ཨེ་འགོག་རང་འདུན་པར་ཨེ་ཙི་འགོས་མེད་པའི་ཡོངས་བསྒྲགས་གནང་།

བོད་ནང་གི་ཨེ་འགོག་རང་འདུན་པ་ཆོས་དཔལ་བཟང་པོ་ལགས་སུ་འདས་ལོར་ཨེ་ཙི་འགོས་ཡོད་སྲིད་པའི་གནས་ཚུལ་ཐོན་ཡོད་ཀྱང་ཟླ་གསུམ་ལྷག་རིང་གཙང་སེལ་འགོག་བཅོས་བྱས་པ་བརྒྱུད་ནད་དུག་འགོས་མེད་པ་གསལ་པོ་ཆགས་ཡོད་འདུག

འདས་ལོའི་ལོ་མཇུག་ཏུ་བོད་ནང་གི་ཨེ་འགོག་རང་འདུན་པ་གྲགས་ཅན་ཆོས་དཔལ་བཟང་པོ་ལགས་སུ་གཉན་ནད་རེག་དུག་གམ་ཨེ་ཙི་འགོས་ཡོད་སྲིད་པའི་གནས་ཚུལ་ཁོ་རང་གི་སྤྱི་ཚོགས་དྲ་ལམ་དུ་སྤེལ་རྗེས། བོད་ནང་དོ་སྣང་དང་གླེང་སློང་བྱེད་མཁན་མང་པོ་བྱུང་ཡོད་ཀྱང་། ཁ་སང་ཕྱི་ཚེས་ ༢༦ ཉིན། ཆོས་དཔལ་བཟང་བོ་ལགས་ཀྱིས་སྒེར་གྱི་ཝེ་པོ་སྤྱི་ཚོགས་དྲ་ལམ་དུ། ཁོང་གིས་བརྟག་དཔྱད་དང་གཙང་སེལ་རིམ་པར་བྱས་ཏེ། ཟླ་གསུམ་དང་ཟླ་ཕྱེད་རྗེས་ནས་བསྐྱར་དུ་བརྟག་དཔྱད་བྱས་པར་ཨེ་ཙི་ན་ཚ་འགོས་མེད་པའི་གྲུབ་འབྲས་ཐོན་ཡོད་སྐོར་ཡོངས་བསྒྲགས་གནང་འདུག

ཁོང་གིས་འགྲེལ་བརྗོད་གནང་བ་ལྟར་ན། སྔར་ལོའི་ཕྱི་ཟླ་ ༡༢ ཚེས་ ༡༠ ཉིན་གྱི་ཕྱི་དྲོར་བོད་ཀྱི་རྒྱལ་ས་ལྷ་ས་ནས་ཡིན་པའི་ཨེ་ཙིའི་ནད་པ་བུད་མེད་ཅིག་ལ་རོགས་རམ་བྱེད་སྐབས། ནད་པའི་ཁྲག་འགོས་ཡོད་པའི་འགྱིག་སྦུག་ཅིག་ཚུར་བསྡུ་སྐབས།  འགྱིག་སྦུག་གིས་ཁོའི་ལག་གཡོན་པར་རྨ་ཁ་བཟོས་ཏེ་ཁྲག་ཅུང་ཙམ་ཐོན་ཡོད་སྟབས། ཆུ་ཚོད་ ༣ ཙམ་གྱི་རྗེས་ནས་གཙང་སེལ་དང་བརྟག་དཔྱད་བྱས་པ་མ་ཟད། ཉིན་གྲངས་ ༢༨ རིང་སྨན་ཟ་དགོས་བྱུང་ཡོད་འདུག

ཆོས་དཔལ་བཟང་པོ་ལགས་ཀྱི་གསལ་བསྒྲགས་དེའི་ནང་། སྤྱིར་མི་ཞིག་ལ་ཨེ་ཙི་འགོས་མེད་པ་དེ་ཧ་ལས་དགོས་པ་ཞིག་ཅི་ཡང་མིན་པར་མ་ཟད། འགོས་མི་འདུག་ཅེས་ངོམས་སོ་དང་བཅས་ཏེ་བཤད་པ་འདི་འོས་ཤིང་འཚམ་པ་ཞིག་ཅི་ཡང་མིན་རུང་། ནམ་རྒྱུན་ཁོ་བོ་ནི་ལས་དབང་ལ་ཁག་དཀྲི་བྱེད་པར་རབ་ཏུ་ནས་མི་དགའ་བའི་མི་ཞིག་ཡིན་རུང་། ཉིན་དེར་ངོ་མ་གློ་བུར་དུ་ལས་དབང་ལ་ཡིད་ཆེས་པ་འདྲ་བ་ཞིག་བྱུང་སོང་། རྒྱུ་མཚན་ནི་རང་གི་ལག་གཡས་པ་འཁྱལ་ཏེ་གཡོན་པར་བརྒྱབས་སོང་ཞེས་བཤད་ན། མི་གཞན་པ་ཞིག་ལྟ་ཅི། ཐ་ན་ང་རང་ཉིད་ཀྱང་ཡིད་མི་ཆེས་པ་འདྲ་བོ་འདུག་མོད། དེ་འདྲའི་སྟེས་དབང་མཚར་བོ་ཞིག་བྱུང་བར་བལྟས་ན། ང་ལ་ནད་དེ་འགོ་དགོས་ཀྱི་འདུག་སྙམ་པའི་བསམ་བློ་མཚར་པོ་ཞིག་བཅོས་མིན་དུ་སྐྱེས་བྱུང་བས། ཐོག་མའི་སྐབས་སུ་དུག་སེལ་ཡག་པོ་ཞིག་ཀྱང་མ་བྱས་ལ། མྱུར་སྐྱོབ་ཀྱི་སྨན་ཡང་བསྟེན་པའི་འཆར་གཞི་མ་བཞག་སྐོར་དང་། མ་གཞི་གསེར་ལས་ལྷག་པའི་མྱུར་སྐྱོབ་ཀྱི་དུས་སྐབས་ནི་ཁྲག་རྣག་ཆུ་སེར་སོགས་རྨ་ཁ་དང་འབྲེལ་བ་བྱུང་ནས་ཆུ་ཚོད ༢ མ་སོང་བའི་སྔོན་ཡིན་པ་དང་། ཐོག་མའི་སྐབས་སུ་ང་རང་གིས་ཨ་འགྱང་ཕྱི་འགྱང་བྱས་བསྡད་པས། ཕལ་ཆེར་ཆུ་ཚོད ༣ ཙམ་གྱི་རྗེས་ནས་མྱུར་སྐྱོབ་ཀྱི་དུག་གནོན་སྨན་བཅོས་ཐུབ་པ་བྱུང་། ཡིན་ན་ཡང་། ཆུ་ཚོད ༢༤ མ་སོང་བའི་སྔོན་ནས་མྱུར་སྐྱོབ་ཐུབ་པ་ནི་གསེར་དང་འདྲ་བའི་མྱུར་སྐྱོབ་ཀྱི་དུས་སྐབས་ཟེར་གྱི་ཡོད་སྟབས། ཁོ་བོ་ཁྲིན་ཏུའུ་རུ་ཡོད་པས་སི་ཁྲོན་ཞིང་ཆེན་གྱི་རིམས་ནད་སྨན་ཁང་དང་ཐག་རིང་བོ་མེད་པས། ཁྲག་འབྲེལ་བྱུང་ནས་ཆུ་ཚོད ༣ ཙམ་འགོར་བའི་རྗེས་སུ་ཨེ་ཛིའི་དུག་གནོན་སྨན་བཅོས་ཀྱི་མགོ་བརྩམས་པ་ཡིན། དུག་གནོན་སྨན་རྫས་དེ་ལ་རིགས་གཉིས་ཡོད་པ་དང་གཅིག་ནི་ཕྱིའི་རྒྱལ་ཁབ་ནས་ནང་འདྲེན་གྱི་སྨན་ཞིག་ཡིན་པས།  སྨན་དེར་རྒྱ་སྒོར་ ༤༠༠༠ ཙམ་དགོས་པ་དང་གཞན་གཅིག་ནི་རྒྱལ་ནང་གི་འདྲ་བཟོའི་སྨན་རྫས་ཤིག་ཡིན་པས། དེ་ལ་སྒོར ༢༠༠༠ ལྷག་ལས་དགོས་ཀྱི་མི་འདུག ཞོར་སྐྱོན་གྱི་ཐད་ནས་འདྲ་བོ་མེད་ཀྱང་སྨན་ནུས་ཀྱི་ཐད་ནས་ནུས་པ་ཕལ་ཆེར་གཅིག་མཚུངས་ཡིན་པར་ཐོས་པས། སྒོར་མོར་ཤ་ཚ་སྟེ་མཐར་སྒོར་ ༢༢༠༦།༠༦ སྤྲད་ནས་སྨན་ཐུན་རིམ་པ་གཉིས་པར་གཏོགས་པའི་ཁྲི་ལེས་ཀྲི་ཟེར་བ་དང་། ཐེས་ནོ་ཧྥུ་བེར། ཨིན་ཆེས་ཐ་ཕིན་ཟེར་བ་གསུམ་གྱི་སྦྱོར་སྡེ་དེ་བསྟེན་པ་ཡིན། ཞེས་བརྗོད་འདུག

དེ་བཞིན་ཨེ་ནད་བརྟག་འབྲས་དེ་དྲ་ཐོག་ལ་འཇོག་དགོས་དོན་སྐོར་ལ་ཁོང་གིས། ངས་ནི་ཨེ་ཙི་ཟེར་བ་དེ་ནམ་ཡང་ངོ་ཚ་ཞིག་ལ་གཏན་ནས་བརྩིས་མེད་པར་མ་ཟད། གལ་ཏེ། རང་ཉིད་ལ་འགོ་དགོས་བྱུང་ན། འདི་ལྟར་འགོས་པ་ནི་རང་གི་མི་ཚེའི་གཟི་བརྗིད་ཅིག་རེད་སྙམ་བཞིན་ཡོད་ལ། གཙོ་བོ་ནི་ཧྲེ་གྱའི་དྲི་མེད་དང་འཇོ་མདའ་དཔལ་འབྱོར་ལ་སོགས་པའི་ནད་དུག་ཅན་དང་ནད་པ་དག་ལ་ནི་ངས་མངོན་དུ་འབུད་པའི་རྒྱབ་སྐྱོར་དང་སྐུལ་མ་བྱས་ཡོད་པས། ང་རང་ཉིད་ལ་ན་ཚ་འདི་ཡོད་ཅིང་བསམ་གཟས་ནས་གཞན་ལ་མ་བཤད་ན་དེ་ནི་རྒྱུ་འབྲས་མེད་པའི་ལས་ཀ་ཞིག་རེད་སྙམ་པས། ཕྱི་ལོ ༢༠༡༩ ཟླ་ ༡༢ པའི་ཚེས་ ༡༠ ཉིན་གྱི་དགོང་མོ་སྟེ། ནད་པ་དེ་དང་ཁྲག་འབྲེལ་བྱུང་བའི་དགོང་མོ་ནས་གནས་ཚུལ་དེ་ཅི་མ་ཇི་བཞིན་པོད་ཕྲན་གྱི་སྟེང་དུ་བཀོད་པ་ཡིན་ལ། གལ་ཏེ་མ་འོངས་པར་ནད་འགོས་སོང་ན། ངེས་པར་དུ་དྲང་བདེན་གྱིས་ཡོད་ཚད་ལ་གདོང་ཕྱོགས་པའི་དམ་བཅའ་ཡང་བཅས་ཡོད། ཅེས་བརྗོད་འདུག

མཇུག་ཏུ་ཐེངས་འདིའི་གནས་ཚུལ་འདི་བརྒྱུད་ཨེ་ནད་སྐོར་ལ་ཤེས་རྟོགས་ག་རེ་བྱུང་ཡོད་མེད་སྐོར་ལ་ཁོང་གིས། ཐེངས་འདིའི་གནས་ཚུལ་དང་བསྟུན། ཨེ་ཙི་ནད་དུག་ཅན་དང་ནད་པའི་དཀའ་ཁག་ལ་དེ་ལས་ཟབ་པའི་རྒྱུས་ལོན་བྱུང་བ་དང་། དུག་གནོན་སྨན་བཅོས་ཀྱི་གོ་རིམ་དང་ཞོར་སྐྱོན་གྱི་དཀའ་ཁག ཞོར་སྐྱོན་དེ་དག་སེལ་ཐབས་སོགས་ལ་རང་བཞིན་གྱིས་ནད་དུག་འགོས་མེད་པའི་རང་འདུན་པ་ཞིག་གིས་མི་ཚེ་གཅིག་ལ་སྦྱངས་མི་ཐུབ་པའི་སེམས་ཚོར་དང་ཉམས་མྱོང་ཐོབ་པས། འདི་ནི་ལས་དབང་གིས་ང་ལ་བསྩལ་བའི་ཆེས་རིན་ཐང་བྲལ་བའི་ལེགས་སྐྱེས་ཤིག་ཏུ་འདོད་ཡོད་ལ། མ་འོངས་པར་རང་ལུས་རིན་པོ་ཆེར་དེ་ལས་གཅེས་འཛིན་བྱེད་པའི་ཞོར་ནས། ཅི་ནུས་ཀྱིས་མི་ལུས་འདི་རིན་ཐང་ལྡན་པ་ཞིག་དང་།མི་ཚེ་འདི་དོན་སྙིང་ལྡན་པ་ཞིག་ཏུ་བསྒྱུར་ཅི་ཐུབ་བྱ་རྒྱུ་ཡིན་ཞེས་དམ་བཅས་པ་ཡིན། ཞེས་བརྗོད་འདུག

གསར་འགོད་པ། སངས་རྒྱས་དཀོན་མཆོག