རྒྱ་གར་རྒྱལ་ཡོངས་ཏོག་དབྱིབས་རིམས་ནད་ཀྱི་ཁྱིམ་སྡོད་བཀའ་རྒྱ་ཕྱི་ཟླ་ ༥ ཚེས་ ༡༧ བར་མུ་མཐུད་ལག་བསྟར་གནང་གཏན་འཁེལ་འདུག
རྒྱ་གར་ནང་སྲིད་ལས་ཁུངས་ཀྱིས་བསྒྲགས་པའི་གནས་ཚུལ་ལྟར་ན། རྒྱ་གར་རྒྱལ་ཡོངས་ཏོག་དབྱིབས་རིམས་ནད་ཀྱི་ཁྱིམ་སྡོད་བཀའ་རྒྱ་ཕྱི་ཟླ་ ༥ ཚེས་ ༤ ནས་བདུན་ཕྲག་གཉིས་ཕྱིར་འགྱངས་བྱས་ཏེ། ཕྱི་ཟླ་ལྔ་པའི་ཚེས་ ༡༧ བར་མུ་མཐུད་ལག་བསྟར་གནང་གཏན་འཁེལ་ཡོད་པ་དང་། དུས་སྐབས་དེའི་རིང་ཏོག་དབྱིབས་རིམས་ནད་ཤུགས་ཆེར་ཁྱབ་པའི་ས་ཁུལ་དམར་པོའི་ནང་ཞིང་ལས་དང་དྲ་ལམ་ཚོང་ལས་རིགས་བྱེད་ཆོག་པ་དང་། ས་ཁུལ་ལྗང་གུའི་ནང་རྒྱལ་ཡོངས་སུ་བཀག་འགོག་བྱས་ཡོད་པའི་རིགས་མིན་ན་རིམ་གྱིས་སྒོ་ཕྱེ་བ་དང་ལས་དོན་གཉེར་ཆོག་པ་མ་ཟད། ས་ཁུལ་དེ་རིགས་ནང་རིམ་གྱིས་སྤྱི་སྤྱོད་རླངས་འཁོར་ནང་འདུག་སྟེགས་བརྒྱ་ཆ་ཕྱེད་ཙམ་བྱས་ཏེ་འགྲོ་སྐྱོད་ཆོག་སྐོར་བསྒྲགས་འདུག
ཐེངས་འདིའི་བཀའ་ཁྱབ་དེ་ནི་རྒྱ་གར་གྱི་སྲིད་བློན་མུ་དྷི་མཆོག་དབུས་པའི་བློན་ཆེན་རྣམ་པ་འདུ་འཛོམས་ཀྱིས། རྒྱ་གར་ནང་གི་ཏོག་དབྱིབས་ནད་པའི་ཁ་གྲངས་དང་ཕྱོགས་ཡོངས་ཀྱི་གནས་བབ་བསྐྱར་ཞིབ་བྱས་པ་བརྒྱུད་ནས་བྱུང་བ་ཞིག་ཡིན་པ་དང་། རྒྱ་གར་འཕྲོད་བསྟེན་བློན་ཆེན་ཧར་ཤི་ཝར་ཌན་(Harsh Vardhan)མཆོག་གིས། ཏོག་དབྱིབས་ནད་དུག་དང་འཐབ་འཛིང་བྱེད་པར་རྒྱ་གར་གྱིས་གོམ་པ་སྔོན་ལ་སྤོ་བཞིན་ཡོད། ཅེས་བརྗོད་ཡོད་འདུག
ཁྱིམ་སྡོད་བཀའ་རྒྱའི་ནང་ཁྱོན་ཡོངས་ནས་དེ་སྔའི་བཀག་སྡོམ་ལྟར་ལག་བསྟར་གནང་འཆར་ཡོད་ན་ཡང་། དུས་སྐབས་དེའི་རིང་རྒྱ་གར་གྱི་སྐམ་མཚོ་གནམ་གསུམ་གྱི་འགྲུལ་སྐྱོད་དང་། སྤྱི་ཚོགས་ནང་རིག་གནས་དང་ཆོས་ལུགས་སོགས་ཀྱིས་མི་མང་འདུ་འཛོམས། རྒྱལ་ཡོངས་ཀྱི་སློབ་གྲྭ་ཁག་དང་ཤེས་ཡོན་ལྟེ་གནས་ཁག ཟ་ཁང་དང་མགྲོན་ཁང་རིགས་གཅིག་ཀྱང་སྒོ་ཕྱེ་མི་ཆོག་པ་མ་ཟད། བྱིས་པ་དང་བུད་མེད་སྦྲུམ་མ། ལོ་ན་མཐོ་བོའི་རྒན་པའི་རིགས་ངེས་པར་འགྲོ་དགོས་པའི་ལས་དོན་འཕྲད་ན་མ་གཏོགས་ཕྱི་ལ་མ་ཐོན་རོགས་ཞེས་བརྗོད་འདུག
དེ་བཞིན་ཁྱིམ་སྡོད་བཀའ་རྒྱའི་སྐབས་སྒོ་ཕྱེ་ཆོག་པའི་རིགས་ལ། སྨན་ཁང་དང་དངུལ་ཁང་དགོས་མཁོ་ཆེ་བའི་ཅ་དངོས་དང་སྨན་བཟོ་གྲྭ། དེ་བཞིན་འཕྲུལ་ལས་བཟོ་གྲྭ་དང་འཐག་ལས་བཟོ་གྲྭ། ཆུ་དང་གློག་བཟོ་མཁན། གད་སྙིགས་དབོར་མཁན། གྲོང་ཁྱེར་གྱི་ཁང་པ་འཛུགས་སྐྲུན་རིགས་མི་གྲངས་ཚོད་འཛིན་དང་སྤྱི་ཚོགས་རྒྱང་བཀྱེད་ཀྱི་གོ་རིམ་ལྟར་སྒོ་ཕྱེ་ཆོག་པ་དང་། ཏོག་དབྱིབས་རིམས་ནད་ཤུགས་ཆེར་ཁྱབ་པའི་ས་ཁུལ་དམར་པོའི་ནང་ཞིང་ལས་དང་དྲ་ལམ་ཚོང་ལས་རིགས་བྱེད་ཆོག་པ་དང་། ས་ཁུལ་ལྗང་གའི་ནང་རྒྱལ་ཡོངས་སུ་བཀག་འགོག་བྱས་ཡོད་པའི་རིགས་མིན་ན་རིམ་གྱིས་སྒོ་ཕྱེ་བ་དང་ལས་དོན་གཉེར་ཆོག་པ་མ་ཟད། ས་ཁུལ་དེ་རིགས་ནང་རིམ་གྱིས་སྤྱི་སྤྱོད་རླངས་འཁོར་ནང་འདུག་སྟེགས་བརྒྱ་ཆ་ཕྱེད་ཙམ་བྱས་ཏེ་འགྲོ་སྐྱོད་ཆོག་སྐོར་བརྗོད་འདུག
གཞན་ཡང་། ཁྱིམ་སྡོད་བཀའ་ཁྱབ་འདི་དང་འབྲེལ་ནས་ཏོག་དབྱིབས་ནད་དུག་གི་ཁྱིམ་སྡོམ་བཀའ་རྒྱའི་འོག སོ་སོའི་རང་ཁྱིམ་དུ་ལོག་མ་ཐུབ་པའི་ལས་མི་དང་སློབ་མ། དེ་བཞིན། ཡུལ་སྐོར་བ་སོགས་མངའ་སྡེ་གཅིག་ནས་གཅིག་ལ་འགྲོ་བར་འབྲེལ་ཡོད་མི་མང་ནས་སྙན་ཞུའི་ལམ་ནས་ས་གནས་གཞུང་ལ་འབྲེལ་གཏུག་བྱས་ཚེ། དབུས་གཞུང་གི་གོ་སྒྲིག་འོག་དམིགས་བསལ་མེ་འཁོར་བརྒྱུད་མི་མང་རྣམས་སོ་སོའི་རང་ཁྱིམ་དུ་སྐྱེལ་འདྲེན་བྱ་འཆར་ཡོད་པ་དང་། ཕྱི་ཚེས་ ༣ ཉིན་རྒྱ་གར་གྱི་སྲིད་བློན་མུ་དྷི་མཆོག་གིས་རྒྱལ་ཡོངས་བསྒྲགས་གཏམ་ཞིག་སྤེལ་འཆར་ཡོད་འདུག
གསར་འགོད་པ། སྐལ་བཟང་སྦྱིན་པ། སངས་རྒྱས་དཀོན་མཆོག
