༧གོང་ས་རྒྱལ་བ་རིན་པོ་ཆེ་མཆོག་ནས་འདས་པའི་ཉིན་གྲངས་ ༢ རིང་ཉི་ཧོང་གི་རྫོང་ཁག་ ༡༡ ནང་མཚོ་རླུང་ཤུགས་ཆེན་གཡུགས་ཏེ་མི་གྲངས་ ༤༠ ལྷག་རྐྱེན་འདས་སུ་ཕྱིན་པར་ཐུགས་གསོའི་གསུང་འཕྲིན་བསྩལ་འདུག
དེ་རིང་རྒྱལ་སྤྱིའི་གསར་ལམ་ཁག་ཏུ་ཐོན་པའི་གནས་ཚུལ་ལྟར་ན། ཟླ་འདིའི་ཕྱི་ཚེས་ ༡༣ ཉིན་ནས་བསྟུན་མར་ཉིན་ ༢ རིང་ཉི་ཧོང་གི་རྒྱ་ས་ཊོག་ཡོག་གཙོའི་རྫོང་ཁག་ ༡༡ ནང་ཧཱ་ཇེ་བྷེ་སི་(Hagibis)མཚོ་རླུང་གཡུགས་ཏེ། མི་གྲངས་ ༤༠ ལྷག་རྐྱེན་འདས་དང་མི་ ༡༦ ལྷག་གར་སོང་ཆ་མེད་དུ་གྱུར་ཡོད་པ་དང་། དེ་རིང་ནས་མཚོ་རླུང་གཡུག་མཚམས་བཞག་ཡོད་ན་ཡང་། མཚོ་རླུང་རྐྱེན་གྱིས་གཙང་བོ་ཁག་རྒྱས་པ་དང་། འདམ་ཉིལ་དང་རི་ཉིལ་ཡོང་བ་སོགས་ཀྱི་འཇིགས་སྣང་ཆེན་པོ་ཡོང་གི་ཡོད་འདུག
དེ་རིང་༧གོང་ས་རྒྱལ་བ་རིན་པོ་ཆེ་མཆོག་ནས་སྲིད་བློན་ཤིན་ཛོ་ཨ་བྷེ་མཆོག་གི་མཚན་ཐོག་ཏུ་ཐུགས་གསོའི་གསུང་འཕྲིན་ཞིག་བསྩལ་བའི་ནང་། ངོས་ནས་ཧཱ་ཇེ་བྷེ་མཚོ་རླུང་ཁྲོད་ཚེ་སྲོག་ཤོར་བའི་འདས་པོ་རྣམས་ཀྱི་ཤུལ་ལུས་ནང་མི་ཚོར་གདུང་སེམས་མཉམ་སྐྱེད་ཞུ་བཞིན་ཡོད་ལ། སྲིད་བློན་མཆོག་དང་ཁོང་གིས་དབུ་འཁྲིད་པའི་གཞུང་ནས་རང་བྱུང་གནོད་སྐྱོན་གྱི་སྔ་རྗེས་སུ་དོན་ཕན་ལྡན་པའི་རོགས་རམ་གནང་བཞིན་པར་ཡི་རང་བསྔགས་བརྗོད་ཞུ་བཞིན་ཡོད་སྐོར་གསུངས་འདུག འདས་པའི་ལོ་མང་ནང་ཉི་ཧོང་དུ་ཆིབས་བསྒྱུར་ཐེངས་དུ་མར་བསྐྱངས་མྱོང་བ་དང་། ཡུལ་དེའི་མི་མང་གིས་མཛའ་བརྩེ་དང་ཐུགས་འཁུར་ཆེན་པོ་གནང་བ་ལ་བརྟེན་ནས་ཁོང་ཉིད་ནས་འགྲོ་བ་མིའི་རིགས་ཀྱི་རིན་ཐང་ལྟ་བ་དང་ཞི་བདེའི་བསམ་བློ་གོང་འཕེལ་དུ་གཏོང་བའི་མཛད་པར་ཐུགས་བསྐྱེད་བསྐྲུན་ཡོད་སྐོར་སོགས་གསུངས་འདུག
ཉི་ཧོང་སྲིད་བློན་ཤིན་ཛོ་ཨ་བྷེ་མཆོག་གིས་བློན་ཆེན་ཁག་དང་ཛ་དྲག་ཚོགས་འདུ་ཚོགས་ཏེ། གནོད་ཐེབས་ས་ཁུལ་ཁག་ཏུ་རྒྱལ་ཡོངས་རང་བཞིན་གྱི་གནོད་ཐེབས་མྱུར་སྐྱོབ་གཏོང་རྒྱུ་དང་། དམིགས་བསལ་མཚོ་རླུང་གིས་གནོད་སྐྱོན་ཤུགས་ཆེར་ཐེབས་པ་ཁག་ཛ་དྲག་ངང་སྐྱོབ་དགོས་པའི་བཀའ་བཏང་ཡོད་པ་མ་ཟད། གནོད་ཐེབས་ཁྲོད་འདས་གྲོངས་སུ་སོང་བའི་ནང་མི་གཉེན་འབྲེལ་ཡོངས་ལ་གདུང་སེམས་མཉམ་བསྐྱེད་དང་སེམས་གསོ་ཞུས་ཡོད་པ་དང་། ད་ལྟའི་ཆར་གཞུང་གི་དམག་མི་གྲངས་ ༣༡༠༠༠ ལྷག་དང་གནོད་སེལ་མྱུར་སྐྱོབ་ལས་མི་སོགས་ཁྱོན་མི་གྲངས་ ༡༠༠༠༠༠ ལྷག་གིས་གནོད་ཐེབས་ས་ཁུལ་ཁག་ཏུ་ཛ་དྲག་མྱུར་སྐྱོབ་དང་ཆུ་འདམ་གཙང་བཟོ་བྱེད་བཞིན་ཡོད་འདུག
ཉི་ཧོང་རྒྱལ་ཡོངས་བརྙན་འཕྲིན་ཁང་(NHK)གིས་སྤེལ་བའི་གནས་ཚུལ་ལྟར་ན། ད་དུང་ཉི་ཧོང་གི་རྫོང་ཁག་ ༦ ལྷག་གི་དུད་ཁྱིམ་ ༤༨༩༠༠ ལྷག་ལ་གློག་མཐུད་ཐུབ་མེད་པ་དང་། མི་གྲངས་ས་ཡ་ ༧ ལྷག་སྔར་བཞིན་སྡོད་གནས་མེད་པར་ས་ཆ་གཞན་དུ་གནས་སྤོར་གྱིས་འདུག་དགོས་བྱུང་ཡོད་པ་དང་། ཉི་ཧོང་མཚོ་རླུང་རྐྱེན་གྱིས་རི་ཉིལ་གྲངས་ ༤༨ བྱུང་ཡོད་པ་དང་། ད་ལྟ་མུ་མཐུད་ཆར་རླུང་དང་དྲག་ཆར་འབབ་རྒྱུའི་ཉེན་ཁ་ཡོད་པ་དང་། མཚོ་རླུང་བྱུང་བ་ནས་ཉི་ཧོང་རྒྱལ་ཡོངས་སུ་གནམ་གྲུ་ཐེངས་ ༡༦༠༠ ལྷག་འཕུར་མཚམས་བཞག་ཡོད་པ་ཡོད་སྐོར་སོགས་བརྗོད་འདུག
ཐེངས་འདིའི་རླུང་འཚུབ་དེ་ནི་ཉི་ཧོང་གི་འདས་པའི་ལོ་ངོ་ ༦༠ ལྷག་གི་ནང་རྒྱ་མཚོའི་རླུང་འཚུབ་ཆེ་ཤོས་ཤིག་ཆགས་ཡོད་པ་དང་། ཧཱ་ཇཱེ་བྷེ་སི་རླུང་འཚུབ་ནི་ཧ་ཅང་དྲག་ཤུགས་དང་མྱུར་མགྱོགས་ལྡན་པ་ཞིག་ཡིན་འདུག ཕྱི་ལོ་ ༢༠༡༡ ཟླ་ ༣ ཚེས་ ༡༡ ཉིན་ས་ཡོམ་ཚད་རིམ་ ༩ ཅན་ཞིག་བྱུང་བ་དང་། མཚོ་སྐྱོམ་རླུང་འཚུབ་ཁྲོད་མི་གྲངས་ཁྲི་ ༣ ལྷག་འདས་གྲོངས་སུ་ཕྱིན་ཞིང་། མི་གྲངས་ས་ཡ་མང་པོ་སྡོད་གནས་མེད་པར་གྱུར་བའི་གོད་ཆག་དེ་ནི་ཉི་ཧོང་གི་ལོ་རྒྱུས་ཁྲོད་ཀྱི་རང་བྱུང་གནོད་ཚབས་ཆེ་ཤོས་དེ་ཡིན་འདུག
གསར་འགོད་པ། སངས་རྒྱས་དཀོན་མཆོག
འཇིག་རྟེན་ཧྲིལ་པོ་འབྱུང་བཞིའི་འོག་ཏུ་གནས།
འབྱུང་བཞིར་ཁ་ལོ་བསྒྱུར་བའི་ཚན་རིག་མེད།
ཚན་རྩལ་རིག་པས་འཇིག་རྟེན་ཉེན་ཁར་བཅུག།
འབྱུང་བཞི་འཁྲུགས་པའི་རྩ་བ་ཚན་རྩལ་རིག།
ས་ཆུ་མེ་རླུང་འཁྲུགས་པའི་ཉེན་ཁའི་འོག།
འཇིག་རྟེན་སྐྱེ་འགྲོའི་ཚེ་སྲོག་སྐད་ཅིག་ཙམ།
སྣང་སྟོང་ཆོས་སྐུ་ཡིན་པ་ངོ་མ་ཤེས།
རང་སེམས་སངས་རྒྱས་ཡིན་པ་དོན་མ་རྟོགས།