རིགས་ཞེན་རལ་གྲི།
ཞི་ཅིན་ཕིན་རྒྱ་ནག་གི་དབུ་ཁྲིད་ལ་སླེབས་སྐབས། བོད་མི་མང་པོ་ཞིག་གིས་རེ་འབྲས་དོན་སྨིན་ཡོང་བར་རེ་ལྟོས་ལྷོད་མེད་བྱས་ནའང་བོད་དོན་ཐག་གཅོད་ནི་ཁོ་པའི་རྨི་ལམ་གྱི་ཟུར་ཙམ་ལ་ཡང་སླེབས་མེད་པར་མ་ཟད། ཁོ་པའི་རྨི་ལམ་ནི་དང་པོར་རྒྱུད་གཅིག་ལམ་གཅིག་གི་དཔལ་འབྱོར་གཡོ་ཐབས། གཉིས་པ་རིག་གཞུང་སིམ་འཛུལ་གྱི་གཡོ་ཐབས། གསུམ་པ་དྲག་པོའི་སྟོབས་ཤུགས་ཀྱི་གཡོ་ཐབས་བཅས་ལ་བརྟེན་ནས་མཐར་ཁ་གཏིང་ལོག་པའི་འཛམ་གླིང་ཧྲིལ་པོ་དབང་སྒྱུར་བྱ་རྒྱུ་དེ་རེད། དེ་ལྟའི་རྨི་ལམ་ཁྲོད་བོད་ནི་ཁ་དྲག་དབང་བཙན་གྱིས་དབང་སྒྱུར་བྱ་ཡུལ་ཞིག་དང་། རིག་གཞུང་བརྗེ་བསྒྱུར། མི་སེར་སྤེལ་ཡུལ་བཅས་ལས་བོད་ལ་སེལ་དགོས་པའི་གནད་དོན་ཞིག་ཆུ་མགོ་གྱེན་ལོག་གི་ཚུལ་དུ་ཡོང་མི་སྲིད།
འོན་ཀྱང་རྒྱ་ནག་གཞུང་གིས་དབུ་མའི་ལམ་གྱི་སྲིད་ཇུས་ཐད་ཁོ་པ་ཚོའི་སྲིད་དོན་རིག་པའམ་བསམ་བློའི་ཁ་ཕྱོགས་ལ་བརྟེན་ནས་གོ་བ་ལེན་པ་ལས། བོད་ཀྱི་བསམ་བློའི་ཁྱེར་སོ་དང་དེ་ལ་བརྟེན་པའི་གོ་བ་ཞིག་ནམ་ཡང་ལེན་གྱིན་མེད། ཉིན་ཞིག་རྒྱ་ནག་གི་གཡོ་ཇུས་རྐུབ་བརྡོལ་པའི་ཉིན་མོར་བོད་དོན་ལ་ལག་པ་འཆང་ངེས་ཀྱང་དེ་ནི་ཚེར་མ་དར་བཏུམ་གྱི་གཡོ་སྒྱུ་ཞིག་ལས་མ་འདས། དེར་བརྟེན་རྒྱ་ནག་གི་རིག་གཞུང་གཞིར་བཟུང་གི་གཡོ་ཇུས་སྣ་ཚོགས་ཀྱིས་བོད་ཙམ་མ་ཟད་འཛམ་གླིང་མི་མང་ལ་བེའུ་ལྗང་འདྲིད་ཀྱི་ཤུགས་རྐྱེན་གང་ཙམ་སླེབས་ཡོད།
རི་བོང་རྡོ་རྫུས་ཀྱི་གཡོ་ཇུས་ནི་སྤྱིར་རྒྱ་ནག་གི་རྒྱལ་རབས་ནང་ལོ་ངོ་སྟོང་ཕྲག་རིང་ལག་ལེན་མཐིལ་ཕྱིན་བྱས་ནས་ཡོང་བའི་རྒྱ་ནག་གི་མགོ་བདེ་དྲན་འཕྲུལ་གྱི་རིག་གཞུང་ཞིག་ཡིན་པ་ལས་མི་རབས་གཅིག་གཉིས་ཤིག་གི་ཐབས་ཇུས་ཤིག་དེ་བས་མིན། དཔེར་ན་བོད་པའི་རིག་གཞུང་གི་དབང་གིས་སྙིང་རྗེ་ཞེས་ཟེར་བ་བོད་མིར་རང་ཆས་སུ་ཡོད་པ་བཞིན། དེང་གི་དུས་སུ་སྐམ་སའི་རྒྱ་མིའི་བསམ་བློར་ཤ་འདྲེས་ལྤགས་འདྲེས་སུ་གྱུར་ཡོད་པའི་རིག་གཞུང་ནི་རང་རྒྱལ་གཞན་ཕམ་གྱི་གཡོ་སྒྱུ་དེའོ།
ཉེ་རབས་ལོ་རྒྱུས་ནང་རྒྱ་ནག་གི་གཡོ་ཇུས་ལ་ས་སྣ་ལམ་རྒྱུས་ཆེ་ཤོས་ནི་བོད་དང་ཡུ་གུར་ཡིན་མོད། རྒྱ་ནག་གཡོ་ཐབས་ལ་མཁས་དྲགས་པས་རྒྱལ་སྤྱིའི་ཐོག་བོད་དང་ཡུ་གུར་ད་དུང་ཐེ་ཝན་བཅས་ཀྱི་སྐད་ཆར་རྣ་རྒྱབ་ལྷགས་པ་ལས་ཆ་འཇོག་བྱེད་མཁན་དཀོན་པོར་ཆགས་ཡོད། འོན་ཀྱང་གཡོ་ཇུས་གང་ཞིག་ཡིན་ཡང་མཇུག་འབྲས་ལེགས་པོ་ཞིག་བྱུང་མྱོང་མེད་པ་ནི་རྒྱ་ནག་གི་ལོ་རྒྱུས་ནང་གསལ་བ་ལྟར་གཡོ་མཐའ་འཁྱོལ་ཐབས་མེད། དེང་སང་རྒྱ་ནག་གི་གཡོ་ཐབས་རྐུབ་བརྡོལ་བར་སྣུམ་ཟད་ཀྱི་མར་མེ་ལྟར་གྱུར་པའི་དུས་འདི་ནི་བོད་ལ་མཚོན་ན་ཆེས་བླ་ན་མེད་པའི་འགྱེལ་ས་ནས་ལང་བའི་སྟབས་ལེགས་སྐབས་ཁེལ་ཞིག་ཡིན་པས་སྐབས་དོན་ཤོར་ག་ལ་རུང་།
དབུས་བོད་མིའི་སྒྲིག་འཛུགས་ཀྱི་ཆབ་སྲིད་ལངས་ཕྱོགས་ཡང་དོན་དངོས་ཀྱི་འཇིག་རྟེན་འདིའི་ཆབ་སྲིད་འཐབ་རྩོད་བྱེད་པར་ཡུལ་དུས་དང་གོ་སྐབས་ལ་བསྟུན་དགོས། སྐབས་ཐོབ་གོ་སྐབས་འཆོར་མི་རུང་བ་ནི་གནད་ཀྱི་དོན་པོ་ཞིག་སྟེ། རིག་གཞུང་མི་འདྲ་བ་གཉིས་ཀྱི་བསམ་བློའི་འཁྱེར་སོ་དང་འབྲེལ་ནས་ཆབ་སྲིད་ཐག་གཅོད་ལེགས་པོ་ཞིག་མི་ཡོང་ན། མིག་ལྡན་གཡང་མཆོངས་མི་བྱེད་པར་ཐབས་གཞན་ཞིག་ཡོད་པ་ནི་ཇུས་ལན་ཇུས་འཇལ་རེད།
ན་ནིང་ད་ལོར་གཞི་ནས་རྒྱ་ནག་གི་གདོང་རིས་དམར་རྗེན་འཛམ་གླིང་འདིར་གཅིག་རྗེས་གཉིས་མཐུད་དུ་ས་རིས་ཐང་གསལ་ཆགས་བཞིན་པ་དང་། ལྷག་པར་རྒྱ་ནག་གི་ནད་དུག་འདིས་ཆར་བ་ཆུ་གྲོགས་ཀྱི་ཚུལ་དུ་འཛམ་གླིང་གི་སྐྱེ་བོ་ཀུན་གཞི་ནས་གཡོ་ཇུས་རིང་མོའི་རྨི་ལམ་དེ་ལས་བསླངས་དང་སློང་བཞིན་ཡོད་ལ། ཞི་ཅིན་ཕིན་གྱི་རྒྱ་ནག་གི་རྨི་ལམ་རིང་མོ་ཡང་བློ་ཕམ་ཡིད་ཆད་ཅིག་དང་ལྷན་དུ་མཇུག་སྒྲིལ་ལ་ཉེ། སྲིད་སྐྱོང་བློ་བཟང་སེངྒེ་མཆོག་གིས་གནད་དོན་དེ་དག་གསལ་པོར་མཁྱེན་པའི་ཐོག་ནས་དབུ་ལ་མེ་ཤོར་གྱི་དཔེ་བཞིན་ཆེས་གལ་ཆེ་བའི་གསང་བའི་ཚོགས་འདུ་བསྡུས་ཏེ་གོ་སྐབས་དམ་འཛིན་ངང་མཛུབ་མོ་རི་སྟོན་གྱིས་གནད་དོན་ཐག་གཅོད་གང་ལེགས་གནང་གིན་ཡོད་ཤས་ཆེ།
ད་ལམ་དབུས་བོད་མིའི་སྒྲིག་འཛུགས་ཀྱིས་དབུ་ཁྲིད་ནས་སྦྲུལ་མདུད་སྦྲུལ་བཤིག་གིས་ཐབས་ཇུས་མང་དག་ཅིག རྒྱ་གར་དང་། ཨ་རི། ཐེ་ཝན། ཉི་ཧོང་། ཡུ་རོབ་བཅས་ལ་ཁ་འཛིན་རོགས་དན་ངང་མཉམ་ལས་བྱ་རྒྱུ་དང་། ལྷག་པར་ཐེ་ཝན་ལྷན་དུ་མཉམ་ལས་རྒྱུན་རིང་སྤེལ་དགོས་པ་མ་ཟད་བོད་མི་གཞོན་སྐྱེས་བརྒྱ་ཕྲག་འགའ་ལ་གསང་དོན་དང་། དམག་དོན། དཔལ་འབྱོར། དྲིལ་བསྒྲགས། བརྡ་འཕྲིན། འཆར་འགོད་སོགས་སྲིད་དོན་ཆེད་ལས་སྣ་མང་ཐོག་སྦྱོང་བརྡར་སྤྲོད་རྒྱུ་དང་། ཆེད་ལས་པ་དེ་དག་གིས་རིམ་བཞིན་རྒྱ་ནག་ལ་ཁ་གཏད་གཅོག་རྒྱུ། ད་དུང་འཐབ་རྩོད་མི་སྣ་གསོ་སྐྱོང་སླད་དམག་སྡེ་ཨང་ ༢༢ ཡར་རྒྱས་གཏོང་རྒྱུ་དང། དམག་ཁུངས་དང་སྲིད་དོན་ཆེད་གཞོན་སྐྱེས་གང་མང་བསྡུ་སྐོང་བྱ་དགོས། ལྷག་དོན་བརྡ་འཕྲིན་བརྒྱུད་ལམ་གྱི་འཐབ་རྩོད་པའི་དཔུང་སྡེ་གསར་སྐྲུན་བྱ་རྒྱུ་ཧ་ཅང་གལ་ཆེ། ལས་འགུལ་དེ་དག་ནི་དབུ་མའི་ལམ་གྱི་སྲིད་ཇུས་དང་མི་འགལ་བར་མ་ཟད། མགོན་པོ་གང་ཉིད་ནས་“རེ་བ་བཟང་ས་ནས་རྒྱོབས། གྲ་སྒྲིག་སྡུག་ས་ནས་བྱོས”ཞེས་གསུངས་པའི་དགོངས་དོན་དང་མཐུན་པ་ཡིན།
ཞི་ཅིན་ཕིན་གྱི་མགལ་མེའི་འཁོར་ལོའི་རྨི་ལམ་ན་མགོ་འཁོར་བཞིན་པའི་རྒྱ་ནག་དང་འཛམ་གླིང་མི་མང་གཉིད་ལས་ཇི་ལྟར་དཀྲོགས་པའི་བྱ་ཐབས། དེའི་རྗེས་ཇི་ལྟར་བྱ་དགོས་མིན་གྱི་རྒྱལ་སྤྱིའི་རང་བཞིན་ཅན་གྱི་དབུས་བོད་མིའི་སྒྲིག་འཛུགས་ཀྱི་ཆབ་སྲིད་ཚོགས་ཆུང་ཟུར་འཛུགས་བྱེད་དགོས་པ་མ་ཟད། འཛམ་གླིང་གང་སར་གནས་པའི་བོད་པའི་སྤྱི་ཚོགས་ནང་རྒྱ་ནག་གིས་ཤུགས་རྐྱེན་དང་གསང་མྱུལ་བ། སྐབས་འཚོལ་བ་བཅས་ལ་སྟངས་འཛིན་ཆེད་གསང་དོན་ཚན་པ་རྒྱལ་ཁབ་སོ་སོའི་གསང་དོན་ཁང་དང་འབྲེལ་མོལ་གྱིས་ཟུར་འཛུགས་བྱས་ཏེ་བོད་མིའི་གོང་བུ་གཅིག་སྒྲིལ་ལ་ཤུགས་རྒྱག་དགོས། བོད་པ་ནང་ཁུལ་ལ་མཚོན་ན། བོད་རང་དབང་སློབ་ཕྲུག་ཚོགས་པ་དང་། གཞོན་ནུ། དགུ་བཅུ་གསུམ་སོགས་ཚོགས་པ་ཁག་མཉམ་འབྲེལ་གྱིས་རང་དབང་སླར་གསོའི་དྲིལ་བསྒྲགས་ཀྱི་ལས་འགུལ་རྒྱ་ཆེན་པོ་ཞིག་སྤེལ་དགོས་པ་མ་ཟད། རྣམ་དཔྱོད་ལྡན་པའི་བྱེད་ཐབས་མང་པོ་ཞིག་གོ་སྒྲིག་བྱ་དགོས།
ཁ་ཚ་དགོས་གཏུགས་ཀྱི་དོན་གནད་ཁག་ཅིག་ནི། རྒྱལ་སྤྱིའི་ཐོག་ནད་དུག་གི་གོ་སྐབས་འདི་བཟུང་ནས་ཐེ་ཝན་གྱིས་ཇུས་ལན་ཇུས་འཇལ་གྱིས་འཕྲོད་བསྟེན་ལས་འགུལ་སྤེལ་བཞིན་པ་ལྟར། བོད་པས་བོད་ནང་དུ་རྒྱ་གཞུང་གིས་གཡོ་ཇུས་ཇི་འདྲ་ཞིག་བྱས་ཡོད་པ་དཔེར་བརྗོད་དེ་བོད་ལ་ལག་བསྟར་བྱས་པའི་གཡོ་ཇུས་ཁག་འཛམ་གླིང་ཧྲིལ་བོར་ལག་བསྟར་བྱས་དང་བྱེད་བཞིན་པའི་ཁུངས་ལུང་གསལ་བོར་བཟོས་ཏེ་གཡོ་སྒྱུའི་གདོང་རིས་དམར་རྗེན་དུ་འདོན་རྒྱུ་དེ་རེད།
དཔེར་ན། བོད་ལ་རྒྱ་ནག་གིས་ཐོག་དང་པོར་དབང་སྒྱུར་བྱེད་སྐབས་དཔལ་འབྱོར་གྱི་བསླུ་བྲིད་བྱས་པ་ལས་དམག་བརྒྱབ་མེད། སྐབས་དེར་དམངས་ཁྲོད་ཀྱི་ཁ་རྒྱུན་ལ་“རྒྱ་གུང་ཁྲན་དྲིན་ཆེན་ཕ་མ་རེད། དངུལ་རྡ་ཡང་ཆར་བ་འབབ་འབབ་རེད་”ཅེས་བརྗོད་ཡོད། དེ་ནས་རིམ་བཞིན་དམག་ཐབས་དང་སྡུག་སྦྱོང་སྣ་ཚོགས། ལྷག་པར་བོད་ལ་སྤེལ་བའི་ལས་འགུལ་ཏེ། དཔལ་འབྱོར། རིག་གཞུང་། སྐད་ཡིག མི་སེར་སྤེལ་ཡུལ་བཅས་ཀྱི་གཡོ་བྱུས་ཀྱི་དབང་སྒྱུར་འོག་མཛེས་སྡུག་ལྡན་པའི་བོད་འདི་དམྱལ་ཁམས་ལྟ་བུར་བསྒྱུར་ཡོད། དེ་རིང་གི་དུས་སུ་ཡང་མུ་མཐུད་ནས་རིག་གཞུང་དང་སྐད་ཡིག་བརྗེ་བསྒྱུར་གྱི་ལས་འགུལ་ཉིན་མཚན་ལྟོས་མེད་དུ་འབད་པ་ལྷུར་ལེན་གྱིས་ཁོ་པ་དག་གི་འདོད་དོན་སྐོང་བཞིན་ཡོད། བྱེད་ཐབས་དེ་དག་ནི་དེང་གི་དུས་སུ་རྒྱལ་སྤྱིའི་ཁྲོད་ཆུ་ལ་ཆུ་བཞག་གི་ཚུལ་དུ་སྤེལ་དང་སྤེལ་བཞིན་ཡོད་པས། དེའི་མཇུག་འབྲས་ནི་བོད་ཀྱི་དཀའ་སྡུག་ཁག་རྡོ་ལག་བརྒྱུད་ཀྱི་ཚུལ་དུ་འཛམ་གླིང་མི་མང་གིས་རིམ་བཞིན་མྱང་དགོས་པ་མཛུབ་མོ་རི་སྟོན་གྱིས་དོན་ཚན་རེ་རེ་ནས་གསལ་འདོན་བྱ་རྒྱུ་ཧ་ཅང་གལ་ཆེ།
བོད་ཀྱི་གནད་དོན་འདི་རྒྱལ་སྤྱིའི་རང་བཞིན་ཅན་ཞིག་ཡོང་བར་ཐབས་བརྒྱ་ཇུས་སྟོང་གིས་ཚ་ཚ་འུར་འུར་ངང་ལས་འགུལ་སྣ་མང་སྤྱི་ཚོགས་དྲ་རྒྱ་དང་། བརྙན་འཕྲིན་བརྒྱུད་ལམ་ཁག་ལ་སྤེལ་ཏེ། འཛམ་གླིང་མི་མང་རྒྱ་ནག་ལ་ལྟ་སྟངས་ལེགས་པོ་མེད་པའི་སྐབས་འདིར་བོད་དོན་འདི་མེ་ལ་མར་ཁུ་བླུགས་པ་ནང་བཞིན་ཞིག་ཡོང་བར་འབད་པ་བྱ་དགོས། ཐེ་ཝན་གྱི་སྲིད་འཛིན་གྱིས་སྤྱི་ཚོགས་དྲ་རྒྱ་ཁྲི་ཋིར་(Twitter)ནང་གནད་དོན་སྤེལ་བཞིན་པ་མིག་དཔེར་འོས་པ་ལས། དུས་སྐབས་འདི་འདྲར་ང་ཚོས་ཁ་ལག་བཟོ་སྟངས་དང་ནད་འགོག་བྱེད་སྟངས། ཞལ་འདེབས་འབུལ་རྒྱུའི་དྲིལ་བསྒྲགས་ཙམ་གྱི་སྣང་བ་བན་བུན་ཞིག་གིས་དྲ་ལམ་ན་མགོ་འཁོར་ག་ལ་རུང་། བརྒྱུད་ལམ་འདྲ་མིན་ནས་རྒྱ་ནག་ལ་སྐྱོན་བརྗོད་བྱེད་བཞིན་པའི་ཁོངས་སོ་སོར་བོད་དོན་དང་རྒྱ་ནག་གི་གཡོ་ཇུས་ངོ་མ་གསལ་སྟོན་ཆེད་སྐད་ཡིག་འདྲ་མིན་ནང་སྤེལ་རྒྱུ་དང་། བརྒྱུད་སྐུལ་བྱེད་པར་འབད་པ་བྱ་རྒྱུ་ཧ་ཅང་གལ་ཆེ།
ད་ལན་སྲིད་སྐྱོང་བློ་བཟང་སེངྒེ་མཆོག་གིས་དབུ་འཁྲིད་ནས་ལས་དོན་འདི་འདྲ་སྤེལ་ན་དོན་ངོ་མར་བོད་རྒྱལ་བཙན་པོ་རིམ་བྱོན་ལ་ངོ་གནོང་མི་དགོས་པ་ཞིག་དང་། མི་རབས་རྗེས་མ་དག་ལ་མིག་ལྟོས་དཔེ་སྟོན་གྱིས་ཡིད་འགུལ་ཐེབས་པའི་ལོ་རྒྱུས་ཀྱི་ལེའུ་གསར་པ་ཞིག་དབུ་ཚུགས་པས་རང་རིགས་སྐྱེ་བོ་ཀུན་གྱིས་རྒྱབ་སྐྱོར་གང་ལེགས་གནང་དགོས་པ་མ་ཟད་རང་ཁྲིའི་ལས་དོན་ཚགས་ཚུད་ཀྱིས་ཆོས་ལུགས་དང་། ཆོལ་ཞེན། ནང་ཁུལ་སྲིད་དོན་པའི་རྩོད་རྙོག སྐབས་འཚོལ་བ་བཅས་ཀྱི་ཤོག་སྦུབས་རླུང་འཚང་གི་ཚོར་བ་ཉི་ཚེ་བ་རང་མགོ་ཆུ་འདྲེན་གྱི་དབང་དུ་མ་སོང་ཞིང་མགོ་མ་འཁོར་བར་ལམ་ནོར་ལྡོག་ཤེས་བྱས་ཏེ། བོད་བཙན་པོའི་སྲིད་དབང་བསྐྱར་གསོ་བྱེད་པའི་ཁ་ཐོག་ལག་བཞག་གི་གོ་སྐབས་བླ་ན་མེད་པ་ཞིག་ཡིན་པ་ངོས་ཟིན་རྒྱུ་ཧ་ཅང་གལ་ཆེ།
གལ་ཏེ་དེ་ལས་ལྡོག་ཚེ་བྱེས་བཞུགས་བོད་མིས་བསྒྲུབ་དགོས་པའི་ལས་དོན་ཕྱར་བ་གྲུ་འདེགས་མ་བྱས་པ་དང་། གོ་སྐབས་ཡོད་བཞིན་དུ་མི་རིགས་ཤིག་མིག་མཐོང་གཡང་བསྐྱུར་གྱིས་ཐལ་ཟིང་འགལ་འཛོལ་གྱི་ལོ་རྒྱུས་ནག་པོ་ཞིག་མི་རབས་ཕྱི་མ་རྣམས་ཀྱི་མདུན་དུ་ལྷག་རྒྱུ་གདོན་མི་ཟ་བས་ཡིད་གཟབ་གནང་གལ་ཆེ་བས་གཞེན་སྐུལ་དུ།
ཕྱི་ལོ་༢༠༢༠ ལོའི་ཟླ་ ༤ ཚེས་ ༢༠ ཉིན་སྤེལ།
བསོད་ནམས་རྒྱལ་མཚན་ལགས། སྲིད་སྐྱོང་བློ་སེང་གིས་སྤེན་ཚེའི་གདོང་ལྤགས་བཤུ་བསམ་ཀྱང་། ཐ་མ་རང་ཉིད་ཀྱི་གདོང་ལྤགས་བཤུས་ཡོད་པ་རེད། ད་དེ་ཚོ་ཚར་པ་རེད། མཇུག་རྫོགས་པ་རེད། གླེང་དགོས་དོན་མི་འདུག སྐབས་སུ་བབས་པ་ང་ཚོའི་མི་རིགས་ཀྱི་གནད་དོན་གླེང་བའི་དུས་རེད། དགྲ་ནང་ཁུལ་མ་རེད། དགྲ་ཕྱི་ལ་ཡོད་པ་དེ་རེད།
ཞི་ཅིན་ཕིན་རྒྱ་ནག་གི་དབུ་ཁྲིད་ལ་སླེབས་སྐབས། བོད་མི་མང་པོ་ཞིག་གིས་རེ་འབྲས་དོན་སྨིན་ཡོང་བར་རེ་ལྟོས་ལྷོད་མེད་བྱས་ནའང་བོད་དོན་ཐག་གཅོད་ནི་ཁོ་པའི་རྨི་ལམ་གྱི་ཟུར་ཙམ་ལ་ཡང་སླེབས་མེད་པ་རེད། (སྐད་འདི་ཚོ་གཅིག་བདེནའདུག)
རྒྱ་ནག་གཞུང་གིས་དབུ་མའི་ལམ་གྱི་སྲིད་ཇུས་ནི་ནས་འབྲུ་ཆང་ལ་བསྒྱུར་ཏེ་འཛམ་གླིང་མི་མང་བཟི་རུ་འཇུག་བྱེད་ཀྱི་ལག་ཆ་ཞིག་ལས། བོད་དོན་ཟེར་བ་ཞིག་རྣ་བའི་ཟུར་ལའང་གཡོར་མྱུང་མེད། (འདི་ལྟར་བཅོས་ན་འོས་པར་སྙམ།)
རི་བོང་རྡོ་རྫུས་ཀྱི་གཡོ་ཇུས་ནི་རྒྱ་ནག་གི་རྒྱལ་རབས་ནང་ལོ་ངོ་སྟོང་ཕྲག་རིང་ལག་ལེན་མཐིལ་ཕྱིན་བྱས་ནས་ཡོང་བའི་རྒྱ་ནག་གི་རིག་གཞུང་གཤའ་མ་ཞིག་རེད། (འདི་ལྟར་བཅོས་ཤིན་ཏུ་འོས།)
སྲིད་སྐྱོང་བློ་བཟང་སེང་གེ་མཆོག་གིས་ དགོས་ཡ་རྒྱ་དམར་གྱི་དཔོན་རིགས་ཚོ་ལྤགས་པ་མ་བཤུས་བ་བྱེད། མི་དགོས་པའི་སྤེན་པ་ཚེ་རིང་ལྤགས་པ་བཤུས། ?
? ཡག་པོ་བཀོད་འདུག ཁྱེད་ལྟ་བུ་སྲིད་སྐྱོང་མ་ལང་མ་གཏོག ཆག་སྒོ་བསླངས་ས་རེད་ད།
ཧཧཧཧ བདེ་འཇགས་ཕོ་ཉ་ལགས། ནང་འཁྲུགས་ཕྲན་བུ་རེ་འབྱུང་བཞིན་པ་དེ་ཚོ་ནི་དགྲ་བོ་རྒྱ་དམར་ལ་ཁ་གཏད་གཅོག་རན་པའི་སྐབས་སུ་ལྡོག་རྩ་གཅིག་ལ་བསྒྲིལ་དགོས་པ་རེད། ནང་ཁུལ་གྱི་རྩོད་སྙོག་དེ་ཚོ་ཡང་རྒྱ་གཞུང་ལ་ཁ་གཏད་གཅོད་པའི་གཞུང་ངམ་སྒྲིག་འཛུགས་ཤིག་སྲ་གཏན་ཡོང་བའི་ཆེད་དུ་རེད། ལར་ནས་ནང་ཁུལ་གྱི་ཙ་གེ་ཙིག་གེ་དེ་འདྲ་ཡང་བྱུང་སྲིད་པ་ཞིག་རེད། འོན་ཀྱང་དུས་རྒྱུན་དུ་བོད་མི་ནང་ཁུལ་ལ་དགྲ་བོ་ཡིན་བསམ་པའི་འདུ་ཤེས་མི་འཛིན་མི་རུང་སྙམ།
དགོངས་ཚུལ་ལ་རྗེས་སུ་ཡི་རང་དང་གཞུང་མང་ཡོངས་ནས་ཐུགས་སྣང་གནང་གལ་ཆེ་བ་མཐོང་།།
ཐོས་པ་དགའ་ལགས། རིགས་ཞེན་རལ་གྲིའི་བཤད་པ་བདེན་མོད། ང་བཅས་ད་དུང་ནང་འཁྲུག་བརྒྱབ་མ་ཚར། དུས་ཚོད་མི་འདུག་ལོ།
༄། །དུས་བབ་གསར་ཁང་ནས་གལ་ཆེའི་གསར་གནས་ཁག་དུས་བསྟུན་སྤེལ་བར་ལེགས་བརྗོད་ཡོད་ཡོད། འདིའི་སྔོན་བོད་སྨན་དང་འབྲེལ་གནས་དང་
ད་ལམ་གོང་གསལ་གྱི་དགོངས་ཚུལ་འདི་དོན་དང་ལྡན་པ་གལ་ཆེན་དུ་མཐོང་། དེས་ན་རང་གཞུང་མཆོག་དང་རང་རིགས་ཡོངས་ཀྱིས་གོ་སྐབས་དམ་འཛིན་གྱིས་དུས་བསྟུན་ལས་དོན་ལ་འབད་བརྩོན་ལྷོད་གཡེང་དུ་མ་སོང་བར་གནང་རྒྱུ་ཆེས་གལ་ཆེན་དུ་མཐོང་། སྤྱིར་ད་སྐབས་རང་གཞུང་དང་གཞུང་མིན་ཚོགས་པ་རེ་ཟུང་དང་སྒེར་རེ་ཟུང་ནས་ནས་ཀྱང་ཐུགས་སྣང་གནང་དང་བཞིན་ལ་བསྔགས་བརྗོད་ཡོད།།
དུས་བབ་གསར་ཁང་ནས་དུས་བསྟུན་གལ་ཆེའི་གསར་གནས་མང་པོ་སྤེལ་དང་སྤེལ་བཞིན་པར་ལེགས་བརྗོདཡོད། ད་ལམ་གོང་གསལ་དགོངས་ཚུལ་ཐུགས་སྣང་ཆེན་པོས་གནང་བ་འདི། དོན་དང་ལྡན་ཞིང་ང་ཚོའི་རང་གཞུང་དང་མང་ཚོགས་བཅས་པས་ཐུགས་སྣང་ཆེ་བཞེས་ཀྱིས་གོ་སྐབས་དམ་འཛིན་སྔར་ལྷག་གནང་རྒྱུར་ཆེས་གལ་ཆེན་དུ་མཐོང་། སྤྱིར་རང་གཞུང་དང་གཞུང་འབྲེལ་མིན་པའི་ཚོགས་པ་རེ་ཟུང་གི་གནང་བ་དང་སྒེར་རེ་ཟུང་ནས་ཀྱང་གནང་དང་གནང་བཞིན་ལ་ཡིད་རང་དང་བསྔགས་བརྗོད་ཡོད།།
གནང་ལ་ཁེལ་བའི་རྩོམ་ཡིག་གཅིག་བྲིས་འདུག བོད་མིའི་སྒྲིན་འཛུགས་ཀྱི་མཛད་གཙོ་རྣམ་པས་ངེས་པར་དུ་རྩོམ་ཡིག་འདིའི་རིགས་ལ་ཐུགས་སྣང་རེ་གནང་བའི་དུས་ལ་བབས་འདུག གོ་སྐབས་ཤོར་ན་མི་ལེགས་སྙམ།