དབུས་དང་ས་གནས་བར་ན་ལྷག་པའི་ནད་མནར་ཉམ་ཐག

དྷ་ས་ས་གནས་ཉམ་ཐག་ཞིབ་འཇུག་ཚོགས་ཆུང་གིས་བོད་མི་རྡོ་རྗེ་ཞུ་བ་ཞིག་གི་འཚོ་བའི་གནས་སྟངས་སྐྱོ་བོ་ཡིན་པའི་སྟེང་ལ་ནད་མནར་ཉམ་ཐག་ཡིན་པའི་སྙན་ཞུ་བོད་མིའི་སྒྲིག་འཛུགས་དབུས་ཉམ་ཐག་ཞིབ་འཇུག་ཚོགས་ཆུང་ལ་ཕུལ་ཡོད་ཀྱང་དབུས་ཉམ་ཐག་ཞིབ་འཇུག་ཚོགས་ཆུང་དང་བཀའ་ཤག་གིས་ཉམ་ཐག་ནང་མ་བཞག་པར་སྨན་བཅོས་ལྟ་སྐྱོང་ལས་གཞིའི་ནང་ཞུགས་དགོས་པའི་ཐག་གཅོད་གནང་མཐར་ནད་པ་ཁོང་འདས་གྲོངས་སུ་ཕྱིན་འདུག

ཕྱི་ཟླ་བདུན་པའི་ཟླ་མཇུག་ལ་ནོར་གླིང་དུ་གནས་སྡོད་བོད་མི་རྡོ་རྗེ་ཞུ་བ་ཞིག་ཉམ་ཐག་དང་ནད་མནར་གྱི་དབང་གིས་ཧི་མ་ཅལ་ཀང་ར་ཧྥོར་ཊེ་སི་སྨན་ཁང་དུ་འདས་གྲོངས་ཕྱིན་ཡོད་པ་དང་། ཁོས་དེ་སྔོན་དྷ་ས་ས་གནས་དང་ས་གནས་ཉམ་ཐག་ཞིབ་འཇུག་ཚོགས་ཆུང་བརྒྱུད། ནད་མནར་ཉམ་ཐག་ཁོངས་སུ་ཐོ་འགོད་བྱས་ཀྱང་། ཚུད་མེད་སྟབས་སྤྱི་ཚོགས་ཐོག་གླེང་ཕྱོགས་མང་པོ་ཡོང་གི་ཡོད་པ་རེད།

ཕྱི་ཟླ་ ༧ ཚེས་ ༢༨ ཉིན་ངོ་དེབ་དང་སྐད་འཕྲིན་སོགས་སྤྱི་ཚོགས་བརྒྱུད་ལམ་ཁག་ཏུ་གསལ་བསྒྲགས་ཤིག་སྤེལ་ཏེ། དྷ་རམ་ས་ལའི་བོད་མི་རྡོ་རྗེ་ཞུ་བ་ཞིག་དབུགས་འཚང་ནད་ཀྱིས་མནར་ཏེ་ཧི་མ་ཅཱལ་ཀང་ར་རྫོང་ཧྥོར་ཊེ་སི་ (Fortis) སྨན་ཁང་དུ་ཡོད་པ་དང་། ད་བར་སྨན་རིན་སྒོར་ ༡༣༨༠༤༤ ཕྱིན་ཡོད་སྐོར་དང་། ཁོ་རང་ལ་སྨན་རིན་སྤྲོད་རྒྱུའི་དངུལ་མེད་པ་མ་ཟད། བདག་སྐྱོང་བྱེད་མཁན་ནང་མི་སྤུན་ཉེ་སོགས་གང་ཡང་མེད་སྟབས། སྐད་འཕྲིན་ཚོགས་པ་(དེང་དུས་ལ་སྟོད་ཚོགས་པ།)ཞེས་པ་ཞིག་བརྒྱུད་དེ་ཞལ་འདེབས་བསྡུ་བཞིན་ཡོད་སྐོར་འཁོད་འདུག གསལ་བསྒྲགས་དེའི་ནང་ནད་པའི་པར་དང་། མཇུག་ཏུ་ནད་པར་རོགས་རམ་བྱེད་མཁན་ཁག་ཅིག་ལ་འབྲེལ་བ་བྱེད་སའི་ཁ་པར་ཨང་བཅས་འཁོད་འདུག

ཕྱི་ཚེས་ ༣༠ ཉིན་སླར་ཡང་སྤྱི་ཚོགས་བརྒྱུད་ལམ་ཁག་ཏུ་གནས་ཚུལ་ཐོན་པའི་ནང་། ནད་པ་རྡོ་རྗེ་ཞུ་བ་ཁོང་ ༢༠༡༧ ཟླ་ ༧ ཚེས་ ༣༠ ཉིན་ཀཱང་ར་ཧྥོར་ཊེ་སི་སྨན་ཁང་ནས་འདས་གྲོངས་ཕྱིན་ཡོད་སྐོར་དང་། ཕྱི་ཟླ་ ༨ ཚེས་ ༡ ཉིན་རོགས་པ་བྱེད་མཁན་ཁག་ཅིག་གིས་འདས་པོའི་ཕུང་བོ་ཀང་ར་ཧྥོར་ཊེ་སི་སྨན་ཁང་ནས་རྩིས་ལེན་གྱིས་དྷ་ས་ཕུང་སྲེང་ཁང་དུ་མེར་བསྲེག་བྱ་འཆར་ཡོད་ཚུལ་འཁོད་འདུག དེ་དང་མཉམ་དུ་ནད་པ་དེ་ཧ་ཅང་དབུལ་བོ་ཉམ་ཐག་ཡིན་པ་མ་ཟད། ཐ་ན་ཟ་འཐུང་ལའང་དཀའ་ངལ་ཡོད་པ་དང་། བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱིས་ནད་པ་དེ་ལ་རོགས་རམ་གནང་མེད་སྐོར་སོགས་ཀྱང་འཁོད་འདུག

ཟླ་འདིའི་ཚེས་ ༡ ཉིན་ནས་འདི་གའི་གསར་འགོད་པ་ནད་པ་འདས་པོ་རྡོ་རྗེ་ལགས་སུ་རོགས་པ་གནང་མཁན་(དེང་དུས་ལ་སྟོད་ཚོགས་པ།)ཞེས་པའི་སྐད་འཕྲིན་ཚོགས་པའི་ཚོགས་གཙོ་གཞོན་དང་། དྷ་རམ་ས་ལའི་ས་གནས་མགོ་འཛིན་ལགས། དེ་བཞིན། བོད་མིའི་སྒྲིག་འཛུགས་ནང་སྲིད་ལས་ཁུངས་དང་། འཕྲོད་བསྟེན་ལས་ཁུངས་སོགས་སུ་རིམ་པ་བཞིན་བཅར་ཏེ། གནས་ཚུལ་དེའི་སྐོར་ལ་རྒྱུས་ལོན་བྱས་པ་ལྟར་ན། དེ་སྔོན་ཕྱི་ལོ་ ༢༠༡༣ དང་ ༢༠༡༤ ལོར་དྷ་རམ་ས་ལའི་ཉམ་ཐག་ཞིབ་འཇུག་ཚོགས་ཆུང་གིས་ཞིབ་འཇུག་གནང་སྐབས་རྡོ་རྗེ་ལགས་ཉམ་ཐག་མིན་པར་ཚོང་ཙག་ཙིག་དང་ལས་ཀ་ཙག་ཙིག་བྱེད་ཀྱི་ཡོད་ཀྱང་། ༢༠༡༥ ལོར་བསྐྱར་དུ་ཞིབ་འཇུག་བྱས་སྐབས་རྡོ་རྗེ་ལགས་ནད་མནར་ཉམ་ཐག་ཆགས་ཡོད་པ་ར་འཕྲོད་བྱུང་ཡོད་སྟབས། ༢༠༡༥།༡༠།༡༥ ཉིན་དྷ་ས་ས་གནས་ཉམ་ཐག་ཞིབ་འཇུག་ཚོགས་ཆུང་གིས་བོད་མིའི་སྒྲིག་འཛུགས་དབུས་ཉམ་ཐག་ཞིབ་འཇུག་ཚོགས་ཆུང་ལ་སྙན་ཞུ་ཕུལ་ཏེ། རྡོ་རྗེ་ལགས་སུ་ད་ལྟ་འཚོ་རྟེན་གང་ཡང་མེད་པ་མ་ཟད་ནད་མནར་ཉམ་ཐག་ཆགས་ཡོད་སྟབས། དབུས་ནས་ཉམ་ཐག་རོགས་སྐྱོར་གནང་དགོས་པའི་འབོད་སྐུལ་ཞུས་འདུག་ཀྱང་། ༢༠༡༦།༣།༣༡ ཉིན་དབུས་ཉམ་ཐག་ཞིབ་འཇུག་ཚོགས་ཆུང་གིས་ཡིག་ལན་ཞིག་འབྱོར་ཏེ། རྡོ་རྗེ་ལགས་ནད་མནར་ཉམ་ཐག་ནང་བཞག་མེད་པ་མ་ཟད། ཁོ་རང་སྨན་བཅོས་ལྟ་སྐྱོང་ལས་གཞིའི་ཁོངས་སུ་འཛུལ་ཞུགས་ལམ་སྟོན་བྱ་དགོས་སྐོར་འཁོད་འདུག

རྗེས་སུ་རྡོ་རྗེ་ལགས་ཀྱི་ནད་གཞི་ཇེ་སྡུག་ཏུ་སོང་སྟེ་སྨན་ཁང་དུ་སྡོད་དགོས་བྱུང་ཡོད་སྟབས། ༢༠༡༧།༧།༡༧ ཉིན་དྷ་ས་ས་གནས་མགོ་འཛིན་ལས་ཁུངས་ཀྱིས་བོད་མིའི་སྒྲིག་འཛུགས་ནང་སྲིད་ལས་ཁུངས་ལ་ཡི་གེ་ཞིག་བཏང་སྟེ། རྡོ་རྗེ་ལགས་ཀྱི་ནད་གཞི་ཇེ་སྡུག་ཏུ་ཕྱིན་ཡོད་པ་མ་ཟད་གཟུགས་པོའི་ནུས་པའང་ཉམས་ཡོད་པ་དང་། ལྟ་རྟོག་བྱེད་མཁན་མེད་པ་སོགས་ལ་བརྟེན་ནས། ཁོ་རང་རྒས་གསོ་ཁང་ཞིག་ཏུ་འཇུག་ཐུབ་གནང་དགོས་པའི་འབོད་སྐུལ་ཞུས་འདུག་ཀྱང་། ༢༠༡༧།༧།༢༡ ཉིན་ནང་སྲིད་ལས་ཁུངས་ནས་ཡིག་ལན་ཞིག་འབྱོར་ཏེ། རྡོ་རྗེ་ལགས་གཞི་ནས་ནད་མནར་ཉམ་ཐག་ཁོངས་སུ་འཇོག་སྐོར་དང་། དེ་ནས་སྨན་བཅོས་རོགས་རམ་རག་ངེས་ཡིན་སྐོར་འཁོད་འདུག

༢༠༡༧།༧།༢༡ ཉིན་དྷ་ས་ས་གནས་མགོ་འཛིན་གྱིས་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ལ་ཛ་དྲག་ཡི་གེ་བཏང་སྟེ། ནད་པ་རྡོ་རྗེ་ལགས་ཀྱི་ན་ཚ་ཛ་དྲག་ཆགས་ཡོད་སྟབས་རོགས་དངུལ་གནང་དགོས་པའི་འབོད་སྐུལ་ཞུས་པར། ༢༠༡༧།༧།༢༥ ཉིན་འཕྲོད་བསྟེན་ལས་ཁུངས་ནས་ཡིག་ལན་ཞིག་འབྱོར་ཏེ། བོད་མིའི་སྒྲིག་འཛུགས་ཀྱི་ཛ་དྲག་སྨན་བཅོས་རོགས་སྐྱོར་སྔོན་མ་ནས་སྒོ་བརྒྱབ་ཟིན་སྟབས་འཕྲོད་བསྟེན་ལས་ཁུངས་ཀྱིས་རོགས་དངུལ་གཏོང་ཐབས་མེད་སྐོར་འཁོད་འདུག ༢༠༡༧།༧།༢༨ ཉིན་དྷ་ས་ས་གནས་ཉམ་ཐག་ཞིབ་འཇུག་ཚོགས་ཆུང་གིས་རྡོ་རྗེ་ལགས་ན་གཞོན་ནད་མནར་ཉམ་ཐག་ཁོངས་འགེངས་ཤོག་བསྐངས་ཏེ་སླར་ཡང་དབུས་ཉམ་ཐག་ཞིབ་འཇུག་ཚོགས་ཆུང་ལ་བཏང་ཡོད་པ་དང་། ༢༠༡༧།༧།༣༠ ཉིན་རྡོ་རྗེ་ལགས་ཀང་ར་ཧྥོར་ཊེ་སི་སྨན་ཁང་ནས་འདས་གྲོངས་སུ་ཕྱིན་ཡོད་པ་རེད།

ཕྱི་ཟླ་ ༨ ཚེས་ ༡ ཉིན་འདི་གའི་གསར་འགོད་པས། འདས་པོ་རྡོ་རྗེ་ལ་རོགས་སྐྱོར་དང་ནད་ཞབས་ཞུ་མཁན་ལྷ་མོ་སྐྱིད་དཔལ་ལགས་དང་དར་རྒྱས་ལགས་གཉིས་ལ་གནས་ཚུལ་དེའི་སྐོར་བཅར་འདྲི་ཞུས་པར་ཁོང་གཉིས་ཀྱིས། འདས་པོ་རྡོ་རྗེ་ཞུ་བ་དེ་ཧ་ཅང་དབུལ་བོ་ཉམ་ཐག་ཡིན་པ་མ་ཟད། ཐ་ན་ཁོང་ལ་ཟ་འཐུང་གི་དཀའ་ངལ་ཡང་འཕྲད་ཡོད་པ་དང་། ཁོང་ཉམ་ཐག་ཡིན་སྟབས། ཁོང་གི་སྡོད་ཁང་ནང་དྲི་ངན་བྲོ་ནས་སྡོད་ཐབས་མེད་པ་དང་། དེ་སྔོན་ཁོང་གིས་ནོར་གླིང་གཡས་གཡོན་དུ་གློ་བ་ཁ་ཚ་བཙོང་ནས་འཚོ་བ་སྐྱེལ་བཞིན་ཡོད་པ་དང་། བར་སྐབས་ཤིག་ནས་ཁོང་དབུགས་འཚང་གི་ནད་གཞིས་མནར་ཏེ་བདེ་ལེགས་སྨན་ཁང་དུ་སྡོད་དགོས་བྱུང་ཡོད་པ་དང་། ནོར་གླིང་སྨན་ཞབས་ཨ་ཅག་གཡང་འཛོམས་ལགས་ཀྱིས་ཐེངས་མང་པོར་ཁོང་ལ་རོགས་རམ་གནང་ཡོད་ཀྱང་། མཐར་དྲག་སྐྱེད་མ་བྱུང་བར་བདེ་ལེགས་སྨན་ཁང་གི་སྨན་པ་ཚེ་བརྟན་ལགས་ཀྱིས། ཁོང་རྒྱ་གར་སྨན་ཁང་ཆེ་བ་ཞིག་ལ་སྟོན་དགོས་སྐོར་གསུངས་སོང་ཡང་། ནད་པ་དེར་དངུལ་མེད་སྟབས། སྨན་ཞབས་གཡང་འཛོམས་ལགས་ཀྱིས་ནོར་གླིང་གི་ངོ་ཤེས་ཚོར་སྨན་རིན་སློང་མོ་བརྒྱབ་ཡོད་པ་དང་། སྐབས་དེར་ལྷ་མོ་སྐྱིད་དཔལ་ལགས་དང་དར་རྒྱས་གཉིས་ཀྱིས་ཀྱང་ཁོ་མོར་རོགས་པ་བྱས་ཏེ། སྤྱི་ཚོགས་བརྒྱུད་ལམ་ཁག་ཏུ་ཞལ་འདེབས་བསླངས་ཏེ་ནད་ཞབས་བྱས་ཀྱང་དྲག་སྐྱེད་མ་བྱུང་བར་ཕྱི་ཟླ་ ༧ ཚེས་ ༣༠ ཉིན་ཀང་ར་ཧྥོར་ཊེ་སི་སྨན་ཁང་དུ་འདས་གྲོངས་སུ་ཕྱིན་ཡོད་སྐོར་སོགས་ངོ་སྤྲོད་གནང་བྱུང་།

ལྷ་མོ་སྐྱིད་དཔལ་ལགས་ཀྱིས་བརྗོད་དོན། ཉེ་ཆར་ནོར་གླིང་སྨན་ཞབས་ཨ་ཅག་གཡང་འཛོམས་ལགས་འཕྲོད་བསྟེན་ལས་ཁུངས་སུ་བཅར་ཏེ། ནད་པ་རྡོ་རྗེ་ལ་སྨན་བཅོས་རོགས་རམ་གནང་དགོས་པའི་རེ་སྐུལ་ཞུས་ཀྱང་། འཕྲོད་བསྟེན་ལས་ཁུངས་ངོས་ནས་ནད་པ་དེ་ལ་ནད་མནར་ཉམ་ཐག་གི་ཨང་ཐོབ་ནང་མེད་པ་མ་ཟད། སྨན་བཅོས་ལྟ་སྐྱོང་ལས་གཞིའི་ནང་དུའང་འཛུལ་ཞུགས་བྱས་མེད་སྟབས། ཁོ་ལ་རོགས་སྐྱོར་བྱེད་ཐབས་མེད་སྐོར་བརྗོད་ཡོད་འདུག དེ་བས། ཁོ་ཚོས་ས་གནས་མགོ་འཛིན་ལས་ཁུངས་སུ་བཅར་ནས་ནད་པ་དེའི་གནས་སྟངས་ཛ་དྲག་ཆགས་ཡོད་པ་ས་གནས་མགོ་འཛིན་ལ་ཞུས་སྐབས། ས་གནས་མགོ་འཛིན་གྱིས་ཁོ་རང་གི་གློ་ཁུག་ནས་ཧིན་སྒོར་ ༥༠༠༠ སྤྲད་སོང་། སྤྱིར་ནད་པ་དེ་སྨན་བཅོས་ལྟ་སྐྱོང་ལས་གཞིའི་ནང་འཛུལ་ཞུགས་བྱས་མེད་ཀྱང་། ཁོང་ངོ་མ་ཛ་དྲག་ཆེ་བའི་ནད་པ་ཉམ་ཐག་དབུལ་བོ་ཞིག་ཡིན་སྟབས། འཕྲོད་བསྟེན་ལས་ཁུངས་ངོས་ནས་ཁོང་ལ་སྨན་བཅོས་མཐུན་འགྱུར་གནང་དགོས་པའི་གནས་སྟངས་ཤིག་ཆགས་ཡོད་པ་དང་། ནད་པ་དེ་གཅིག་པུ་ཙམ་མིན་པར་བཙན་བྱོལ་སྤྱི་ཚོགས་ནང་ད་དུང་ནད་པ་ཉམ་ཐག་དེ་འདྲ་མང་པོ་ཞིག་ཡོད་པའི་གནས་ཚུལ་ཡོད་པ་རེད། ནད་པ་དེ་མ་གྲོངས་སྔོན་ལ་ནད་པ་དེས་ནད་ཞབས་ཚོར། ཁོ་རང་ནད་མནར་ཉམ་ཐག་ཁོངས་སུ་མ་ཚུད་པ་དེ་ནི། ཁོའི་སྡོད་ཁང་ནང་མལ་ཆས་གསར་བ་ཞིག་དང་བརྙན་འཕྲིན་ཞིག་ཡོད་པས་ཡིན་སྐོར་དང་། མལ་ཆས་དེ་དང་བརྙན་འཕྲིན་དེ་ཁོ་རང་གི་རོགས་པ་ཞིག་གིས་ཁོ་བོར་སྤྲད་པ་ཡིན་ཚུལ་བརྗོད་སོང་། ཞེས་སོགས་ངོ་སྤྲོད་གནང་བྱུང་།

ལྷ་མོ་སྐྱིད་དཔལ་ལགས་ཀྱིས་བརྗོད་པ་ལྟར་ན། དོན་གྲུབ་ལགས་དང་ཁོང་གཉིས་ནད་པ་དེའི་གཉེན་ཉེ་ངོ་ཤེས་དེ་འདྲ་མིན་ཡང་། ཁོང་གཉིས་“དེང་དུས་ལ་སྟོད་ཚོགས་པ”ཞེས་པའི་སྐད་འཕྲིན་ཚོགས་པ་ཞིག་གི་ཚོགས་གཙོ་གཞོན་ཡིན་པ་དང་། ཚོགས་པ་དེ་ནི་ཁོ་ཚོ་ཕ་ཡུལ་གཅིག་པ་ཁག་ཅིག་མཉམ་འཛོམས་ཀྱིས་གྲུབ་པའི་སྤྱི་ཚོགས་དང་བླངས་ཞབས་ཞུ་ཚོགས་པ་ཞིག་ཡིན་འདུག

ཟླ་འདིའི་ཚེས་ ༡ ཉིན་འདི་གའི་གསར་འགོད་པ་བོད་མིའི་སྒྲིག་འཛུགས་དབུས་ཉམ་ཐག་ཞིབ་འཇུག་ཚོགས་ཆུང་ལ་བསྐྱོད་དེ་སྐད་ཆ་དྲིས་སྐབས། དབུས་ཉམ་ཐག་ཞིབ་འཇུག་ཚོགས་ཆུང་གི་ལས་བྱེད་བློ་བཟང་བསྟན་འཛིན་ལགས་དང་བསྟན་འཛིན་རབ་འབྱོར་ལགས་གཉིས་ཀྱིས། གལ་ཏེ་རྡོ་རྗེ་ཞུ་བ་དེ་དྷ་ས་ས་གནས་མགོ་འཛིན་དང་ས་གནས་ཉམ་ཐག་ཞིབ་འཇུག་ཚོགས་ཆུང་གི་ཞིབ་འཇུག་གནང་བ་བརྒྱུད་དེ་ཉམ་ཐག་ནང་ཐོ་འགོད་བྱས་ཡོད་ན། དེའི་བདེན་དཔང་ཡིག་ཆ་འཁྱེར་ཡོང་དགོས་སྐོར་དང་། དེ་གར་ཁོང་གཉིས་ལ་རྡོ་རྗེ་ཞུ་བ་དེ་ཉམ་ཐག་ཁོངས་སུ་ཐོ་འགོད་བྱས་ཡོད་མེད་ཀྱི་ཡིག་ཆ་སྔོག་པའི་ཐོབ་ཐང་མེད་པ་དང་། འགན་གཙོ་བོ་དེ་ནང་སྲིད་ལས་ཁུངས་ཀྱི་ལྕམ་ཚེ་རིང་སྒྲོལ་མ་ལགས་ཀྱིས་འཁུར་གྱི་ཡོད་པ། ཁོ་མོ་ད་ལྟ་གུང་གསེང་ཡིན་སྟབས་གཟའ་ཟླ་བའི་བར་བདེན་དཔང་ཡིག་ཆ་ཁྱེར་ནས་ཡོང་དགོས་པ་དང་། དེ་མིན་ད་ལྟ་སྤྱི་ཚོགས་བརྒྱུད་ལམ་ཁག་ཏུ་གཞུང་ལ་སྐྱོན་བརྗོད་སྣ་ཚོགས་བྱེད་ཀྱི་ཡོད་པས། གནས་ཚུལ་དེ་ཁུངས་ལྡན་ཡིན་མིན་བཤད་དཀའ་ལུགས་སོགས་བརྗོད་སོང་།

གསར་འགོད་པ་དྷ་ས་ས་གནས་མགོ་འཛིན་ལས་ཁུངས་སུ་བསྐྱོད་དེ། ས་གནས་མགོ་འཛིན་ཟླ་བ་རིན་ཆེན་ལགས་སུ་བཀའ་འདྲི་ཞུས་སྐབས་ཁོང་གིས། རྡོ་རྗེ་ཁོ་རང་སྔོན་ཆད་ཟ་འཐུང་མེད་མཁན་ཉམ་ཐག་དེ་འདྲ་མ་རེད། ཁོས་སྔོན་ཆད་ཟ་ཁང་དང་མགྲོན་ཁང་སོགས་སུ་ལས་ཀ་བྱས་པ་དང་། ཚོང་ལས་གཉེར་ནས་འཚོ་གནས་བཟུང་ཡོད་པ་ཞིག་རེད། ཁོ་རང་གྲོངས་རྗེས་ནོར་གླིང་ས་གནས་བརྒྱ་དཔོན་སོགས་མི་ཁག་ཅིག་ཁོ་རང་གི་ནང་དུ་ཕྱིན་ཏེ་ལྟ་སྐབས་དངུལ་ ༢༢༠༠༠ ཡོད་པ་དངོས་སུ་མཐོང་ཡོད་པ་རེད།

ང་ཚོས་ཀིརྟི་བདེ་རྩ་ཚོགས་པ་དང་བོད་ཀྱི་ཐེབས་རྩ་ཁང་། བདེ་ལེགས་སྨན་ཁང་སོགས་ལ་རྒྱབ་གཉེར་ཡི་གེ་ཕུལ་བ་བརྒྱུད་དེ། བདེ་ལེགས་སྨན་ཁང་གི་དབུ་འཛིན་གྱིས་འགན་ཁུར་བའི་ཐོག་ནས་ཁོ་རང་གི་ཟས་རིན་དང་། སྨན་ཁང་གི་བརྟག་དཔྱད། སྨན་རིན་སོགས་རིན་མེད་གནང་ཡོད་པ་རེད། དེ་ནས་ཁོ་རང་གི་ནད་གཞི་ཛ་དྲག་ཕྱིན་པ་དང་སྨན་པ་ཚེ་བརྟན་ལགས་ཀྱི་ལམ་སྟོན་འོག ཁོང་རྒྱ་གར་སྨན་ཁང་ཆེ་ས་ཞིག་ཏུ་སོང་ན་ཡག་པོ་ཡོད་པ་རེད་ཅེས་གསུངས་ཡོད་པ་རེད།

ནོར་གླིང་བརྒྱ་དཔོན་དང་ས་གནས་བརྒྱ་དཔོན་ཚོས་ཁོ་རང་གི་གནས་སྟངས་སྙན་ཞུ་འབྱོར་སོང་ཡང་། ང་ཚོའི་ངོས་ནས་མ་བྱས་པ་གང་ཡང་མ་རེད། ས་གནས་མགོ་འཛིན་གྱི་ངོས་ནས་ཁོ་རང་ལ་སྒོར་ ༥༠༠༠ དང་། ལས་ཁུངས་ཀྱི་ངོས་ནས་སྒོར་ ༡༥༠༠༠ ། ད་དུང་རྒྱབ་གཉེར་ཡི་གེ་སོགས་ཚང་མ་སྤྲད་ཡོད། ཡིན་ནའང་ད་ལྟ་སྤྱི་ཚོགས་བརྒྱུད་ལམ་ཁག་ཏུ། ནད་པ་དེའི་རྒྱབ་ལྗོངས་ཀྱི་གནས་ཚུལ་གང་ཡང་མ་ཤེས་པར། གནས་ཚུལ་ཆུང་ཆུང་ཞིག་ཆེན་པོ་བཟོས་ཏེ་སྤྱི་ཚོགས་ནང་དཀྲོག་གཏམ་བཟོ་བཞིན་འདུག ང་ཚོའི་ངོས་ནས་འདིར་གསལ་བཤད་གཙང་མ་བྱས་པ་ཡིན། ཞེས་བརྗོད་སོང་།

དྷ་ས་ས་གནས་མགོ་འཛིན་ལས་ཁུངས་ཀྱིས་ཡིག་ཆ་ཁོ་སྤྲོད་གནང་བ་ལྟར་ན། ༢༠༡༥ ཟླ་ ༡༠ ཚེས་ ༡༥ ཉིན་དྷ་ས་ས་གནས་ཉམ་ཐག་ཞིབ་འཇུག་ཚོགས་ཆུང་གིས་བོད་མིའི་སྒྲིག་འཛུགས་དབུས་ཉམ་ཐག་ཞིབ་འཇུག་ཚོགས་ཆུང་ལ་ཡི་གེ་ཞིག་ཕུལ་བའི་ནང་། “དྷ་ས་ས་གནས་ཉམ་ཐག་ཞིབ་འཇུག་ཚོགས་ཆུང་ཚོགས་ནས་དངོས་ཡོད་འཚོ་བར་དཀའ་ངལ་ཡོད་མེད་ཞིབ་འཇུག་མཐིལ་ཕྱིན་པ་བྱས་རྗེས།” ཅེས་དང་། “ཁྱོན་བསྡོམས་ཉམ་ཐག་བཅུ་ཚོགས་ཆུང་ནས་ངོ་བཞེས་གནང་སོང་བས། འདི་ལས་ནས་ཉམ་ཐག་བཅུའི་ལོ་རྒྱུས་འགེངས་ཤོག་ཟུར་སྦྱར་འབུལ་ལམ་ཞུས་ཡོད་པས། རྩིས་བཞེས་གནང་སྐྱོང་ཡོང་བ་ཞུ།” ཞེས་འཁོད་འདུག་ལ། ཉམ་ཐག་དེ་དག་རེ་རེའི་གནས་ཚུལ་ཞིབ་ཕྲ་འཁོད་པའི་ཟུར་སྦྱར་ཡི་གེ་ནང་། “ལོ་གཞོན་ནད་མནར་ཉམ་ཐག་ (ང) མིང་། རྡོ་རྗེ། ཕ་ཚེ་འདས་རིན་འཛིན། གྲོང་སྡེ་དང་ཁང་ཨང་། ནོར་བུ་གླིང་ཁ། སྐྱེས་ལོ་སྐྱེས་ཚེས་ ༡༩༦༩ ། ན་ཚ་ཅི་ཡིན་སྨན་པས་རྩད་ཆོད་མ་ཐུབ་པ། (ནད་མནར་ཡིན་པའི་ར་སྤྲོད་ཐུབ་པའི་ངེས་སྨན་པའི་ངོས་སྦྱོར་མཉམ་སྦྱར) ད་ལྟ་དབུས་དང་ས་གནས་ཚོགས་གང་རུང་ནས་འཚོ་སྣོན་དང་སྨན་བཅོས་རོགས་སྐྱོར་མེད།” ཞེས་དང་། རྡོ་རྗེ་ལགས་སྒེར་གྱི་གནས་སྟངས་ཞིབ་ཕྲ་འཁོད་པའི་ནང་། “འདི་ལས་ཀྱི་ཁྱབ་ཁོངས་རྡོ་རྗེ་ལགས་ངོ་བཅར་གྱིས་བདེ་སྡུག་སྙན་ཞུ་ཕུལ་དོན་ལྟར། ཁོང་ནོར་བུ་གླིང་ཁར་བསྡད་ནས་ལོ་ངོ་དྲུག་ཙམ་འགྲོ་མུས་ལ་སོང་། སྔོན་མ་ཁོང་གིས་ཚོང་ཙག་ཙིག་བརྒྱབས་ནས་ཉིན་རེའི་འཚོ་བ་འདང་ཙམ་གྱིས་ཚོགས་སྡེ་དང་རོགས་ཚོགས་གཞན་ཁག་ནས་འཚོ་སྣོན་གང་ཡང་ལེན་གྱི་མི་འདུག ད་ཆ་ཁོང་མགོ་བོ་ན་བ་དང་ཚ་བ་འབར་བ་སོགས་ཀྱི་རྐྱེན་པས། སྨན་པར་བསྟན་ཡང་ནད་གཞི་ག་རེ་ཡིན་མིན་ངོས་འཛིན་མ་ཐུབ་པས། ཉིན་ལྟར་སྨན་ཟ་དགོས་ཀྱི་འདུག ལུས་ཁམས་མི་བདེ་བའི་རྐྱེན་གྱིས་ཚོང་ཙག་ཙིག་དེ་ཡང་གཡུག་དགོས་བྱུང་འདུག་ན། ད་ཆ་ཁོང་ལ་འཚོ་རྟེན་གང་ཡང་མེད་པར་བརྟེན། སྐུ་ངོ་མཆོག་ནས་ལོ་གཞོན་ནད་མནར་གྱི་ཉམ་ཐག་ནང་ཚུད་ཐབས་ཡོང་བའི་རོགས་རམ་གནང་སྐྱོང་ཡོང་བ་ཞུ། གོང་གསལ་གནད་དོན་ཁག་སྲེས་ལྷད་མེད་པར་ལྷག་བསམ་དྲང་བདེན་གྱི་སྒོ་ནས་གནས་སྟངས་དངོས་སུ་ཞིབ་འཇུག་མཐིལ་ཕྱིན་ཞུས་པའི་སྙན་ཐོར། ས་གནས་ཉམ་ཐག་ཚོགས་གཙོའི་མཚན་རྟགས་དང་ལས་དམ།” ཞེས་འཁོད་འདུག

བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱིས་རོགས་སྐྱོར་གནང་བཞིན་པའི་ཉམ་ཐག་ཁྲོད། ༼ ཕྲུ་གུ་ལ་བརྟེན་ནས་ཁྱིམ་འཚོ་མ་ཟིན་པའི་ཉམ་ཐག༽ དང་། ༼ ལོ་གཞོན་ནད་མནར་ཉམ་ཐག༽ ། ༼ རྒས་གཅོང་མགོན་མེད་ཉམ་ཐག༽ ། བཅས་རིགས་ ༣ ལ་དབྱེ་ཡོད་པའི་ཁྲོད། དྷ་ས་ས་གནས་ཉམ་ཐག་ཞིབ་འཇུག་ཚོགས་ཆུང་གིས་ཞིབ་འཇུག་བྱས་པ་བརྒྱུད་དེ། འདས་པོ་རྡོ་རྗེ་ལགས་ལོ་གཞོན་ནད་མནར་ཉམ་ཐག་ཁོངས་སུ་བཞག་སྟེ་དབུས་ཉམ་ཐག་ཞིབ་འཇུག་ཚོགས་ཆུང་ལ་རྒྱབ་གཉེར་ཞུས་འདུག

༢༠༡༦ ཟླ་ ༣ ཚེས་ ༣༡ ཉིན་དབུས་ཉམ་ཐག་ཞིབ་འཇུག་ཚོགས་ཆུང་གིས་དྷ་ས་ས་གནས་མགོ་འཛིན་ལ་ཡིག་ལེན་འབྱོར་བའི་ནང་། “ དེ་ནས་རིམ་བཞིན་འབྱོར་བའི་ཉམ་ཐག་གསར་ཐོན་དང་བསྐྱར་ཞིབ་འགེངས་ཤོག་རྣམས་ལ་དབུས་ཉམ་ཐག་ཞིབ་འཇུག་ཚོགས་ཆུང་གི་ཚོགས་མི་ལྷན་ཚོགས་ཀྱིས་ཞིབ་བཤེར་དང་སྦྲགས་དཔལ་ལྡན་བཀའ་ཤག་ལྷན་རྒྱས་སུ་སྙན་འབུལ་ཞུས་པར། ༢༠༡༦ ཟླ་ ༣ ཚེས་ ༡༨ ཉིན་བཀའ་འཁྲོལ་བསྩལ་སྨིན་བྱུང་བའི་གནས་སྟངས་ཟུར་སྦྱར་ཐོ་གཞུང་ཁུངས་འབུལ་ཞུས་པ་ནང་གསལ་ཐུགས་ཞིབ་ཡོང་བ་དང་རྩིས་ལོ་ ༢༠༡༦།༤།༡ ནས་གཟིགས་སྐྱོང་གནང་ཕྱོགས་ལག་བསྟར་གནང་གལ་བཅས་དེ་དོན་དགོངས་འཇགས་ཞུ།” ཞེས་དང་། ཟུར་སྦྱར་ཡི་གེ་ནང་། “ནད་མནར་རྡོ་རྗེ་ལགས་སྨན་བཅོས་ལྟ་སྐྱོང་ལས་གཞིའི་ཁོངས་སུ་འཛུལ་ཞུགས་དགོས་རྒྱུའི་ལམ་སྟོན་གནང་གལ།” ཞེས་འཁོད་འདུག

ས་གནས་ཉམ་ཐག་ཞིབ་འཇུག་ཚོགས་ཆུང་ནས་ཉམ་ཐག་ལོ་རྒྱུས་འགེངས་ཤོག་ཕུལ་བ་ལྟར་དབུས་ཉམ་ཐག་ཞིབ་འཇུག་ཚོགས་ཆུང་གིས་ཞིབ་འཇུག་བྱས་ཏེ་བཀའ་ཤག་ལ་ཕུལ་བའི་ཐོ་གཞུང་ནང་མི་གྲངས་ ༡༧ འཁོད་ཡོད་པ་ལས་མི་ ༥ ཉམ་ཐག་ཁོངས་སུ་ངོས་བཞེས་གནང་ཡོད་པ་ལས་གཞན་དག་ཉམ་ཐག་ཁོངས་སུ་ཚུད་མི་འདུག་ལ། རྡོ་རྗེ་ཚུད་པའི་མི་ ༤ སྨན་བཅོས་ལྟ་སྐྱོང་ལས་གཞིའི་ནང་ཞུགས་དགོས་པའི་ལམ་སྟོན་གནང་དགོས་སྐོར་ས་གནས་ལ་བཀའ་མངགས་གནང་འདུག

ཟླ་འདིའི་ཕྱི་ཚེས་ ༤ ཉིན་གསར་འགོད་པས་བོད་མིའི་སྒྲིག་འཛུགས་དབུས་ཉམ་ཐག་ཞིབ་འཇུག་ཚོགས་ཆུང་གི་ཚོགས་གཙོ་ཚེ་རིང་སྒྲོལ་མ་ལགས་སུ། འདས་པོ་རྡོ་རྗེ་སྐོར་བཀའ་འདྲི་ཞུས་པར་ཁོང་མོས། “གཞི་རྩའི་ང་ཚོས་རྡོ་རྗེ་ལགས་ལ་ཛ་དྲག་དངུལ་གང་ཡོང་ཡོང་ཞིག་ཕུལ་ཡོད། ༢༠༡༥ ཟླ་ ༦ པར་དྷ་ས་ས་གནས་མགོ་འཛིན་ལས་ཁུངས་ནས་ཁོ་རང་ནད་མནར་ཁོངས་སུ་འཇུག་དགོས་པའི་སྙན་ཞུ་འབྱོར་ཡོད་པ་དངོས་ཡོད་གནས་ཚུལ་རེད། ཡིན་ན་ཡང་སྐབས་དེར་ང་ཚོས་དྷ་ས་ས་གནས་མགོ་འཛིན་ལས་ལུངས་ལ་ག་རེ་ཞུས་ཡོད་ཟེར་ན། ད་ལྟ་ཁོ་ལ་ཛ་དྲག་གི་དཀའ་ངལ་འཕྲད་ཀྱི་ཡོད་ན་སྒོར་ཁྲི་གཅིག་ལས་མ་བརྒལ་བ་ས་གནས་མགོ་འཛིན་གྱི་ཛ་དྲག་རོགས་སྐྱོར་ནས་གནང་རོགས། གལ་སྲིད་སྒོར་ཁྲི་གཅིག་ལས་བརྒལ་བ་ཡིན་ན། འཕྲོད་བསྟེན་ལས་ཁུངས་དང་ནང་སྲིད་ལས་ཁུངས་ལ་ཞུ་རོགས་ཞུས་ཡོད།” ཅེས་དང་། “ ད་ལྟ་ཁྱེད་རང་ཚོ་སོང་ནས་དྷ་ས་ས་གནས་མགོ་འཛིན་ལ་ཞིབ་འཇུག་གནང་ན་མ་འགྲིག་པ་ཡོད་པ་མ་རེད། ང་ཚོས་ངོས་ནས་དྷ་ས་ས་གནས་མགོ་འཛིན་ལས་ཁུངས་ལ་སྒོར་ཁྲི་ལས་མ་བརྒལ་བ་གནང་རོགས་ཞུས་པ་ལྟར། ཁོ་རང་ལ་ཟླ་རེར་སྒོར་ཆིག་སྟོང་རེ་བྱས་ཏེ་གནང་ཡོད་སྟབས། དེའི་ཐོ་དེ་ཁོ་ཚོར་ཡོད་ཡོད་པ་རེད་ལ་ཁོ་རང་ཚོའི་རྩིས་ནང་དུ་གསལ་ཀྱི་རེད་བསམ་ཡོད།” ཅེས་གསུངས་སོང་།

གསར་འགོད་པས། རྡོ་རྗེ་ལགས་ལ་མཚོན་ན་ས་གནས་ནས་ཉམ་ཐག་ཡིག་ཆའི་ངོས་སུ་ཉམ་ཐག་རེད་ཅེས་ཐག་བཅད་འདུག་ན་ཡང་། དབུས་ནས་ཁོ་རང་ཉམ་ཐག་ཁོངས་སུ་མ་བཞག་པར་སྨན་བཅོས་ལྟ་སྐྱོང་ལས་གཞིའི་ནང་ཞུགས་དགོས་པའི་འབོད་སྐུལ་ཞུ་དགོས་སྐོར་གསུངས་པའི་རྒྱུ་མཚན་ཅི་ཡིན་དྲིས་པར། ཚེ་རིང་སྒྲོལ་མ་ལགས་ཀྱིས་ཉམ་ཐག་ནང་ཚུད་པར་ས་གནས་ཉམ་ཐག་ཞིབ་འཇུག་ཚོགས་ཆུང་གིས་ཞིབ་འཇུག་བྱས་པའི་ཡིག་ཆར་དབུས་ཉམ་ཐག་ཞིབ་འཇུག་ཚོགས་ཆུང་གིས་བསྐྱར་ཞིབ་གནང་སྟེ་བཀའ་ཤག་ལ་འབུལ་དགོས་པ་དང་། བཀའ་ཤག་གིས་ངོས་བཞེས་གནང་སྟེ་བཀའ་འཁྲོལ་ཐོབ་ན་གཞི་ནས་ས་གནས་ལ་འབྲེལ་བ་བྱས་ཏེ་རོགས་སྐྱོར་མགོ་འཛུགས་ཀྱི་ཡོད་པ་སོགས་ཀྱི་བརྒྱུད་རིམ་མང་པོ་ཞིག་ཡོད་སྟབས། དེ་ལས་ཁོ་རང་སྨན་བཅོས་ལྟ་སྐྱོང་ནང་ཞུགས་པ་ཡིན་ན་རོགས་སྐྱོར་སྔོན་ལ་རག་གི་ཡོད་སྐོར་དང་། སྨན་བཅོས་ལྟ་སྐྱོང་ནང་ཞུགས་པར་དོ་བདག་གིས་སྒོར་ ༣༠༠༠ ལྷག་འབུལ་དགོས་ཀྱི་ཡོད་པ་དེའང་ཁོ་རང་གིས་སྤྲོད་མི་དགོས་པར་དྷ་ས་ས་གནས་མགོ་འཛིན་ནས་སྤྲོད་རྒྱུ་བྱས་ཡོད་སྐོར་སོགས་བརྗོད་བྱུང་།

གསར་འགོད་པས། ས་གནས་ནས་དབུས་ལ་ཞུ་ཡིག་ཕུལ་བ་དང་། དབུས་ནས་ཡིག་ལན་ཕུལ་བའི་བར་ཟླ་བ་ ༥ དང་ཉི་ ༡༥ ལྷག་ཕྱིན་ཡོད་པ་དེའི་རྒྱུ་མཚན་ཅི་ཡིན་དྲིས་པར་ཚེ་རིང་སྒྲོལ་མ་ལགས་ཀྱིས། ང་ཚོས་སྙན་ཞུ་འབྱོར་བ་དེ་དག་ཉིན་གཅིག་ལ་ཞིབ་འཇུག་གནང་གི་ཡོད་པ་མ་རེད། ནང་སྲིད་ལས་ཁུངས་དང་འཕྲོད་བསྟེན་ལས་ཁུངས་ཤེས་རིག་ལས་ཁུངས་སོགས་འབྲེལ་ཡོད་ཚང་མར་ཚོགས་ཆུང་ཞིག་ཡོད་པ་རེད། དེ་ཚོ་ཚང་མ་འཛོམས་ནས་གྲོས་བསྡུར་བྱ་དགོས་ཀྱི་ཡོད་པ་རེད། གལ་ཏེ་འཛོམས་མ་ཐུབ་པ་ཡིན་ན་ཐག་གཅོད་བྱེད་ཐུབ་ཀྱི་ཡོད་པ་མ་རེད། ཡིན་ན་ཡང་། གཞི་རྩའི་ཁོ་རང་ལོ་གཞོན་ནད་མནར་ཡིན་པས་གནད་དོན་དེ་འཕྲོད་བསྟེན་ལས་ཁུངས་སུ་དམིགས་བསལ་འབྲེལ་བ་ཆགས་བསྡད་ཡོད་པ་རེད། འཕྲོད་བསྟེན་ལས་ཁུངས་ནས་ཛ་དྲག་ནད་མནར་གྱི་མཐུན་འགྱུར་གནང་མེད་ན། དེ་ཁོ་རང་ཚོའི་ནོར་འཁྲུལ་རེད། ཅེས་སོགས་བརྗོད་སོང་།

བོད་མིའི་སྒྲིག་འཛུགས་འཕྲོད་བསྟན་ལས་ཁུངས་ཀྱིས་ ༢༠༡༧ ཟླ་ ༦ ཚེས་ ༡ ཉིན་ས་གནས་མགོ་འཛིན་ཁག་ལ་ཉམ་ཐག་ཨང་ཐོབ་ཅན་རྣམས་ལ་ཛ་དྲག་སྨན་གྲོན་གཏོང་ཕྱོགས་སྐོར་གྱི་བཀོད་ཁྱབ་ཅིག་བཏང་ཡོད་པའི་ཟུར་སྦྱར་ཡིག་ཆའི་ཚན་པ་(ཁ)བའི་ཨང་ (༡༠) པའི་ནང་། “གོང་གསལ་ལམ་སྟོན་ནང་མ་ཚུད་པའི་དམིགས་བསལ་དཀའ་སེལ་མཐུན་འགྱུར་ཞུ་དགོས་རིགས་འཕྲོད་བསྟེན་ལས་ཁུངས་སུ་ཡིག་ཐོག་བཀའ་འཁྲོལ་ངེས་པར་དུ་ཞུ་དགོས་པ་བཅས་” ཞེས་འཁོད་འདུག་པའི་ཆ་རྐྱེན་འོག་ནས་རྡོ་རྗེ་ལགས་སུ་ཛ་དྲག་སྨན་གྲོན་ཅི་ཕྱིར་མ་ཐོབ་པའི་དོགས་འདྲི་ཞིག་ཡོང་གི་ཡོད་འདུག

༢༠༡༧ ཟླ་ ༧ ཚེས་ ༡༧ ཉིན། དྷ་ས་ས་གནས་མགོ་འཛིན་ལས་ཁུངས་ཀྱིས་བོད་མིའི་སྒྲིག་འཛུགས་ནང་སྲིད་དྲུང་ཆེ་མཆོག་གི་མཚན་ཐོག་ཏུ་ཡི་གེ་ཞིག་ཕུལ་བའི་ནང་། “འདི་ལས་ནོར་གླིང་ས་གནས་བརྒྱ་དཔོན་ནས་ཞུ་གསོལ་གསོལ་འདེབས་སྙིང་ལ། ནོར་གླིང་གནས་སྡོད་རྡོ་རྗེ་རང་ལོ་ ༤༧ ཅན་དེ་སྔོན་རྒྱུ་མ་དང་གློ་བ་ཁ་ཚ་སོགས་བཙོང་ནས་རང་ཁ་རང་གསོ་བྱེད་མཁན་ཞིག་རེད་འདུག་ན། ད་ཆ་ཁོ་པ་ནད་གཞི་ལྗིད་པོ་ཞིག་ཕོགས་ནས་གཟུགས་པོའི་ནུས་ཤུགས་རྣམས་ཉམས་ནས་ལས་ཀ་གང་ཡང་བྱེད་ཐུབ་ཀྱི་མེད་པ་མ་ཟད། ཁོ་པ་ལ་དམིགས་གསལ་ལྟ་རྟོག་བྱེད་མཁན་ཕ་མ་སྤུན་མཆེད་སུ་ཡང་མེད་པར། ད་ཆ་བདག་མེད་ལྟ་བུར་ལུས་འདུག་ན། སྐུ་ངོ་མཆོག་ནས་ཐུགས་བསམ་ཆེ་བཞེས་ཀྱིས་ཁོ་པ་གང་མགྱོགས་བྱམས་གླིང་རྒས་གསོ་ཁང་དུ་འཇུག་དགོས་གནང་སྐྱོང་ཡོང་བ་དང་སྦྲགས། འདི་ལས་ནས་ཁོ་པའི་གཟུགས་པོ་ཆ་ཚང་ཡོད་པའི་འདྲ་པར་ཞིག་ཀྱང་འབུལ་ལམ་ཞུས་ཡོད་པས་རྩིས་བཞེས་གནང་སྐྱོང་ཡོང་བ་ཞུ།” ཞེས་འཁོད་འདུག

༢༠༡༧ ཟླ་ ༧ ཚེས་ ༢༡ ཉིན་བོད་མིའི་སྒྲིག་འཛུགས་ནང་སྲིད་ལས་ཁུངས་ནས་དྷ་ས་ས་གནས་མགོ་འཛིན་ལ་ཕུལ་བའི་ཡི་གེ་ནང་། “དེ་ནས་ ༢༠༡༧ ཟླ་ ༧ ཚེས་ ༡༧ འཁོད་གནད་ཕུལ་འབྱོར་ནང་གསལ། དེ་གའི་ཁྱབ་ཁོངས་ནོར་གླིང་གནས་སྡོད་ཁྱོ་རྡོ་རྗེ་རང་ལོ་ ༤༨ ཅན་ནད་གཞི་ལྕི་མོ་ཕོགས་ནས་གཟུགས་པོ་ནུས་ཤུགས་མེད་པ་དང་ལྟ་རྟོག་བྱེད་མི་སུ་ཡང་མེད་པས། དྷ་ས་རྒས་གསོ་ཁང་དུ་འཇུག་བཞེས་ཡོང་བའི་རྒྱབ་གཉེར་གནང་དོན། ཁོ་པ་ལོ་ནའི་བབ་ཀྱིས་རྒས་གསོའི་ཐ་སྙད་དང་མ་མཐུན་པར་ད་ལྟའི་ཆར་རྒས་གསོ་ཁང་ལ་འཇུག་བཞེས་ཡོང་ཐབས་མི་འདུག སྤྱིར་ཁོ་པ་ལོ་གཞོན་ནད་མནར་དངོས་ཡོད་ལ་སོང་ (ཉམ་ཐག་ (ང) པའི་འགེངས་ཤོག་ཞིབ་བསྐང་གིས་འཕྲལ་འབུལ་གནང་དགོས། ལོ་གཞོན་ནད་མནར་ཉམ་ཐག་ཁོངས་ནས་སྨན་བཅོས་མཐུན་འགྱུར་ཡོང་ངེས། ཛ་དྲག་སྨན་བཅོས་ཆེད་བདེ་ལེགས་སྨན་ཁང་ལ་སྨན་གཏུགས་བྱ་དགོས། གཟུགས་པོའི་བབ་ནས་རང་སྐྱ་འཕེར་ངེས་བྱུང་མཚམས་ལས་རིགས་ཆུང་ཙག་དོན་སོན་ཡོང་ཐབས་རོགས་མགོན་གནང་གལ། མ་ཟད་ཁོ་པ་བཞེས་ལག་བཟོ་སྟངས་གང་ལེགས་ཡོད་པ་དེ་སྔ་ ༡༩༩༡ ན་ ༡༩༩༥ བར་དྷ་ས་བོད་ཀྱི་གསོལ་མགྲོན་ཁང་ནང་མ་བྱན་ལས་མྱོང་ཡོད་པའི་ངོས་སྦྱོར་འདི་མཉམ་ཐུགས་ཞིབ་ཆེད་འབུལ་ཞུས་ཡོད་པ་བཅས་དེ་དོན་དགོངས་འཇག་ཞུ།” ཞེས་འཁོད་འདུག

༢༠༡༧ ཟླ་ ༧ ཚེས་ ༢༡ ཉིན་དྷ་ས་ས་གནས་མགོ་འཛིན་ཀྱིས་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་དྲུང་ཆེ་མཆོག་གི་མཚན་ཐོག་ཏུ་ཕུལ་བའི་ཡི་གེ་ནང་། “འདི་ལས་ཀྱི་ཁྱབ་ཁོངས་ནོར་གླིང་ཁུལ་དུ་གནས་སྡོད་ཁྱོ་བོ་རྡོ་རྗེ་ནད་མནར་གྱི་རྐྱེན་པས་འདི་ལས་འབོད་སྐུལ་ཞུས་པ་བཞིན་བདེ་ལེགས་སྨན་ཁང་དུ་སྨན་བཅོས་རིན་མེད་ཐོག་གནང་མུས་ཀྱང་། ད་ཆ་ཁོ་པའི་གཟུགས་པོའི་གནས་སྟངས་ཧ་ཅང་སྐྱོ་བོ་ཡིན་པར་བརྟེན་ཕྱི་ལོགས་སྨན་ཁང་ཆེ་བ་ (Ventilator) ཡོད་ས་ཞིག་ནང་སྨན་བཅོས་བྱེད་དགོས་འདུག་ན། ཁོ་པར་ལྟ་རྟོག་བྱེད་མཁན་སུ་ཡང་མེད་པར་དངོས་ཡོད་ཉམ་ཐག་དཀའ་ངལ་ཅན་ཞིག་རེད་འདུག་པས། སྐུ་ཉིད་མཆོག་ནས་དམིགས་བསལ་དགོངས་བཞེས་ཐོག་ཛ་དྲག་གི་རོགས་དངུལ་གསོལ་སྩལ་གནང་སྐྱོང་ཡོང་བའི་འབོད་སྐུལ་ཞུ།” ཞེས་འཁོད་འདུག

༢༠༡༧ ཟླ་ ༧ ཚེས་ ༢༥ ཉིན་འཕྲོད་བསྟེན་ལས་ཁུངས་ནས་དྷ་ས་ས་གནས་མགོ་འཛིན་ལ་ཡིག་ལན་འབྱོར་བའི་ནང་། “དགོངས་པའི་མངའ་གསོལ་བཞིན་ ༢༠༡༡ ཟླ་ ༡ ཚེས་ ༡ ནས་བོད་མིའི་སྨན་བཅོས་ལྟ་སྐྱོང་ལས་གཞི་མགོ་འཛུགས་ཞུས་པ་ནས་བཟུང་ཛ་དྲག་སྨན་བཅོས་རོགས་སྐྱོར་ཞུ་རྒྱུ་མཚམས་བཞག་ཟིན་པ་དང་། གལ་ཏེ་ཉམ་ཐག་དངོས་འབྲེལ་ཡིན་ཚེ། ས་གནས་སུ་ཐག་ཉག་ཚོགས་ཆུང་ཡོད་བཞིན་པས་གཟིགས་རྟོགས་དགོས་པ་མ་ཟད། འདི་ལས་སུ་ཛ་དྲག་སྨན་བཅོས་དང་འབྲེལ་བའི་ཐོག་རྩིས་འགྲོ་གཏོང་ཁུངས་གང་ཡང་མེད་པ་དེ་ནས་མ་འོངས་རྒྱབ་གཉེར་གནང་ཕྱོགས་ཐོག་དགོངས་འཇགས་ཡོང་བ་ཞུ།” ཞེས་འཁོད་འདུག

༢༠༡༧ ཟླ་ ༧ ཚེས་ ༢༨ ཉིན། དྷ་ས་ས་གནས་ཉམ་ཐག་ཚོགས་ཆུང་གིས་རྡོ་རྗེ་ལགས་ནད་མནར་ཉམ་ཐག་ཁོངས་སུ་འཇུག་རྒྱུའི་འགེངས་ཤོག་བསྐངས་ཏེ་དབུས་ཉམ་ཐག་ཚོགས་ཆུང་ལ་ཕུལ་བའི་ཡི་གེ་ནང་། “དྷ་ས་ས་གནས་འགོ་འཛིན་ལས་ཁུངས་ཀྱི་ཁྱབ་ཁོངས་ནོར་གླིང་ཁུལ་དུ་གནས་སྡོད་ཁྱོ་རྡོ་རྗེ་རང་ལོ་ ༤༨ ཅན་དངོས་ཡོད་དཀའ་ངལ་ཅན་གྱི་ཉམ་ཐག་ཡིན་པར་སོང་། ས་གནས་ཉམ་ཐག་ཞིབ་འཇུག་ཚོགས་ཆུང་ནས་གནས་སྟངས་ཞིབ་འཇུག་བྱས་རྗེས། ༢༠༡༥ ཟླ་ ༨ ཚེས་ ༢༦ ཉིན། ཁོ་པའི་ཉམ་ཐག་ལོ་རྒྱུས་འགེངས་ཤོག་ཞིབ་བཀང་ཐོག་དབུས་ཉམ་ཐག་ཞིབ་འཇུག་ཚོགས་ཆུང་ལ་ཕུལ་བ་དང་། དེ་ནས་ ༢༠༡༦ ཟླ་ ༣ ཚེས་ ༣༡ ཉིན་འཁོད་གནད་ནང་གསལ་ཁོ་པ་སྨན་བཅོས་ལྟ་སྐྱོང་གི་ཚོགས་མིར་འཛུལ་ཞུགས་བྱེད་དགོས་པའི་ལམ་སྟོན་ཕེབས་པ་བཞིན་འདི་ནས་ཀྱང་ཁོ་པར་དེ་ལྟར་ཞུས་ཡོད། མ་ཟད་འདི་ག་ས་གནས་འགོ་འཛིན་ལས་ཁུངས་ནས་ཁོ་པའི་ཛ་དྲག་དཀའ་ངལ་སེལ་ཆེད་ཕྱི་ལོ་ ༢༠༡༥ ནས་ ༢༠༡༧ ཟླ་ ༦ ཚེས་ ༥ བར་ཁྱོན་བསྡོམས་ཧིན་སྒོར་ ༡༥༠༠༠ གནང་ཡོད་པ་དང་། དེ་བཞིན། ཉེ་ཆར་ཛ་དྲག་ནད་མནར་གྱི་རྐྱེན་པས་འདི་ནས་བདེ་ལེགས་སྨན་ཁང་གི་འགན་འཛིན་ལ་རེ་བ་ཞུས་པ་བཞིན་ཁོ་པར་སྨན་བཅོས་དང་དུས་གསུམ་གྱི་ཞལ་ལག་རིན་མེད་ཐོག་མཐུན་འགྱུར་གནང་ཡོད་པ་དང་། ད་ཆ་ཁོ་པའི་གནས་སྟངས་ཛ་དྲག་ཆགས་པར་བརྟེན་ཀཱང་ར་ (Fortis) སྨན་ཁང་གི་ (ICU) ནང་སྨན་བཅོས་བྱེད་མུས་ཡིན་པས། ཁོ་པར་ལྟ་རྟོག་བྱེད་མཁན་ནང་མི་སྤུན་མཆེད་སུ་ཡང་མེད་པར་དཔལ་འབྱོར་གྱི་དཀའ་ངལ་འཕྲད་བཞིན་ཡོད་པར་བརྟེན་འདི་ག་ལས་ཁུངས་ནས་དཔལ་ལྡན་འཕྲོད་བསྟེན་ལས་ཁུངས་སུ་ཛ་དྲག་མ་དངུལ་གསོལ་སྩལ་ཡོང་བའི་ངོ་སྦྱོར་ཕུལ་ཡང་དེ་ནས་སྨན་བཅོས་ལྟ་སྐྱོང་ལས་གཞི་འགོ་འཛུགས་བྱས་པ་ནས་བཟུང་སྒྲིག་གཞི་དགོངས་དོན་ལྟར་ཛ་དྲག་མ་དངུལ་གནང་བདེ་མེད་ལུགས་ཡིག་ཐོག་ནས་ཕུལ་སོང་ལ། དཔལ་ལྡན་ནང་སྲིད་ལས་ཁུངས་སུ་ཁོ་པ་ཛ་དྲག་ཐོག་ནས་རྒས་གསོར་འཇུག་བཞེས་ཡོང་བའི་འབོད་སྐུལ་ཞུས་ནས་དེ་ལས་ཀྱི་ལམ་སྟོན་གཞིར་བཟུང་ལོ་གཞོན་ནད་མནར་ཉམ་ཐག་གི་ལོ་རྒྱུས་འགེངས་ཤོག་ཞིབ་བཀང་བྱས་ནས་ཟུར་འབུལ་ཞུས་ཡོད་པས། སྐུ་ཉིད་མཆོག་ནས་དམིགས་བསལ་དགོངས་བཞེས་གནང་ནས་ཛ་དྲག་ཐོག་ལོ་གཞོན་ནད་མནར་ཉམ་ཐག་ཁོངས་སུ་འཇུག་བཞེས་ཡོང་བའི་འབོད་སྐུལ་ཞུ” ཞེས་འཁོད་འདུག

འདས་པོ་རྡོ་རྗེ་ལགས་ཀྱི་དང་བླང་དཔྱ་དངུལ་ལག་དེབ་ནང་འཁོད་པ་ལྟར་ན། ཁོ་རང་གི་སྐྱེས་ལོ་ ༡༩༦༩ ཡིན་པ་དང་ཕ་ཡུལ་སྟོད་རྫང་ཁ། ཞེས་འཁོད་འདུག་ཀྱང་། དྷ་ས་ས་གནས་མགོ་འཛིན་ལས་ཁུངས་ནས་རྡོ་རྗེ་ལགས་ཀྱི་ལོ་རྒྱུས་སྙིང་བསྡུས་མཁོ་སྤྲོད་གནང་བའི་ནང་། ༡༩༦༨ ཟླ་ ༡༡ ཚེས་ ༢ ཉིན་ཁོང་དྷེ་ར་ལྡུན་ཡི་ཤུ་སློབ་གྲྭ་ (Joseph’s Academy school Dehra Dun (U.P) ནང་སློབ་སྦྱོང་བྱས་ཡོད་པ་དང་། དེའི་རྗེས་རྒྱ་ནག་གི་ཟ་མ་བཟོ་སྟངས་ལོ་དགུ་ལ་ཉམས་མྱོང་བསགས་ཡོད་ཅིང་། (Hotel Hans Plaza) ནང་རྒྱ་ནག་གི་ཟ་མ་བཟོ་མཁན་མ་བྱན་ཨང་དང་པོ་བྱས་འདུག དྷ་ས་བོད་ཀྱི་གསོལ་མགྲོན་ཁང་ (Hotel Tibet) དུ་ལོ་ལྔ་རིང་རྒྱ་ནག་གི་ཟ་མ་བཟོ་མཁན་མ་བྱན་བྱས་འདུག འབྲས་ལྗོངས་སྒང་ཏོག་བོད་ཀྱི་གསོལ་མགྲོན་ཁང་ (Hotel Tibet Gangtak) དུ་ལོ་གཅིག་རིང་རྒྱ་ནག་གི་ཟས་རིགས་བཟོ་མཁན་མ་བྱན་བྱས་སྐོར་སོགས་འཁོད་འདུག

གསར་འགོད་པ། པདྨ་རྒྱལ།