འགྲོ་བ་མིའི་ཐོབ་ཐང་ལྟ་ཞིབ་ཁང་གི་སོ་ཕྷི་རི་ཆརཌ་སཱན་གྱིས་བརྩམས།
(Sophie Richarson, Human Rights Watch, 24 May 2017)
ཚེ་རིང་དོན་གྲུབ་ཀྱིས་བསྒྱུར།
༢༠༡༧ ཟླ་ ༡ ཚེས་ ༡༨ ཉིན་སུད་སིའི་རྒྱལ་ས་ཇེ་ནེ་ཝ་རུ་ཡོད་པའི་འཛམ་གླིང་མཉམ་འབྲེལ་རྒྱལ་ཚོགས་ཀྱི་ཡུ་རོབ་སྤྱི་ཁྱབ་ལས་ཁུངས་ཀྱི་གྲོས་ཚོགས་ཚོགས་ཁང་ནང་རིམ་པ་མཐོ་བའི་མཛད་སྒོ་ཞིག་གི་སྐབས་རྒྱ་ནག་གི་སྲིད་འཛིན་ཞི་ཅིན་ཕིན་གྱིས་གཏམ་བཤད་སྤེལ་བཞིན་པ།
“ཤར་ལྷོ་ནུབ་བྱང་གི་ཕྱོགས་མཚམས་ཐམས་ཅད་དུ་ན་ཚ་ཞིག་ཁྱབ་བརྡལ་དུ་འགྲོ་བཞིན་འདུག” འདི་ནི་ལོ་སྔོན་མའི་ནང་མཉམ་འབྲེལ་རྒྱལ་ཚོགས་ཀྱི་སྤྱི་ཁྱབ་དྲུང་ཆེ་ཨན་ཀྲོ་ནོ་གྷུ་ཀྲ་རེ་སེ་ཡིས་འཛམ་གླིང་ཁྱོན་ཡོངས་སུ་འགྲོ་བ་མིའི་ཐོབ་ཐང་ལ་དོ་སྣང་མེད་པའི་སྐོར་བརྗོད་པའི་རྣམ་པ་རེད། འོན་ཀྱང་གྷུ་ཀྲ་རེ་སེ་ཡིས་རྒྱལ་ཚོགས་ནང་ལོགས་ནས་འགྲོ་བ་མིའི་ཐོབ་ཐང་ཐོག་གནོན་ཤུགས་སྤྲོད་ཚུལ་ཏེ་དམིགས་བསལ་དུ་མཉམ་འབྲེལ་རྒྱལ་ཚོགས་བདེ་འཇགས་ཚོགས་ཆུང་གི་གཏན་འཇགས་ཚོགས་མི་རྒྱ་ནག་གིས་རྒྱལ་ཚོགས་ཀྱི་སྒྲིག་འཛུགས་ལྟེ་བ་ལ་གནོན་ཤུགས་སྤྲོད་ཕྱོགས་ཐད་ལའང་དོ་ཁུར་བྱ་དགོས་ཀྱི་ཡོད།
ཡུན་རིང་རྒྱ་ནག་གཞུང་འོག་གཉའ་གནོན་མྱོང་བཞིན་པའི་ཡུ་གུར་ཁ་ཆེ་བ་རྣམས་ཀྱི་བདེ་དོན་ཆེད་དུ་ཇར་མན་གྱི་སྙན་གྲགས་ཅན་གྱི་ལས་འགུལ་བ་ཌོལ་ཀུན་ཨི་སཱ་སྤྱི་ཟླ་ ༤ ཚེས་ ༢༦ ཉིན་ནེའུ་ཡོག་མཉམ་འབྲེལ་རྒྱལ་ཚོགས་ཀྱི་སྤྱི་ཁྱབ་ལས་ཁུངས་སུ་སྐོང་བཞིན་པའི་གདོད་མའི་མི་རིགས་ཀྱི་གནད་དོན་གླེང་སྟེགས་ཤིག་ལ་བཅར་ཡོད། ཁོང་གླེང་སྟེགས་དེར་ཞུགས་རྒྱུའི་ཆོག་མཆན་ཆ་ཚང་ཐོབ་ཡོད་ཀྱང་ཨི་སཱ་ཡིས་བརྗོད་པ་ལྟར་ན། ལྷན་ཚོགས་ཁང་ཨང་ ༤ སྐྱོད་བཞིན་པའི་སྐབས་ཚོགས་ཁང་གི་བར་འཁྱམས་ནས་རྒྱལ་ཚོགས་ཀྱི་བདེ་སྲུང་མི་སྣས་ཁོང་གི་ལམ་ཁ་བཀག་སྟེ་འཕྲལ་མར་ས་ཁུལ་དེ་ནས་ཁ་བྲལ་དགོས་ཚུལ་བརྗོད་ཡོད་འདུག ཉིན་རྗེས་མར་ཡང་ཁོང་གི་ཚོགས་བཅར་གྱི་ངོས་བཞེས་ཆོག་མཆན་རྩིས་མེད་དུ་སོང་མེད་ནའང་འཛུལ་ཞུགས་བྱ་རྒྱུར་བསྐྱར་དུ་བཀག་འགོག་བྱས་ཡོད་ལ། སྤྱི་ཚེས་ ༢༨ གླེང་སྟེགས་འདི་བསྐྱར་དུ་མགོ་འཛུགས་བྱེད་སྐབས་ཀྱང་བཀག་འགོག་བྱས་ཡོད། འགྲོ་བ་མིའི་ཐོབ་ཐང་ལྟ་ཞིབ་ཁང་གིས་དེའི་སྐོར་ལ་འགྲེལ་བརྗོད་དགོས་ཚུལ་བརྗོད་སྐབས་རྒྱལ་ཚོགས་ཀྱི་མགྲིན་ཚབ་ལས་ཁུངས་ནས་གནས་དོན་དེའི་སྐོར་ལ་ཤེས་རྟོགས་མེད་ཚུལ་བརྗོད་ཡོད།
དོན་རྐྱེན་དེ་རིགས་ནི་ཐེངས་དང་པོར་བྱུང་བ་དེ་འདྲ་མ་ཡིན། སྤྱི་ཟླ་དང་པོའི་ནང་མཉམ་འབྲེལ་རྒྱལ་ཚོགས་ཀྱིས་ཇེ་ནི་ཝ་རུ་ཡོད་པའི་རྒྱལ་ཚོགས་ལས་ཁུངས་སུ་རྒྱ་ནག་གི་སྲིད་འཛིན་ཞི་ཅིན་ཕིན་ཕེབས་བསུ་ཞུ་སྐབས་ལས་དོན་འཆར་འགོད་ཀྱི་དགོས་མཁོ་ལ་བསྙད་དེ་རྒྱལ་ཚོགས་ཀྱི་ལས་བྱེད་མི་སྣ་ ༣,༠༠༠ ལྷག་ཙམ་ཇེ་ནི་ཝ་རུ་བཏང་ཡོད་ཅིང་། ད་དུང་ལས་ཁུངས་ཀྱི་ས་ཁང་གཡས་གཡོན་དུ་གཞུང་འབྲེལ་མ་ཡིན་པའི་ཚོགས་པའི་མི་སྣ་རྣམས་འཛུལ་ཞུགས་བྱ་རྒྱུར་བཀག་འགོག་ཀྱང་བྱས་ཡོད། སྤྱི་ཁྱབ་དྲུང་ཆེ་གྷུ་ཀྲ་རེ་སེ་ཡི་སྲིད་འཛིན་ཞི་ཅིན་ཕིན་ངོ་སྤྲོད་གཏམ་བཤད་ནང་། རྒྱ་ནག་གིས་རྒྱལ་ཁབ་ཁག་ཕན་ཚུན་བར་གྱི་མཉམ་འབྲེལ་གོང་བུ་གཅིག་འགྱུར་གྱི་རྩ་དོན་དང་རྒྱལ་ཚོགས་ལ་བཅངས་པའི་ལར་ཞེན་དང་ཆོད་སེམས་ལ་ངོ་བསྟོད་བྱས་པ་མ་གཏོགས་འགྲོ་བ་མིའི་ཐོབ་ཐང་རྡོག་རོལ་གཏོང་ཕྱོགས་ཐོག་ལ་སེམས་ཁུར་ཡོད་པ་རྣམ་པ་གང་ཡང་བསྟན་མེད།
དེ་ཡང་ལས་འགུལ་བ་ཀཱའོ་ཞུན་ལི་ཡིས་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱིས་བསྐོང་ཚོགས་བྱས་པའི་རྒྱ་ནག་གི་སྤྱི་ཡོངས་དུས་མཚམས་སོ་སོའི་བསྐྱར་ཞིབ་གླེང་སྟེགས་ནང་འཛུལ་ཞུགས་བྱ་ཐབས་བྱས་པའི་རྐྱེན་གྱིས་རྒྱ་ནག་གཞུང་གིས་ཁོ་མོ་བཙོན་འཇུག་བྱས་ཏེ་ ༢༠༡༤ ལོར་ཁོ་མོ་བཀག་ཉར་འོག་འདས་གྲོངས་སུ་ཕྱིན་ཏེ་ད་བར་ལོ་ངོ་གསུམ་ཕྱིན་ཡོད་ཀྱང་། ད་བར་རྒྱ་ནག་གཞུང་གིས་ཁོ་མོའི་འཆི་རྐྱེན་ལ་འགན་འཁྲི་ཡོད་སྲིད་པའི་མི་སྣ་རྣམས་ལ་ཉེས་ཆད་འགེལ་རྒྱུ་ལྟ་ཅི་ཐ་ན་ཁོ་མོ་འཆི་རྐྱེན་ཐད་ལ་འགྲེལ་བརྗོད་འདང་ངེས་ཤིག་ཀྱང་བརྒྱབ་མེད།
ཡོང་འཆར་གྱི་བདུན་ཕྲག་འགའ་ཞིག་གི་ནང་ཆེས་ཉམ་ཐག་སྐོར་ལ་མཉམ་འབྲེལ་རྒྱལ་ཚོགས་ཀྱི་དམིགས་བསལ་རྟོག་ཞིབ་མི་སྣ་ཕི་ལིབ་ཨལ་སེ་ཀྲོན་གྱིས་ཁོང་གི་ ༢༠༡༦ ཟླ་ ༨ ནང་རྒྱ་ནག་ཏུ་རྟོག་ཞིབ་འཚམས་གཟིགས་སུ་སུ་བསྐྱོད་པའི་སྙན་ཐོ་སྒྲོག་སྦྱང་ཞུ་རྒྱུ་ཡིན་ཞིང་འཚམས་གཟིགས་དེའི་སྐབས་སུ་གཞུང་འབྲེལ་མི་སྣས་ཁོང་གི་རྟོག་ཞིབ་ལ་བཀག་འགོག་བྱས་ཡོད་པ་རེད།
མཉམ་འབྲེལ་རྒྱལ་ཚོགས་ཀྱི་དབུ་འཁྲིད་ཚོས་འགྲོ་བ་མིའི་ཐོབ་ཐང་རྡོག་རོལ་གཏོང་བའི་ “ན་ཚ་”རྩ་མེད་གཏོང་ཕྱོགས་དང་། རྒྱལ་ཚོགས་ཀྱི་བྱ་གཞག་འགྲོ་བ་མིའི་ཐོབ་ཐང་གི་གལ་ཆེའི་ཀ་བ་འདི་སྲུང་སྐྱོབ་བྱ་རྒྱུའི་ཐད་དོ་ནན་ཆེན་པོ་བྱ་དགོས། དེ་ནི་མཉམ་འབྲེལ་རྒྱལ་ཚོགས་ནི་རྒྱ་ནག་གི་འགྲོ་བ་མིའི་ཐོབ་ཐང་སྲུང་སྐྱོབ་བྱེད་མཁན་རྣམས་ལ་གཅིག་མཚུངས་ཀྱི་བདག་ཐོབ་ཡོད་ཚུལ་ཡོངས་གྲགས་ཀྱི་སྒོ་ནས་གསལ་སྟོན་དང་། ཐོབ་ཐང་དེ་རིགས་ལ་རྡོག་རོལ་གཏོང་བའི་རྒྱ་ནག་གི་འབད་ཐབས་ལ་ཤུགས་དྲག་ཆེན་པོས་འགོག་རྒོལ་བྱ་རྒྱུ་དེ་ཡིན་པ་རེད།
མ་རྩོམ་གྱི་དྲ་གནས་ཁ་བྱང་ http://tibet.net/2017/05/chinas-rights-abuses-infect-un/
