ཟླ་འདིའི་ཕྱི་ཚེས་ ༡༠ ཉིན་ནས་བོད་རེབ་གོང་ཐུན་རིན་རྫོང་མི་མང་སྲིད་གཞུང་ཟེར་བས་ཟི་ལིང་གྲོང་ཁྱེར་ནས་ཁྲིན་ཏུའུ་གྲོང་ཁྱེར་བར་དུ་མེ་འཁོར་ལྕགས་ལམ་འཛུགས་བསྐྲུན་ཆེད་ས་གནས་མི་མང་གི་ས་ཆ་གཞུང་བཞེས་གཏོང་གི་ཡོད་འདུག
མཚོ་སྔོན་ཞིང་ཆེན་སྲིད་གཞུང་གི་ (༢༠༡༥) ཡིག་ཆ་ཨང་ ༦༡ པ་ཟེར་བ་སྟེ། མཚོ་སྔོན་ཞིང་ཆེན་སྲིད་གཞུང་གི་ལེགས་སྒྲིག་དང་། གསར་བསྒྱུར་བྱས་རྗེས་ཀྱི་མཚོ་སྔོན་ཞིང་ཆེན་གྱི་ས་ཆ་བསྡུ་ལེན་གྱི་གཅིག་གྱུར་གྱི་ལོའི་ཐོན་ཚད་ཚད་གཞི་དང་ས་ཆ་བསྡུ་ལེན་ས་ཁུལ་གྱི་ཕྱོགས་བསྡུས་ས་ཆའི་རིན་གོང་སྤྱི་བསྒྲགས་ཟེར་བ་དེ་གཞིར་བཟུང་། ཟླ་འདིའི་ཕྱི་ཚེས་ ༡༠ ཉིན་ནས་ལྕགས་ལམ་འཛུགས་བསྐྲུན་ཆེད་ས་ཞིང་བསྡུ་ལེན་བྱ་འཆར་ཡོད་པའི་ཁོངས་སུ། འབྲེལ་ཡོད་གཞུང་ནས་རྩད་ཞིབ་ཐིག་ལེན་དང་ས་མཚམས་གཏན་འཁེལ་སོགས་ཀྱི་ལས་དོན་མགོ་འཛུགས་བྱས་ཡོད་པས། ཞིང་ལས་འདེབས་འཛུགས་དང་འཛུགས་བསྐྲུན་བྱེད་རིགས་ལ་ཁ་གསབ་དངུལ་གཅིག་ཀྱང་མེད་སྐོར་བསྒྲགས་འདུག
ཐུན་རིན་རྫོང་གིས་དེའི་སྐོར་ལ་བརྡ་ཐོ་ཞིག་བསྒྲགས་པའི་ནང་དུ། ཐུན་རིན་རྫོང་གི་སྤྱི་ཚོགས་དང་དཔལ་འབྱོར་ཡར་རྒྱས་ལ་སྐུལ་འདེད་དང་། ལྕགས་ལམ་འགྲིམ་འགྲུལ་གྱི་རྨང་གཞི་སྒྲིག་བཀོད་ཆུ་ཚད་ཇེ་མཐོར་གཏོང་བ། ཟི་ལིང་དང་ཁྲིན་ཏུའུ་བར་གྱི་ལྕགས་ལམ་ལས་ཐུན་རིན་ལམ་མཚམས་ལས་གྲྭའི་འཛུགས་བསྐྲུན་གྱི་ས་ཆའི་དགོས་མཁོ་འགན་སྲུང་བཅས་བྱ་ཆེད། ས་ཞིང་དོ་དམ་བཅའ་ཁྲིམས་སོགས་བཅའ་ཁྲིམས་ཁྲིམས་སྲོལ་གྱི་གཏན་འབེབ་གཞིར་བཟུང་ཞིང་། ཐུན་རིན་རྫོང་མི་མང་སྲིད་གཞུང་གིས་ཞིབ་འཇུག་བྱས་པ་བརྒྱུད་ཐག་གཅོད་བྱས། ཅེས་བཀོད་དེ་ས་གནས་སུ་ལྕགས་ལམ་བཟོ་ཆེད་ས་ཆ་བསྡུ་འཆར་ཡོད་པ་བསྒྲགས་འདུག
ཟི་ལིང་ནས་ཁྲིན་ཏུའུ་བར་གྱི་ལྕགས་ལམ་དེ་ལས་ཐུན་རིང་རྫོང་ཁོངས་ཀྱི་ཐོ་རྒྱ་གྲོང་རྡལ་ཁྱུང་བོ་སྡེ་བ་ནས་མགོ་བཙུགས་ཏེ་ཀན་ལྷོ་བོད་རིགས་རང་སྐྱོང་ཁུལ་བསང་ཆུ་རྫོང་རྒན་རྒྱ་ཡུལ་ཚོ་བར་དུ་བཟོ་འཆར་ཡོད་པ་དང་། ལས་གཞི་དེའི་རིང་ཚད་ལ་སྤྱི་ལེ་ ༤༩།༧ དང་། བསྡུ་ལེན་བྱེད་རྩིས་ཡོད་པའི་ས་ཞིང་ལ་ཁྱོན་མུའུ་ ༡༣༢༠ ཡོད་པ་རེད། དེའི་ནང་ཐོ་རྒྱ་གྲོང་རྡལ་གྱི་མཁར་ཕྱི་ནང་གི་སྡེ་བ་བཞི་དང་སྡོང་སྐམ་སྡེ་བ། ཁ་རྒྱ། གླིང་རྒྱ། ཁྱུང་བོ། སེར་རྒྱ། ཞོ་འོང་དཔྱི་སྡེ་བ་སོགས་དང་འབྲེལ་བ་ཡོད་འདུག
སྤྱིར་རྒྱ་ནག་གཞུང་དང་སྤྱི་གཉེར་ཚོང་ལས་ཁང་སོགས་ཀྱིས་བོད་ཁུལ་གྱི་དཔལ་འབྱོར་དང་འཚོ་བ་ཡར་རྒྱས་ལ་ཁ་གཡར་ཏེ་བཟོ་གྲྭ་གསར་རྒྱག་དང་སྤྱི་གླིང་། གཏེར་ཁ་སྔོག་འདོན་ས་ཚིགས་སོགས་གསར་རྒྱག་བྱས་ཏེ། མི་མང་གི་ཞིང་ས་གཞུང་བཞེས་བཏང་སྟེ་ཁ་གསབ་དངུལ་སྤྲོད་རྒྱུ་ཁས་ལེན་བྱས་ཡོད་ཀྱང་། མི་མང་ལ་ཁྲིམས་ཀྱི་གོ་རྟོགས་དེ་ཙམ་མེད་སྟབས་དངུལ་དུས་ཐོག་ཏུ་མ་ཐོབ་པ་དང་གཏན་ནས་མ་ཐོབ་པ། སོོ་ནམ་པའི་ས་ཆ་དང་འབྲོག་ས་ཤོར་བར་བརྟེན་འཚོ་གནས་གསར་པ་ཞིག་ལ་བརྟེན་སྐབས་དཀའ་ཁག་མི་ཉུང་བ་ཞིག་དང་འཕྲད་བཞིན་ཡོད་པ་རེད།
གསར་འགོད་པ། ཀླུ་མགོན་ཐར།
