རྒྱ་ནག་ལ་དགོངས་སེལ་ཞུས། 

ཨི་ཊ་ལི་ཡི་དཔེ་གསར་གྱོན་གོས་བཟོ་ཚོང་ཁང་ཞིག་གིས་ཧོང་ཀོང་དང་མེ་ཁོ་གཉིས་རྒྱལ་ཁབ་ཀྱི་ངོ་བོར་ཇུས་འགོད་བྱས་པར་བརྟེན་རྒྱ་ནག་ནང་གི་གན་རྒྱ་རྩིས་མེད་བཏང་སྟེ་སྐྱོན་བརྗོད་བྱས་འདུག
ཨི་ཊ་ལིའི་དཔེ་གསར་གྱོན་གོས་བཟོ་ཚོང་ཁང་ཝིར་སཱ་ཆི་ (Versace) ཡིས་ཇུས་འགོད་བྱས་པའི་སྟོད་ཐུང་ཞིག་གི་ཐོག  ཧོང་ཀོང་དང་མེ་ཁོ་གཉིས་རྒྱ་ནག་ལས་ཐ་དད་པའི་རྒྱལ་ཁབ་ཅིག་ཏུ་བཟོས་ཡོད་པར་བརྟེན། རྒྱ་ནག་ཕྱོགས་ནས་བཟོ་ཚོང་ཁང་དེས་རྒྱ་ནག་གཅིག་གི་སྲིད་བྱུས་ལ་རྒྱབ་འགལ་བྱས་ཡོད་པའི་སྐྱོན་བརྗོད་ཤུགས་ཆེན་བྱས་པར་བརྟེན། ཁ་སང་ཕྱི་ཚེས་ ༡༡ ཉིན་དཔེ་གསར་གྱོན་གོས་བཟོ་ཚོང་ཁང་དེས་རྒྱ་ནག་ལ་དགོངས་སེལ་ཞུས་ཡོད་འདུག

འདས་པའི་བདུན་ཕྲག་གཅིག་རིང་རྒྱ་ནག་གི་ཝེ་པོ་ (Weibo) སྤྱི་ཚོགས་བརྒྱུད་ལམ་ཐོག ཧོང་ཀོང་དང་མེ་ཁོ་གཉིས་རྒྱ་ནག་ལས་ཐ་དད་ཀྱི་རྒྱལ་ཁབ་ཅིག་གི་ངོ་བོར་བཟོས་པའི་སྟོད་ཐུང་ཞིག་གི་པར་རིས་གང་སར་བཀྲམ་སྟེ། རྒྱ་ནག་གཅིག་གི་སྲིད་བྱུས་ལ་སྣང་མེད་དང་། རྒྱ་ནག་གི་མངའ་ཁོངས་ལ་གུས་བརྩི་བྱས་མེད་སྟབས། བཟོ་ཚོང་ཁང་དེའི་ཐོན་རྫས་རྣམས་རྒྱ་ནག་ནང་ཚོང་འདྲེན་བྱེད་པར་བཀག་འགོག་དགོས་པ་དང་། རྒྱ་རིགས་ཚོས་བཟོ་ཚོང་ཁང་དེའི་ཐོན་རྫས་རྣམས་ཉོ་མཚམས་འཇོག་དགོས་པ་སོགས་ཀྱི་བསམ་ཚུལ་མང་པོ་བྱུང་རྗེས། རྒྱ་ནག་ནང་གི་དཔེ་གསར་གྱོན་གོས་བཟོ་ཚོང་ཁང་དེའི་ཚབ་མཚོན་མི་སྣ་རྒྱ་ནག་གི་གཞས་མ་དང་གློག་བརྙན་འཁྲབ་སྟོན་མ་ཡཱང་མེ་ (Yang Mi) ཡི་ཚོང་གཉེར་ཁང་གིས་དཔེ་གསར་གྱོན་གོས་བཟོ་ཚོང་ཁང་ཝིར་སཱ་ཆི་དང་མཉམ་བཞག་པའི་གན་རྒྱ་རྩིས་མེད་བཏང་ཡོད་སྐོར་བསྒྲགས་འདུག

དཔེ་གསར་གྱོན་གོས་བཟོ་ཚོང་ཁང་དེའི་གཙོ་གཉེར་བ་ཌོ་ནཱ་ཊེ་ལཱ་ཝིར་སཱ་ཆི་ (Donatella Versace) ཡིས། སྒེར་གྱི་པར་མཛོད་ (Instagram) སྤྱི་ཚོགས་དྲ་ལམ་ཐོག སྤྱི་ཚོགས་དྲ་ལམ་ཁག་ཏུ་གླེང་སློང་བྱེད་བཞིན་པའི་ཉེ་ཆར་གྱི་སྟབས་མ་ལེགས་པའི་ངེད་བཟོ་ཚོང་ཁང་གི་ནོར་འཆུག་དེར་ངས་སེམས་གཏིང་ནས་དགོངས་སེལ་ཞུ་ཡི་ཡོད། རྒྱ་ནག་གི་མངའ་ཁོངས་ལ་གུས་བརྩི་མི་བྱེད་པའི་བསམ་བློ་ང་ལ་རྩ་བ་ཉིད་ནས་མེད་སྟབས། ང་སྒེར་ནས་ཡང་དག་མ་ཡིན་པའི་རྒྱ་ནག་གི་མངའ་ཁོངས་དང་དེས་ཕོག་ཐུག་བཟོས་པ་ཐམས་ཅད་ལ་དགོངས་དག་ཞུ་ཡི་ཡོད། ཅེས་བྲིས་འདུག

དེ་བཞིན་བཟོ་ཚོང་ཁང་དེས་གཞུང་འབྲེལ་ཐོག་དགོངས་སེལ་ཞུས་པའི་ནང་། སྟོད་ཐུང་དེ་ཕྱིར་འཚོང་མཚམས་བཞག་ཟིན་ཡོད་པ་དང་། བཟོ་ཚོང་ཁང་ནས་ཐོན་རྫས་དེའི་ཇུས་འགོད་ཐད་དགོངས་སེལ་ཞུ་ཡི་ཡོད་ལ། ཐོན་རྫས་དེ་འདི་ལོའི་ཕྱི་ཟླ་ ༧ པ་ནས་ཕྱིར་འཐེན་མགོ་བཙུགས་ཟིན་ཡོད་སྐོར་དང་། བཟོ་ཚོང་ཁང་ནས་ཉིན་རེའི་ལས་དོན་ཁྲོད་ཡར་རྒྱས་གཏོང་ཕྱོགས་ལ་འབད་ཀྱི་ཡོད་སྐོར་བཀོད་འདུགཝིར་སཱ་ཆི་ཡི་སྟོད་གོས་འགྲེམ་སྟོན་མ་དང་མཉམ་འབྲེལ་གན་རྒྱ་འཇོག་མཁན། རྒྱ་ནག་གི་གཞས་མ་དང་གློག་བརྙན་འཁྲབ་སྟོན་མ་ཡཱང་མེ་ (Yang Mi) ཡི་ཚོང་གཉེར་ཁང་གི་ཝེ་པོ་སྤྱི་ཚོགས་དྲ་ལམ་ཐོག ཁ་སང་ཕྱི་ཚེས་ ༡༡ ཉིན་ཡོངས་ཁྱབ་གསལ་བསྒྲགས་ཤིག་སྤེལ་བའི་ནང་། རྒྱ་ནག་གི་མངའ་ཁོངས་ཧྲིལ་པོ་དང་དེའི་བདག་དབང་ནི་རྩ་ཆེན་ཡིན་ལ། དུས་ནམ་ཡང་གས་ཆག་གཏོང་ཐབས་མེད་པ་ཞིག་ཡིན། རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་ཁོངས་གཏོགས་བཟོ་གྲྭ་ཞིག་དང་། ཡཱང་མེ་ནི་རྒྱ་ནག་གི་མི་སེར་ཞིག་ཡིན་པའི་ཆ་ནས་གནད་དོན་དེར་དགག་བྱ་ཧ་ཅང་ཆེན་པོ་ཡོད་ལ། རྒྱ་ནག་གཅིག་གི་སྲིད་བྱུས་རྒྱུན་སྐྱོང་བྱེད་པ་དང་རྒྱལ་ཡོངས་ཀྱི་ཆིག་སྒྲིལ་ལ་སྲུང་སྐྱོབ་བརྟན་པོ་བྱ་རྒྱུ་ནི་རྒྱ་ནག་གི་མི་སེར་ཡོངས་ཀྱི་འགན་འཁྲི་ཡིན་པ་རེད། ཅེས་བཀོད་འདུག

དཔེ་གསར་གྱོན་གོས་བཟོ་ཚོང་ཁང་ཝིར་སཱ་ཆི་ནི་ཕྱི་ལོ་ ༡༩༧༨ ལོར་ཨི་ཊ་ལིའི་གྱོན་གོས་ཇུས་འགོད་པ་ཇི་ཨ་ནི་ཝིར་སཱ་ཆི་ (Gianni Versace) ཞེས་པ་ཞིག་གིས་བཙུགས་ཤིང་། ད་ལྟའི་ཆར་འཛམ་གླིང་ཁྱོན་ཡོངས་ལ་སྡེབ་ཚོང་བྱེད་མཁན་ཁྱོན་ ༡༥༠༠ ཙམ་ཡོད་འདུག བཟོ་གྲྭ་དེས་རྒྱུ་ཆ་སྤུ་ཡིན་པའི་གྱོན་ཆས་ཀྱི་རིགས་དང་གོ་བའི་ཐོན་རྫས་སྣ་མང་བཟོ་ཚོང་བྱེད་ཀྱི་ཡོད་འདུག་ལ། ཉེ་སྔོན་རྒྱ་ནག་གི་གཞས་མ་དང་གློག་བརྙན་འཁྲབ་སྟོན་མ་ཡཱང་མེ་ (Yang Mi) ཡི་ཚོང་གཉེར་ཁང་དང་མཉམ་འབྲེལ་གན་རྒྱ་བཞག་སྟེ།  ཡཱང་མེ་ཡིས་དཔེ་གསར་ཐོན་རྫས་ཀྱི་འགྲེམ་སྟོན་པའི་ལས་ཀ་བྱས་ཡོད་པ་དང་། དེ་ནི་བཟོ་ཚོང་ཁང་དེས་རྒྱ་ནག་སྐམ་སར་ཡོད་པའི་རྒྱ་རིགས་ཤིག་ལ་འགྲེམ་སྟོན་མི་སྣའི་གན་རྒྱ་བཞག་པ་ཐོག་མ་དེ་ཆགས་ཡོད་འདུག

གསར་འགོད་པ། ཀླུ་མགོན་ཐར།