རྒྱ་ནག་གཞུང་གིས་མི་འདོད་པ་མང་པོ་ཞིག་ལེ་ཁི་ཆང་གིས་སྦེད།

པེ་ཅིན་གྱིས་ཨ་རྒྱ་གཉིས་བར་ཚོང་འབྲེལ་དམག་འཁྲུག་བརྒྱག་འདོད་མེད་ལ། རྒྱལ་ནང་ལ་ཟིང་འཁྲུག་བསླངས་འདོད་ཀྱང་མེད། ཨེ་ཤ་ཡའི་ལྷོ་ཤར་རྒྱལ་ཁབ་ཁག་ལ་ལྷོ་རྒྱ་ནག་རྒྱ་མཚོའི་བདག་དབང་སྤྲོད་འདོད་མེད་ལ། ཧོང་གོང་ལ་རང་བཙན་སྤྲོད་འདོད་དེ་ལས་ཀྱང་མེད། དེ་མིན་གྱི་གནད་དོན་གཞན་མང་པོ་ཞིག་ཀྱང་ཡོད་པ་རེད།

རྒྱ་ནག་རྒྱལ་ཡོངས་ཚོགས་ཆེན་གཉིས་མཇུག་བསྒྲིལ་རྗེས། གཟའ་ལྷག་པའི་ཉིན་སྲིད་བློན་ལེ་ཁི་ཆིང་གིས་གསར་འགོད་ལྷན་ཚོགས་བསྐྱངས་ཏེ། རྒྱ་ནག་གི་དཔལ་འབྱོར་དང་ཨ་རྒྱའི་འབྲེལ་ལམ་སོགས་ཀྱི་ཐད་གཏམ་བཤད་སྤེལ་ཡོད་པ་དང་། སྲིད་བློན་ལེ་ཡི་གསར་འགོད་ལྷན་ཚོགས་སྟེང་གི་སྐད་ཆ་དག་ལས་ང་ཚོས་གནད་དོན་དྲུག་བཤད་ཐུབ།

དང་པོ། ཨ་རྒྱ་གཉིས་ཀྱི་འབྲེལ་ལམ།

སྲིད་བློན་ལི་ཡིས་ཨ་རྒྱ་གཉིས་བར་ཚོང་དོན་དམག་འཁྲུག་ག་འདྲ་ཞིག་བྱུང་ཡང་། མ་འོངས་པར་ཉེས་ཆད་གཅོད་དགོས་ཡོང་གི་རེད། སྐབས་དེར་ཐོག་དང་པོར་ཨ་རིའི་བཟོ་གྲྭ་ཁག་དཀའ་ངལ་འཕྲད་ངེས་རེད་ཟེར། ལེ་ཡིས་ “ང་ཚོས་རྒྱལ་ཁབ་གཉིས་བར་ཚོང་དོན་དམག་འཁྲུག་བརྒྱག་མ་དགོས་ན་བསམ་ཡོད། དེས་མ་འོངས་པར་ཕྱོགས་གཉིས་ཀྱི་ཚོང་ལས་དྲང་པོ་ཡོང་བར་ཕན་ཐོགས་གང་ཡང་མེད།” “ང་ཚོ་རྒྱ་ནག་གི་ཕྱོགས་ནས་རྒྱལ་ཁབ་གཉིས་ཀྱི་འབྲེལ་ལམ་ལ་བརྡབ་གསིག་ཕྲན་བུ་རེ་བྱུང་བ་དེ་སྐྱོན་ཆ་ཆེན་པོར་མཐོང་གི་མེད། ང་ཚོས་མུ་མཐུད་དུ་བཟང་ཕྱོགས་སུ་མདུན་སྐྱོད་བྱེད་ཐུབ་པར་རེ་བ་བརྒྱབ་ཡོད།” ཅེས་བརྗོད་འདུག

ལེ་ཡིས་པེ་ཅིན་དང་ཝ་ཞིན་ཊོན་གཉིས་ཐུག་འཕྲད་བྱ་འཆར་ཡོད་ལ། དེ་ནི་རྒྱལ་ཁབ་གཉིས་ཀྱི་སྲིད་འཛིན་བར་གྱི་གྲོས་མོལ་ཞིག་ཡིན་པ་དང་། གསར་འགོད་པ་ཚོས་ཐེངས་འདིའི་སྲིད་འཛིན་གཉིས་ཀྱི་ཐུག་འཕྲད་བྱེད་ཡུལ་དེ་སྲིད་འཛིན་ཊི་རུམ་ཕི་ཧྥི་ལོ་རེ་ཌ་(Florida)ཡི་མཱར་ཨཱ་གྷཱོ་སྤྲོ་གླིང་(Mar -a-Lago resort)ཟེར་བ་དེ་ཡིན་སྐོར་བཤད་ཀྱི་ཡོད་པ་རེད།

སྲིད་བློན་ལེ་ཡིས་བརྗོད་དོན་ “ ངས་བསམ་པར་ང་ཚོ་ཕྱོགས་གཉིས་ལ་ཁྱད་པར་ག་རེ་ཡོད་ཀྱང་། ཐུག་འཕྲད་གྲོས་མོལ་དང་ལས་ཀ་མཉམ་དུ་བྱས་ན་གནད་དོན་ག་རེ་ཡིན་ཡང་སེལ་ཐུབ་ངེས་རེད།” ཅེས་བརྗོད་དེ། རྒྱལ་ཁབ་གཉིས་ཀྱི་ཚོང་འབྲེལ་དང་དངུལ་གྱི་འཛའ་ཐང་ཕྱོགས་ནས་མི་འདྲ་བའི་གནས་སྟངས་ཡོད་ཀྱང་། ཁོ་རང་གིས་ཕྱོགས་གཉིས་ཀྱི་འབྲེལ་ལམ་ལ་བཟང་ཕྱོགས་ནས་རེ་བ་རྒྱག་གི་ཡོད་སྐོར་སོགས་བརྗོད་ཡོད།

ཁོས་ད་དུང་བསྐྱར་དུ་ཨ་རིས་ཐེ་ཝན་ཐད་རྒྱ་ནག་གཅིག་གི་སྲིད་ཇུས་ངོས་ལེན་བྱ་རྒྱུ་དེ་ཨ་རྒྱའི་འབྲེལ་ལམ་ཐད་ཀྱི་གཞི་རྩ་མེད་དུ་མི་རུང་བ་ཞིག་ཡིན་སྐོར་བརྗོད་ཡོད། ཨ་རིའི་འོས་བསྡུ་གྲུབ་རྗེས་སྲིད་འཛིན་ཊི་རུམ་ཕིས་ཁ་པར་ལས་ཐའེ་ཝན་གྱི་སྲིད་འཛིན་ཚཱེ་ཡིན་ཝན་ལ་ཁ་བརྡ་བྱས་པ་དེས་དུས་ཐུང་རིང་ཨ་རྒྱའི་འབྲེལ་ལམ་ཟང་ཟིང་བཟོས་ཡོད་ཀྱང་། དེའི་རྗེས་ཊི་རིམ་ཕིས་ཞི་ཅིན་ཕིན་ལ་ཁ་པར་གྱི་ལམ་ནས་ཁོའི་འཛིན་སྐྱོང་གིས་རྒྱ་ནག་གཅིག་གི་སྲིད་ཇུས་ལ་ངོས་ལེན་ཡོད་སྐོར་བརྗོད་ཡོད།

ལེ་ཁི་ཆང་གིས་ཨ་རིའི་སྲིད་འཛིན་ཊི་རིམ་ཕི་དང་མཐོ་རིམ་དཔོན་རིགས་ཚོས་རྒྱ་ནག་གིས་ཨ་རིའི་ཐོན་སྐྱེད་བཟོ་གྲྭ་ཁག་ཏུ་རྐུན་མ་རྒྱག་གི་ཡོད་པར་བཤད་ཀྱང་རྒྱ་ནག་དང་མཉམ་དུ་ཚོང་འབྲེལ་བྱས་པ་དེས་ན་ནིང་གཅིག་པོར་ཨ་རིར་ལས་ཀ་ས་ཡ་ ༡ ལྷག་བསྐྲུན་ཐུབ་ཡོད་པ་རེད། རྒྱལ་ཁབ་གཉིས་ཀྱིས་ཕན་ཚུན་གྱི་མི་འདྲ་བའི་ཕྱོགས་དེར་དོ་སྣང་བྱེད་པ་ལས་ཕན་ཚུན་གཉིས་ཀར་འདོད་མོས་ཡོད་པའི་འདྲ་མཚུངས་ཀྱི་ཕྱོགས་ལ་ཤུགས་བརྒྱབ་ན། གཞན་དག་མ་འོངས་པར་དུས་ཚོད་དང་བསྟུན་ཏེ་འགྲིག་འགྲོ་བ་རེད། ཅེས་སོགས་བརྗོད་ཡོད་པ་རེད།

གཉིས་པ། ཧོང་ཀོང་།

ལེ་ཡིས་ཧོང་ཀོང་རང་བཙན་སྐོར་ཁ་ཐུག་གིས་བཤད་མེད་ཀྱང་། ཁོས་གནད་དོན་དེའི་སྐོར་ཉིན་བཅུའི་སྔོན་གྱི་རྒྱལ་ཡོངས་སྲིད་གྲོས་ཚོགས་ཆེན་གྱི་ཉིན་དང་པོར་སྙན་ཐོ་སྒྲོགས་སྦྱང་བྱེད་སྐབས་བཤད་ཡོད། ཁོས་ “ཧོང་ཀོང་རང་བཙན་གྱི་བསམ་ཚུལ་དེ་ནམ་ཡང་མི་སྲིད་པ་ཞིག་རེད།” ཅེས་བརྗོད་ཡོད།

ཁོས་ད་དུང་རྒྱ་ནག་སྐམ་ས་ཆེན་པོ་དང་ཧོང་ཀོང་གཉིས་ཀྱིས་དཔལ་འབྱོར་འཛུགས་སྐྲུན་ཐད་མཉམ་འབྲེལ་བྱས་ཏེ། ཧོང་ཀོང་དེ་རྒྱ་ནག་གི་ཁྲོམ་རྭའི་དཔལ་འབྱོར་གྱི་གཞི་བརྟེན་ལྟ་བུ་ཞིག་ཏུ་བསྒྱུར་ཐབས་སུ་འཆར་གཞི་གསར་བ་སྒྲིག་གི་ཡོད་སྐོར་བརྗོད་ཡོད།

ལེ་ཡིས་སྲིད་གཞུང་གིས་ད་ལོ་ནས་ཁྲོམ་རྭའི་དཔལ་འབྱོར་གན་རྒྱའི་ལས་འཆར་གསར་པ་འཇོག་རྒྱུ་ཡིན་ལ། དེས་ཕྱིའི་རྒྱལ་ཁབ་ཁག་གི་མ་རྐང་ཧོང་ཀོང་བརྒྱུད་ནས་རྒྱ་ནག་ལ་འདྲེན་གྱི་ཡོད་སྟབས། ཧོང་ཀོང་ནི་ལས་དོན་དེར་ཕན་ཐོགས་ཡུལ་གྱི་གནད་སར་འཁེལ་ཡོད། བཟོ་གྲྭ་དེ་དག་གི་ལས་འཆར་རྒྱུ་ཆ་ཧོང་ཀོང་དང་ཧྲིང་ཧེ། ཧྲིན་ཀྲུན་སོགས་ཀྱི་བར་དུ་འབྲེལ་ཡོད་པ་དང་། ཧོང་ཀོང་དེ་ “རྒྱལ་སྤྱིའི་དཔལ་འབྱོར་ལྟེ་གནས།”དང་། དེ་བཞིན། ཚོང་ལས་ཚོགས་པ་མང་པོའི་འབྲེལ་མཐུད་སྒོ་འབྱེད་ས་ལྟེ་བ་དེ་ཆགས་རྒྱུ་ཡིན་སྐོར་སོགས་བརྗོད་ཡོད།

ལེ་ཡིས་ཧོང་ཀོང་གིས་ “རྒྱལ་ཁབ་གཅིག་ལ་ལམ་ལུགས་གཉིས” ཀྱི་ལྟ་གྲུབ་དེ་ངེས་ཤེས་ཟབ་མོ་ཡོད་པའི་ཐོག་ནས་ལག་ལྟར་བྱེད་དགོས་པ་དང་། ལྟ་གྲུབ་དེར་འཁྱོག་བཤད་སོགས་གང་ཡང་མེད་པའི་ཐོག་ནས་ངོས་ལེན་གནང་ན་ཧོང་ཀོང་ལ་ཕན་ཐོགས་ཆེན་པོ་ཡོད་ཚུལ་བརྗོད་ཡོད།

གསུམ་པ། ལྷོ་རྒྱ་ནག་རྒྱ་མཚོ་དང་ཨེ་ཤ་ཡའི་མནའ་འབྲེལ་རྒྱལ་ཁབ་ཁག

ཐཱ་ལེན་ཊིའི་གསར་འགོད་པས་ལེ་ཁི་ཆང་ལ་སྟོབས་ཆེན་རྒྱ་ནག་དང་ཨ་རིའི་ས་མཚམས་རྩོད་རྙོག་གི་གནས་སྟངས་འོག་ལྷོ་ཨེ་ཤ་ཡའི་རྒྱལ་ཁབ་ཁག་ཅི་བྱ་གཏོལ་མེད་དུ་གྱུར་བཞིན་པའི་སྐབས་འདིར། རྒྱ་ནག་གིས་བསམ་བཞིན་དུ་རྩོད་ཉོག་ཡོད་པའི་གླིང་ཕྲན་དེ་རང་ལ་འཛུགས་སྐྲུན་བྱེད་བཞིན་པའི་སྐོར་ལ་དྲི་བ་བཏོན་པར། ལེ་ཡིས་རྒྱ་ནག་གིས་ལྷོ་ཨེ་ཤ་ཡའི་རྒྱལ་ཁབ་ཁག་ལ་ཨ་རྒྱ་གཉིས་བར་དུ་བཙན་ཤེད་བྱ་འདོད་མེད་ལ། རྒྱ་ནག་གིས་མུ་མཐུད་ཨེ་ཤ་ཡའི་མནའ་འབྲེལ་རྒྱལ་ཁབ་ཁག་གི་བདེ་འཇགས་དང་ཚོང་དོན་ལམ་ལུགས་ལ་རྒྱབ་སྐྱོར་བྱེད་རྒྱུ་ཡིན་ཞེས་བརྗོད་ཡོད་པ་རེད།

“ང་ཚོས་ཨེ་ཤ་ཡའི་མནའ་འབྲེལ་རྒྱལ་ཁབ་ཁག་དེ་གྲང་དམག་སྐབས་ག་རེ་བྱུང་བའི་བསམ་ཕྱོགས་ལྟར་ཟུར་འདོན་བྱ་འདོད་མེད།” ཅེས་བརྗོད་སོང་།

ཨེ་ཤ་ཡའི་ལྷོ་བྱང་ཁུལ་དུ་ཡོད་པའི་ཁྱིམ་མཚེས་རྒྱལ་ཁབ་ཁག་ནི་ཡུན་རིང་ས་མཚམས་རྩོད་རྙོག་ཡོད་མེད་ལ་མ་ལྟོས་པའི་རྒྱ་ནག་གི་ཕྱི་འབྲེལ་ཐོག་ཧ་ཅང་གལ་གནད་ཆགས་ཡོད། ལེ་ཡིས་ལྷོ་རྒྱ་ནག་རྒྱ་མཚོའི་ཆུ་ཡིས་འབྲེལ་ཡོད་པའི་རྒྱ་ནག་དང་ཨེ་ཤ་ཡའི་མནའ་འབྲེལ་རྒྱལ་ཁབ་ཁག་གི་རྩོད་རྙོག་མུ་མཐུད་གྲོས་མོལ་ཐོག་བསྐྱར་དུ་སྐུལ་འདེད་བྱ་ཐུབ་པ་ཞིག་རེད།

ལེ་ཡིས་རྒྱ་ནག་གིས་ད་ལོ་དམག་དོན་འགྲོ་གྲོན་བརྒྱ་ཆ་ ༧ ཙམ་ཇེ་མང་དུ་གཏོང་རྒྱུའི་འདོད་པ་ཡོད་ཚུལ་བསྒྲགས་ཡོད་མོད། ཊི་རུམ་ཕིས་དམག་དོན་འགྲོ་གྲོན་ཨ་སྒོར་ཐེར་འབུམ་ ༥༤ ཇེ་མང་དུ་གཏོང་རྒྱུའི་ཐག་གཅོད་བྱས་ཡོད།

ལེ་ཡིས། རྒྱ་ནག་དང་ཨ་རི་གཉིས་ལ་ཨེ་ཤ་ཡའི་ལྷོ་བྱང་ཁུལ་དུ་ཐུན་མོང་གི་འདོད་མོས་ཡུན་རིང་བོ་ནས་ཡོད་པའི་ལས་དོན་མང་པོ་ཞིག་ཡོད་པ་རེད་ལ། ཨ་རིའི་ཚོང་དོན་བཟོ་གྲྭ་མང་པོ་ཞིག་རྒྱ་ནག་གི་ལྷོ་ཞི་བདེ་རྒྱ་མཚོའི་མངའ་ཁུལ་དུ་ཡོད་སྟབས། པེ་ཅིན་གཞུང་གིས་ཕྱོགས་གཉིས་ཀྱི་འབྲེལ་འདྲེས་དེ་མ་འོངས་པར་ནུས་ཤུགས་ཤིག་ཏུ་འགྱུར་འདོད་པ་ལས། “དཀའ་རྙོག་གི་གཞི་རྩ་” ཞིག་ཏུ་མི་འགྱུར་བའི་རེ་བ་ཡོད།

བཞི་པ། དཔལ་འབྱོར།

ལེ་ཡིས། ཁོ་རང་སྲིད་བློན་ཆགས་རྗེས་ཀྱི་ལོ་ངོ་བཞིའི་རིང་རྒྱ་ནག་གི་དཔལ་འབྱོར་གནས་བབ་ཡང་དག་པའི་ལམ་དུ་ཡར་རྒྱས་བཏང་ཡོད་པ་དང་། སྔ་ལོར་དཔལ་འབྱོར་གནས་བབ་བརྟན་པོ་མེད་པའི་འཇིགས་སྣང་ཅུང་ཙམ་བྱུང་སྐབས། སྲིད་གཞུང་གིས་རྒྱབ་རོགས་ཤུགས་ཆེན་བྱས་པ་དེར་ཐུགས་རྗེ་ཆེ་ཞུས་པ་ཡིན་ཞེས་བརྗོད་ཡོད།

ལེ་ཡིས། འདས་པའི་ལོ་ངོ་བཞིའི་ནང་རྒྱ་ནག་གི་དཔལ་འབྱོར་འཕེལ་ཚད་ཀྱིས་འགྱུར་བ་ཆེན་པོ་གཏོང་ཐུབ་པ་ཞིག་བྱུང་མེད་ཀྱང་བཟོ་གྲྭ་དང་མཛད་སྤྱོད་པའི་འཕེལ་ཚད་ཇེ་མང་དུ་སོང་ཡོད་སྐོར་སོགས་བརྗོད་ཡོད། ༢༠༡༧ ལོར་རྒྱ་ནག་གི་དཔལ་འབྱོར་འཕེལ་ཚད་བརྒྱ་ཆ་ ༦.༧ ལ་དམིགས་ཚད་བཟུང་ཡོད་པ་དང་། ཚད་གཞི་དེར་བསླེབ་རྒྱུ་ལས་སླ་བོ་མིན་ཡང་། རྒྱ་ནག་གི་དཔལ་འབྱོར་འཕེལ་ཚད་དེས་རྒྱལ་སྤྱིའི་དཔལ་འབྱོར་འཕེལ་ཚད་ལ་རམ་འདེགས་དང་སྐུལ་འདེད་ཀྱི་ནུས་པ་གལ་ཆེན་འཐོན་ཡོད།

ལེ་ཡིས། ཤུགས་སྣོན་ཆེ་ཤོས་བརྒྱག་དགོས་ས་དེ་འཛིན་སྐྱོང་གི་ལས་མི་ཇེ་ཉུང་དང་། གཞུང་སྲོལ་དམ་འཛིན་བྱ་རྒྱུ་དེ་རེད། དཔེར་ན། རྒྱ་ནག་གི་ས་གནས་གཞུང་ཞིག་དུ་ལས་རིགས་མི་འདྲ་བ་ ༡༠༨ ཡིས་མགོ་ཁྲིད་ཚོའི་ཆེད་དུ་ལས་གནས་ཀྱི་ཆོག་མཆན་སྤྲོད་དགོས་སྟབས། དེ་ལ་འགྱུར་བཅོས་དང་ཇེ་ཉུང་དུ་གཏོང་དགོས་པ་ཞིག་ཆགས་ཡོད་པ་རེད། ཅེས་བརྗོད་སོང་།

ལྔ་པ། བྱང་ཀོ་རི་ཡ།

ལེ་ཡིས། བྱང་ཀོ་རི་ཡ་དང་འབྲེལ་འདྲེས་བྱེད་པ་དེས་ཉེ་འཁོར་གྱི་རྒྱལ་ཁབ་ཚོ་དང་མཉམ་དུ་དཀའ་རྙོག་བཟོ་ཡི་ཡོད་པ་དང་། དེས་རྒྱ་ནག་གཞུང་ལའང་གནོན་སྐྱོན་བཟོ་བཞིན་ཡོད་པར་བརྗོད་ཡོད་པ་རེད། ཁོས་ “ མི་སུ་ཞིག་ཡིན་ཡང་སོ་སོའི་སྒོ་འགྲམ་ནས་ཟིང་ཆ་ལངས་མི་འདོད་པ་དེ་ཚང་མ་གཅིག་པ་རེད།” ཅེས་བརྗོད་ཡོད་པ་དང་། ལེ་ཡིས་སྣང་མེད་ཀྱི་ཚུལ་དུ་རྒྱ་ནག་ལ་སོལ་དང་ཨ་རི་གཉིས་ཀྱིས་ལྷོ་ཀོ་རི་ཡའི་ནང་རྡུལ་ཕྲན་མཚོན་ཆའི་རྩོད་རྙོག་ཡོད་པ་དེའི་སྐོར་གང་ཡང་བཤད་མེད།

རྒྱ་ནག་དང་ལྷོ་ཀོ་རི་ཡའི་བར་གྱི་འབྲེལ་ལམ་དེ་དམག་དོན་རྐྱེན་པས་ཇེ་སྡུག་ཏུ་འགྲོ་བཞིན་ཡོད་ན་ཡང་། ལྷོ་ཀོ་རི་ཡས་སེམས་འཚབ་བྱེད་ས་གཙོ་བོ་དེ་བྱང་ཀོ་རི་ཡའི་རྡུལ་ཕྲན་མཚོན་ཆའི་ནུས་པ་བཀག་འགོག་ལས་གཞི་ཡར་རྒྱས་གཏོང་གི་ཡོད་ཀྱང་། པེ་ཅིན་གྱིས་དོན་དག་དེ་ཁོ་རང་ཚོའི་ཉེན་ཁ་ཞིག་ཆགས་རྒྱུར་འཇིགས་སྣང་བྱེད་ཀྱིན་ཡོད་པ་རེད།

དྲུག་པ། མཐའ་བསྡོམས།

ལེ་ཡིས་ད་དུང་ཐའེ་ཝན་གྱི་འབྲེལ་ལམ་དང་ཡུ་རོབ་དང་ར་ཤི་ཡ་སོགས་ཀྱི་འབྲེལ་ལམ་སྐོར་ནས་སྐད་ཆ་བཤད་ཡོད་ཀྱང་། མི་རིང་བའི་ཕྱི་ཟླ་ ༤ པའི་ནང་ “ས་རྒྱུད་གཅིག” “ལམ་ཁ་གཅིག” ཅེས་པའི་ཚོང་འབྲེལ་ཚོགས་འདུ་འཚོགས་འཆར་ཡོད་པའི་སྐོར་གང་ཡང་བཤད་མེད། གང་ལྟར། ལོ་འདིར་རྒྱ་ནག་དམར་ཤོག་གཞུང་གི་ཚོགས་ཆེན་ཚོགས་གྲབས་ཡོད་པ་དང་། སྐབས་དེར་མགོ་ཁྲིད་མཐོ་ཤོས་ཚོར་འགྱུར་བ་འགྲོ་བཞིན་ཡོད་པ་རེད།

འདི་ནི་ལེ་ཁི་ཆང་གི་གསར་འགོད་གསལ་བསྒྲགས་མཐའ་མ་དེ་ཡིན་མིན་བཤད་དཀའ་ཡང་། ཁོ་རང་མུ་མཐུད་ ༢༠༡༨ ལོའི་བར་ལོ་ལྔ་མ་ཚར་བར་འདུག་འཆར་ཡོད་པ་གསལ་བོ་རེད།

ལེ་ཡི་གསར་འགོད་གསལ་བསྒྲགས་ཀྱི་མཐའ་མ་དེར་གསར་འགོད་པ་ཚང་མར་བསམ་གཞིག་བྱ་དགོས་པ་ཞིག་བཞག་ཡོད་པ་ནི། ཁོས་ “ད་ཉིན་ཟས་ཟ་རན་སོང་། ང་ཚོ་རྗེས་ནས་གོ་སྐབས་ནམ་ཡོད་ལ་ཕན་ཚུན་ཐུག་འཕྲད་བྱས་ཆོག” ཅེས་བརྗོད་ཡོད་པ་དེ་རེད།

སངས་རྒྱས་དཀོན་མཆོག་གིས་བོད་ཡིག་ཏུ་བསྒྱུར།