རྒྱ་གར་གྱི་མཐོ་རིམ་དབུ་འཁྲིད་ཚོའི་གླ་ཕོགས་ཀྱི་བརྒྱ་ཆ་༣༠་རེ་འཐེན་རྒྱུ་ཡིན་འདུག

རྒྱ་གར་གྱི་སྲིད་འཛིན་མཆོག་གཙོ་བོར་གྱུར་བའི་དབུས་སའི་བློན་ཆེན་རྣམས་དང་གྲོས་ཚོགས་འཐུས་མི་ཚོའི་ལོ་གཅིག་གི་ཟླ་ཕོགས་ནས་བརྒྱ་ཆ་ ༣༠ རེ་འཐེན་ནས་ཏོག་དབྱིབས་ནད་ཡམས་འགོག་བཅོས་ཆེད་གཏོང་འཆར་ཡོད་འདུགཁ་སང་ཕྱི་ཚེས་ ༦ ཉིན་གྱི་ཕྱི་དྲོར། རྒྱ་གར་དབུས་གཞུང་གི་སྲིད་བློན་མུ་དྷི་མཆོག་གི་དབུས་བློན་ཆེན་རྣམ་པས་ཏོག་དབྱིབས་རིམས་ནད་སྐོར་ལ་དྲ་ལམ་ཚོགས་འདུ་ཚོགས་ཏེ། ཏོག་དབྱིབས་རིམས་ནད་སྔོན་འགོག་དང་སྨན་བཅོས། རྒྱ་གར་གྱི་དཔལ་འབྱོར་གནས་བབ་དང་ཐེམ་སྤང་བཀའ་རྒྱའི་དུས་ཡུན་ཚར་རྗེས་ལས་དོན་འཆར་གཞི་ག་འདྲ་དགོས་མིན་སོགས་ཀྱི་སྐོར་ལ་གྲོས་སྡུར་གནང་ཡོད་པ་དང་། ཚོགས་འདུའི་སྟེང་རྒྱ་གར་སྲིད་འཛིན་དང་སྲིད་འཛིན་གཞོན་པ་བཅས་དབུས་དང་ས་གནས་ཀྱི་བློན་ཆེན་རྣམས་དང་གྲོས་ཚོགས་འཐུས་མི་ཚོའི་ལོ་གཅིག་གི་ཟླ་ཕོགས་ནས་བརྒྱ་ཆ་ ༣༠ རེ་འཐེན་ཏེ། སྲིད་བློན་མུ་དྷི་མཆོག་གི་ཐེབས་རྩ་ཁང་བརྒྱུད་ཏོག་དབྱིབས་རིམས་ནད་སྔོན་འགོག་དང་སྨན་བཅོས་ཆེད་གཏོང་རྒྱུ་ཡིན་པ་ཐག་གཅོད་གནང་ཡོད་འདུག

བློན་ཆེན་རྣམས་ཀྱིས་ཚོགས་འདུ་གྲོལ་བ་དང་རྒྱ་གར་ཁོར་ཡུག་དང་ནགས་ཚལ། གནམ་གཤིས་འགྱུར་ལྡོག་དང་དྲིལ་བསྒྲགས་བློན་ཆེན་གཅིག་ལྕོགས།  སྐུ་ཞབས་པར་ཀཱ་ཤི་ཇ་ཝ་ཌི་ཀར་(Prakash Javadekar)ལགས་ཀྱིས་གསར་འགོད་གསལ་བསྒྲགས་ཤིག་བསྡུས་ཏེ། ཟླ་རེའི་གླ་ཕོགས་ནས་བརྒྱ་ཆ་ ༣༠ རེ་འཐེན་རྒྱུའི་ཐག་གཅོད་དེ་སྲིད་འཛིན་སྲིད་བློན་རྣམ་གཉིས་ཀྱི་དབུས་མངའ་སྡེའི་བློན་ཆེན་ཚང་མའི་དྭང་བླང་གིས་ངོས་ལེན་གནང་ཡོད་པ་དང་། དངུལ་དེ་དག་ཏོག་དབྱིབས་རིམས་ནད་སྔོན་འགོག་ཐད་སྤྱོད་རྒྱུ་ཡིན་སྐོར་བརྗོད་ཡོད་པ་མ་ཟད།  རྒྱ་གར་དབུས་གཞུང་གིས་ལོ་རེའི་གྲོས་ཚོགས་འཐུས་མིའི་ས་གནས་ཡར་རྒྱས་མ་དངུལ་ཧིན་སྒོར་ཐེར་འབུམ་ ༧༩༠༠ རེ་སྤྲོད་བཞིན་པ། འབྱུང་འགྱུར་ལོ་གཉིས་ནང་གནས་སྐབས་སྤྲོད་མཚམས་བཞག་སྟེ་ཏོག་དབྱིབས་རིམས་ནད་ཐེབས་རྩ་ཁང་ལ་སྤྲོད་རྒྱུ་བྱས་ཡོད་སྐོར་སོགས་གསུངས་འདུག

རྒྱ་གར་བློན་ཆེན་ལྷན་ཚོགས་ཀྱི་ཐག་གཅོད་དེ་དང་འབྲེལ། ཀོང་རི་སི་ཁ་གཏད་ཚོགས་པས་ཟླ་ཕོགས་འཐེན་གཅོག་གི་ཐག་གཅོད་ལ་ངོས་ལེན་བྱེད་བཞིན་ཡོད་ཀྱང་། ས་གནས་ཡར་རྒྱས་མ་དངུལ་སྤྲོད་མཚམས་བཞག་པའི་ཐད་ཀོང་རི་སི་གྲོས་ཚོགས་འཐུས་མི་མང་པོས་དངོས་ཤུགས་བརྒྱུད་གསུམ་ནས་སྐྱོན་བརྗོད་དང་ངོ་རྒོལ་བྱེད་བཞིན་ཡོད་པ་དང་། ཁ་ཤས་ཀྱིས་སྤྱི་ཚོགས་དྲ་ལམ་བརྒྱུད་ད་ལྟའི་གཞུང་འཛིན་ཚོགས་པས་ཛ་དྲག་གི་དུས་སྐབས་དང་བསྟུན་སྤྱི་པའི་དངུལ་གྱིས་ཆབ་སྲིད་རོལ་རྩེད་འཁྲབ་བཞིན་ཡོད་སྐོར་དང་། མི་མང་ལ་བདག་པའི་སྤྱི་དངུལ་དེ་གཞུང་གིས་གང་བྱུང་བེད་སྤྱོད་གཏོང་མི་ཆོག་པར་མི་མང་རང་གི་འཚོ་གནས་ཐད་བཀོལ་དགོས་པ་སོགས། ས་གནས་ཡར་རྒྱས་མ་དངུལ་དེ་དག་མི་མང་གི་འཚོ་གནས་དང་འཛུགས་སྐྲུན་ཡར་རྒྱས་ལ་ངེས་པར་གཏོང་དགོས་པའི་འབོད་སྐུལ་དང་སྐྱོན་བརྗོད་བྱེད་བཞིན་ཡོད་འདུག

དེ་བཞིན་དེ་རིང་ནས་རྒྱ་གར་རྒྱལ་ཡོངས་ཐེམ་སྤང་བཀའ་རྒྱའི་འོག་བསྡད་དེ་ཉིན་གྲངས་ ༡༤ འགྲོ་བཞིན་ཡོད་པ་དང་། ད་ལྟའི་ཆར་རྒྱ་གར་རྒྱལ་ཡོངས་སུ་ཏོག་དབྱིབས་རིམས་ནད་ཅན་མི་གྲངས་ ༤༠༠༠ ཡོད་པ་མ་ཟད། འདས་པའི་ཆུ་ཚོད་ ༢༤ རིང་ཏོག་ནད  ༦༩༣ འཕར་ཡོད་སྟབས། རྒྱ་གར་དབུས་གཞུང་གིས་ཐེམ་སྤང་བཀའ་རྒྱའི་འོག་མུ་མཐུད་འདུག་དགོས་མིན་ཐད་གླེང་སློང་བྱེད་བཞིན་ཡོད་འདུག

གསར་འགོད་གསལ་བསྒྲགས་དེའི་ཐོག་དྲིལ་བསྒྲགས་བློན་ཆེན་མཆོག་གིས། ང་ཚོས་འཛམ་གླིང་དང་གནས་སྟངས་ཐད་དུས་ཚོད་སྐར་ཆ་རེ་རེ་བྱས་ཏེ་རྒྱུས་ལོན་བྱེད་བཞིན་ཡོད་ལ། མུ་མཐུད་ཐེམ་སྤང་བཀའ་རྒྱའི་འོག་སྡོད་མིན་སོགས་ཕྱོགས་ཡོངས་ཀྱི་གནས་སྟངས་དང་། དུས་ཚོད་དང་སྟབས་བསྟུན་ནས་གསལ་བསྒྲགས་བྱ་རྒྱུ་ཡིན་སྐོར་གསུངས་ཡོད་པ་དང་། ཀེ་ར་ལ་མངའ་སྡེའི་བློན་ཆེན་དང་མངའ་སྡེ་ཁག་གི་བློན་ཆེན་ཁ་ཤས་ཀྱིས་ཐེངས་འདིའི་ཐེམ་སྤང་བཀའ་རྒྱའི་དུས་ཡུན་ཚར་བ་དང་། མུ་མཐུད་བཀོད་ཁྱབ་བཏང་སྟེ་མི་མང་རང་ཁྱིམ་ནས་འདུག་བཅུག་དགོས་སྐོར་གསུངས་འདུག

ཕྱི་ཚེས་ ༦ ཉིན་གྱི་སྔ་དྲོར་རྒྱ་གར་བྷེཇི་པེ་ཆབ་སྲིད་ཚོགས་པ་བཙུགས་ཏེ་ལོ་ངོ་ ༤༠ འཁོར་བའི་དུས་དྲན་དང་བསྟུན། རྒྱ་གར་སྲིད་བློན་མུ་དྷི་མཆོག་གིས་བརྙན་ལམ་བརྒྱུད་གསུང་བཤད་གནང་ཡོད་པ་དང་། སྐབས་དེར་སྲིད་བློན་མུ་དྷི་མཆོག་གིས་བྷི་ཇེ་པི་སྲིད་དོན་ཚོགས་པའི་ལས་མི་ཚོས་དུས་ཡུན་རིང་བའི་ཏོག་དབྱིབས་རིམས་ནད་དམག་འཐབ་ལ་གྲ་སྒྲིག་དགོས་པ་དང་།  གནད་དོན་འདིར་འཐབ་རྩོད་བྱེད་པར་དུས་ཡུན་རིང་པོ་དགོས་པས་ང་ཚོ་ཐང་ཆད་མི་ཉན་སྐོར་སོགས་གསུངས་ཡོད་འདུག

གསར་འགོད་པ། སངས་རྒྱས་དཀོན་མཆོག