སྐུའི་བླ་སྨན་པ་ཚེ་བརྟན་རྡོ་རྗེ་ལགས་ཀྱིས་༧གོང་ས་རྒྱལ་བ་རིན་པོ་ཆེ་མཆོག་གི་སྐུའི་འཕྲོད་བཞེས་ཧ་ལས་པ་ཡག་པོ་འདུག་པས་མི་མང་ཐུགས་བློ་བདེ་པོའི་ངང་བཞུགས་རོགས་ཞེས་བརྗོད་བྱུང་།
དེ་སྔོན་གནས་མཆོག་རྡོ་རྗེ་གདན་གྱི་དུས་འཁོར་དབང་ཆེན་སོགས་ཀྱི་སྐབས་སུ་ཁོར་ཡུག་གཙང་སྦྲ་དང་དགུན་དུས་ཀྱི་གནམ་གཤིས་སོགས་ཀྱིས་༧གོང་ས་རྒྱལ་བ་རིན་པོ་ཆེ་མཆོག་ནས་མགུལ་ཆམ་བཞེས་པའི་གནས་སྟངས་བྱུང་ཡོད་སྟབས། འདི་གའི་གསར་འགོད་པས་སྐུའི་ཕྱི་ལུགས་ཀྱི་བླ་སྨན་པ་ཚེ་བརྟན་རྡོ་རྗེ་ལགས་སུ། འདི་ལོར་སྐུའི་འཕྲོད་བཞེས་ག་འདྲ་ཡོད་བཀའ་འདྲི་ཞུས་པར་ཁོང་གིས། ༧གོང་ས་མཆོག་དགུང་ལོ་ཡར་ཕེབས་ཀྱི་ཡོད་ནའང་ཕྱོགས་གཅིག་ནས་སྐུ་ཁམས་ཐང་དུ་ཕེབས་བཞིན་འདུག་པས་ལོ་འགའི་རིང་གནས་མཆོག་རྡོ་རྗེ་གདན་དུ་རྟག་པར་ཕེབས་ཀྱི་ཡོད་པ་རེད། གལ་སྲིད་མགུལ་ཆམ་དང་༧སྐུའི་འཕྲོད་བཞེས་ཐད་སྐུ་ངལ་ཡོད་ན་ལོ་ལྟར་ཕེབས་ཀྱི་མ་རེད། ད་ལྟའི་ཆར་༧རྒྱལ་བ་རིན་པོ་ཆེ་མཆོག་གི་སྐུ་ཁམས་ཧ་ལས་པ་ཡག་པོ་རེད་འདུག ང་ཚོ་འདིར་བསླེབས་ནས་ཉིན་ཤས་འགོར་ཡོད་པ་རེད་དེ་སྨན་པ་སུ་གཅིག་ལ་ཞུས་པ་དང་བཅར་དགོས་བྱུང་མ་སོང་། ཚང་མས་སྐུའི་འཕྲོད་བཞེས་སྐོར་ལ་ཐུགས་བློ་བདེ་པོར་བཞུགས་རོགས་ཞུ་རྒྱུ་ཡིན། ཞེས་བརྗོད་བྱུང་།
སྐུའི་བླ་སྨན་པ་ཚེ་བརྟན་རྡོ་རྗེ་ལགས་ཀྱི་བརྗོད་པ་ལྟར་ན། ཉེ་སྔོན་ནས་༧གོང་ས་རྒྱལ་བ་རིན་པོ་ཆེ་མཆོག་མཛད་འཕྲིན་རྒྱས་པོ་ཡིན་སྐབས་སྐུ་ངལ་གསོ་ཆེད་ཉིན་གཅིག་རེར་སྐུ་ངལ་གསོ་ཡི་ཡོད་པ་དང་། མཛད་འཕྲིན་སྐབས་བཞེས་ལག་སོགས་ཕྱི་ལོག་ནས་མཆོད་མ་དགོས་པ་གནང་བ། དེ་བཞིན་ཞོགས་པ་མཛད་འཆར་མང་པོ་སྒྲིག་ན་ཉིན་གུང་གི་སོལ་ཚིགས་ཕྱག་ཚོད་ ༡༡།༣༠ ཐོག་དུས་ལྟར་མཆོད་ཐུབ་ཀྱི་མེད་པས་ཞོགས་པའི་མཛད་འཆར་ཉུང་འཕྲི་ཞུས་ཡོད་འདུག
གནས་མཆོག་རྡོ་རྗེ་གདན་ནས་གསར་འགོད་པ་ཀླུ་མགོན་ཐར་གྱིས་སྤེལ།
