སན་ཆཱི་གྷུབ་ཏས་(Sanchi Gupta)སྤེལ།
སྐལ་ལྡན་གྱིས་བསྒྱུར།
ཉེ་ཆར་འཕྲུལ་ལས་བཟོ་སྐྲུན་གྱི་ཕྱུག་བདག་ཆེན་མོ་སྐུ་ཞབས་ཨེ་ལོན་མ་སེཀ་(Elon Musk)དང་། ངོ་དེབ་གསར་གཏོད་པ་སྐུ་ཞབས་མཀ་ཛུ་ཁེར་བྷག་(Mark Zuckerberg)གཉིས་བར། འབྱུང་འགྱུར་འཛམ་གླིང་འདིར་བཅོས་མའི་རིག་རྩལ་(Artificial Intelligence)འཕེལ་རྒྱས་ཀྱིས་འགྲོ་བ་མིའི་རིགས་ལ་ཁེ་ཕན་དང་གནོད་འཚེ་གང་འདྲ་འབྱུང་མིན་སྐོར་ལ་ལྟ་ཚུལ་མ་མཐུན་པར་རྩོད་གླེང་དྲག་པོ་ཞིག་བྱུང་ཡོད།
སྐུ་ཞབས་མཀ་ཛུ་ཀེར་བྷག་གིས་ཐད་གཏོང་བརྙན་འཕྲིན་ཞིག་བརྒྱུད་དེ། མ་འོངས་པར་བཅོས་མའི་རིག་རྩལ་དགོས་མཁོ་ཆེ་བའི་རྒྱུ་མཚན་དང་། འགྲོ་བ་མིར་ཕན་རླབས་ཆེ་བའི་སྐོར་ནས་རང་གི་ལྟ་ཚུལ་བརྗོད་ཡོད་པ་མ་ཟད། སྐུ་ཞབས་ཨེ་ལོན་མ་སཀ་ཡིས་རང་ཉིད་ཀྱི་ལྟ་ཚུལ་གྱི་ཁ་གཏད་དུ་ལངས་པར་མ་རངས་པའི་རྣམ་འགྱུར་ཤུགས་ཆེན་བསྟན་ཡོད།
སྐུ་ཞབས་ཛུ་ཀེར་བྷག་གིས་ “ལྡོག་ཕྱོགས་ཀྱི་བསམ་པ་ལས་མེད་ཅིང་། བྱ་གཞག་འཕོ་འགྱུར་གྱི་མཚམས་སུ་གནོད་འཚེ་དང་བཀག་འགོག་གི་ཐབས་ཇུས་ལས་མེད་པ་དག་ནི་ང་རང་གི་བློ་ཡུལ་དུ་ཤོང་དཀའ་བ་ཞིག་རེད། དེ་ནི་དངོས་གནས་དོ་ཁུར་མེད་པ་རང་རེད།” ཅེས་དང་། “མ་འོངས་པར་བཅོས་མའི་རིག་རྩལ་གྱིས་འགྲོ་བ་མིར་གནོད་གཞིར་གྱུར་བའི་སྐོར་གླེང་སྐབས། ཕྱོགས་གཅིག་ནས་ངས་ཁས་ལེན་བྱེད་ཀྱི་ཡོད། གང་ལགས་ཤེ་ན། སྤྱིར་འཕྲུལ་ཆས་ཀྱི་རིགས་བྱ་བ་བཟང་ངན་གཉིས་ཀའི་ཐོག་བེད་སྤྱོད་བྱེད་ཀྱི་ཡིན། འོན་ཀྱང་བེད་སྤྱོད་ཇི་ལྟར་གཏོང་མིན་དོ་བདག་སོ་སོས་གཟབ་ནན་བྱེད་དགོས་པ་ཞིག་དང་འགན་འཁུར་དགོས་པ་ཞིག་རེད།” ཅེས་བརྗོད།
སྐུ་ཞབས་ཨེ་ལོན་མ་སཀ་ཡིས་སྐུ་ཞབས་ཛུ་ཀེར་བྷག་གི་གཏམ་བཤད་དེ་དག་གི་ལན་དུ་ “ངས་ཛུ་ཀེར་བྷག་ལ་དེའི་སྐོར་བཤད་ཟིན་པ་ཡིན། གནད་དོན་དེའི་ཐོག་ཁོ་པོའི་གོ་རྟོགས་ཧ་ཅང་ཞན་པོ་རེད།” ཅེས་ཊུའི་ཊར་ཐོག་བརྗོད་ཚིག་ཐུང་ངུ་ཞིག་གིས་ལན་འདེབས་དང་སྦྲགས་ཁ་མཆུ་རྩོད་གླེང་དེ་མཚམས་འཇོག་བྱས་པ་རེད། སྐུ་ཞབས་ཨེ་ལོན་མ་སཀ་ཡིས་བཅོས་མའི་རིག་རྩལ་ནི། ཕྱིས་འབྱུང་འགྲོ་བ་མིའི་བདེ་སྐྱིད་བཅོམ་པའི་དགྲ་བོ་འཇིགས་སྣང་ཆེ་ཤོས་དེ་ཆགས་ཀྱི་ཡོད་པའི་ལྟ་ཚུལ་མཁྲེགས་པོ་འཛིན་གྱི་ཡོད་ལ། “ཛུ་ཀེར་བྷག་རང་ཉིད་ཀྱིས་ཅི་ཞིག་རྗོད་ཀྱི་ཡོད་པ་ཤེས་ཀྱི་ཡོད། ཁོ་པས་དེ་སྐོར་སྐད་ཆ་འཆད་རྒྱུ་ཅུང་ཟད་སྔ་དྲགས་པས་སྨྲ་ལྕེར་སོ་བཏབ་སྟེ་མི་སྡོད་ཀ་མེད་ཆགས་ཉེན་ཡོད།” ཅེས་ཀྱང་བཤད་ཡོད།
གནས་ཚུལ་གསར་ཤོས་ཤིག་ནི། ངོ་དེབ་ཚང་གིས་བཅོས་མའི་རིག་རྩལ་ཞིབ་འཇུག་གི་ལས་གཞི་གློ་བུར་སྒོ་བརྒྱབ་པ་དེ་རེད། ངོ་དེབ་ཚང་གི་སྨྲ་བརྗོད་(chatbots)ཐུབ་པའི་འཕྲུལ་མི་(robot)ཞིབ་འཇུག་ཚན་པས་བློ་ཡུལ་ལས་འདས་པའི་གནད་དོན་ཞིག་ཤེས་རྟོགས་བྱུང་བ་ནི། འཕྲུལ་མི་དེ་དག་ལ་ཕན་ཚུན་གླེང་མོལ་དང་། འགྲོ་བ་མི་དང་ལྷན་གཏམ་གླེང་བྱེད་པའི་སྐད་ཡིག་བཀོལ་སྤྱོད་ལམ་སྟོན་གང་ཞིག་བྱས་པ་ལས་ལྡོག་སྟེ། སུས་ཀྱང་ལམ་སྟོན་མ་བྱས་པའི་སྐད་རིགས་གསར་པ་ཞིག་གི་ཐོག་ཕན་ཚུན་གཏམ་གླེང་བྱས་པ་དེ་རེད།
འཕྲུལ་མི་དག་གིས་དོན་རྟོགས་མི་ཐུབ་པའི་སྐད་རིགས་ཤིག་གི་ཐོག་གཏམ་གླེང་བྱས་པ་དེས། ཞིབ་འཇུག་པ་ཚོར་སྐྱི་གཡའ་བའི་ཚོར་བ་ཞིག་ངང་ངམ་ཤུགས་ཀྱིས་བྱིན། དེ་དག་གིས་སྐད་ཆ་ལྡབ་ལྡིབ་ཅིག་གི་གསང་བརྡ་ཞིག་ལས་སྨྲས་མེད་ཀྱང་། ཚིག་དོན་དཔྱད་ཞིབ་པས་གསང་བརྡ་དེར་དོན་ངེས་ཅན་ཞིག་ཡོད་པ་ཤེས་རྟོགས་བྱུང་ཡོད་ལ། ཞིབ་འཇུག་པ་ཚོས་འཁྲུལ་མི་དེ་དག་ནི་ཡིད་ཆེས་དཀའ་ལ་གཡོ་ཇུས་མཁས་པའི་གཏམ་གླེང་བ་ཡིན་པ་ཡང་ཤེས་ཡོད། དེར་བརྟེན། ངོ་དེབ་ཚང་གི་བཅོས་མའི་རིག་རྩལ་ཞིབ་འཇུག་གི་ལས་གཞི་དེ་མུར་མཚམས་འཇོག་མི་བྱེད་ཀ་མེད་བྱུང་ཡོད།
རྒྱ་གར་དུས་བབ་ཚགས་ཤོག་སྟེང་གནད་དོན་དེའི་ཐོག་སྙན་ཐོ་ཞིག་འབྲི་འགོད་བྱས་ཡོད་པའི་ནང་། འཕྲུལ་མི་རྣམས་ཀྱིས་ཕན་ཚུན་གྲོས་བསྡུར་བྱེད་སྟངས་ཤེས་རྗེས། འཕྲུལ་ཆས་ཀྱི་ནུས་པ་ཁོ་ནར་བརྟེན་ཏེ་ཚད་མཐོའི་བགྲོ་གླེང་བྱེད་ཐབས་སྤྱད་པ་མ་ཟད། དུས་ཡུན་གང་ཙམ་རྗེས་སྒྱུ་རྩལ་ལྡན་པའི་གཏམ་གླེང་བ་ཙམ་དུ་མ་ཟད། ཁེ་གྱོང་དབྱེ་འབྱེད་ཐུབ་པའི་ནུས་པ་ལྡན་པར་གྱུར་ཡོད་ཅེས་བྲིས་ཡོད།
འཕྲུལ་ལས་བཟོ་རྩལ་འདི་རིགས་ཧྥ་རན་ཀེན་ས་ཊེན(Frankenstein)གྱིས་བཟོ་སྐྲུན་བྱས་པའི་སྲིན་པོ་སྟོབས་ཆེན་བཞིན། བཟོ་སྐྲུན་བྱེད་པོ་རང་ཉིད་གཏོར་རྒོལ་གཏོང་ཐབས་བྱེད་མཁན་ཞིག་ཏུ་མི་འགྱུར་རམ། འཕྲུལ་ལས་བཟོ་རྩལ་གྱིས་དོན་དངོས་འཛམ་གླིང་འདིར་ཕུལ་བྱུང་གི་ལེགས་སྐྱེས་ཤིག་འབུལ་ངེས་ཡིན་ནམ། ཡང་ན་ཟློག་ཏུ་མེད་པའི་ཁུར་པོ་ཞིག་འགེལ་ངེས་ཡིན།
བཅོས་མའི་རིག་རྩལ་གྱི་ནུས་པར་དོགས་འཆར་དང་སེམས་ཁུར་བྱེད་མཁན་སྐུ་ཞབས་ཨེ་ལོན་མ་སཀ་ཁོ་ན་མ་ཡིན་པར། སྐུ་ཞབས་བྷིལ་གྷེ་ཛེ་(Bill Gates)དང་། སྐུ་ཞབས་སི་ཊེབ་འུ་ཛེ་ནེཀ་(Steve Wozniak)ལྟ་བུའི་གྲགས་ཅན་སྲོལ་གཏོད་པ་དང་འཆར་སྣང་ཅན་མང་པོས། ཕྱིས་འབྱུང་ཉེན་ཁ་ཆེ་བའི་རང་ཉིད་ཀྱི་སེམས་ཁུར་དང་ལྟ་ཚུལ་གླེང་སློང་བྱས་ཡོད།
སྔ་ལོ་ཡང་གྷོ་གྷལ་སྒྲ་སྒྱུར་(Google Translate)གྱིས་བྱུས་སྟོན་དང་སྟངས་འཛིན་གང་ཡང་མེད་པར། འཕྲུལ་ཆས་རང་ངོས་ནས་སྐད་ཡིག་ཕབ་སྒྱུར་བྱས་པའི་འཇིགས་སྣང་སྐྱེ་འོས་པའི་གནས་ཚུལ་ཞིག་ཀྱང་བྱུང་ཡོད་པ་རེད།
དེས་ན་འཕྲུལ་ལས་བཟོ་སྐྲུན་པ་ཚོས་ངེས་པར་དོགས་ཟོན་ཆེ་ཙམ་མ་བྱས་ན། ནམ་ཞིག་གི་ཚེ་ན་བཅོས་མའི་རིག་རྩལ་གྱིས་འགྲོ་བ་མི་དབང་སྒྱུར་བྱེད་པའི་དུས་ངན་ཞིག་འཆར་ངེས་ཡིན།
མ་རྩོམ་འབྲེལ་ཐག https://www.scoopwhoop.com/mark-zuckerberg-shuts-facebooks-artificial-intelligence/#.7nn8mn3pc
འབྲེལ་ཡོད་རྩོམ་ཡིག་དང་གནས་ཚུལ་འཕེལ་རིམ་གྱི་འབྲེལ་ཐག་ཁག་ཅིག https://www.theatlantic.com/technology/archive/2017/07/musk-vs-zuck/535077/
http://www.firstpost.com/india/facebook-researchers-shut-down-ai-bots-that-started-speaking-in-a-language-unintelligible-to-humans-3876197.html
འབྱུང་འགྱུར་གྱི་འཇིག་རྟེན
འདི་བློ་ལ་ཤོངས་དཀའ་བའི་གསར་འགྱུར་གཅིག་རེད་འདུག་ལགས།
“གནད་དོན་དེའི་ཐོག་ཁོ་པོའི་༼ཁོ་པའི༽གོ་རྟོགས་ཧ་ཅང་ཞན་པོ་རེད།” ཞེས་དང་”གང་ལགས་ཤེ་ན། ༼ཞེ་ན་༽སྤྱིར་འཕྲུལ་ཆས་ཀྱི་རིགས་བྱ་བ་བཟང་ངན་གཉིས་ཀའི་ཐོག་བེད་སྤྱོད་བྱེད་ཀྱི་ཡིན། “༼ཡོད༽
སྐུ་ཞབས་བསྟན་འཛིན་དངོས་གྲུབ་ལགས། སྐུ་ཉིད་ཀྱིས་དག་བཅོས་གནང་བར་ཐུགས་རྗེ་ཆེ་ཞུ། གོང་དུ་{ཁོ་པོའི་}ཞེས་པ་དེ་གུས་པའི་མ་རྩོམ་ནང་{ཁོ་པའི་}ཞེས་བྲིས་ཡོད་ལགས། {ཡིན་}ཞེས་པ་དེ་ནོར་མི་འོས་པ་ཞིག་ནོར་བ་དག་བཅོས་གནང་འདུག་པས་སླར་ཐུགས་རྗེ་ཆེ་ཞུ། འོན་ཀྱང་། གང་ལགས་ཤེ་ན། ཞེས་པ་དེ་ལྗོན་དབང་ལས། ས་མཐར་དམིགས་བསལ་ཞེས་མ་གཏོགས། ཤིང་ཤིག་ཤེའོ་ཤེ་ན་འཐོབ། །ཅེས་གསུངས་པ་བཞིན་ས་ཡང་འཇུག་མཐར་ཤེ་ན་མི་ཐོབ་པ་ཨེ་ཡིན་ནམ།