ལི་བྷི་ཡའི་སྲིད་བློན་ཟུར་པ་སྐུ་ཞབས་མཱ་ཧེ་མུ་དྷི་རྗེབ་རིལ་ལགས་ཏོག་དབྱིབས་ནད་ཡམས་ཀྱིས་འདས་གྲོངས་སུ་ཕྱིན་ཡོད་འདུག
དེ་རིང་རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་སྤེལ་བའི་གནས་ཚུལ་ལྟར་ན། དཀྱིལ་ཤར་ཡུལ་གྲུའི་རྒྱལ་ཁབ་ལི་བྷི་ཡའི་སྲིད་བློན་ཟུར་པ་སྐུ་ཞབས་མཱ་ཧེ་མུ་དྷི་རྗེབ་རིལ་(Mahmoud Jibril)་ལགས་ལ་ཏོག་དབྱིབས་ནད་ཡམས་འགོས་ཏེ། ཡུལ་དེའི་ཁཱ་རའོ(Cairo)གྲོང་ཁྱེར་གྱི་(Ganzouri Specialized Hospital)སྨན་ཁང་དུ་བདུན་ཕྲག་གཉིས་རིང་སྨན་བཅོས་བྱས་ཡོད་ཀྱང་། ཕན་འབྲས་མ་ཐོན་པར་ཁ་སང་ཕྱི་ཚེས་ ༥ ཉིན་གྱི་ཕྱི་དྲོར་འདས་གྲོངས་སུ་གྱུར་ཡོད་སྐོར་བསྒྲགས་འདུག
མཱ་ཧེ་མུ་དྷི་རྗེབ་རིལ་འདས་གྲོངས་སུ་ཕྱིན་པའི་སྐོར་ལ་ཁཱ་རའོ་སྨན་ཁང་གི་འགན་འཛིན་ཧེ་ཤིམ་ཝེ་དྷེ(Hisham Wagdy)ཟེར་བ་ཞིག་གིས། དང་ཐོག་སྙིང་རྩ་འགག་པའི་ནད་གཞི་བྱུང་བར་ངོས་འཛིན་བྱས་ཡོད་ཀྱང་། བརྟག་དཔྱད་བྱས་རྗེས་ཁོང་ལ་ཏོག་དབྱིབས་ནད་ཡམས་འགོས་ཡོད་པ་ཤེས་རྟོགས་བྱུང་ཡོད་པ་དང་། སྨན་བཅོས་བྱས་ཏེ་ནད་གཞི་དྲག་སྐྱེད་ཅུང་ཙམ་ཡོང་ཡོད་ན་ཡང་གློ་བུར་དུ་ནད་གཞི་བསྐྱར་ལོག་བྱས་ཏེ་ཇེ་སྡུག་སོང་ནས་འདས་གྲོངས་སོང་ཡོད་སྐོར་བརྗོད་འདུག
འཛམ་གླིང་འཕྲོད་བསྟེན་ལྷན་ཚོགས་ཀྱི་གྲངས་ཐོ་ལྟར་ན། ཉེ་སྔོན་ཕྱི་ཟླ་ ༣ ཚེས་ ༢༢ ཉིན་ནས་ལི་བྷི་ཡ་ནང་ཏོག་དབྱིབས་རིམས་ནད་བྱུང་ཡོད་པ་ཤེས་རྟོགས་བྱུང་ཡོད་པ་དང་། ད་ལྟའི་བར་ཁྱོན་མི་གྲངས་ ༡༨ ལ་ཏོག་དབྱིབས་རིམས་ནད་བྱུང་ཡོད་པ་དང་མི་གཅིག་འདས་གྲོངས་སུ་སོང་ཡོད་འདུག འཛམ་གླིང་འཕྲོད་བསྟེན་ལྷན་ཚོགས་ཀྱིས་ཡུལ་དེའི་ནང་མུ་མཐུད་ཏོག་དབྱིབས་རིམས་ནད་འགོས་ཁྱབ་ཆེན་པོ་ཕྱིན་པ་ཡིན་ན། འཕྲོད་བསྟེན་ཆ་རྐྱེན་ཞན་པ་དང་། སྲིད་དབང་སྲ་བརྟན་མེད་པ་སོགས་ཀྱིས་ནང་འཁྲུག་ཡོང་གཞིར་འགྱུར་ཉེན་ཡོད་པའི་བློ་ཚབ་བྱེད་བཞིན་ཡོད་འདུག
སྐུ་ཞབས་མཱ་ཧེ་མུ་དྷི་རྗེབ་རིལ་ལགས་ནི་ཕྱི་ལོ་ ༢༠༡༡ ལོར་དཀྱིལ་ཤར་ཨེ་ཤ་ཡའི་ཨ་རབ་རྒྱལ་ཁབ་ཁག་གི་ནང་མེ་ཏོག་བ་སྤྲུའི་གསར་བརྗེ་ལས་འགུལ་བྱུང་སྐབས། ལི་བྷི་ཡའི་སྲིད་དབང་སྒེར་གཅོད་པ་གྷ་ཌ་ཧྥེ་ལ་ངོ་རྒོལ་ཤུགས་ཆེན་བྱེད་མཁན་ཞིག་དང་། ཡུལ་དེའི་མི་མང་གྱེན་ལངས་ཤོག་ཁག་གི་རྒྱལ་ཡོངས་སྲིད་འགྱུར་ཚོགས་པའི་མགོ་འཁྲིད་དེ། ཕྱིའི་རྒྱལ་ཁབ་ཨ་རི་དང་ཡུ་རོབ་སོགས་ཀྱི་ནང་རྒྱབ་སྐྱོར་འཚོལ་མཁན་ཞིག་ཡིན་པ་དང་། གྷ་ཌ་ཧྥེ་ཡི་སྲིད་དབང་ཕམ་ཉེས་གཏོང་བར་ཤུགས་སྣོན་བྱེད་མཁན་གཙོ་གྲས་ཤིག་ཡིན་འདུག་ལ། ཁོང་གིས་ལོ་བདུན་ལྷག་ལ་སྲིད་བློན་གྱི་ཕྱག་ལས་གནང་ཡོད་པ་དང་། རྒྱལ་ཡོངས་སྲིད་འགྱུར་ལྷན་ཚོགས་(National Transitional Council) མགོ་གཙོའང་གནང་ཡོད་འདུག
གསར་འགོད་པ། སངས་རྒྱས་དཀོན་མཆོག
