ཞི་ཅིན་ཕིན་གཞུང་གིས་ཏོག་དབྱིབས་ནད་ཡམས་འགོས་ཁྱབ་སྦེད་གསང་བྱས་ཏེ་ད་ཆ་འཛམ་གླིང་ཡུལ་ལུང་མང་པོའི་ནང་ཁྱབ་སྟེ་མི་གྲངས་འབུམ་བརྒྱད་ལྷག་ལ་ཚེ་སྲོག་གི་ཉེན་ཁ་བཟོས་ཡོད་པས་ཁྲིམས་གཏུགས་བྱས་འདུག
དེ་རིང་ཕྱི་ཟླ་ ༤ ཚེས་ ༡ ཉིན། རྒྱ་གར་གྱི་དཔལ་འབྱོར་དུས་བབ་གསར་དང་(The Quint)གསར་ཁང་སོགས་ཀྱིས་སྤེལ་བའི་གནས་ཚུལ་ལྟར་ན། རྒྱ་གར་བྱང་ཕྱོགས་ཨོ་ཊར(Uttar Pradesh)མངའ་སྡེའི་ལཱ་ཁེམ་པོར(Lakhimpur)གྲོང་ཁྱེར་གྱི་ཁྲིམས་རྩོད་པ་དང་སྤྱི་ཚོགས་ལས་འགུལ་བ་ ༤༠ ལྷག་མཉམ་འབྲེལ་གྱིས། མངའ་སྡེ་དེའི་ས་གནས་ཁྲིམས་ཁང་ལ་རྒྱ་ནག་གི་མཐོ་རིམ་མགོ་འཁྲིད་ཚོས་ཏོག་དབྱིབས་ནད ཡམས་སྐོར་གྱི་གནས་ཚུལ་སྦས་གསང་བྱས་ཏེ། འཛམ་གླིང་ཡོངས་སུ་ཁྱབ་ཏུ་བཅུག་པ་དང་མི་གྲངས་ས་ཡ་མང་པོའི་ཚེ་སྲོག་ཉེན་ཁར་ལྷུང་ཡོད་པའི་ནག་ཉེས་འོག་རྒྱ་ནག་གི་མགོ་འཁྲིད་ཞི་ཅིན་ཕིན་ཁྲིམས་གཏུགས་བྱས་ཡོད་འདུག
གནས་ཚུལ་དེའི་ཐད་ཡུལ་དེའི་ས་གནས་མཐོ་རིམ་ཉེན་རྟོག་པ་ཞིག་གིས། ད་ལྟའི་ཆར་ང་ཚོས་ཁྲིམས་གཏུགས་ཉན་ཞིབ་ཀྱི་རིམ་པ་མ་སོང་སྔོན་ལ་གནད་དོན་དེའི་ཐད་ཁྲིམས་ལུགས་ཀྱི་དགོངས་ཚུལ་བསྡུ་ལེན་བྱེད་བཞིན་ཡོད་ལ། གནད་དོན་དེ་རྒྱལ་སྤྱིའི་རང་བཞིན་གྱི་དཀའ་ངལ་ཁྲིམས་གཏུགས་ཤིག་ཆགས་ཡོད་སྟབས། ཕྱོགས་ཡོངས་ཀྱི་གནས་ཚུལ་ཤེས་རྟོགས་མ་ཡོང་བར་ཁྲིམས་གཏུགས་ཉན་ཞིབ་འགྲོ་ཐུབ་ཀྱི་མེད་སྐོར་བརྗོད་འདུག
ཁྲིམས་གཏུགས་བྱེད་མཁན་ཚོའི་གྱོད་གཞི་གཙོ་བོ་རྒྱ་ནག་གཞུང་གིས་ཏོག་དབྱིབས་ནད་ཡམས་ཐོག་མར་ཝུ་ཧན་ནས་མཆེད་སྐབས། རྒྱ་ནག་ནང་གི་ཛ་དྲག་པའི་གནས་ཚུལ་སྦ་གསང་བྱས་པ་དང་། ད་ལྟའི་ཆར་འཛམ་གླིང་ཡུལ་ལུང་གང་སར་ཁྱབ་བརྡལ་ཕྱིན་སྟེ་མི་གྲངས་ ༤༠༠༠༠ ལ་ཉེ་བའི་ཚེ་སྲོག་ཤོར་བ་དང་། མི་གྲངས་འབུམ་ ༩ ལ་ཉེ་བར་ནད་ཡམས་བྱུང་ཡོད་པ་དང་། རྒྱ་ནག་གཞུང་གིས་ནད་ཡམས་དེ་ཐོག་མ་ནས་ཕྱི་གསལ་ནང་གསལ་མ་བྱས་རྐྱེན་ད་ལྟའི་ཆར་མི་གྲངས་ས་ཡ་མང་པོའི་ཚེ་སྲོག་ཉེན་ཁའི་གནས་སུ་ལྷུང་ཡོད་པ་སོགས་ཀྱི་ནག་ཉེས་བཙུགས་ཡོད་འདུག
ཏོག་དབྱིབས་ནད་ཡམས་འཛམ་གླིང་ཁྱོན་ཡོངས་སུ་སྤང་ལ་མེ་མཆེད་པ་ལྟར་ཤུགས་ཆེ་རུ་འགྲོ་བཞིན་ཡོད་པ་དང་བསྟུན། རྒྱལ་སྤྱིའི་སྟེང་རྒྱ་ནག་གཞུང་དང་རྒྱ་ནག་གི་མགོ་འཁྲིད་ཚོ་ཁྲིམས་གཏུགས་བྱེད་མཁན་ཇེ་མང་དུ་འགྲོ་བཞིན་ཡོད་པ་དང་། ཉེ་སྔོན་ཕྱི་ཟླ་ ༣་ཚེས་ ༡༦ ཉིན་རྒྱ་གར་གྱི་ཤར་ཕྱོགས་བྷི་ཧར་མངའ་སྡེའི་ཁྲིམས་རྩོད་པ་སུ་དྷིར་ཀུ་མཱར་ཨོ་ཇ་(Sudhir Kumar Ojha)ཞེས་པ་ཞིག་གིས། རྒྱ་ནག་གི་སྲིད་འཛིན་ཞི་ཅིན་ཕིན་དང་། རྒྱ་གར་དུ་ཡོད་པའི་རྒྱ་ནག་གི་གཞུང་ཚབ་པ་སིན་ཝེ་ཏུང་གཉིས་ཁྲིམས་གཏུགས་བྱས་ཡོད་པ་དང་། ཕྱི་ཟླ་ ༣ ཚེས་ ༡༧ ཉིན་ཨ་རིའི་ཧྥི་ལོ་རེ་དྷ་མངའ་སྡེའི་བྷོ་ཁཱ་རཱ་ཊོན་(Boca Raton)བྷིར་མན་ཁྲིམས་ལུགས་ཚོགས་(Berman Law Group)པས། རྒྱ་ནག་གཞུང་གིས་ཏོག་དབྱིབས་ཐད་གུན་གསབ་སྤྲོད་དགོས་པའི་དགོས་འདུན་འོག་ཁྲིམས་གཏུགས་བྱས་ཡོད་པ་རེད།
གཞན་ཡང་ཕྱི་ཟླ་ ༣ ཚེས་ ༢༤ ཉིན་ཨ་རིའི་ཁྲིམས་རྩོད་པ་ལེ་རེ་ཁལ་མན་ལགས་ཀྱིས་གཙོ་གཉེར་བྱེད་བཞིན་པའི་རང་དབང་ལྟ་ཞིབ་ཚོགས་པ་དང་། ཊག་སཱ་སིའི་ནང་རྟེན་གཞི་བྱས་པའི་(Buzz Photos)ཞེས་པའི་པར་རིས་གསར་ཁང་གཉིས་ཀྱིས། ཏོག་དབྱིབས་ནད་ཡམས་དང་འབྲེལ་རྒྱ་ནག་གཞུང་དང་རྒྱ་ནག་གི་དམག་མི། དེ་བཞིན། ཝུ་ཧན་ནང་གི་རྒྱ་ནག་གི་ཆེས་མཐོའི་ནད་ཡམས་རིག་པ་ཞིབ་འཇུག་ལྟེ་གནས་ཁང་དང་དེའི་འགན་འཛིན་ཧྲི་ཀྲན་ལི། རྒྱ་ནག་གི་སྤྱི་ཁྱབ་དམག་དཔོན་ཁྲིན་ཝི་(Chen Wei)བཅས་ལ་ཏོག་དབྱིབས་ནད་ཡམས་ཁྱབ་སྤེལ་བཏང་བའི་ནག་ཉེས་འོག་ཨ་རིའི་གཞུང་ལ་ཁྲིམས་གཏུག་བྱས་ཡོད་པ་དང་། རྒྱ་གར་(The Quint)གསར་ཁང་གིས་སྤེལ་བའི་གནས་ཚུལ་ནང་ད་ལྟའི་ཆར་བལ་ཡུལ་གྱི་མི་སེར་རྒྱ་གར་ནང་སྐྱབས་བཅོལ་ཡོད་མཁན་མང་པོས་རྒྱ་ནག་གཞུང་གིས་ཏོག་དབྱིབས་ནད་ཡམས་གང་སར་ཁྱབ་སྤེལ་བཏང་བའི་ནག་ཉེས་བཙུགས་ཏེ་ཁྲིམས་གཏུགས་བྱེད་བཞིན་ཡོད་སྐོར་སོགས་བརྗོད་འདུག
རྒྱལ་སྤྱིའི་སྟེང་རྒྱ་ནག་གཞུང་དང་རྒྱ་ནག་གི་མགོ་འཁྲིད་ཚོ་ཁྲིམས་གཏུག་བྱེད་བཞིན་པའི་གནས་ཚུལ་ཐད། ད་ལྟའི་ཆར་རྒྱ་ནག་གཞུང་ཕྱོགས་ནས་རྒོལ་ལན་གྱི་སྐད་ཆ་གང་ཡང་བཤད་མེད་ན་ཡང་། རྒྱལ་སྤྱིའི་གནད་དོན་དབྱེ་ཞིབ་པ་དང་ཁྲིམས་ལུགས་རིག་པ་བ་མང་པོས་རྒྱལ་སྤྱིའི་སྟེང་རྒྱ་ནག་གཞུང་དང་རྒྱ་ནག་གི་མགོ་འཁྲིད་ཚོ་ཁྲིམས་གཏུགས་བྱེད་བཞིན་པར་དངོས་སུ་གྲུབ་འབྲས་ཐོན་མི་སྲིད་ན་ཡང་། རྒྱལ་སྤྱིའི་སྟེང་རྒྱ་ནག་གི་སྣང་བརྙན་དང་འབྲེལ་ལམ་སོགས་ཀྱི་ཐད་ནས་རྒྱ་ནག་ལ་གནོད་པ་ཆེན་པོ་ཐེབས་རྒྱུ་ཡིན་སྐོར་བརྗོད་བཞིན་འདུག
གསར་འགོད་པ། སངས་རྒྱས་དཀོན་མཆོག
བོད་དེ་ རྒྱ་ཡིས་ཆ་ཤས་ རྒྱ་ཡིས་ཆ་ཤས་ སྤྲེལ་ལད་ཆེ་དྲག་ན་ ཡོང་རྒྱུ་འདི་ བ། ད་ ཁྲིམས་གཏུགས།