རྒྱ་ནག་དམར་ཤོག་ཚོགས་ཆེན་མཇུག་སྡོམ་ཐོག་ཞི་ཅིན་ཕིན་གྱི་དུས་རབས་གསར་པའི་རྒྱ་ནག་གི་ཁྱད་ཆོས་ལྡན་པའི་བསམ་བློ་ཟེར་བ་དང་ཁོ་རང་གི་མིང་བཅས་རྩ་ཁྲིམས་ནང་བཀོད་ཡོད་འདུག
དེ་རིང་ཏང་གི་ཚོགས་ཆེན་ ༡༩ པ་མཇུག་བསྡུའི་མཛད་སྒོའི་སྟེང་། ཞི་ཅིན་ཕིན་བསྐྱར་དུ་རྒྱ་ནག་དམར་ཤོག་ཚོགས་པའི་སྲིད་འཛིན་ལ་འདེམ་ཐོན་བྱུང་སྟེ། འབྱུར་འགྱུར་ཕྱི་ལོ་ ༢༠༢༢ བར་སྲིད་འཛིན་གྱི་ལས་ཡུན་གཉིས་པ་འཁུར་རྒྱུ་ཡིན་པ་མ་ཟད། ཞི་ཡི་དུས་རབས་གསར་པའི་རྒྱ་ནག་གི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་བསམ་བློ་ཞེས་པ་དེ་རྒྱ་ནག་གི་རྩ་ཁྲིམས་ནང་འགོད་རྒྱུ་ཐག་བཅད་ཡོད་འདུག
དེ་སྔོན་རྒྱ་ནག་གི་གཙོ་འཛིན་མའོ་ཙེ་དུང་དང་ཏི་ཞོན་ཕིན་གཉིས་ཀྱིས་སོ་སོའི་མིང་དང་ལྟ་གྲུབ་བཅས་རྒྱ་ནག་དམར་ཤོག་ཚོགས་པའི་རྩ་ཁྲིམས་ནང་བཀོད་དེ། དམར་ཤོག་ཚོགས་པའི་ལོ་རྒྱུས་ནང་གི་མགོ་ཁྲིད་གལ་ཆེ་ཤོས་གཉིས་ལ་རྩིས་ཡོད་པ་དང་། དེའི་རྗེས་མགོ་ཁྲིད་ཟུར་པ་ཧྲུའུ་ཅིན་ཐའོ་དང་ཅང་ཙི་མེན་གཉིས་ཀྱིས་དམར་ཤོག་རྩ་ཁྲིམས་ནང་སོ་སོའི་ལྟ་གྲུབ་བཀོད་ཐུབ་ཡོད་ཀྱང་། མའོ་དང་ཏི་ཞོན་ཕིན་ལྟར་མིང་འགོད་ཐུབ་མེད་པ་རེད། འདས་པའི་ལོ་ངོ་ ༢༠ མ་ཟིན་ཙམ་ཞིག་གི་ནང་དམར་ཤོག་ལོ་རྒྱུས་ཁྲོད། ཞི་ཅིན་ཕིན་དམར་ཤོག་ཚོགས་པའི་རྩ་ཁྲིམས་སྟེང་མིང་དང་ལྟ་གྲུབ་གཉིས་ཆ་འགོད་མཁན་སྲིད་འཛིན་ཨང་གསུམ་པ་དེ་ཆགས་ཡོད་པ་རེད།
དམར་ཤོག་ཚོགས་པའི་ལམ་སྲོལ་ལྟར་ན། རྒྱ་ནག་གི་སྲིད་འཛིན་རྣམས་ཀྱི་ལྟ་གྲུབ་ནི་དམར་ཤོག་ཚོགས་པའི་རྩ་ཁྲིམས་ནང་བཀོད་པ་ཙམ་མ་ཡིན་པར་འབྱུང་འགྱུར་གྱི་དམར་ཤོག་ཚོགས་པའི་ཁ་ཕྱོགས་ལ་ལམ་སྟོན་གྱི་ལྟ་གྲུབ་ཅིག་ཆགས་ཀྱི་ཡོད་སྟབས། ཞི་ཡི་དུས་རབས་གསར་པའི་རྒྱ་ནག་གི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་བསམ་བློ་ཞེས་པ་མི་འགྱངས་བར་རྒྱ་ནག་རྒྱལ་ཡོངས་ཀྱི་སློབ་གྲྭ་ཁག་གི་སློབ་ཚན་དུ་འཇོག་རྒྱུ་ཡིན་སྐོར་བསྒྲགས་ཡོད་པ་རེད།
དེ་རིང་གི་ཚོགས་ཆེན་གྱི་མཇུག་བསྡུའི་གྲོས་ཆོད་ལྟར་ན། ལོ་ན་ ༦༤ ཡིན་པའི་ཞི་ཅིན་ཕིན་རྒྱ་ནག་གི་མགོ་འཁྲིད་ཨང་དང་པོ་དང་། ལོ་ན་༦༢ ཡིན་པའི་ལི་ཁུ་ཆང་མགོ་ཁྲིད་ཨང་གཉིས་པར་འདེམ་ཐོན་བྱུང་སྟེ། ཞི་དང་ལི་གཉིས་ཕྱི་ལོ་ ༢༠༡༢ ལོ་ནས་ ༢༠༢༢ བར་རྒྱ་ནག་དབུས་ཆབ་སྲིད་རྒྱུན་ལས་ལྷན་ཁང་གི་གཙོ་འཛིན་མི་སྣ་ཆགས་རྒྱུ་ཡིན་པ་དང་། གཞན་དབུས་ཆབ་སྲིད་རྒྱུན་ལས་ལྷན་ཁང་གི་གཙོ་འཛིན་མི་སྣ་ལྔ་དང་ཚོགས་མི་བཅས་པ་སང་ཉིན་གསར་བསྒྲགས་བྱ་རྒྱུ་ཡིན་འདུག་ལ། རྒྱ་ནག་དམར་ཤོག་ཚོགས་པའི་དབུས་རྒྱུན་ལས་ལྷན་ཚོགས་ནང་འཐུས་མི་ ༢༢༡ ཡོད་པ་ལས་ མི་ ༢༠༤ འདེམ་ཐོན་བྱུང་ཡོད་འདུག
ཡང་སི་ཨན་ཨན་གསར་ཁང་གི་གསར་འགྱུར་ནང་། དེ་རིང་ཏང་གི་ཚོགས་ཆེན་མཇུག་བསྡུའི་མཛད་སྒོའི་ཐོག དམར་ཤོག་ཚོགས་པའི་རྩ་ཁྲིམས་ནང་ཞི་ཅིན་ཕིན་གྱི་མིང་དང་ལྟ་གྲུབ་གསར་འཇོག་གིས་བཅོས་སྒྱུར་བྱེད་སྐབས། རྒྱལ་ཡོངས་ཀྱི་འཐུས་མི་ ༢༢༠༠ལྷག་གིས་དུས་གཅིག་ལ་ལག་པ་ཡར་སྒྲེང་སྟེ། དམར་ཤོག་ཚོགས་པའི་རྩ་ཁྲིམས་བཅོས་སྒྱུར་ལ་མོས་མཐུན་ཡོད་པའི་རྣམ་འགྱུར་བསྟན་ཡོད་པ་མ་ཟད། སྐབས་དེར་མདོ་འཛིན་པའི་མིན་འདུག་ཅེས་མོས་མཐུན་མེད་པའི་མི་གཅིག་ཀྱང་མེད་སྐོར་བསྒྲགས་ཡོད་པ་དང་།
ཧོང་ཀོང་རྒྱ་ནག་གཙུག་ལག་སློབ་གཉེར་ཁང་གི་དགེ་རྒན་ཆེན་མོ་ཝེ་ལེ་ལམ་(Willy Lam)ལགས་ཀྱིས། ད་ལྟ་ཞི་ཅིན་ཕིན་ལ་རྩ་ཁྲིམས་ཀྱིས་གཏན་འབེབས་བྱས་པའི་རྒྱབ་སྐྱོར་ཡོད་སྟབས། ཇི་སྲིད་ཁོ་རང་གི་ལུས་པོའི་འཕྲོད་བསྟེན་གྱིས་འཇོན་པ་ཡིན་ན་དེ་སྲིད་རྒྱལ་པོ་ལྟར་ཚེ་གང་ཆབ་སྲིད་དབང་ཆ་ལ་བརྙེས་ཏེ་འདུག་ཆོག་གི་ཡོད། ཅེས་བརྗོད་འདུག
གསར་འགོད་པ། སྐལ་བཟང་སྤྱིན་པ།
༄༅། རྒྱ་ནག་དམར་ཤོག་ཚོགས་པའི་དཔོན་རིགས་ཚོ་ལ་བསྟོད་རྒྱུ་གང་ཡང་མི་འདུག།
ཚང་་མ་རང་དོན་ཁོ་ནའི་ལས་དོན་བྱེད་ཀྱི་ཡོད་པ་རེད། ངེས་བརྟན་ཅི་ཡང་མེད།
མི་མང་དུང་ཕྱུར་མང་པོ་ཞིང་པ་དབུལ་པོ་ཤ་སྟག་རེད། དེ་ཚོའི་དཀའ་ངལ་སུས་སེལ་།
སྙིང་རྗེ་ད་རིང་ལྟོ་ཟ་རྒྱུ་ཡོད་ཀྱང་སང་་ཉིན་མེད་པའི་གནས་སྟངས་རེད།
མི་མང་མང་གཙོ་ཁྲིམས་ཡིག་འོག་ཏུ་འཚོ་།
གྲལ་རིམ་དམངས་གཙོ་གཅིག་བསྡུད་འོག་ཏུ་འཚོ་།ཧཧཧ