བོད་ཀྱི་བུ་མོའི་འཚེར་སྣང་དང་ངའི་ལོ་རྒྱུས།

ཚེ་རིང་དབྱངས་སྐྱིད་ལགས་ཀྱིས་དབྱིན་ཡིག་ནང་སྤེལ།

སྤྱིར་བོད་མིའི་ཁྲག་རྒྱུན་ལ་འཚེར་སྣང་རྒྱུག་གིན་ཡོད་པ་དང་། ཡང་སྒོས་བོད་པའི་བུ་མོ་ཚོར་ཚོར་སྣང་དེ་ཤུགས་ཆེན་པོ་ཡོད་པའི་བཤད་སྲོལ་ཞིག་ཡོད། འཚེར་སྣང་དང་ཁུ་སིམ་པོར་བསྡད་ན་མི་དེ་ཞི་འཇམ་པོ་དང་ཀུན་སྤྱོད་ཡ་རབས་ཤིག་ལ་ངོས་འཛིན་བྱེད་ཀྱིན་ཡོད། ང་ཚོས་བུ་མོ་ཡིན་ཚུན་ཆད་ལ་ཁྱད་ཆོས་དམིགས་བསལ་བ་ནི། འཚེར་སྣང་དང་། ལྷག་བསམ། ཉམས་ཆུང་། ཁེངས་སྐྱུང་། དམའ་ས་འཛིན་པ། ཡིན་ལུགས་ཚུལ་ལྡན་སོགས་ཡོད་དགོས་ཟེར་གྱིན་ཡོད།

གུས་མོ་བོད་ཀྱི་བུད་མེད་ཅིག་ཡིན་སྟབས། གུས་མོའི་རང་གཤིས་ལའང་ཁྱད་ཆོས་དམིགས་བསལ་བ་དེ་ཚོ་འཇོག་ཆེད་དུ་ཐབས་ཤེས་བྱས་ཡོད། དཔེར་ན། གུས་མོའི་ཨ་མ་ལགས་ཀྱིས་གུས་མོ་ནར་སོན་དུས་སྐད་ཆ་བཤད་རྒྱུ་མང་གི་འདུག་གསུངས་ནས་སྐད་ཆ་མང་པོ་བཤད་མ་བཅུག་པ་དང་། ཁོང་མོས་རྒྱུན་དུ་ “བུ་མོ་ཞིག་གིས་ཧ་ཅང་ཁུ་སིམ་པོ་ཁ་ཅི་ཡང་གྲགས་རྒྱུ་མེད་པ་དེ་འདྲ་ཡང་བྱེད་མི་ཉན་ལ། བུ་ཞིག་གིས་སྐད་ཅོར་ཚ་བོ་སྨྱོན་པ་ནང་བཞིན་ཡང་བྱེད་མི་ཉན་”ཞེས་གསུངས་ཤིང་ཁ་ཏ་བསླབ་བྱ་གནང་གི་རེད། དེ་འདྲའི་བསམ་བློ་གཏོང་ཕྱོགས་ནི་དུས་ཚོད་ཅིག་ལ་བོད་པའི་སྤྱི་ཚོགས་ནང་ཡོངས་གྲགས་རེད། སྐབས་དེར་བུ་མོ་ལས་བུ་ལ་ལྟ་ཚུལ་བཟང་པོ་ཡོད་པ་དང་། དེས་ཕོ་མོ་དབྱེ་འབྱེད་ཀྱི་ལྟ་ཚུལ་ཡོད་པ་གསལ་པོར་བསྟན་གྱི་ཡོད།

དེ་བཞིན། ང་ཚོར་ཕྲུ་གུ་ལོ་ཆུང་རྣམས་ཀྱིས་མི་རྒན་པའི་མཉམ་དུ་འགྲོ་མི་ཉན་ཞེས་ལབ་པ་མ་ཟད། དམིགས་བསལ་གྱི་མི་རྒན་པའི་ལས་ཀ་ལ་ཇུས་གཏོགས་བྱ་མི་དགོས་ཞེས་བཀའ་སྐྱོན་གནང་གི་རེད། གལ་སྲིད་ཕྲུ་གུ་ཞིག་གིས་མི་རྒན་གྲལ་དུ་མཉམ་ཞུགས་བྱེད་པར་འཚེར་སྣང་མ་བྱས་ན། ཕྲུ་གུ་དེ་ནི་རང་གཤིས་རྩུབ་པོ་ཞིག་ལ་ངོས་འཛིན་བྱེད་ཀྱི་རེད།

མཐར་གུས་མོ་སློབ་གྲྭ་འགྲོ་སྐབས་གོང་གི་བསླབ་བྱ་དེའི་ཤུགས་རྐྱེན་རྒྱུད་ལ་འཇགས་ཚར་ཡོད། གུས་མོ་བློ་ཁོག་མེད་པ་དང་འཚེར་སྣང་ཅན་ཆགས་ཡོད་སྟབས། སློབ་གྲྭའི་ནང་དགེ་རྒན་ལ་དྲི་བ་འདྲི་མ་ཐུབ་ཅིང་གཞན་ལ་ཡ་ལན་སྤྲད་མ་ཐུབ་པ་མ་ཟད། མགོ་བོའང་ཡར་འདེགས་ཐུབ་ཀྱི་མེད། སློབ་གྲྭའི་ནང་གི་ལས་ཀ་ཡོད་ཚད་ལ་མཉམ་ཞུགས་བྱས་ཏེ། རང་གི་ལོ་མཉམ་བུ་དང་། ངོ་མི་ཤེས་པའི་མི། རང་ལས་རྒན་པའི་མིར་ཁ་ཏ་བྱ་མི་ཐུབ་པ་མ་ཟད། སྐབས་དེར་སོ་སོའི་སེམས་གཏིང་གི་འདོད་པ་ལྟར་སློབ་གྲྭའི་གར་སྟེགས་སྟེང་དུ་བྲོ་འཁྲབ་པ་དང་གླུ་ལེན་པ་སོགས་བྱ་རྒྱུར་ཡང་གཉའ་བཅག་འཇོག་གི་ཡོད་པ་རེད།

ཐེངས་ཤིག་གུས་མོ་སློབ་གྲྭའི་ཟློས་གར་ཚོགས་པའི་འཁྲབ་སྟོན་པར་འདེམས་སྒྲུག་བྱས་སོང་། གུས་མོར་མཚོན་ན། འཚེར་སྣང་གི་དབང་གིས་དེར་མཉམ་ཞུགས་བྱས་ཏེ་མི་མང་གིས་དོ་སྣང་ཆེན་པོས་ལྟ་བཞིན་པར་གདོང་ལེན་བྱེད་མི་ཐུབ་མཁན་ཞིག་ཡིན་ཡང་སྐབས་དེར་འཁྲབ་སྟོན་བྱེད་མི་ཐུབ་ཅེས་ཕར་བཤད་ཀྱང་ཕོད་མ་སོང་། འཚེར་སྣང་གི་ཁྱད་ཆོས་དེས་རྐྱེན་བྱས་ནས་རང་གི་འདོད་པ་དང་ཚོར་བ་དེ་དག་གློ་བུར་དུ་མནན་དགོས་ཐུག་ཡོད། སོ་སོའི་གསང་བ་དང་སྒེར་གྱི་གནད་དོན་ཞིབ་ཚགས་བརྗེ་ལེན་བྱ་རྒྱུ་ནི་བློ་ཡུལ་དུའང་ཤར་མྱོང་མེད། སྐབས་དེར་ང་ཚོས་སོ་སོའི་ཨ་མར་ཡིན་རུང་རང་གི་ཟླ་མཚན་དང་། ལུས་པོའི་བདེ་འཇགས་དང་འཕྲོད་བསྟེན་སྐོར་ཁ་གསལ་པོ་ཞིག་བཤད་མི་ཆོག་ཅིང་། བཤད་ནའང་སྤྱི་ཚོགས་ཀྱི་ལམ་སྲོལ་དང་འགལ་བའི་སྐད་ཆ་ཞིག་རེད་ཟེར།

གུས་མོས་སྐབས་དེའི་སྤྱི་ཚོགས་ཀྱི་གནས་སྟངས་དབང་གིས་མིའི་བསམ་བློ་གུ་དོགས་པོ་དང་འཚེར་སྣང་ལ་གོ་ནོར་ཐེབས་པ་ཤེས་ཀྱི་ཡོད། དེར་བརྟེན། གུས་མོས་སུ་ལའང་གནས་སྟངས་དེ་འདྲ་ཞིག་བྱུང་སོང་ཞེས་སྐྱོན་བརྗོད་བྱེད་ས་མེད།

དེ་རིང་གུས་མོས་རྒྱུ་མཚན་མེད་པར་འཚེར་སྣང་བྱ་རྒྱུ་མེད་པ་ཤེས་སོང་། དེ་ནི་རང་གི་ཉམས་མྱོང་དངོས་ལ་བརྟེན་ནས་དེ་འདྲ་ཞིག་ཡིན་པ་ཤེས་སོང་། གུས་མོས་རང་གི་འཚེར་སྣང་ལ་བརྟེན་ནས་གོ་སྐབས་བཟང་པོ་མང་པོ་ཤོར་བ་དང་། རང་གི་ཤེས་བྱ་ཡོན་ཏན་གྱི་ཐོས་རྒྱ་དང་མཐོང་རྒྱ་གཏིང་ཟབ་ཅིང་རྒྱ་ཆེར་གཏོང་བའི་ནུས་པ་རྣམས་ཀྱང་བེད་སྤྱོད་བྱེད་མ་ཐུབ་པར་མི་ཚེར་གྱོང་རྒུད་ཆེན་པོ་ཞིག་བྱུང་བ་ཚོར་གྱིན་འདུག གུས་མོའི་ཆུང་དུས་ཀྱི་བསམ་བློ་གཏོང་ཕྱོགས་དང་ཀུན་སྤྱོད་དེ་དག་གིས་གུས་མོར་རྒྱུ་མཚན་མེད་པ་དང་། རིག་པར་འགལ་བའི་བསམ་བློ་འཁུར་ནས་འཚར་ལོངས་བྱས་བཅུག་སྟབས། ད་ཆ་གུས་མོ་བློ་ཁོག་མེད་ཅིང་དམིགས་ཡུལ་མེད་པ། རེ་བ་ཆེན་པོ་མེད་པ། མ་འོངས་པར་བསྒྲུབ་བྱ་དང་འདུན་པ་གང་ཡང་མེད་པའི་མི་ཞིག་ཏུ་གྱུར་ཡོད། དཔེར་ན། ད་གུས་མོས་རང་ཉིད་ཀྱི་རེ་བ་དང་འདོད་པ་ཞིག་སྒྲུབ་འདོད་ཀྱང་བསྒྲུབ་ཐུབ་རྒྱུ་ཁག་པོ་རེད། ད་ལྟ་གུས་མོའི་མི་ཚེ་ལ་གང་ཞིག་བྱུང་ཡང་དེ་ཉིད་དང་ལེན་བྱས་ཏེ། གང་ཡང་མ་བྱུང་བ་བཞིན་སྡོད་རྒྱུ་ལས་ཅི་ཡང་ལྷག་མེད་པ་མ་ཟད། ད་ལྟ་གཞུང་གི་ལས་སྣེར་ཞུགས་ཡོད་སྟབས་མ་འོངས་པར། དེ་འདྲ་མི་འབྱུང་བའི་ཆེད་དུ་སྐུ་ཚབ་ཅིག་གི་ཚུལ་གྱིས་མི་གཞན་ལ་སེམས་ཤུགས་སྤར་རྒྱུ་ཡང་ཁག་པོ་ཆགས་ཡོད།

གུས་མོ་རང་ཉིད་ཀྱིས་དངོས་སུ་མྱངས་པའི་ཉམས་མྱོང་དང་རང་ཉིད་ལ་བསམ་བློ་ནན་པོ་གཏོང་དུས། སོ་སོའི་ཕྲུ་གུའི་རྒྱུད་ལ་འཚེར་སྣང་འཇགས་ཐབས་ཀྱི་ལམ་སྲོལ་དེས་འཕྲལ་ཕུགས་ལ་ཕན་ལས་གནོད་ཆེ་བ་ཡོད་པའི་དཔང་རྟགས་བྱེད་བཞིན་པ་ཚོར་གྱིན་འདུག དེར་བརྟེན། དེར་དོ་སྣང་དང་སེམས་འཁུར་བྱེད་མཁན་ཚོས། གུས་པས་བདག་ཅག་གིས་འཚེར་སྣང་འཇགས་ཐབས་ཀྱི་ལམ་སྲོལ་དེར་སྒེར་གྱིས་ཞིབ་འཇུག་བྱས་པ་དེ་ཉིད་གཞན་ལ་བརྒྱུད་བསྐུལ་བྱེད་དགོས་པ་འདུག་དྲན་གྱིན་ཡོད་ལ། རང་གི་ཕྲུ་གུའི་རྒྱུད་ལ་འཚེར་སྣང་འཇོག་ཐབས་བྱེད་མཁན་གྱི་ཀློག་པ་པོ་རྣམས་ལ་འཚེར་སྣང་གི་མཇུག་འབྲས་ངོ་སྤྲོད་ཡོང་བའི་རེ་བ་ཡོད།

ལམ་འགྲོ་མེད་པར་གུས་མོས་ཆུང་དུས་མི་ཚེ་ནི་འཚེར་སྣང་ཞིག་དང་དམའ་ས་ཁོ་ན་བཟུང་ནས་བསྐྱལ་དགོས་པ་ཆགས་སོང་བསམ་གྱིན་འདུག གུས་མོས་རང་གི་གདེང་ཚོད་བརླགས་སྟབས། དེ་དང་ལྷན་དུ་ཉམས་མྱོང་དང་བློ་སྐྱེད་གསར་པ་ཡོང་ཆེད་འབད་པ་བྱ་རྒྱུའི་སྤྲོ་སྣང་དང་དབྱིངས་ཀྱང་བརླགས་ཏེ། རང་རྒྱུད་ལ་ཧ་ཅང་འཇིགས་ཤིང་ཁུམས་པའི་བློ་དེ་སྙོར་སྐྱོང་བྱས་དགོས་བྱུང་སོང་ལ། གུས་མོས་གཞན་གྱི་མདུན་སར་འཁྲབ་སྟོན་བྱེད་པའི་ནུས་པའང་མེད་པ་ཆགས་ཤིང་། ནམ་ཡང་སེམས་འཚབ་ཀྱིས་བཟུང་ནས་ལས་ཀ་གང་ལའང་མཉམ་ཞུགས་བྱེད་མ་ཐུབ་པ་ཞིག་ཏུ་གྱུར། དེ་འདྲའི་འཇིགས་ཞུམ་གྱི་བློ་དེར་བརྟེན་ནས་གུས་མོས་རང་གི་བསམ་ཚུལ་དང་། ཚོར་བ་སོགས་ཕྱིར་སྟོན་མ་ཐུབ་པ་ཆགས་སོང་། གུས་མོ་སྤྱི་ཚོགས་ཀྱི་འདོད་མོས་དང་རང་གི་ནུས་པ། མ་འོངས་པའི་བརྩི་འཇོགས་ལ་བློས་གཞིགས་ཏེ་ནམ་ཡང་ས་མཚམས་ཞིག་ལས་མ་བརྒལ་བར་སྡོད་དགོས་བྱུང་སོང་།

གུས་མོས་རང་གི་མྱོང་བ་གཞིེར་བཞག་སྟེ་སྐུལ་མ་བྱེད་འདོད་པ་ནི། མི་སུ་ཞིག་ཡིན་རུང་འཚེར་སྣང་བྱེད་དགོས་པ་མེད་ལ། རང་ཉིད་ཀྱི་གདེང་ཚོད་དང་རང་མཐོང་ལ་ཕན་པའི་བྱ་བ་བསྒྲུབ་ཕྱིར་མདུན་དུ་ཕྱོགས་ཏེ་ལག་ལེན་བསྟར་དགོས་པ་རེད། རང་ལ་ཡོད་པའི་འཚེར་སྣང་གི་རང་བཞིན་དེ་མེད་པར་བཟོ་ཕྱིར་གདེང་ཚོད་ལྡན་པའི་ངང་སྐད་ཆ་བཤད་སྟངས་བསླབ་སའི་སྦྱོང་བརྡར་ཁང་དང་གཟབ་སྦྱོང་ཁག་ལ་མཉམ་ཞུགས་བྱེད་དགོས་ཀྱི་འདུག ལམ་སང་ཡར་རྒྱས་འགྲོ་རྒྱུ་ཁག་པོ་ཡིན་ཡང་། དེས་མ་འོངས་པར་རང་ལ་ཕན་ཐོགས་ཧ་ཅང་ཆེན་པོ་ཡོང་གི་རེད། རང་གི་བསམ་བློ་དང་འདོད་པར་གཞིགས་ཏེ་བརྟག་དཔྱད་བྱེད་ཆེད་བློ་རྒྱ་ཆེན་པོ་བསྐྱེད་དགོས་པ་དང་། དཀའ་ངལ་གསར་པ་ཁག་ལ་གདོང་ལེན་བྱེད་ཆེད་ཉམས་མྱོང་གསོག་དགོས། རང་གིས་འདོད་ན་འདོད་ཀྱི་འདུག མ་འདོད་ན་འདོད་ཀྱི་མི་འདུག་ཅེས་འཚེར་སྣང་མེད་པར་ལབ་ཐུབ་པ་ཞིག་དགོས་ལ། གུ་དོག་པའི་སྤྱི་ཚོགས་ཀྱི་ར་བ་ལས་བརྒལ་ཏེ་སོ་སོའི་རྨི་ལམ་དང་འདོད་པ་ལྟར་མི་ཚེ་སྐྱེལ་ཐུབ་པ་དགོས།

ལས་ཀ་གང་བྱེད་ཀྱང་དེ་ལ་བསམ་བློ་ནན་པོ་གཏོང་ཐུབ་མཁན་ཞིག་དགོས། དཔེར་ན། གོམས་གཤིས་ངན་པས་རང་གི་ཁ་ཕྱོགས་བསྒྱུར་ཏེ་རང་ལ་གནོད་ཀྱི་ཡོད་པའམ། རང་ཉིད་ལས་རིགས་དེ་འདྲ་ལ་ངང་གིས་འཇུག་འགྲོ་བཞིན་ཡོད་ན་ངེས་པར་དུ་དེ་འདོར་དགོས། ང་ཚོས་ངེས་པར་དུ་གདེང་ཚོད་དང་ང་རྒྱལ་གཉིས་ཀྱི་གོ་དོན་ཤེས་པར་བྱས་ཏེ། དེ་དག་ལ་ལྟ་སྟངས་ཕྱོགས་ལྷུང་མེད་པ་ཞིག་དགོས། རང་གི་འདོད་པ་ཁོ་ན་གཅེས་པར་བཟུང་སྟེ་རང་མཐོང་རང་གིས་མ་བརླགས་པ་བྱེད་དགོས་ལ། གཞན་སྐྱོན་ཁོ་ནར་བལྟས་ཏེ་གཞན་མཐོང་རང་རྒྱུད་ནས་མ་བརླགས་པ་བྱེད་དགོས། དེ་བཞིན། ང་ཚོས་རང་གི་བསམ་བློ་ཕྱོགས་ལྷུང་མ་ཡོང་བའི་འབད་བརྩོན་ཡང་བྱེད་དགོས། སྤྱིར་བཏང་རང་བཞིན་ལྷན་སྐྱེས་ཀྱི་འཚེར་སྣང་དེ་སྣང་བར་འགྲོ་བོ་ཡོད་ལ། ང་ཚོའི་སྙན་གྲགས་ལྡན་པའི་རིག་གཞུང་ནང་ཁྱད་ཆོས་ཡིད་དབང་འཕྲོག་པ་འདིར་གོ་གནས་ཆེན་པོ་སྤྲད་ཡོད། འོན་ཀྱང་། ཁྱོད་ཀྱི་མདུན་དུ་སྒྲ་སྐྱེད་ཁ་པར་(Microphone)ཞིག་བཞག་སྐབས། ཁྱོད་རང་བྲོས་མ་འགྲོ་བ་ཞིག་ཡིན་དགོས་ལ། ཅུང་ཟད་འཛུམ་ཅིང་ངོ་ཚ་བའི་རྣམ་འགྱུར་བསྟན་ཏེ་མགོ་བོ་སྒུར་བའམ་གོ་སྐབས་དེ་གཞན་ལ་སྤྲད་རོགས་ཞེས་འབོད་སྐུལ་མི་བྱེད་མཁན་ཞིག་དགོས་ཀྱི་ཡོད། གོ་སྐབས་དེ་ཁྱོད་ཀྱིས་དེ་མ་ཐག་ཡར་ལངས་ཏེ་ལེན་ཐུབ་མཁན་ཞིག་དགོས།

༸གོང་ས་མཆོག་གི་བཀའ་སློབ་ལམ་སྟོན་དང་ཐུགས་རྗེ་བཀའ་དྲིན་གཡོ་བ་མེད་པའི་སྐྱབས་འོག་ཏུ། བོད་མིའི་སྒྲིག་འཛུགས་དང་བོད་ཀྱི་བུད་མེད་ལྷན་ཚོགས་ཀྱིས་རྒྱབ་སྐྱོར་ལ་བརྟེན་ཏེ། བུད་མེད་ཀྱི་ནུས་སྟོབས་གོང་འཕེལ་གཏང་ཐབས་དང་། ཕོ་མོ་གཉིས་དཔུང་པ་མཉམ་གཤིབ་ཡོང་བའི་འབད་བརྩོན་བྱེད་བཞིན་པ་མཐོང་གིན་འདུག རྒྱུ་མཚན་དེ་ལ་བརྟེན་ནས་དེང་སང་ང་ཚོའི་སྤྱི་ཚོགས་ཁྲོད་བུད་མེད་ནང་ནས་མགོ་ཁྲིད་དང་། དགེ་རྒན། ཚོང་པ། སྨན་པ། གསར་འགོད་པ། མཁས་དབང་སོགས་གྲངས་འབོར་ཇེ་མང་དུ་འགྲོ་བཞིན་ཡོད་ལ། དེ་ནི་བོད་པའི་སྤྱི་ཚོགས་ལ་གནད་འགག་ཆེན་པོ་ཞིག་ཆགས་ཡོད། རང་གིས་འདོད་པ་ལྟར་བྱེད་དགོས་ལ། རང་གི་རང་བཞིན་ལྷན་སྐྱེས་ཀུན་སྤྱོད་ལ་གཞན་གྱིས་དབང་སྒྱུར་བྱེད་མ་བཅུག་པར། རང་ཉིད་ངོ་མ་དེ་ཇི་ལྟར་ཡིན་པ་དེ་རང་སྟོན་ཐུབ་པ་ཞིག་བྱེད་དགོས། འཚེར་སྣང་བྱོས་ལབ་སོང་ཟེར་ནས་འཚེར་སྣང་མ་བྱེད་རོགས།

ཟུར་མཆན། རྩོམ་པ་པོ་ནི་བོད་མིའི་སྒྲིག་འཛུགས་ཕྱི་དྲིལ་ལྷན་ཁང་གི་དྲུང་འཕར་ཡིན་པ་དང་། ཁོང་མོས་ལོ་ངོ་ ༢༡ རིང་བོད་མིའི་སྒྲིག་འཛུགས་ནང་ཕྱག་ལས་གནང་ཡོད། གོང་འཁོད་རྩོམ་ཡིག་དེ་ནི་ཁོ་མོ་སྒེར་གྱི་ལྟ་བ་ཡིན་པ་ལས་བོད་མིའི་སྒྲིག་འཛུགས་དང་བཀའ་ཤག་གི་ལྟ་བ་ཡིན་པས་མ་ཁྱབ།

མ་ཡིག་འབྲེལ་ཐག https://parakeetpensthewrit.com/2017/02/16/tibetan-female-shyness-my-story/