བོད་རང་བཙན་སྐོར་གྱི་རྩོམ་བསྡུའི་གསལ་བརྡ།
༄༅། ། མཁྱེན་དཔྱོད་ཡངས་པའི་སྨྱུག་ཐོགས་པ་ཡོངས་ཀྱི་སྙན་ལམ་དུ་ཞུ་རྒྱུར། ཕྱི་ལོ་༢༠༡༨ ཟླ་༥ ཚེས་༢༣ ནས་ཉིན་གསུམ་རིང་རྒྱལ་སྤྱིའི་བོད་རང་བཙན་གྱི་ཚོགས་ཆེན་ཞིག་རྒྱ་གར་དྷ་རམ་སཱ་ལར་འཚོགས་འཆར་ལགས་ན། སྐབས་དེ་དང་བསྟུན་ནས་རྩོམ་ལུས་སྣ་ཚོགས་ལས་གྲུབ་པའི་བོད་རང་བཙན་སྐོར་གྱི་ཆེད་དེབ་ཅིག་འདོན་འཆར་ཡོད་ལ། ཆེད་དེབ་དེའི་སླད་མཁས་པའི་དཔྱད་རྩོམ་དང་ཡོངས་ཁྱབ་རྩོམ་ཡིག་འགྲན་སྡུར་ཞིག་བྱ་རྒྱུ་དང་། ཆེད་དེབ་འདོན་འཆར་གྱི་དགོས་དམིགས་ནི། རྒྱ་ནག་གིས་བོད་ལ་བཙན་འཛུལ་དབང་བསྒྱུར་བྱས་པ་ནས་ད་ལྟ་བོད་ཀྱི་མི་རབས་གསུམ་པར་སླེབས་བཞིན་ཡོད་པས། ལོ་རྒྱུས་མ་ཤེས་ན་སོ་སོའི་ཕ་ཡང་ངོ་མི་ཤེས་པའི་དཔེ་ལྟར། ན་གཞོན་ཚོའི་ཁྲོད་བོད་ཀྱི་འདས་མ་ད་གསུམ་ལ་ཤེས་རྟོགས་འགན་འཁྲིའི་བསམ་བློ་སྐྱེད་སྲིང་དང་། མ་འོངས་བོད་རང་བཙན་འཐབ་རྩོད་ཀྱི་ཕུགས་བསམ་མངོན་འགྱུར་བཅས་གཙོ་གནད་དུ་བཟུང་བ་ཞིག་ཡིན།
༡ དཔྱད་རྩོམ་བསྡུ་རུབ།
བརྗོད་གཞི་གཙོ་བོ། ༡ བོད་རང་བཙན་སྐབས་ཀྱི་ལོ་རྒྱུས་ལ་དཔྱད་ཞིབ་དང་འབྲེལ། ལོ་རྒྱུས་ཐོག་ནས་བོད་རང་བཙན་ཁུངས་སྐྱེལ། ༢ བོད་རང་བཙན་འཐབ་རྩོད་ཀྱི་གལ་གནད། ༣ བོད་རང་བཙན་འཐབ་རྩོད་ཀྱི་ཐབས་ཇུས། ༤ རྒྱ་ནག་གི་སྲིད་ཇུས་འོག་གི་བོད་ཀྱི་གནས་བབས། ༥ བོད་ཕྱི་ནང་གི་དེ་སྔའི་བོད་རང་བཙན་འཐབ་རྩོད་ལས་འགུལ་ལ་དབྱེ་ཞིབ། ༦ མཉམ་འབྲེལ་རྒྱལ་ཚོགས་བཙུགས་རྗེས་རྒྱལ་སྤྱིའི་ནང་རང་བཙན་ཐོབ་མཁན་དང་ཁོང་ཚོའི་འཐབ་རྩོད་ལས་འགུལ་ལ་དཔྱད་ཞིབ་དང་། བོད་རང་བཙན་འཐབ་རྩོད་བྱེད་ཕྱོགས་ལ་མཚུངས་བསྡུར། ༧ མ་འོངས་བོད་རང་བཙན་རྒྱལ་ཁབ་ཀྱི་འཆར་སྣང་བཅས་རྩོམ་པ་པོ་རྣམ་པའི་དཔྱད་བརྗོད་ཀྱི་བརྗོད་གཞིར་བཞག་པ་ཡིན། ཐེངས་འདིའི་དཔྱད་བརྗོད་དང་འགྲན་རྩོམ་གྱི་དགོས་དམིགས་འོག་གོང་བཀོད་བརྗོད་གཞི་ཁག་མ་ཡིན་པ་རང་ངོས་ནས་བརྗོད་གཞི་གདམ་རྒྱུའི་རང་དབང་ཡོད་མོད། བོད་རང་བཙན་དང་འབྲེལ་བའི་སྐོར་ཡིན་དགོས། རྩོམ་ཡིག་ཁག་ཆེད་དེབ་ཐོག་བཀོད་མིན་དབང་ཚད་རྩོམ་སྒྲིག་ཚོགས་ཆུང་ལ་ཡོད།
༢ རྩོམ་ཡིག་འགྲན་སྡུར།
འགྲན་རྩོམ་འདི་ནི་མཐོ་རིམ་སློབ་གྲྭ་དང་དགོན་སྡེ། སྤྱི་ཚོགས་ཁྱོན་ཡོངས་ཀྱི་རྩོམ་པ་པོ་རྣམས་ལ་གོ་སྐབས་གཅིག་མཚུངས་སུ་ཡོད་ལ། བོད་རང་བཙན་གྱི་མངོན་འདོད་འོག་རྩོམ་ལུས་ལ་ཁྱད་པར་མེད་ཅིང་། སྐད་ཡིག་བོད་དབྱིན་གང་རུང་ཐོག་འབྲི་ཆོག བོད་ཡིག་ཡིན་ན་ཡིག་འབྲུ་༤༠༠༠ ལས་མ་བརྒལ་བ་དང་དབྱིན་ཡིག་ལ་ཡིག་འབྲུ་༣༠༠༠ ལས་མ་བརྒལ་བ་དགོས། (ཡིག་འབྲུའི་ཚད་བཀག་འདི་གཙོ་བོ་འགྲན་རྩོམ་གྱི་དཔྱད་རྩོམ་ཆེད་ཡིན། )
གསལ་འདེབས།
དཔྱད་བརྗོད་ཆེད་དེབ་འདོན་འཆར་དུ་རྩོམ་ཡིག་བསྡུ་རུབ་བྱེད་རྒྱུ་ཡིན་ན། འགྲན་རྩོམ་གྱི་རྩོམ་ཡིག་ཁག་ཚད་ལྡན་བྱུང་ན་ཆེད་དེབ་ཐོག་འགོད་འཆར་ཡོད་པས། རྩོམ་པ་པོ་རྣམ་པས་རྩོམ་ཡིག་གང་མང་གཏོང་གནང་ཡོད་པ་མཁྱེན།
(འགྲན་རྩོམ་ཆེད་དུ་བཏང་བ་ཡིན་མིན་ཟུར་མཆན་འགོད་རོགས། འགྲན་རྩོམ་ནང་ཨང་དང་པོ་ཐོབ་མཁན་གྱི་རྩོམ་ཡིག་ཚད་ལྡན་བྱུང་ཡོད་ན། ཚོགས་ཆེན་ཐོག་རྩོམ་ཡིག་དེ་འབྲེལ་བའི་གཏམ་བཤད་བྱེད་རྒྱུའི་གོ་སྐབས་བསྐྲུན་ཆོག)
འགྲན་རྩོམ་བྱ་དགའ།
ཨང་དང་པོར་ཧིན་སྒོར་༢༥༠༠༠ དང་། ཨང་གཉིས་པར་ཧིན་སྒོར་༡༥༠༠༠། ཨང་གསུམ་པར་ཧིན་སྒོར ༡༠༠༠༠ བཅས་ཡོད། རྩོམ་ཡིག་ཁག་ཕྱི་ལོ་༢༠༡༨ ལོའི་ཟླ་༤ ཚེས་༣༠ སྔོན་ལ་འབྱོར་དགོས།
རྩོམ་ཡིག་ངེས་པར་དུ་གཤམ་གྱི་གློག་འཕྲིན་བརྒྱུད་བསྐུར་རོགས།
རྒྱལ་སྤྱིའི་བོད་རང་བཙན་ཚོགས་ཆེན་ཐེངས་ལྔ་པའི་གོ་སྒྲིག་ཚོགས་ཆུང་ནས་༢༠༡༧ ལོའི་ཕྱི་ཟླ་༡༢ པའི་ཚེས ༡༥ ཉིན།
འབྲལ་གཏུག་བྱེད་ཡུལ།
Email: rangzenpas@gmail.com
Blog: https://ircd2018.wordpress.com
ངོ་དེབ་ཁ་བྱང་།https://www.facebook.com/irc2018/
ཁ་པར་ཨང་། +91 9817113191 / 9857570131
ཚོགས་ཞུགས་པའི་ཐོ་འགོད་བྱེད་ས།
Register Here https://goo.gl/forms/xpjQ3PHL6M0VeCKx1
