ཁ་སང་ཕྱི་ཚེས ༢ ཉིན་རྒྱ་ནག་ཧྲན་ཏུང་ཞིང་ཆེན་ཆན་ཧྥོ་ཧྲན་སྨན་ཁང་གིས་འབྲོག་པ་རྒད་པོ་མགོ་ནང་དུ་གྲི་ཆག་ལྷག་ནས་ལོ་ངོ་ ༢༦ ཙམ་འགྲོ་བཞིན་པ་དེར་གཤག་བཅོས་བྱས་ནས་ལེགས་འགྲུབ་བྱུང་ཡོད་འདུག
དེ་འབྲེལ་གནས་ཚུལ་ནང་རྒད་པོའི་མགོ་ནང་ལ་གྲི་ཆག་ལྷག་ཡོད་པའི་གསར་འགྱུར་སྤེལ་རྗེས། མཚོ་བྱང་ཁུལ་མི་དམངས་སྨན་ཁང་དང་མཚོ་སྔོན་གྱི་རོགས་སྐྱོར་ཆེད་མཁས་སྨན་པ་ཀྲང་ཧྲུའུ་ཞང་དང་། མཚོ་བྱང་ཁུལ་བོད་སྨན་ཁང་གི་མགོ་གཙོ་གཞོན་པ་སྟག་ལྷ་གཉིས་ཀྱི་རོགས་རམ་འོག ཧྲན་ཏུང་ཞིང་ཆེན་ཆན་ཧྥོ་ཧྲན་སྨན་ཁང་དང་འབྲེལ་བ་བྱས་ཏེ་གཤག་བཅོས་བྱས་ཡོད་སྐོར་བརྗོད་འདུག་ལ། ཉིན་ཤས་རིང་རྨ་ཁ་གསོས་ནས་སྨན་བཅོས་བྱེད་དགོས་སྐོར་བརྗོད་འདུག
མཚོ་བྱང་ཁུལ་བོད་སྨན་ཁང་གི་སྨན་པ་སྟག་ལྷ་ལགས་ཀྱིས། ཆན་ཧྥོ་སྨན་ཁང་གིས་ཕྱི་ཚེས་ ༢ ཉིན་གྱི་སྔ་དྲོའི་ཆུ་ཚོད་ ༩ ནས་གཤག་བཅོས་མགོ་འཛུགས་བྱས་ཏེ། ཆུ་ཚོད་ ༡ ལྷག་ལ་གཤག་བཅོས་བྱས་པ་བརྒྱུད་མགོ་ནང་གི་གྲི་བདེ་ལེགས་ངང་ལེན་ཐུབ་ཡོད་པ་དང་། ད་ལྟའི་ཆར་རྒད་པོའི་མགོ་ཡི་རྨ་ཁ་ཅུང་ཆེན་པོ་ཡིན་ན་ཡང་། གཤག་བཅོས་ལེགས་གྲུབ་ཆེན་པོ་བྱུང་ཡོད་པས། ནད་གཞི་བདེ་འཇགས་ཡིན་པ་མ་ཟད་རྣམ་རིག་གསལ་ཞིང་སེམས་ཁམས་དྭངས་ཡོད་སྐོར་བརྗོད་འདུག
ཕྱི་ལོ་ ༡༩༩༤ ལོར་འཕྲོག་བཅོམ་བྱེད་མཁན་ཞིག་གིས་རྒད་པོ་རྡོ་རྗེ་ཡི་མགོ་ལ་གྲིས་བསྣུན་སྐབས་གྲི་ཆག་སྟེ་མགོ་ནང་དུ་ལྷག་ཡོད་པ་དང་། དོན་རྐྱེན་དེ་བྱུང་རྗེས་འདས་པའི་ལོ་ངོ་ ༢༦ རིང་ཕྱིར་འདོན་ཐུབ་མེད་པ་དང་། ཕྱི་ལོ་ ༢༠༡༢ ལོར་མགོ་ལ་སྐྲང་འབུར་ཆེན་པོ་ཞིག་ཐོན་པས་སྨན་ཁང་དུ་བརྟག་དཔྱད་བྱེད་སྐབས། མགོ་ནང་དུ་གྲི་ཞིག་ཟུག་ནས་ཡོད་པ་ཤེས་རྟོགས་བྱུང་ཡོད་པ་དང་། རྒད་པོའི་འཕྲོག་བཅོམ་གྱོད་དོན་དེ་གོང་རིམ་ལ་ཞུ་གཏུག་བྱས་ཡོད་ཀྱང་ད་བར་མཇུག་འབྲས་གང་ཡང་མ་བྱུང་སྐོར་བརྗོད་ཡོད་པ་རེད།
གསར་འགོད་པ། སངས་རྒྱས་དཀོན་མཆོག
