སྒྲོལ་མ་ཉེར་གཅིག
༧གོང་ས་མཆོག་ལ་བསྟན་བཤིག་ཟེར་མཁན་ཞིག་ཡོད་ན། ད་ལན་སྲིད་སྐྱོང་བཀའ་ཤག་གིས་གསར་འགོད་གསལ་བསྒྲགས་ཤིག་མ་སྤེལ་ཐབས་མེད་ཡིན་རྒྱུ་རེད། གལ་སྲིད་བཙན་བྱོལ་བོད་མིའི་བཅའ་ཁྲིམས་ལེའུ་དང་པོའི་དོན་ཚན་གཉིས་པའི་ནང་དུ་ “བཅའ་ཁྲིམས་འདིས་བོད་མིའི་སྒྲིག་འཛུགས་ཀྱི་མངའ་ཁོངས་སུ་གཏོགས་པའི་བོད་མི་ཡོངས་ལ་ཁྱབ་པ་ཡིན།” ཞེས་བཀོད་ཡོད་པ་ལྟར་ལག་བསྟར་གནང་གི་ཡོད་ན། ཧ་ཅང་ནག་ཉེས་ཆེན་པོ་རེད། རྒྱུ་མཚན་གང་ཡིན་ཞེ་ན། “བོད་ཀྱི་ལྷ་སྐལ་སྤྱན་རས་གཟིགས་དབང་མིའི་གཟུགས་སུ་བྱོན་པའི་ཁམས་གསུམ་ཆོས་ཀྱི་རྒྱལ་པོ་ྋགོང་ས་ྋསྐྱབས་མགོན་སྐུ་ཕྲེང་བཅུ་བཞི་པ་ཆེན་པོ་མཆོག་ནི་འཇིག་རྟེན་ཞི་བདེའི་དེད་དཔོན་དང༌། ས་སྟེང་ྋརྒྱལ་བསྟན་ཡོངས་རྫོགས་ཀྱི་མངའ་བདག བོད་མི་ཡོངས་ཀྱི་མགོན་སྐྱབས། བླ་ན་མེད་པའི་དབུ་འཁྲིད། བླང་དོར་ལམ་སྟོན་པ། བོད་མིའི་ངོ་བོ་དང༌། དེའི་ཆིག་སྒྲིལ་གྱི་མཚོན་རྟགས། བོད་མི་ཡོངས་ཀྱི་རང་དབང་ལྡན་པའི་མགྲིན་ཚབ་པ་བཅས་ཡིན།” ཞེས་བཙན་བྱོལ་བོད་མིའི་བཅའ་ཁྲིམས་ལེའུ་དང་པོའི་དོན་ཚན་དང་པོའི་ནང་དུ་འདི་ལྟར་གསལ་ཡོད་སྟབས། “བོད་དང་བོད་མིའི་མགོན་སྐྱབས་དང་མཚོན་རྟགས”ལ་གཞི་མེད་བསྐུར་འདེབས་བྱས་ན། གཞུང་མང་གཉིས་ཀའི་ངོས་ནས་རང་དགར་བཟོད་ཐབས་ཡེ་ནས་མེད།
མདང་དགོང་ཐུབ་བསྟན་ཐོགས་མེད་ལགས་ཀྱི་བརྙན་ཐུང་ཞིག་ལ་ཉན་པ་ཡིན། དེ་རིང་ཞོགས་པ་ཆོས་རིག་བཀའ་བློན་གྱི་མིང་ཐོག་ནས་སྤེལ་བཞིན་པའི་ཡི་གེ་ཤོག་ལྷེ་གཅིག་ཅན་ཞིག་མཐོང་སོང་། ལས་ཤོག་དང་མཚན་རྟགས་ངོ་མ་ཡིན་མིན་མི་ཤེས་མོད། དབུས་བོད་མིའི་སྒྲིག་འཛུགས་ཀྱི་དྲ་ངོས་སུ་ སྤྱི་ལོ་༢༠༢༠/༥/༢༦ ཉིན་ཆོས་རིག་བཀའ་བློན་གྱིས་སྤེལ་བའི་གནས་ཚུལ་དེ་འདྲ་ཞིག་མཐོང་རྒྱུ་མི་འདུག ཡིག་ཐོག་གི་གསར་འགྱུར་བརྒྱུད་ལམ་ཁག་ནས་གནས་ཚུལ་དེ་འདྲ་ཞིག་མཐོང་ལམ་དུ་མ་གྱུར། གསལ་བསྒྲགས་དང་གསལ་བཤད་སོགས་གང་ཡིན་ཡང་མི་ཤེས་པས་ཡིག་འཁྱར་ཞིག་ཡིན་རྒྱུ་རེད་བསམ་སོང་། ཡིན་ན་ཡང་། རྗེས་སུ་ཤེས་རྟོགས་བྱུང་བ་ལྟར་ན། དེ་ནི་ཆོས་རིག་ལས་ཁུངས་ཀྱི་ངོ་དེབ་ཐོག་ལ་སྤེལ་བའི་གནས་ཚུལ་ཞིག་ཡིན་འདུག་ལ། “དཔལ་ལྡན་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་གིས་གནད་དོན་ཁག་ཅིག་ཐོག་གནས་ལུགས་གསལ་བཤད་གནང་བ་གཤམ་གསལ།” ཞེས་བཀོད་ཡོད་པ་ངོ་དེབ་དེའི་ཐོག་མཐོང་རྒྱུ་འདུག ཡང་ཡ་མཚན་པ་ཞིག་ལ་གནས་ཚུལ་དེ་སྤེལ་ནས་ཆུ་ཚོད་དྲུག་ཙམ་གྱི་རྗེས་སུ། “དཔལ་ལྡན་ཆོས་རིག་བཀའ་བློན་མཆོག་ནས་གསལ་བཤད་འཕར་མ།” ཞེས་པ་ཞིག་སྤེལ་ནས་ཐོག་མའི་གསལ་བཤད་དེ་བཀའ་ཤག་གི་གསལ་བཤད་མིན་ཚུལ་བཤད་འདུག མི་མང་མང་ཚོགས་ནས་གཞི་འཛིན་ས་གང་ཡིན་མི་རྙེད་པ་ལྟ་བུའི་ཆེད་ཡིན་ནམ། ཡང་ན། ད་ལན་ཆོས་རིག་བཀའ་བློན་གྱིས་བྱ་སྤུ་གནོན་གྱི་སྒྲིག་འཛུགས་ཟེར་བ་ཞིག་ཡོད་པ་བརྗེད་སོང་བ་ནི་ཨེ་ཡིན། དོན་ངོ་མའི་ཆ་ནས། ཆོས་རིག་བཀའ་བློན་གྱིས་ཏཱ་ལའི་བླ་མ་བསྟན་བཤིག་ཡིན་པ་ངོས་ལེན་བྱས་འདུག དེ་ཡང་སྤྲུལ་སྐུ་ཨོ་རྒྱན་སྟོབས་རྒྱལ་གྱི་གནོན་ཤུགས་ལ་སྐྲག་ནས་ཡིན་པ་གསལ་པོ་རེད། སྤྱིར་བཏང་ཆོས་རིག་ལས་ཁུངས་ནི་དབུས་བོད་མིའི་སྒྲིག་འཛུགས་ཀྱི་བློན་ཆེན་ལས་ཁུངས་གཙོ་གྲས་ཤིག་པས། ཆོས་རིག་བཀའ་བློན་གྱི་བཀའ་ཁྱབ་གང་གནང་བ་རྣམས་བཀའ་ཤག་གི་ཐག་ཆོད་ཡིན་པར་གོ་དགོས་པ་རེད། གཡུ་ཐོགས་ཀརྨ་དགེ་ལེགས་སྒེར་གྱི་གསལ་བཤད་ཡིན་ཟེར་བའི་ཚབ་ཏུ་ཆོས་རིག་བཀའ་བློན་སྒེར་གྱི་གསལ་བཤད་ཡིན་ཚུལ་བཤད་པ་ནི། ཤེས་བཞིན་དུ་ཧམ་བཤད་དང་བསམ་གཟས་ནས་སྤྱི་ཚོགས་དཀྲུག་ན་འདོད་པ་ཙམ་རེད། ཀུན་སློང་མ་དག་པའི་སྐྱོན་དང་འགན་མ་ཁུར་བའི་ནོར་འཁྲུལ་ཡང་རེད།
ད་ནི་གཡུ་ཐོགས་ཀརྨ་དགེ་ལེགས་ཟེར་བའི་གྲྭ་རྒན་དེས་མངོན་སུམ་འཛེམ་མེད་དུ་ཁྲིམས་མེད་ལུགས་མེད་ཀྱི་བྱ་སྤྱོད་སྤེལ་བ་མང་དྲགས་སོང་། གྲྭ་རྒན་འདིས་བཀའ་བློན་གྱི་མིང་གི་རྒྱབ་ཏུ་ཡིབ་ནས་རང་དོན་བསྒྲུབས་པ་མང་དྲགས་སོང་། ད་ལོ་ཡང་མི་མང་གི་མདུན་ལ་ཡོང་ནས་ཧམ་པ་བཤད་ཡོང་གི་འདུག སྤྱི་ནོར་གོང་ས་རྒྱལ་བ་རིན་པོ་ཆེ་མཆོག་ནས། འཛམ་བུ་གླིང་གི་དད་ལྡན་མང་ཚོགས་ཀྱི་རེ་འདོད་བསྐོང་ཆེད། བརྙན་འཕྲིན་བརྒྱུད་ལམ་ལ་བརྟེན་ནས་ཐུགས་རྗེ་ཆེན་པོའི་དབང་ཆེན་གནང་རྒྱུ་ཡིན་པ་དེ། བསྟན་པ་བཤིག་བྱེད་ཀྱི་སྟ་རེ་ཡིན་ཚུལ་བཤད་མཁན་མདོ་སྟོད་སྤྱི་ཟུར་ཨོ་རྒྱན་སྟོབས་རྒྱལ་ལ་སྤྲུལ་སྐུ་དང་རིན་པོ་ཆེ་ཞེས་གང་ཡག་ཡག་དང་གང་སྙན་སྙན་འདྲ་ཞིག་བཤད་འདུག ཨོ་རྒྱན་སྟོབས་རྒྱལ་ཟེར་བའི་མི་དེས་རང་གི་སེམས་ལ་གང་དྲན་དྲན་ཙམ་ཞིག་ཁ་ནས་ཤོར་བ་ཡིན་ཚུལ་བཤད་པ་ནི་བདེན་པ་རེད། ཡིན་ན་ཡང་། བོད་མིའི་འདི་ཕྱི་གཉིས་ཀའི་སྐྱབས་མགོན། འཛམ་གླིང་ཞི་བདེའི་དེད་དཔོན། སྤྱི་ནོར་གོང་ས་རྒྱལ་བ་རིན་པོ་ཆེ་མཆོག་ལ་བསྟན་པའི་དགྲ་བོ་རེད་ཟེར་མཁན་ལ་དམིགས་ཡུལ་ངན་པ་མེད་པར་ཡིད་ཆེས་ཡོད་ན། དེས་ན་དམིགས་ཡུལ་ངན་པ་ཡོད་མཁན་གྱི་མི་དེ་སུ་རེད། དམིགས་ཡུལ་ངན་པ་སུ་ལ་ཡོད་དམ། ད་དུང་ཨོ་རྒྱན་སྟོབས་རྒྱལ་ཟེར་བའི་མི་དེས། ཏཱ་ལའི་བླ་མ་ཞེས་ཐད་ཀར་གོང་ས་མཆོག་གི་མཚན་སྨོས་ནས་གཞི་མེད་བསྐུར་འདེབས་བྱས་ཡོད་པ་ལ་མང་ཚོགས་ནས་བསམ་འཆར་དང་ཐུགས་ཁུར་གནང་དགོས་ངེས་ཡིན་པ་དེ་ལ་དོན་མེད་བློ་ཕམ་ཞེས་ཁྱད་གསོད་མ་རུང་བའི་ཚིག་འདི་དག་གིས་ཡང་བསྐྱར་འབངས་གྱེན་ལོག་གི་སྒོ་མོ་རྡུང་རྩིས་ཡིན་ནམ།
རིགས་གནས་གསར་བརྗེའི་ལིང་དགག་ཁུང་དགག་འགོ་བཙུགས་བྱས་འདུག ཧཧཧ། སྤེན་ཚེ་དང་བཀྲས་མཐོང་གི་ཨ་ཕྲུག་སྐབས་འཚོལ་རིང་ལུགས་པ་ཚོས་ཚེར་མ་ལ་སྐོར་ནས་རི་བོང་ལ་འཇབ་རྡོ་གཞུ་རྩིས་་འདུག དེའི་སྟེང་ཁམས་འབྲོག་ཀླད་སྟོང་བ་སྐྱག་སྤྲུལ་གྱི་ལྐུགས་རྟགས་བསྣན་ན་དེ་བས་ཀྱང་ལྟད་མོ། ཧཧཧཧ།
༄༅། །དེང་སང་༧གོང་ས་མཆོག་ལ་སྐྱོན་བརྗོད་པའི་གཏམ་ཞིག་ལ་བརྟེན་ནས་སྤྱི་ཚོགས་དྲ་ལམ་ན་དཀྲུག་ཤིང་ཆེན་པོ་ཞིག་སློང་རྒྱུར་འབད་བརྩོན་བྱེད་མཁན་མང་པོ་འདུག །དུས་བབ་ཚོས་ཀྱང༼ དེས་ན་དམིགས་ཡུལ་ངན་པ་སུ་ལ་ཡོད་དམ་༽ ཞེས་པས་འགོ་བརྗོད་བཞག་པ་འདི་ལ་ཡང་གོ་རྒྱུ་ངན་པ་ཞིག་འདུག་སྙམ། ༼ དེས་ན༽ ཞེས་པའི་རྒྱུ་མཚན་འདྲེན་པའི་ཚིག་དེས་དུས་བབ་ཚོའི་སེམས་ནང་ཡོད་པའི་ན་ཚ་རྙིང་པ་ཞིག་དམིགས་ཡུལ་ངན་པ་ལ་བསྙད་ནས་གཙོ་འདོན་བྱས་པ་འདྲ་པོ་འདུག། གང་ལྟར། དམིགས་ཡུལ་ངན་པ་གཞན་ལ་ཡོད་མེད་དོགས་པའི་དྲི་བ་འདིས་རང་ལ་དམིགས་ཡུལ་ངན་པ་ཡོད་པ་གསལ་སྟོན་བྱས་འདུག་པ་མ་ཚད། རྩ་བའི་གནས་ཚུལ་དོན་གཞན་ཞིག་ལ་བསྒྱུར་ནས་དམིགས་ཡུལ་གཞན་གྱི་ཆེད་བེད་སྤྱོད་བཏང་ཡོང་དུས་རྩ་བའི་གནས་ཚུལ་ངན་པ་ཅི་ཞིག་ཡིན་ཡང་དེ་ལ་དགག་པ་བྱེད་པའི་བསམ་པ་འགྱུར་ནས་དོན་གཞན་དང་དམིགས་ཡུལ་གཞན་ལ་བསམ་གཞིག་མི་བྱེད་ཀ་མེད་རེད།
མ་ཚད་རྩོམ་རྙོག་འདིར་བལྟས་དུས་རྩོམ་ཉམས་དང་དོན་སྙིང་མེད་པ་མ་ཚད། རྩོམ་རྙོག་འདི་སྤེལ་དགོས་དོན་ཡང་ཐུབ་བསྟན་ཐོག་མེད་ཀྱི་སྐད་ཆ་མཉན་ནས་ཡིན་ཚུལ་བཤད་འདུག །བཟང་པོར་བརྟེན་ནས་བཟང་དང་ངན་པར་བརྟེན་ནས་ངན་ཟེར་བའི་དཔེ་ལྟར། སྤྱི་ཚོགས་གཏོར་སེམས་དང་ཆོལ་ཁ་ཕྱོགས་རིས་ཁོ་ནས་སེམས་ཁམས་རྟག་ཏུ་འཁྲུགས་པའི་མིའི་རྒྱུ་རྐྱེན་ལ་བརྟེན་ན་འབྲས་བུ་ཡང་དེ་ལྟ་བུ་ལས་འབྱུང་མི་ནུས་པ་ནི་རྒྱུ་འབྲས་རྟེན་འབྲེལ་གྱི་འབྲེལ་བ་ལས་ཤེས་ཐུབ།
བོད་པའི་སྤྱི་ཚོགས་སྦར་མོ་གང་པོ་འདི་རྙོགས་ཁྲས་རྟག་ཏུ་བཀང་ཡོད་པ་ནི། གཏམ་བཤད་མཁན་དང་ཉན་མཁན་འདི་དག་གི་ཉེས་པ་ཡིན་ལ། གསར་ཁང་ཞིག་ལ་མཚོན་ན། མི་འཆར་གཏམ་ཅན་གྱི་དབང་དུ་སོང་ནས་བསམ་མེད་ཀླད་སྟོང་གི་རྩོམ་རྙོག་འདི་འདྲ་སྤེལ་བ་ནི་བསམ་ཡུལ་ལས་འདས་པ་ཡིན་པས་དེ་ནི་དུས་བབ་ལ་གསར་ཁང་གི་འགྲོ་སྟངས་ཙམ་ཡང་མེད་པའི་དོན་རྟགས་ཅི་མ་ཡིན། དམིགས་ཡུལ་ངན་པ་ནི་རང་གཞན་སུ་ལ་ཡོད་ཀྱང་ངན་པ་ཡིན་ནོ། །