རྒྱག་གི་ཡོད་པའི་ཉི་མའི་ཁྱིམ་རྒྱུད་དང་འདྲ་བ་གཞན་ཞིག་གསར་རྙེད་བྱུང་ཡོད་འདུག

སི་ཨིན་ཨིན་གསར་ཁང་གིས་གནས་ཚུལ་སྤེལ་བ་ལྟར་ན། ཟླ་འདིའི་ཕྱི་ཚེས་ ༢༢ ཉིན་ཨ་རིའི་རང་བྱུང་དུས་དེབ་(Journal Nature)ཅེས་པའི་སྟེང་། ཨ་རིའི་ཚན་རིག་ཞིབ་འཇུག་ཁང་ནཱ་སཱ་(NASA)དང་གནམ་དཔྱད་རིག་པའི་མཁས་པ་ཁག་ཅིག་གིས་བར་སྣང་སྟོང་ཁམས་ཆེན་མོ་ནས་ང་ཚོའི་སའི་གོ་ལའི་ཆེ་ཆུང་དང་མཉམ་པའི་གཟའ་སྐར་གསར་པ་ ༧ གསར་དུ་རྙེད་སོན་བྱུང་ཡོད་པ་དང་། གཟའ་སྐར་དེ་དག་གིས་རང་གི་ཉི་མར་སྐོར་བ་རྒྱག་གི་ཡོད་ཅིང་། གཟའ་སྐར་དེ་དག་གི་གནམ་གཤིས་དྲོད་ཚད་སྙོམས་པོ་ཡོད་སྟབས། དེ་དག་ནང་རྒྱ་མཚོ་དང་ཚེ་སྲོག་ཡོད་སྲིད་པའི་ཚོད་དཔག་བྱེད་བཞིན་ཡོད།

ཡུ་རོབ་སྦེལ་ཇམ་ལཱའེ་གྷི་མཐོ་སློབ་ཀྱི་གནམ་རིག་སྨྲ་བ་སྐུ་ཞབས་མཱའེ་ཀཱེལ་གྷིལ་ལཱོཎ་(Michael Gillion)ལགས་ཀྱིས། “ ཐེངས་གཅིག་ལ་དེ་འདྲའི་གཟའ་སྐར་མང་པོ་ཡོད་པ་རྙེད་སོན་བྱུང་བ་ནི་ལོ་རྒྱུས་ནང་ཐེངས་དང་པོ་ཆགས་ཡོད།”ཅེས་བརྗོད།

གསར་རྙེད་བྱུང་བའི་གཟའ་སྐར་བདུན་དེ་ཕན་ཚུན་བར་ཐག་རིང་པོ་མེད་པ་དང་། ཉི་མའི་ཁྱིམ་རྒྱུད་གསར་པ་དེར་ཀྲཔ་པཱིས་དང་པོ་(Trappist-1) དམར་ཆུང་བརྟན་སྐར་ཞེས་མིང་བཏགས་ཡོད་འདུག གཟའ་སྐར་དེ་དག་བྲག་རྡོ་ལས་གྲུབ་ཡོད་པར་ཚོད་དཔག་བྱེད་བཞིན་ཡོད་འདུག གསར་རྙེད་བྱུང་བའི་གཟའ་སྐར་བདུན་ལས་གསུམ་གྱི་སྟེང་དུ་ཆུ་ཡོད་པའི་ཚོད་དཔག་བྱེད་བཞིན་ཡོད་ཅིང་། གཟའ་སྐར་དེ་གསུམ་ལ་ཀྲཔ་པཱིས་དང་པོ་(Trappist-1)ཡི་ཨི་(e)དང་། ཨེཕ་(F)། ཇཱི་(G)ཞེས་མིང་བཏགས་ཡོད་འདུག ཞིབ་འཇུག་བྱེད་མཁན་ཚོས་ཀྲཔ་པཱིས་དང་པོ་ཡི་ཨེཕ་(F)ཡི་དྲོད་ཚད་ང་ཚོའི་སའི་གོ་ལ་ལས་ཅུང་གྲང་བ་ཡོད་ཀྱང་ཚེ་སྲོག་འཚོ་ཐུབ་པའི་གཟའ་སྐར་འཚམ་ཤོས་ཡིན་པར་བརྗོད་ཡོད།

ལོ་སྔོན་མའི་ཕྱི་ཟླ་ ༥ པའི་ནང་ཞིབ་འཇུག་པ་ཚོས་ཆེས་ཐོག་མར་ཀྲཔ་པཱིས་དང་པོ་ཡི་བརྟན་སྐར་ལ་གཟའ་སྐར་གསུམ་གྱིས་སྐོར་བ་བྱེད་ཀྱིན་ཡོད་པ་གསར་རྙེད་བྱུང་ཡོད་པ་དང་། རྗེས་སུ་རིམ་གྱིས་ཁྱིམ་རྒྱུད་དེར་གཟའ་སྐར་བདུན་ཡོད་པ་རྙེད་སོན་བྱུང་ཡོད་འདུག

ཁཱམ་བྷི་རིཇཱ་མཐོ་སློབ་(Cambridge University)ཀྱི་གནམ་རིག་པ་ཨེ་མཱའུ་རི་ཊེའུ་ཨུཌ་(Amaury Triaud)ལགས་ཀྱིས། “གལ་སྲིད་ང་ཚོས་ཀྲཔ་པཱིས་དང་པོ་ཡི་གཟའ་སྐར་རྣམས་གྱི་སྟེང་དུ་ཚེ་སྲོག་ཡོད་པའི་སྒྲུབ་བྱེད་རྙེད་པ་ཡིན་ན། ང་ཚོའི་འཚོལ་སྙེག་གིས་གོམ་པ་མདུན་སྤོ་ཆེན་པོ་ཞིག་བྱས་ཡོད་པ་རེད།” ཅེས་བརྗོད་པ་དང་། དེ་བཞིན། ཞིབ་འཇུག་པ་ཚོས་གཟའ་སྐར་དེ་དག་སྟེང་ཚེ་སྲོག་གི་བྱུང་རིམ་དང་འཕེལ་འགྱུར་སོགས་ང་ཚོའི་སའི་གོ་ལ་དང་མ་འདྲ་བ་ཡིན་སྲིད། དེར་བརྟེན། ང་ཚོའི་ཞིབ་འཇུག་གི་གནད་འགག་འཛིན་ས་གཙོ་བོ་དེ་རླུང་ཁམས་དང་ཚེ་སྲོག་ཆགས་ཡོད། ཅེས་བརྗོད་ཡོད་འདུག

ང་ཚོས་ག་རེ་ཤེས་ཀྱི་ཡོད།

གསར་རྙེད་བྱུང་བའི་གཟའ་སྐར་དེ་དག་གི་བར་ཐག་ཧ་ཅང་ཉེ་བོ་ཡོད་སྟབས། ཀྲཔ་པཱིས་དང་པོའི་བརྟན་སྐར་ལྟེ་བ་བྱས་ཏེ་གཟའ་སྐར་མཐའ་མའི་བར་ང་ཚོའི་ཉི་མའི་ཁྱིམ་རྒྱུད་ཀྱི་ཉི་མ་ནས་གཟའ་སྐར་ལྷག་པ་(Mercury)བར་གྱི་བར་ཐག་ལས་ལྡབ་ ༥ ཐུང་བ་དང་། གསར་རྙེད་གཟའ་སྐར་རྣམས་ཕན་ཚུན་བར་ཐག་ཉེ་བོ་ཡོད་སྟབས་ཚན་རིག་པ་ཚོས་ཞིབ་འཇུག་བྱེད་བདེ་བོ་ཡིན་འདུག

གསར་རྙེད་གཟའ་སྐར་བདུན་པོ་དེས་རང་གི་བརྟན་སྐར་ཉི་མར་སྐོར་བ་གཅིག་དང་ཕྱེད་ཀ་བརྒྱབ་ན། ང་ཚོའི་སའི་གོ་ལའི་ཉིན་གྲངས་ལྟར་ན་ཕལ་ཆེར་ཉིན་ ༡༣ འགོར་གྱི་ཡོད་འདུག འོན་ཀྱང་། གསར་རྙེད་གཟའ་སྐར་བདུན་གྱི་ནང་ནས་ཉི་མར་སྐོར་བ་བྱེད་མཁན་མགྱོགས་ཤོས་དེ་ཉིན་གྲངས་ག་ཚོད་འགོར་གྱི་ཡོད་མེད་ད་སྔ་ཤེས་རྟོགས་ཐུབ་མེད།

གསར་རྙེད་གཟའ་སྐར་གྱི་ངོས་སུ་ཉི་མའི་དྲོད་ཚད་དེ་ང་ཚོའི་ཉི་མའི་དྲོད་ཚད་ལས་ལྡབ་ ༢༠༠ ཙམ་གྱིས་དམའ་བ་ཡོད་ཀྱང་། མིའི་ཚེ་སྲོག་འཚོ་ཐུབ་པའི་དྲོད་ཚད་ཀྱིས་འདང་གི་ཡོད་འདུག གང་ཡིན་ཟེར་ན། གསར་རྙེད་གཟའ་སྐར་དེ་དག་རང་གི་ཁྱིམ་རྒྱུད་ཀྱི་ཉི་མ་དང་བར་ཐག་ཧ་ཅང་ཉེ་བོ་ཡོད་པས་ཡིན་འདུག

གསར་རྙེད་གཟའ་སྐར་ཞིག་གི་སྟེང་ནས་གཟའ་སྐར་གཞན་ཞིག་ལ་ལྟ་སྐབས། ང་ཚོའི་སའི་གོ་ལའི་སྟེང་ནས་ཟླ་བ་མཐོང་བའི་ཚད་གཞི་ལས་ཅུང་ཟད་ཆེ་བ་མཐོང་བ་དང་། ཀྲཔ་པཱིས་དང་པོ་ཡི་གཟའ་སྐར་ཨེཕ་(F)ནས་སྐར་མ་དེ་ཚོར་ལྟ་སྐབས་ང་ཚོས་ཉི་མ་མཐོང་བའི་ཚད་གཞི་ལས་ལྡབ་གསུམ་གྱིས་ཆེ་བ་ཡོད་འདུག

ཞིབ་འཇུག་པ་ཚོས། ང་ཚོའི་སའི་གོ་ལའི་ཟླ་བ་སྒྲིབ་ཀྱི་ཡོད་པ་ལྟར་གསར་རྙེད་བྱུང་བའི་ཁྱིམ་རྒྱུད་དེའི་ཉི་མའི་ཉེ་སར་ཡོད་པའི་གཟའ་སྐར་དག་དུས་རླབས་ཀྱིས་འཛིན་གྱི་ཡོད་པ་དང་། དུས་རླབས་ཀྱིས་བཟུང་རྗེས་གཟའ་སྐར་གྱི་ཕྱོགས་གཅིག་རྟག་ཏུ་ཉི་མར་ཁ་ཕྱོགས་ནས་ཡོད་པ་དང་ཕྱོགས་གཅིག་རྟག་ཏུ་ནག་ཁུང་ཆགས་ནས་ཡོད་འདུག

ད་ལྟ་གསར་རྙེད་གཟའ་སྐར་དེ་ཚོར་སྔོན་འགྲོའི་ཞིབ་འཇུག་མ་གཏོགས་བྱས་མེད་པ་དང་། གསར་རྙེད་གཟའ་སྐར་ བདུན་གྱི་ནང་ནས་དང་པོ་ནས་གསུམ་པའི་བར་ཉི་མ་དང་བར་ཐག་ཉེ་བོ་ཡོད་སྟབས་ཚ་དྲོད་ཀྱིས་ཆུ་སྐམ་འགྲོ་བ་དང་། ཀྲཔ་པཱིས་དང་པོའི་གཟའ་སྐར་ཨེཆ་(H)ནི་རང་གི་ཉི་མ་ལས་བར་ཐག་རིང་བས་གནམ་གཤིས་གྲང་དྲགས་ཏེ། ཆུ་མེད་པའང་འབྱུང་སྲིད་མོད། འོན་ཀྱང་། དེ་དག་གི་སྐོར་ལ་ཞིབ་ཕྲའི་བརྟག་དཔྱད་ད་དུང་མུ་མཐུད་ནས་བྱ་དགོས་པ་རེད་ཅེས་བརྗོད་ཡོད་འདུག

ཇི་ལྟར་གསར་རྙེད་བྱུང་བ་རེད།

ཀྲཔ་པཱིས་དང་པོའི་དྲོད་ཚད་ནི་ང་ཚོའི་ཉི་མའི་ཚ་དྲོད་ཀྱི་ཕྱེད་ཀ་ལས་ལྷག་ཙམ་ཡིན་པ་དང་། དེའི་ལྗིད་ཚད་ནི་ང་ཚོའི་ཉི་མ་དུམ་བུ་ ༡༠ ལ་བཏང་བའི་ཆ་ ༡ གི་ལྗིད་ཁོག་ཡོད་འདུག དེ་ལ་ཐག་རིང་ནས་ལྟ་སྐབས་དམར་པོ་དང་འོད་རླབས་རབ་རིབ་ཅན་ཞིག་ཏུ་མཐོང་བ་དང་། དེའི་དབྱིབས་ཀྱི་རྒྱ་ཁྱོན་ནི་ང་ཚོའི་ཉི་མའི་ཁྱིམ་རྒྱུད་ཀྱི་གཟའ་སྐར་ཕུར་བུ་ལས་ཅུང་ཆེ་ཞིང་། དེ་འདྲའི་མིའུ་ཐུང་སྐར་མ་གྲང་ངར་ཆུང་བ་(Ultracool dwarf star)ནི། ང་ཚོའི་དགུ་ཚིགས་སྐྱ་མོ་(Galaxy)ནང་ཧ་ཅང་མང་པོ་ཡོད་འདུག

གནམ་རིག་སྨྲ་བའི་ཚན་རིག་པ་གྷིལ་ལཱོཎ་(Gillon)ལགས་ཀྱིས། ང་ཚོའི་ཉི་མའི་ཁྱིམ་རྒྱུད་མ་ཡིན་པར་ཉི་མའི་ཁྱིམ་རྒྱུད་གཞན་ལ་ཞིབ་འཇུག་མ་བྱས་སྔོན་ལ་སྐར་མ་ཆུང་ཆུང་དེ་དག་ལ་སུས་ཀྱང་དོ་སྣང་བྱས་མི་འདུག་ཅེས་བརྗོད་འདུག

ཐེངས་འདིར་གསར་རྙེད་བྱུང་བའི་ཉི་མའི་ཁྱིམ་རྒྱུད་གསར་པ་དེའི་མིང་ལ་ཀྲཔ་པཱིས་དང་པོ་ཞེས་འདོག་དོན་ནི། ཉི་མའི་ཁྱིམ་རྒྱུད་གསར་པ་དེར་བརྟག་དཔྱད་གཏོང་སྐབས་ཀྲཔ་པཱིས་(Trappist)ཞེས་པའི་རྒྱང་ཤེལ་དམིགས་བསལ་བ་ཞིག་བེད་སྤྱད་བཏང་ཡོད་སྟབས་དེ་ལྟར་བཏགས་པ་ཡིན་འདུག

ཚན་རིག་པ་ཚོས་རྒྱང་ཤེལ་ཀྲཔ་པཱིས་ཞེས་པས་གསར་དུ་རྙེད་པའི་ཉི་མའི་ཁྱིམ་རྒྱུད་དེའི་ཉི་མའི་འོད་དང་བཀྲག་མདངས་སོགས་ཇི་ལྟར་འགྱུར་བ་འགྲོ་བཞིན་ཡོད་པར་བརྟག་དཔྱད་བཏང་སྟེ། ཐོག་མར་ཉི་འཛིན་དང་ཟླ་འཛིན་ལྟ་བུའི་གྲིབ་གཟུགས་མཐོང་ཡོད་པ་དང་། མཚམས་རེར་གྲིབ་གཟུགས་དེས་ཉི་མའི་འོད་ཐད་ཀར་ཕོག་པར་འགོག་རྐྱེན་བྱེད་ཀྱི་ཡོད་པ། དེ་བཞིན། གྲིབ་གཟུགས་དེར་ཞིབ་འཇུག་ནན་ཏན་བྱས་མཐར། དེ་དག་ནི་གཟའ་སྐར་ཡིན་པའི་ངེས་ཤེས་གསལ་བོར་རྙེད་ཡོད་འདུག

དེའི་རྗེས་སླར་ཡང་རྒྱང་ཤེལ་ཀྲཔ་པཱིས་དང་བར་སྣང་དུ་ཡོད་པའི་རྒྱང་ཤེལ་ཨེས་པཱིཊ་ཛཱར་(Spitzer)གཉིས་ཟུང་འབྲེལ་ཐོག་གསར་རྙེད་བྱུང་བའི་ཉི་མའི་ཁྱིམ་རྒྱུད་དེར་བརྟག་དཔྱད་བྱས་ཏེ། གཟའ་སྐར་འཁོར་ལམ་དུ་དུས་ཡུན་ག་ཚོད་འགོར་བ་དང་། གཟའ་སྐར་ཕན་ཚུན་གྱི་བར་ཐག དེ་བཞིན། གསར་རྙེད་ཉི་མ་དང་དེ་དག་གི་བར་ཐག གསར་རྙེད་ཉི་མའི་ཁྱིམ་རྒྱུད་ནང་གཟའ་སྐར་ག་ཚོད་ཡོད་མེད་སོགས་རེ་རེ་བཞིན་ཤེས་རྟོགས་བྱུང་ཡོད་པ་རེད།

དེ་རྗེས་ནས་གང་བྱེད་ཀྱི་རེད།

དེ་རྗེས་ནས་ངོ་ལོ་བཅུ་ཕྲག་ཁ་ཤས་རིང་ཞིབ་འཇུག་པ་ཚོས་གསར་རྙེད་གཟའ་སྐར་རེ་རེའི་རླུང་ཁམས་ལ་བརྟག་དཔྱད་བཏང་སྟེ་འགྲེལ་བཤད་རྒྱག་རྒྱུ་ཡིན་པ་དང་། གཟའ་སྐར་དེ་དག་ནང་ཆུ་དང་རླན་གཤེར་གྱི་དངོས་པོ་ཡོད་མེད། དེ་བཞིན་དེ་དག་ནང་ཚེ་སྲོག་ཡོད་པའི་རྟགས་མཚན་སོགས་འཚོལ་ཞིབ་བྱ་རྒྱུ་རེད།

སྤྱིར་འོད་ལོ་ ༤༠ ནི་དེ་ཙམ་རིང་པོ་ཞིག་ཏུ་མཐོང་གི་མེད་ཀྱང་། གསར་རྙེད་ཉི་མའི་ཁྱིམ་རྒྱུད་དེར་ང་ཚོ་དངོས་སུ་བསླེབ་པར་ལོ་ངོ་ས་ཡ་ཁ་ཤས་འགོར་སྲིད། ཉི་མའི་ཁྱིམ་རྒྱུད་གསར་པ་དེ་རྙེད་པར་བརྟེན་ཏེ་ང་ཚོར་རང་གི་ཉི་མའི་ཁྱིམ་རྒྱུད་ལས་བརྒལ་ཏེ། གཟའ་སྐར་གྱི་ཁྱིམ་རྒྱུད་གཞན་ཞིག་ན་ཚེ་སྲོག་ཡོད་མེད་འཚོལ་ཞིབ་བྱེད་པའི་གོ་སྐབས་དང་། དམིགས་འབེན་འཛིན་ས་ཡག་ཤོས་ཤིག་རེག་པ་རེད།

ཚན་རིག་པ་གྷིལ་ལཱོཎ་གྱིས་ “གལ་སྲིད་ང་ཚོས་ད་ལྟ་གནད་དོན་གསར་པ་ཞིག་རྙེད་པ་ཡིན་ན། རྗེས་སུ་རིམ་གྱིས་བརྟག་དཔྱད་བཏང་སྟེ། དེ་དག་དངོས་ཡིན་མིན་ལྟ་ཆོག་གི་རེད།” ཅེས་ཟེར།

འབྱུང་འགྱུར་ ༢༠༡༨ ལོར་རྒྱང་ཤེལ་གསར་པ་ཇཱེམ་སའེ་བྷེ་ཨེབ་ཨིས་པཱེས་(James Webb Space Telescope)ཞེས་པ་འདོན་འཆར་ཡོད་པ་དང་། རྒྱང་ཤེལ་དེ་བཏོན་རྗེས་འཛམ་གླིང་ནས་རྒྱང་ཐག་ལེ་དབར་(miles)ས་ཡ་གཅིག་ལྷག་གི་ཕ་རོལ་ན་འཇིག་རྟེན་ག་འདྲ་ཡོད་མེད་གསལ་ཐིང་ཐིང་གིས་བལྟ་ཐུབ་ངེས་རེད། དེས་ང་ཚོའི་ཉི་མའི་ཁྱིམ་རྒྱུད་ལས་བརྒལ་ཏེ་གཟའ་སྐར་གཞན་དག་གི་སྐོར་ལ་སྔར་ལས་ཀྱང་ཤེས་རྟོགས་མང་དུ་ཡོང་བའི་རེ་བ་བྱེད་ཀྱི་ཡོད་པ་རེད།

དེང་སྐབས་ཚན་རིག་ཞིབ་འཇུག་པ་རྣམས་ཀྱིས་ཐེངས་འདིར་གསར་དུ་རྙེད་པའི་ཉི་མའི་ཁྱིམ་རྒྱུད་གསར་པ་དེ་དང་འདྲ་བའི་ཁྱིམ་རྒྱུད་གཞན་དང་། དེ་འདྲའི་རླུང་ཁམས་འཚོལ་གྱིན་ཡོད་པ་རེད། ཅཱི་ལཱིའི་(Chile)རྒྱལ་ཁབ་ནས་ཨིས་པཱི་ཀུ་ལུས་(Speculoos)ཞེས་པའི་རྒྱང་ཤེལ་བཞི་ཟུང་འབྲེལ་བེད་སྤྱོད་བྱས་ཏེ། འཇིག་རྟེན་ལྷོ་ཕྱོགས་ཀྱི་བར་སྣང་ལ་ཉི་མའི་ཁྱིམ་རྒྱུད་གཞན་ཡོད་མེད་འཚོལ་བཞིན་ཡོད།

གནམ་རིག་པ་གྷིལ་ལཱོཎ་ལགས་ཀྱིས། གལ་སྲིད་ནམ་ཞིག་ང་ཚོའི་ཉི་མའི་ཁྱིམ་རྒྱུད་འདི་འཇིག་སྟེ་རྩ་སྟོང་ཆགས་ཀྱང་། ཐེངས་འདིར་གསར་དུ་རྙེད་པའི་ཉི་མའི་ཁྱིམ་རྒྱུད་ཀྲཔ་པཱིས་དང་པོ་དེ་མི་འཇིག་པར་ངོ་ལོ་ཐེར་འབུམ་ལ་གནས་ངེས་རེད་ཅེས་བཤད་ཡོད་འདུག ང་ཚོའི་འཇིག་རྟེན་གྱི་ཚེ་སྲོག་མཇུག་རྫོགས་ཀྱང་ད་དུང་ཚེ་སྲོག་འཚོ་གནས་ཐུབ་པའི་རེ་བ་ཉག་གཅིག་ཡོད་པ་ནི། ཀྲཔ་པཱིས་དང་པོ་དེ་ཆགས་ཡོད་པར་ངོས་འཛིན་བྱས་ཡོད།

ཨ་རིའི་ནཱ་སཱ་ཚན་རིག་སྡེ་ཚན་གྱི་ཨིས་པཱིཏ་ཛཱར་སྡེ་ཚན་འགན་འཛིན་སྐུ་ཞབས་སཱེན་ཀཱེ་རཱི་(Sean Carey)ལགས་ཀྱིས། “ ད་རེབ་ཉི་མའི་ཁྱིམ་རྒྱུད་གསར་པ་ཀྲཔ་པཱིས་དང་པོ་རྙེད་སོན་བྱུང་བ་དེ་ནི། ལོ་ངོ་ ༡༤ ནང་ང་ཚོའི་ཨིས་པཱིཏ་ཛཱར་ཚོགས་པས་འཚོལ་སྙེག་བྱས་པའི་གྲུབ་འབྲས་ཆེ་ཤོས་དེ་ཡིན།” ཞེས་དང་། “ཨིས་པཱིཏ་ཛཱར་ཚོགས་པས་མུ་མཐུད་ནས་གསར་རྙེད་བྱུང་བའི་ཉི་མའི་ཁྱིམ་རྒྱུད་དེའི་གཟའ་སྐར་དག་གི་གནས་ཚུལ་ལ་ཞིབ་འཇུག་ནན་ཏན་བྱ་རྒྱུ་ཡིན། རྗེས་མ་ཇཱེམ་སའེ་བྷེ་ཨེབ་ཨིས་པཱེས་རྒྱང་ཤེལ་གསར་པ་ཐོན་རྗེས། སྔོན་གྱི་གནད་དོན་དག་ལ་བསྐྱར་དུ་ཞིབ་འཇུག་བྱེད་མ་དགོས་པར། མུ་མཐུད་ནས་གནད་དོན་གསར་པ་འཚོལ་ཞིབ་བྱ་ཐུབ་པ་དང་། གསར་རྙེད་ཁྱིམ་རྒྱུད་དེའི་གསང་བ་ལྐོག་གྱུར་སྔར་ལས་མང་བ་ཞིག་ཕྱིར་འདོན་ཐུབ་པའི་ཡིད་ཆེས་ཡོད།”ཅེས་བརྗོད་འདུག