དང་པོ། ཁྱོད་ཀྱིས་རང་ཉིད་དང་ཁ་བརྡ་བྱས་མྱོང་ངམ།
མཚན་གུང་ཁ་ཁུ་སིམ་པའི་དུས་སུ་ཁྱེད་རང་མལ་ཁྲིའི་སྟེང་དུ་ཉལ་ཏེ་རང་ཉིད་དང་ཁ་བརྡ་བྱས་མྱོང་ངམ།
༡༽ རང་ཉིད་ལ་དྲིས་པ་སྟེ། མི་ཚེ་འདིར་ཡང་སྙིང་ཅི་ཞིག་དགོས།
འདི་ནི་དྲི་བ་ཤིན་ཏུ་གལ་ཆེན་ཞིག་ཡིན། ངེས་པར་དུ་རང་ཉིད་ལ་ཞིབ་ཕྲ་འདྲི་དགོས། ཁྱེད་ལ་ཚེ་འདིར་དགོས་པ་དེ་ཡང་སྙིང་ཅི་ཞིག་ཡིན། ཁྱེད་ཀྱི་མི་ཚེའི་དམིགས་ཡུལ་དེ་ཅི་ཞིག་ཡིན། ཁྱེད་ཀྱིས་ཆེས་མཐའ་མར་འཚོ་བ་ཅི་འདྲ་ཞིག་རོལ་རྒྱུར་བསམ་བློ་འཁོར་མྱོང་། འདི་དག་གཞན་ལ་བཤད་མི་དགོས། རང་ཉིད་ལ་ཤོད་དང་དེས་འཐུས་པ་ཡིན།
༢༽ ཁྱེད་ཀྱིས་ད་ལྟ་ཅི་ཞིག་བསྒྲུབ་ཐུབ་ཀྱི་ཡོད།
ཁྱེད་ཀྱིས་རླངས་འཁོར་ཡག་པོ་ཞིག་ཉོ་འདོད་དམ། ཁྱེད་རང་མཐོ་རིམ་སྤྲོ་སྐྱིད་ཁང་དུ་འདུག་འདོད་དམ། ཁྱེད་རང་དབང་གིས་འཛམ་གླིང་ཡོངས་སུ་ལྗོངས་རྒྱུར་ཕེབས་འདོད་དམ། ཏན་ཏན་དྲན་གྱི་ཡོད་ངེས། འོ་ན་ཁྱེད་ཀྱིས་ཅིའི་ཕྱིར་དེ་ཚོ་མི་བསྒྲུབ་པ་ཡིན། མི་ལ་ལས་དེ་ལ་དགའ་མོས་མེད་ཅེས་ཟེར། གལ་སྲིད་ཁྱེད་རང་ཁྱིམ་དུ་བསྡད་དེ། ལས་ཀ་ཅི་ཡང་མ་བསྒྲུབས་ཀྱང་སྒོར་མོ་འབེལ་ཐག་ཆོད་ཅིག་ཡོད་ན། རླངས་འཁོར་ཉོ་དྲན་ན་རླངས་འཁོར་ཉོ་བ་དང་། ཁང་པ་ཉོ་དྲན་ན་ཁང་པ་ཉོ་བ། ལྗོངས་རྒྱུར་འགྲོ་དྲན་ན་ལྗོངས་རྒྱུར་ཕྱིན་ན་ཁྱེད་ཀྱི་ནང་སེམས་ལ་དགའ་སྤྲོ་དཔག་མེད་ཅིག་མི་ཡོང་ངམ།
༣ ༽ ཁྱེད་ཀྱིས་ད་ལྟ་ཅི་ཞིག་སྒྲུབ་བཞིན་ཡོད།
ཁྱེད་ཀྱིས་ད་ལྟ་སྒྲུབ་བཞིན་པའི་བྱ་བས་ཁྱེད་ཀྱི་མི་ཚེའི་དམིགས་ཡུལ་མངོན་འགྱུར་ཐུབ་བམ། གལ་སྲིད་མི་ཐུབ་ན། ལོ་ལྔའི་རྗེས་སུ་ཁྱེད་རང་སྔར་བཞིན་ད་ལྟ་དང་གཅིག་པ་མ་ཡིན་ནམ། ད་དུང་ལོ་རེ་ནས་ལོ་རེར་ཇེ་བཟང་དུ་འགྲོ་རྒྱུར་རེ་བ་མེད་ན། ལོ་ངོ་དེ་དག་རྒྱབ་ཆད་ཞིག་རལ་ཞིག་མ་རེད་དམ། ཅིའི་ཕྱིར་འདི་ལྟར་རེད་ཅེ་ན། དེ་ནི་ང་ཚོས་ད་ལྟ་སྒྲུབ་བཞིན་པའི་བྱ་བ་དེ་ང་ཚོའི་རེ་འདུན་དང་དམིགས་ཡུལ་རྣམས་དང་འབྲེལ་བ་མེད་པས་རེད།
༤ ༽ ཁྱེད་ཀྱིས་ཅི་ཞིག་བསྒྲུབ་འོས་སམ།
ཁྱེད་ཀྱི་དེ་རིང་གི་འཚོ་བ་ནི། ཁྱེད་ཀྱི་ལོ་གསུམ་སྔོན་གྱི་འདམ་ག་ལས་བྱུང་ཞིང་། དེ་བཞིན། ཁྱེད་ཀྱི་ལོ་གསུམ་རྗེས་ཀྱི་འཚོ་བ་ནི་ཁྱེད་ཀྱི་ད་ལྟའི་འདམ་ག་ཡིས་ཐག་བཅད་ཡོད། ཁྱེད་རང་མི་ཅི་ལྟ་བུ་ཞིག་ཆགས་འདོད་ན་ཁྱེད་རང་དེ་ལྟ་བུའི་མི་ཞིག་དང་འགྲོགས་ཏེ་སློབ་སྦྱོང་གནང་དགོས། ཁྱེད་ཀྱིས་རང་གི་ནུས་པ་ཡར་རྒྱས་གཏོང་དགོས་སྙམ་ན། ནུས་པ་ཡོད་པའི་མི་ཞིག་དགེ་རྒན་དུ་བསྟེན་རོགས། བྱ་གཞག་ལེགས་གྲུབ་ཅན་གྱི་མི་སྣའི་སྒྲ་ཕབ་མང་ཙམ་ཉན་ཞིང་། ལེགས་གྲུབ་ཅན་གྱི་དཔེ་ཆ་མང་ཙམ་གཟིགས་ཤིག ཁྱེད་ཀྱིས་སྒོར་མོ་ཁྲི་ ༡༠༠༠ བསྒྲུབ་བསམ་ན། དེ་སྔོན་སྒོར་ཁྲི་སྟོང་ཕྲག་བསྒྲུབས་ཟིན་པའི་ཕྱུག་བདག་ཅིག་བཙལ་ཏེ། ཁོང་གིས་སྒོར་མོ་དེ་དག་ཇི་ལྟར་བསྒྲུབས་པའི་ཉམས་མྱོང་དང་ཐབས་ཤེས་སློབ་དགོས། དེ་ལྟར་བྱས་ན། ལེགས་གྲུབ་ཡོད་ཚད་ཇི་ལྟར་བསྒྲུབས་ནས་འགྲུབ་ཡོད་པ་རྟོགས་ཐུབ་པ་ལས། བསྡད་བཞག་ནས་འགྲུབ་ཐབས་མེད་པ་ཁྱེད་ཀྱིས་ངེས་པར་དུ་མཐོང་ཐུབ་ངེས་ཡིན། ཡིན་ཡང་མི་ལ་ལས་གཞན་གྱིས་རང་གི་ལེགས་གྲུབ་ཀྱི་བདག་གཉེར་(经营)འཕངས་མེད་ངང་ཁྱོད་ལ་བསླབས་ཤིང་། ཧ་ཅང་རྩ་ཆེའི་ཆ་འཕྲིན་ཟིན་བྲིས་རྣམས་ཀྱང་མཁོ་སྤྲོད་གནང་ཡང་། ཁྱོད་ཀྱིས་ད་དུང་ཁ་གཡར་ས་བཙལ་ནས་འདི་ལྟར་ཟེར་སྲིད་དེ། ཀ. ང་འདི་ལ་དགའ་མོས་མེད། ཁ. ང་བྲེལ་བ་ཤིན་ཏུ་ཆེ། དུས་ཚོད་མེད། ག. འདི་ཕལ་ཆེར་ང་ལ་འཚམ་པོ་མི་འདུག
དགའ་མོས་གླེང་བ།
སྒོར་མོ་མེད་ན་ཁྱོད་ལ་དགའ་མོས་དེ་དག་གླེང་བའི་ཐོབ་ཐང་ཡང་མེད། དེ་ལས་སོ་སོས་བསྒྲུབ་འོས་པ་དེ་ཡག་པོར་སྒྲུབས་ཤིག སོ་སོས་གང་འདོད་ལྟར་སོ་སོ་དགའ་བ་ཡོད་ཚད་བསྒྲུབ་ཐུབ་མཁན་ག་ཚོད་ཅིག་འདུག དཔེར་ན། ཁྱེད་རང་རླངས་འཁོར་ལ་དགའ། དེས་ཁྱེད་རང་ལས་དོན་སྒྲུབ་པ་དང་ཕ་ཡུལ་དུ་ལོག་སྐབས་སྟབས་བདེ་པོ་དང་ལྷོད་པོ། ངོ་སོ་ཆེན་པོའང་ཡོད། ཁྱེད་རང་སྤྲོ་སྐྱིད་ཁང་ལ་དགའ། དེར་ཡངས་ཤིང་རྒྱ་ཆེ་ལ་དཀར་ཆ་དོད་པོ་དང་བག་ཕེབས་པོ་ཡོད། དེ་ལྟ་ནའང་ཁྱེད་ཀྱིས་རླངས་འཁོར་ཉོས་ཡོད་དམ། ཁྱེད་ཀྱིས་སྤྲོ་སྐྱིད་ཁང་ཉོས་ཡོད་དམ། ཉོས་མེད། འོ་ན་ག་རེ་བྱས་ནས་མ་ཉོས་པ་རེད། དེ་ནི། སྒོར་མོ་མེད་པས་རེད། དོན་དངོས་ཐོག་ཏུ་མི་ཕལ་ཆེ་བས་གསོན་གནས་ཆེད་ལས་ཀ་སྒྲུབ་ཀྱིན་ཡོད། སོ་སོ་དངོས་གནས་ཐོག་ག་རེ་ལ་དགའ་ན་དེ་རང་སྒྲུབ་ཐུབ་མཁན་ཤིན་ཏུ་ཉུང་། བྱི་དུག་ཚོང་མཁན་བྱི་དུག་ལ་དགའ་བ་རེད་དམ། པུར་སྒམ་ཚོང་མཁན་པུར་སྒམ་ལ་དགའ་བ་རེད་དམ། མི་ཞིག་ལ་སྒོར་མོ་མེད་པའི་དུས་སུ་དགའ་མོས་ཡོད་དང་མེད་ཅེས་གླེང་བའི་འདམ་ག་དང་ཐོབ་ཐང་མེད།
བུ་མོ་མཛེས་མ་ཞིག་མཐོང་བ་དང་ཁྱེད་རང་དེ་ལ་དགའ་ངེས། དེར་ཧང་སང་རྒྱུ་ག་རེ་ཡོད། མི་ཞིག་གམ་བྱ་བ་ཞིག ཡང་ན་ཚོང་ཞིག་ལ་དགའ་བ་གང་ཡིན་ཡང་དེ་ལ་བརྒྱུད་རིམ་ངེས་ཅན་ཞིག་ཡོད། ཁྱེད་ཀྱིས་ད་ལྟ་རང་ཉིད་ཀྱིས་སྒྲུབ་པའི་ལས་ཀ་འདིས་རང་ལ་བདེ་ཐང་དང་སོས་དལ། ཁྱིམ་ཚང་འཆམ་མཐུན། འཚར་ལོངས་བདེ་ཐང་། འཚོ་བ་ཕྱུག་པོ། ཕྱི་ཡུལ་དུ་ལྗོངས་རྒྱུ་སོགས་བསྒྲུབ་ཐུབ་པར་བསམ་ན་ལས་ཀ་དེར་གུས་བརྩི་བྱེད་ཐུབ། དངོས་གནས་རང་ཉིད་ལ་ལས་འགན་རང་དབང་། དུས་ཚོད་རང་དབང་། སེམས་ཁམས་རང་དབང་སོགས་སྤྲོད་ཐུབ་ཅིང་། སོ་སོའི་དམིགས་ཡུལ་དང་འཚོལ་སྙེག་ཆ་ཚང་མངོན་དུ་འགྱུར་ནུས་ན། ཁྱེད་ཀྱིས་དགའ་བཞིན་སྤྲོ་བཞི་དང་ལེན་བྱས་ན་ཏན་ཏན་ཁྱེད་ཀྱི་ལས་ཀ་ལ་དགའ་ཞིང་དྭངས་བ་སྐྱེ་ངེས། ལས་ཀ་དེས་ཁྱེར་འོང་བའི་ཡོད་ཚད་ཀྱིས་ཁྱེད་ལ་ཤིན་ཏུ་དགའ་ཞིང་སྐྱིད་པའི་ལོངས་སྤྱོད་ཅིག་མྱོང་དུ་འཇུག་ངེས། འདིའི་མིང་ལ། དགའ་མོས་ཀྱིས་རྐྱེན་པས་སྒྲུབ་པ་མ་ཡིན་པ། དེ་ལས་ལྡོག་སྟེ་བསྒྲུབས་ཏེ་ད་གཟོད་དགའ་མོས་སྐྱེས་པ་ཟེར།
ང་ཤིན་ཏུ་བྲེལ། དུས་ཚོད་མེད།
མི་ཚང་མའི་དུས་ཚོད་གཅིག་པ་རེད། གནད་འགག་ནི་ཁྱེད་ཀྱིས་དུས་ཚོད་གང་དུ་སྤྱོད་མིན་དེ་རེད། ཁྱེད་ཀྱིས་སྔར་ནས་དུས་ཚོད་ཡོད་ཚད་དང་ནུས་ཤུགས་ཆ་ཚང་ས་ཆ་ཞིག་ལ་སྤྱད་ཚར་ཞེས་གསུང་གི་ཡོད་དམ། འོ་ན། ཁྱེད་ཀྱི་ཡོང་འབབ་དང་དུས་ཚོད་བཀོལ་ཚད། ནུས་ཤུགས་བཅས་ཀྱི་བརྒྱ་ཆའི་སྡུར་ཚད་ཏག་ཏག་སླེབ་ཀྱི་ཡོད་དམ། ཁྱེད་རང་ཉིན་རྟག་པར་འདི་ལྟར་བྲེལ་བ་ཆེན་པོ་ཡིན། འོ་ན། བྲེལ་བ་དེ་མཇུག་རྫོགས་པའི་ཉིན་མོ་ག་དུས་ཡིན། ང་ཚོའི་འཚོ་བ་ལོ་རེ་ནས་ལོ་རེར་འགྱུར་ལྡོག་ཆེན་པོ་རེད། གལ་སྲིད་བསམ་ཡུལ་ལས་འདས་པའི་དོན་རྐྱེན་འདྲ་བྱུང་སྟེ། ཁྱེད་རང་ཟླ་བ་དྲུག་གམ་ལོ་གཅིག་རིང་ལས་ཀ་བྱེད་མ་ཐུབ་པ་ན། ཁྱེད་ཀྱི་ཡོང་འབབ་ཤིན་ཏུ་ཉུང་བའམ། ཀླད་ཀོར་དུ་འགྱུར་ཡང་སྲིད། མ་ཟད་བསྟུད་མར་ལོ་ཕྱེད་དམ་ལོ་གཅིག་ལ་ལས་ཀ་མ་བྱས་ན་ཆོག་གམ།
དེར་བརྟེན། ངས་ཁྱེད་ལ་དངོས་ཡོད་གནས་ཚུལ་དེ་ཞུ་དགོས། ད་ལྟ་ཁྱོད་ཀྱི་ལས་ཀ་ཇི་ཙམ་བྲེལ་བ་ཆེ་ན་དེ་ཙམ་གྱིས་ཁྱེད་རང་འཆིང་ནས་བཞག་ཡོད། ཁྱེད་རང་ལྷོད་ལ་བབ་སྟེ་དབྱེ་ཞིབ་ལེགས་པོ་ཞིག་གནང་དགོས། ཁྱེད་ཀྱིས་ད་ལྟ་སྒྲུབ་བཞིན་པའི་ལས་ཀ་ཁྱེད་ཀྱི་མི་ཚེའི་དམིགས་ཡུལ་ཐོག་ཁེལ་ཐུབ་བམ། མི་ཚེ་འདིར་ཁྱེད་ཀྱིས་ད་དུང་རླངས་འཁོར་ཡག་པོ་ཉོ་བ་དང་སྤྲོ་སྐྱིད་ཁང་དུ་སྡོད་པ། འཛམ་གླིང་ཡུལ་གྲུ་སོ་སོར་ལྗོངས་རྒྱུར་འགྲོ་ཐུབ་བམ། གལ་སྲིད་མ་ཐུབ་ན། ཁྱེད་ཀྱིས་ད་ལྟ་བསྒྲུབས་པ་ཡོད་ཚད་མཇུག་བསྒྲིལ་ན་ལེགས། ཁྱེད་ཀྱི་ཡོང་འབབ་རང་དབང་། དུས་ཚོད་རང་དབང་། སེམས་ཁམས་རང་དབང་སོགས་བསྐྲུན་ཐུབ་པའི་ལས་དོན་ཞིག་བདམས་ཏེ། དུས་ཚོད་དང་ཚེ་སྲོག་སྒོར་མོ་ལ་མ་བརྗེ་རོགས།
འོས་འཚམ་ཡིན་མིན་གླེང་བ།
ཁྱེད་ཀྱིས་རང་ཉིད་ཀྱིས་ཅི་ཞིག་བསྒྲུབ་ན་འཚམ་མིན་ཤེས་སམ། ཁྱེད་ཀྱིས་ད་ལྟ་སྒྲུབ་བཞིན་པའི་བྱ་བ་དེ་ཁྱེད་ལ་ཤིན་ཏུ་འཚམ་པོ་འདུག་གམ།
སློབ་དཔོན་ཞིག་གིས། མི་ཡི་མི་མངོན་པའི་ནུས་པ་བརྒྱ་ཆ་ ༩༠ ཙམ་ད་དུང་ཕྱིར་མངོན་མེད་ཅིང་། མི་ཡི་མི་ཤེས་པའི་ནུས་པ་ནི་ཤེས་པའི་ནུས་པའི་ལྡབ་སུམ་ཁྲི་རེད། ཅེས་གསུངས་མྱོང་། འདིས་གསལ་བཤད་བྱེད་པ་ནི། མི་ཡི་ནུས་པ་མང་པོ་ཞིག་ད་དུང་ཕྱིར་བཏོན་ཐུབ་མེད། བཤད་སྟངས་གཞན་བྱས་ན། ད་དུང་མི་མང་པོ་ཞིག་གིས་རང་ཉིད་རྒྱུས་ལོན་བྱེད་ཐུབ་མེད། ཁྱེད་ཀྱིས་ད་དུང་ལས་དོན་མང་པོ་ཞིག་བསྒྲུབ་ཆོག་ཅིང་། ཁྱེད་ལ་ད་དུང་ལེགས་གྲུབ་ཆེན་པོ་ཞིག་འབྱུང་ཆོག ད་ལྟ་ནི་གོམས་པའི་དབང་གིས་འཁོར་རྒྱུགས་བྱེད་བཞིན་པ་ཙམ་རེད། དེ་བརྟེན། ལས་དོན་གང་ལའང་ཁྱེད་དང་མི་འཚམ་ཞེས་བཤད་མི་རུང་། རྒྱུ་མཚན་ནི་ལས་དོན་གྱིས་ལུས་རྟེན་དང་ན་ཚོད་དབྱེ་འབྱེད་མི་བྱེད། མ་མཐར་ཡང་ཁྱེད་ཀྱིས་རང་ལ་གོ་སྐབས་ཐེངས་གཅིག་སྤྲོད། ནོར་འཁྲུལ་བྱུང་ཡང་རུང་སྟེ་གོ་སྐབས་ནི་ནམ་ཡང་ཤོར་དུ་མ་འཇུག བསྐྱར་དུ་འདྲི་རྒྱུར། ཁྱེད་ཀྱིས་རང་ཉིད་དང་ཁ་བརྡ་བྱས་སམ།
གཉིས་པ། ཁྱེད་རང་ཤིན་ཏུ་རྩ་ཆེན་ཞིག་ཡིན།
ལས་གནས་སུ། དངོས་གནས་བྱས་ན་ཁྱེད་རང་རྩ་ཆེན་ཞིག་མིན།
ཁྱིམ་ཚང་ནང་། ཁྱེད་རང་ཤིན་ཏུ་རྩ་ཆེན་ཞིག་ཡིན།
ལས་གནས་གང་ཞིག་ཡིན་ཡང་གཅིག་མཚུངས་རེད། ཁྱེད་རང་ལས་གནས་དེར་ཁ་གྱེས་ཀྱང་ལས་གནས་ནི་སྔར་བཞིན་འཁོར་རྒྱུགས་བྱེད་ཅིང་། ཁོ་ཚོས་ཤིན་ཏུ་མགྱོགས་པོས་ཁྱེད་ཀྱི་ཚབ་ཏུ་མི་གཞན་ཞིག་བརྙེད་ངེས་རེད། ཁྱེད་རང་ཁྱོད་ཀྱིས་བསམ་པ་ལྟར་དེ་འདྲའི་གལ་ཆེན་ཞིག་མ་རེད། སོ་སོར་ཚོད་དཔག་མཐོ་དྲགས་ཏེ་རང་ཉིད་མར་མི་འབབ་པ་མ་བྱེད་རོགས། དོན་དངོས་ཐོག་ཤེས་ཡོན་ཅན་ཚང་ཁ་རྒྱག་བཞིན་པའི་ཁྲོད་དུ་ཁྱེད་རང་གཏན་ནས་རྩ་ཆེན་ཞིག་མ་རེད།
ཁྱིམ་ཚང་ནང་། དངོས་གནས་བྱས་ན་ཁྱེད་རང་ཤིན་ཏུ་རྩ་ཆེན་ཞིག་ཡིན།
ཁྱེད་རང་ཁྱིམ་ཚང་དང་ཁ་བྲལ་ན། ཁྱིམ་ཚང་འདི་ལ་ཆག་གྲུམ་ཤོར་ངེས། སྐབས་རེར་ཚེ་སྲོག་ནི་ཤིན་ཏུ་མཁྲེགས་པོ་ཞིག་ཡིན་ཡང་སྐབས་རེར་ཚེ་སྲོག་ནི་ཧ་ཅང་སྙི་པོ་ཞིག་ཡིན། གལ་སྲིད་རྐྱེན་དབང་གིས་ཁྱེད་རང་ན་བའམ། ཡང་ན་འཇིག་རྟེན་འདི་དང་ཁ་བྲལ་ཚེ། ཁྱེད་ཀྱི་ཁྱིམ་ཚང་དང་ནང་མིར་མཚོན་ན་དངོས་གནས་མགོ་ཀླད་ཀྱི་གནམ་རྡིབ་པ་ཡིན། ཁྱེད་དང་ཁྱེད་ཀྱི་རྒྱབ་སྐྱོར་མེད་ན་ཁྱིམ་ཚང་འདི་ཇི་ལྟར་འཁོར་རྒྱུགས་བྱ་དགོས་སམ།
ང་ཚོས་ཐལ་དྲགས་པོས་རང་གི་གཟུགས་པོ་གཏའ་མར་བཞག་ཏེ་ལེགས་འགྲུབ་དང་ཁེ་གྲགས་སྒྲུབ་པ་དང་། ད་དུང་སྣང་མེད་ངང་ཁྱིམ་ཚང་གི་དྲོད་ཁོལ་གླེང་། ཡང་བསྐྱར་སྒོར་མོ་ཁྱེར་ཏེ་གཟུགས་པོའི་བདེ་ཐང་སླར་གསོ་བྱེད་དགོས་བསམ་ཏེ། ཁྱིམ་ཚང་ལ་ཁུར་པོ་འཕར་མ་བཞག་སྟེ། གཉེན་ཉེ་ལ་སེམས་སྡུག་འཕར་མ་སྤྲོད་ཀྱིན་ཡོད། ང་ཚོ་ཚང་མའི་ངོས་ནས་བཤད་ན། ལས་ཀ་འཚམ་པོ་དང་གཟུགས་པོ་བདག་གཅེས། ཁྱིམ་མིར་རམ་འདེགས་མང་ཙམ་བྱ་རྒྱུ་ནི་དོན་ངོ་མའི་རྩ་ཆེ་ཤོས་དེ་ཡིན། དེར་བརྟེན། ཡིད་ལ་འདི་ལྟར་འཛིན་རོགས། ཁྱིམ་ཚང་ནང་སུས་ཀྱང་ཁྱེད་ཀྱི་ཚབ་བྱེད་ཐབས་མེད་ལ། ཁྱེད་ཀྱི་ནང་མིར་མཚོན་ན་ཁྱེད་རང་ནི་དོན་ངོ་མའི་རྩ་ཆེ་ཤོས་དེ་ཡིན། དུས་རྟག་ཏུ་ནང་མིར་མེད་མི་རུང་བ་ནི་རྒྱུ་ནོར་དང་སྙན་གྲགས་མིན་པར་ཁོ་ཚོར་མཁོ་བ་ནི་ཁྱེད་ཀྱི་རམ་འདེགས་ཡིན།
རྒྱ་ཡིག་འཕྲིན་སྟེགས་ལས་བོད་བསྒྱུར་ཞུས།
