ཏོག་དབྱིབས་ནད་ཡམས་ཀྱིས་རྐྱེན་བྱས་ཏེ་བོད་ཀྱི་མཛངས་མའི་འགྲན་སྡུར་ཐེངས་བཅོ་བརྒྱད་པ་འཚོགས་རྒྱུ་མིན་པའི་གསལ་བསྒྲགས་སྤེལ་འདུག
བོད་ཀྱི་མཛངས་མ་འགྲན་སྡུར་གོ་སྒྲིག་པ་བློ་བཟང་དབང་རྒྱལ་ལགས་ཀྱིས་འདི་གའི་གསར་འགོད་པར། ད་ལྟ་འཛམ་བུ་གླིང་ཡོངས་ཏོག་དབྱིབས་ནད་ཡམས་ཀྱི་དཀའ་ངལ་ནང་ཚུད་དེ་དཀའ་ངལ་འཕྲད་བཞིན་པའི་རྒྱུ་མཚན་ལ་བརྟེན་བོད་ཀྱི་མཛངས་མའི་འགྲན་སྡུར་དེ་འཚོགས་པའི་གནས་སྟངས་མེད་སྐོར་དང་། སྤྱིར་གནད་དོན་དབྱེ་ཞིབ་པས་ད་ལྟའི་ནད་ཡམས་ཀྱི་གནས་སྟངས་དེ་ཛ་དྲག་ཆེ་རུ་འགྲོ་བ་ལས་ཆུང་དུ་འགྲོ་བའི་ཚོད་དཔག་བྱེད་ཀྱི་མེད་པ། དེ་བཞིན་ཉི་ཧོང་གི་ཨོ་ལམ་ཕིག་ལུས་རྩལ་འགྲན་ཚོགས་ཆེན་མོ་ཡང་ཕྱིར་འགྱངས་བྱས་ཏེ་ལོ་རྗེས་མའི་ཕྱི་ཟླ་ ༧ ནང་འཚོག་གཏན་འཁེལ་བ་སོགས་ལ་བལྟས་ཚེ། འདི་ལོའི་བོད་ཀྱི་མཛངས་མའི་འགྲན་སྡུར་དེའང་ཟླ་ཤས་ནང་དུ་འཚོགས་ཐུབ་ཐབས་མེད་པ་ཚོད་དཔག་ཐུབ་པ་ཞིག་ཡིན་པས་བོད་ཀྱི་མཛངས་མའི་འགྲན་སྡུར་ཐེངས་བཅོ་བརྒྱད་པ་དེ་འཚོགས་རྒྱུ་མིན་སྐོར་བརྗོད་བྱུང་།
ཕྱི་ལོ་ ༢༠༢༠ ལོའི་བོད་ཀྱི་མཛངས་མའི་འགྲན་སྡུར་ནང་འཛུལ་ཞུགས་པ་གྲངས་ག་ཚོད་བྱུང་ཡོད་མེད་དྲིས་པར་ཁོང་གིས། དེ་རིང་ཕྱི་ཚེས་ ༣༡ ཉིན་གྱི་ཨ་རིའི་དགུང་མོའི་ཆུ་ཚོད་ ༡༢ ཐོག་འཛུལ་ཞུགས་པའི་ཐོ་འགོད་ཀྱི་དུས་ཚོད་རྫོགས་ཀྱི་ཡོད་པ་རེད། མཚམས་རེར་སྙན་ཞུ་འབུལ་མཁན་ཉུང་ངུ་ལས་མེད་པས་དུས་ཚོད་འཕར་འགྱངས་བྱེད་ཀྱི་ཡོད་པ་རེད། གང་ལྟར་ཁ་སང་ནས་འགྲན་ཞུགས་བྱ་རྒྱུ་ཡིན་ལབ་མཁན་ཁ་ཤས་ཤིག་བྱུང་སོང་། ཁ་ཤས་ལ་ད་ལོ་འཚོག་ཐུབ་ཐབས་མི་འདུག་ཅེས་གསལ་བསྒྲགས་མ་བཏང་སྔོན་ནས་ལབ་པ་ཡིན། ཏག་ཏག་ག་ཚོད་ཅིག་བྱུང་མིན་ང་ཚོས་ལབ་ཐུབ་ཀྱི་མ་རེད། ཅེས་བརྗོད་བྱུང་།
བོད་ཀྱི་མཛངས་མའི་འགྲན་སྡུར་དེ་ཕྱི་ལོ་ ༢༠༠༢ ལོར་ཐོག་མར་མགོ་འཛུགས་བྱས་ཡོད་པ་དང་། ད་བར་ཁྱོན་བོད་ཀྱི་མཛངས་མ་ ༡༦ བདམས་ཐོན་བྱུང་ཡོད་པ་དང་། དེའི་ནང་ནས་བུད་མེད་ཁག་ཅིག་རྒྱལ་སྤྱིའི་སྡིངས་ཆ་གང་འཚམ་ཞིག་ནང་མཉམ་ཞུགས་བྱེད་པའི་གོ་སྐབས་རག་ཡོད་པ་མ་ཟད། བོད་ཀྱི་མཛངས་མའི་མིང་ཐོག་ནས་བོད་དོན་དྲིལ་བསྒྲགས་སོགས་ཀྱང་བྱས་ཡོད་པར་བརྟེན། རྒྱ་ནག་གཞུང་གིས་བོད་ཀྱི་མཛངས་མ་དང་རྒྱལ་སྤྱིའི་མཛངས་མའི་འགྲན་སྡུར་གོ་སྒྲིག་པ་སོགས་ལ་གནོན་ཤུགས་སྤྲད་པའི་གནས་ཚུལ་ཡང་བྱུང་ཡོད་པ་རེད། ཕྱི་ལོ་ ༢༠༡༩ ལོའི་བོད་ཀྱི་མཛངས་མ་འགྲན་སྡུར་ནང་འགྲན་ཞུགས་པ་གཅིག་ཀྱང་བྱུང་མེད་སྟབས་སྐབས་དེའི་འགྲན་སྡུར་ཕྱིར་བསྡུ་བྱེད་དགོས་བྱུང་ཡོད་པ་རེད།
གསར་འགོད་པ། ཀླུ་མགོན་ཐར།
