ཚེ་རིང་བསམ་གྲུབ།
ཝཱཎ་མཐོ་སློབ།
ཉེ་ཆར་དཔལ་སྔ་འགྱུར་རྙིང་མའི་བླ་གྲལ་དུ་ཚུད་པའི་གནས་བརྟན་མཆོག་གླིང་སྐུ་ཐོག་གོང་མའི་བུ་རྒྱུད་ཨོ་རྒྱན་སྟོབས་རྒྱལ་གྱིས་༸རྒྱལ་བ་རིན་པོ་ཆེར་མཚན་དམས་བློ་ཡུལ་དུ་གཤོང་དཀའ་བ་ཞིག་ཞུས་པ་དེར། འཛམ་གླིང་ཡུལ་གྲུ་གང་སར་གནས་པའི་དད་དམ་གཙང་མའི་བོད་མི་ཁྲི་ཁྲག་མང་པོའི་སེམས་སུ་བཟོད་དཀའ་བའི་ན་ཟུག་དང་། འགའ་རེ་མཚན་མོའི་གཉིད་ཀྱང་མི་ཁུག་པའི་སེམས་སྡུག་བྱུང་ཡོད། ཡ་རབས་རྣམ་དཔྱོད་ཅན་གྱི་གང་ཟག་ཆོས་ཁས་མི་ལེན་མཁན་ཞིག་གིས་ཐོས་ཀྱང་བློ་ཕམ་སྐྱེ་དགོས་པའི་གནས་ཚུལ་ཞིག་ཆགས་ཡོད། གནས་ཚུལ་འདིའི་ཐད་ལ་དྲྭ་རྒྱའི་རྒྱུད་ལམ་ཐོག་ཏུ་རྒྱ་ཆེའི་མི་དམངས་དཀྱུས་མས་ཨོ་སྟོབས་ལ་ཡིག་ངག་གཉིས་ཐོག་ནས་རང་གི་བསམ་པ་མཚོན་པའི་ལན་འདེབས་དུ་མ་བྱས་ཏེ་སྨྲ་བརྗོད་ཀྱི་རང་དབང་བླངས་པ་ཀུན་གྱིས་ཤེས་གསལ་ལྟར་རེད། འོན་ཀྱང་ཀླུ་མཁར་བྱམས་ཀྱིས་ཨོ་སྟོབས་ཀྱི་རྒྱབ་ལངས་བྱས་ཏེ་མི་དམངས་དཀྱུས་མ་ཚོས་སྐྱོན་བརྗོད་བྱས་པ་དེ་ནོར་བ་དང་། ནོར་དགོས་དོན་ནི་༸རྒྱལ་བ་རིན་པོ་ཆེ་ལ་དད་པའི་དབང་གིས་སྐྱོན་བརྗོད་བྱས་པ་ཞིག་ཡིན་པ་དང་། དེ་བཞིན་དད་པ་ནི་རྒྱལ་ཁབ་དང་མི་དམངས་ཀྱི་རང་དབང་ལ་ཉེན་ཚབས་ཆེ་རབས་ཀྱི་སྐད་ཆ་དམ་དུམ་མང་ཙམ་བཤད་འདུག མ་ཟད་ཁྲིམས་ཁང་མ་གཏོགས་མི་དམངས་ལ་དཀར་ནག་དབྱེ་འབྱེད་ཀྱི་ཐོབ་ཐང་མེད་ཅེས་བཤད་པའང་ཐོས།
སྤྱིར་བཏང་ཀླུ་མཁར་བྱམས་སུ་ཡིན་མིན་ངོ་སྤྲོད་མི་དགོས་ཀྱང་། ངས་འདིར་ཐོག་མར་དྲན་བསྐུལ་ཐུང་ཐུང་ཞིག་བྱེད་འདོད་བྱུང་། ཀླུ་མཁར་བྱམས་ཀྱིས་དེ་སྔོན་རྩོམ་ཡིག་ཞིག་གི་ནང་༸རྒྱལ་བ་རིན་པོ་ཆེར་བླ་རྒན་ཅེས་བྲིས་པ་རེད། དེ་ནས་བོད་རིག་པའི་མཁས་པ་ཨེ་ལོ་ཌི་སི་པར་ལིང་ (Elliot Sperling) ལགས་ཀྱི་དགོངས་རྫོགས་རྗེས་དྲན་རྩོམ་ཡིག་ཞིག་གི་ཁ་བྱང་ལ་ལོ་བརྒྱ་དང་བཅུ་གསུམ་སྡོད་དགོས་མཁན་དེ་ཁྱེད་རེད་ཅེས་བྲིས་ཡོད། མ་ཟད་པཎ་ཆེན་རིན་པོ་ཆེ་བལ་ཡུལ་དུ་ཕེབས་སྐབས་སྐུ་སྒེར་ནས་མི་སྣ་ཆེད་གཏོང་གིས་དར་ཆ་ནག་པོ་འཕྱར་དུ་བཅུག་པ་རེད་ཅེས་ཀྱང་བྲིས་མྱོང་ཡོད། དེ་ལས་ཀྱང་གལ་ཆེ་བ་ཞིག་ནི་ཁོ་རང་གིས་བྲིས་པའི་དོན་ཚན་གཅིག་ལ་ཡང་ཁོ་རང་གིས་ཁུངས་སྐྱེལ་འགྲེལ་བརྗོད་གཙང་མ་ཞིག་རྩ་བ་ནས་བྱེད་ཐུབ་མེད་པ་ནི་ཚང་མས་ཤེས་གསལ་རེད། བྱས་ཙང་མི་འདི་འདྲ་ཞིག་གིས་༸རྒྱལ་བ་རིན་པོ་ཆེར་བལྟ་སྟངས་དྲང་པོ་ཞིག་འཛིན་ཐུབ་པའི་རེ་བ་ཡོད་དམ། ཁོས་བཤད་པའི་སྐད་ཆར་ཆ་འཇོག་བྱེད་འོས་པ་ཞིག་རེད་དམ།
དེ་བཞིན་ཀླུ་མཁར་གྱི་རྒྱབ་སྐྱོར་བ་མང་པོ་ཞིག་ནི་འདས་པའི་དུས་སམ། ཡང་ན་ད་ལྟའི་སྐབས་སུ་༸རྒྱལ་བ་རིན་པོ་ཆེར་གོ་སྐབས་ནམ་བྱུང་ལ་ཟུར་ཟ་དང་། མི་འདོད་པའི་རྣམ་འགྱུར་སྟོན་མཁན་ཁག་རེད། བྱས་ཙང་ཀླུ་མཁར་ནི་དུས་ནམ་ཡང་ཕྱོགས་ལྷུང་མེད་མཁན་གྱི་མི་ཞིག་རྩ་བ་ཉིད་ནས་ཆགས་མེད།
ད་ནི་དོན་ངོ་མ་དེ་བཤད་ན། ཐོག་མར་ཁྲིམས་ཁང་མ་གཏོགས་མི་དམངས་ལ་དཀར་ནག་དབྱེ་འབྱེད་ཀྱི་ཐོབ་ཐང་མེད་ཅེས་པ་དེའི་ཐད་བསམ་བློ་ཞིག་གཏང་ན། སྤྱིར་བཏང་ཁྲིམས་ཐག་གཅོད་མཁན་དེ་ཁྲིམས་ཁང་ཡིན་པ་ལས། མི་དམངས་ལ་དབང་ཆ་མེད་པ་བདེན་ཡང་། མི་དམངས་ཀྱིས་སོ་སོའི་རྣམ་དཔྱོད་བེད་སྤྱོད་བྱས་ནས་ལེགས་ཉེས་འབྱེད་པའི་ཐོབ་ཐང་མེད་ཟེར་ན། མི་དམངས་ཀྱི་གཞི་རྩའི་རང་དབང་འཕྲོག་པ་གསལ་པོ་ཡིན། འཛམ་གླིང་གི་མང་གཙོའི་ཡུལ་གྲུབ་དུ་མར་རྔམ་སྟོན་ཁྲོམ་སྐོར་བྱེད་བཞིན་པ་དེ་ཚོ་མི་དམངས་ཀྱིས་ལེགས་ཉེས་དཀར་ནག་དབྱེ་འབྱེད་བྱས་ནས་བྱུང་བ་ཞིག་མ་རེད་དམ།
ད་ཐེངས་ཨོ་སྟོབས་ལ་མི་དམངས་དཀྱུས་མས་རང་གི་བསམ་པ་མཚོན་པའི་ལན་འདེབས་བྱས་པ་རེད་མ་གཏོགས་ཀླུ་མཁར་གྱིས་འུར་བརྒྱབས་པ་ནང་བཞིན་ཁྲིམས་ཁང་དང་ཉེན་རྟོག་པའི་ལས་ཀ་མི་དམངས་ཀྱིས་བླངས་ནས་བྱས་པ་ཞིག་ག་ནས་ཡིན། ཨོ་སྟོབས་ལ་མི་དམངས་ཚོས་རང་གི་བསམ་པ་མཚོན་པའི་ལན་འདེབས་སྐྱོན་བརྗོད་བྱས་པ་དེ་ཇི་ལྟར་བྱས་ནས་ནོར་བ་རེད། མང་གཙོ་དང་རང་དབང་གི་སྐད་ཆ་ཤོད་ཀྱིན་ཤོད་ཀྱིན། ཀླུ་མཁར་རང་ཉིད་ཀྱི་བསམ་པའི་འཁོར་རྒྱ་ལས་བརྒལ་བ་དང་། བསམ་ཚུལ་དང་མི་མཐུན་པའི་མི་དམངས་ཀྱི་མངོན་འདོད་དང་བསམ་ཚུལ་ཚང་མ་རྒྱུ་མཚན་མེད་པ་དང་། རང་དབང་དང་མང་གཙོའི་འགལ་རྐྱེན་རེད་ཅེས་བཤད་པ་དེ་ནི་དངོས་གནས་གད་མོ་ཤོར་དགོས་པའི་གནས་ཚུལ་ཞིག་ཡིན། དངོས་གནས་བྱས་ན་༸རྒྱལ་དབང་རིན་པོ་ཆེ་བསྟན་བཤིག་མིན་པ་ལོང་བས་ཀྱང་མཐོང་ཐུབ་ཀྱི་རེད། ནོར་མཁན་དེ་ཨོ་སྟོབས་རེད། དེའི་དཀར་ནག་དབྱེ་འབྱེད་བྱེད་མཁན་གཞུང་ཞིག་ཡོད་པའི་དབང་དུ་བཏང་ཡང་། མི་དམངས་ཀྱིས་བྱེད་མི་ཆོག་པ་གང་ཡིན། དེའི་ཐོབ་ཐང་དང་། བཟང་སྤྱོད་ཀྱི་འགན་དབང་བོད་མི་ཚོར་མེད་ན་སུ་ལ་ཡོད་དམ། ཀླུ་མཁར་ཁྱོད་ཀྱི་བསམ་སྤྱོད་ལ་དཀར་ནག་དབྱེ་འབྱེད་ཀྱི་ཐོབ་ཐང་དེ་མི་དམངས་ཚོར་མེད་ན། ཁྱོད་ལ་ཁོང་ཚོའི་སྲིད་སྐྱོང་གི་འོས་མིར་ལང་རྒྱུའི་ཐོབ་ཐང་དེ་ཡང་བཙན་པོ་དབང་ཡོད་དང་། མགོ་སྐོར་བསླུ་འབྲིད་བྱས་ན་མ་གཏོགས་ཇི་ལྟར་འཐོབ་སྲིད་དམ།
ཡང་ཁྱོད་ཀྱིས་ཨོ་སྟོབས་ལ་སྐྱོན་བརྗོད་བྱས་པ་དེ་ནི་༸རྒྱལ་བ་རིན་པོ་ཆེར་དད་པ་ཡོད་པའི་དབང་གིས་ཡིན་པ་དང་། དད་པ་ནི་རྒྱལ་ཁབ་དང་མི་དམངས་ཀྱི་རང་དབང་ལ་ཉེན་ཚབས་ཆེ་རབས་བཤད། ང་ཚོས་ཐོག་མར་དད་པ་ཟེར་བ་གང་འདྲ་ཞིག་ལ་ཟེར་མིན་ཤེས་དགོས། ནང་པ་སངས་རྒྱས་པའི་གཞུང་དུ། དད་པ་ནི་ཡུལ་ཁྱད་པར་ཅན་ལ་མངོན་པར་ཡིད་ཆེས་པའམ། དང་བའམ། འདོད་པའི་སེམས་བྱུང་ངོ་ཞེེས་གསུངས་ཡོད། སྟབས་བདེ་ཁ་གསལ་གྱི་ཐོག་ནས་འགྲེལ་བརྗོད་ཅིག་བྱས་ན། དད་པ་ཟེར་བ་ནི་ཐོག་མར་དད་པ་བྱ་ཡུལ་ནི་བཟང་པོའི་ཡོན་ཏན་གྱིས་ཁྱད་པར་དུ་འཕགས་པ་ཞིག་ཡིན་དགོས། དེ་ནས་བཟང་པོའི་ཡོན་ཏན་དང་དེ་ལྡན་གྱི་གང་ཟག་དེར་ཡིད་ཆེས་མེད་ན་དད་པ་མི་སྐྱེ་བ་ཡིན། དེ་བཞིན་ཕ་རོལ་པོའི་ཡོན་ཏན་ལ་དང་བའམ་བརྩི་མཐོང་མེད་ནའང་དད་པ་མི་སྐྱེ་བ་ཡིན། ཡང་ཕ་རོལ་པོའི་ཡོན་ཏན་ཁྱད་པར་ཅན་རྣམས་རང་ལ་འབྲེལ་བ་མི་འདུག་སྙམ་ནས་དེ་འཐོབ་འདོད་ཀྱི་བསམ་པ་མེད་ནའང་དད་པ་མི་སྐྱེ་བ་ཡིན།
ད་ནི་བཤད་འདོད་པའི་དོན་ངོ་མ་འདི་ཡིན། བོད་མི་ཚོས་༸རྒྱལ་དབང་རིན་པོ་ཆེར་སྔར་ལས་ལྷག་པའི་དད་པ་བྱེད་བཞིན་པ་དེ་ནི་རྩ་བའི་ཆ་ནས་༸རྒྱལ་བ་རིན་པོ་ཆེའི་མཛད་སྤྱོད་ལ་བརྟེན་ནས་འབྱུང་བ་ཞིག་རེད་མ་གཏོགས་མགོ་བསྐོར་བསླུ་འབྲིད་བྱས་པ་ཞིག་མ་ཡིན་ཞིང་། བོད་མི་རྣམས་ལྐུགས་དྲགས་པའི་དབང་གིས་ཀྱང་རྩ་བ་ནས་མིན། སྤྱན་རས་གཟིགས་ཀྱི་རྣམ་སྤྲུལ་ཡིན་པ་ཙམ་གྱིས་ཀྱང་ག་ལ་ཡིན་ཏེ། སྤྱན་རས་གཟིགས་ཀྱི་རྣམ་སྤྲུལ་ཡིན་པར་གྲགས་པའི་བླ་སྤྲུལ་གཞན་ཡང་ཡོད་པའི་ཕྱིར་རོ།། དེ་བཞིན་བོད་མི་ཚོ་དད་པ་བྱ་རྒྱུར་དགའ་དྲགས་ནས་དད་པ་བྱ་ཡུལ་སྐྱེས་བུ་ཁྱད་པར་ཅན་གཞན་མ་རྙེད་པའམ་མེད་པ་དེ་འདྲའང་མ་རེད། དོན་གྱི་སླད་དུ་ཁོང་ཅག་གི་མཚན་ཙམ་སྨོས་ན། འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས། ས་སྐྱ་གོང་མ་ཡབ་སྲས། བདུད་འཇོམས་རིན་པོ་ཆེ། རྒྱལ་དབང་ཀརྨ་པ། དིལ་མགོ་མཁྱེན་བརྩེ། རྡོ་གྲུབ་ཆེན། རྒྱལ་དབང་འབྲུག་པ། གླིིང་རིན་པོ་ཆེ། བྱ་བྲལ་སངས་རྒྱས་རྡོ་རྗེ་ལ་སོགས་པའི་བསྟན་འཛིན་གྱི་སྐྱེས་ཆེན་དུ་མ་ཡོད།
དེ་ཡང་དད་པ་ཞེས་པ་ནི་ཡིད་ཆེས་ཀྱི་ཐོག་ནས་བྱུང་བ་རེད། ཡིད་ཆེས་དེ་ཇི་འདྲ་བྱས་ནས་བྱུང་བ་རེད་དམ་ཟེར་ན། ༸རྒྱལ་བ་རིན་པོ་ཆེ་དགུང་ལོ་བཅུ་དྲུག་ལ་ཕེབས་པའི་སྐབས་སུ་རྒྱལ་སྲིད་ཆོས་སྲིད་ཀྱི་སྐུ་དབང་ཕུལ་བ་ནས་བཟུང་ཏེ། ད་ལྟ་བར་དུ་མི་ལོ་བདུན་བཅུ་ཙམ་འདས་ཟིན་ཞིང་། དུས་ཡུན་དེའི་རིང་བོད་ཀྱི་ལོ་རྒྱུས་ཀྱི་དྲན་ཐོའི་ནང་གསལ་མ་མྱོང་བའི་དཀའ་སྡུག་ཚད་ལས་འདས་པ་བོད་མི་ཚོས་མྱངས་ཡོད། རྒྱ་གར་ལ་བྲོལ་བྱོལ་དུ་སླེབས་སྐབས་སྤྲང་པོ་སྤྲང་ནག་ཡིན་པའི་བོད་མི་ཚོས་༸རྒྱལ་བ་རིན་པོ་ཆེར་ཡར་དབུལ་རྒྱུ་གང་ཡང་མེད་ལ། ༸རྒྱལ་བ་རིན་པོ་ཆེ་ནི་དགུང་གྲངས་ཉི་ཤུའི་ནང་དུ་སླེབས་པའི་གཞོན་ནུ་ཞིག་རེད། མི་ཕལ་བ་ཞིག་ཡིན་ན་གཞོན་ནུའི་སྣང་བ་སྐྱིད་སྐྱིད་ཀྱི་འདུ་འཛིར་གཡེང་ནས་བོད་དང་བོད་མིའི་རྩ་དོན་དང་བདེ་ཐབས་ལ་སྣང་མེད་དང་འཐུས་ཤོར་གཏོང་སྲིད་པ་ཞིག་རེད། འོན་ཀྱང་བོད་དང་བོད་མི་རྣམས་ཇི་ལྟར་ཐབས་སྐྱོ་ཞིང་རེ་བ་མེད་པ་ལྟ་བུ་ཞིག་ཏུ་གྱུར་ཀྱང་། ཁོང་གིས་བོད་མི་རྣམས་རྩ་བ་ནས་ཡལ་བར་དོར་མེད། ཐོག་མར་སློབ་གྲྭ་དང་། གཞིས་ཆགས། དེ་ནས་དགོན་སྡེ་ཁག་རིམ་པས་འཛུགས་སྐྲུན་མཐུན་འགྱུར་མཛད་ཅིང་། བོད་གཞུང་གི་འགྲོ་ལུགས་ཁག་དུས་བསྟུན་རིམ་པས་ལེགས་བཅོས་མཛད་པ་བཅས་ད་ལྟའི་ཆར་འཛམ་གླིང་གི་མང་གཙོའི་རྒྱལ་ཁབ་མང་པོ་ཞིག་ལས་ཀྱང་ཚགས་ཚུད་པའི་བཙན་བྱོལ་གཞུང་དང་སྤྱི་ཚོགས་འདི་ཆགས་པ་རེད། རྒྱ་གར་གྱི་གྲོང་ཁྱེར་ཆེ་ཁག་དེ་ཚོའི་ནང་དུ་ལོ་ཤ་ཤིན་ཏུ་ཕྲ་བའི་ཕྲུ་གུ་མང་པོ་ལམ་ཟུར་དུ་སློང་བཞིན་པ་དེ་འདྲ་མང་དུ་མཐོང་རྒྱུ་ཡོད་ཀྱང་། བོད་ཕྲུག་གཅིག་ཀྱང་མེད་པ་འདི་བླ་མ་དྲིན་ཆེན་འདིའི་བཀའ་དྲིན་ཉག་ཡིན་པ་ངོ་ཚ་ཁྲེལ་གཞུང་ཡོད་པའི་བོད་མི་བསམ་ཡོད་ཚོས་ཤ་དང་རུས་པའི་གསེང་ནས་ཀྱང་ཚོར་གྱི་ཡོད། དེ་ལྟ་བུའི་དབུ་འཁྲིད་ལ་མི་དམངས་ཀྱིས་ཡིད་ཆེས་བྱས་པ་དེ་ནོར་བ་ཡིན་རབས་ཤོད་མཁན་དེ་ར་བཟི་མིན་ན་སྨྱོས་པ་རེད་དམ། ཡང་ན་འཇིག་རྟེན་མི་ནག་གི་ལྟ་བ་ལས་ཀྱང་ལོག་པར་འཁྱམས་པའི་ལྟ་བ་གསར་པ་ཞིག་རེད་དམ། འདི་ལྟ་བུའི་སྐྱེས་ཆེན་འདི་ལ་བདེན་པའི་གཞི་རྩ་ཁྱོན་ནས་མེད་པའི་སྐྱོན་བརྗོད་འདི་འདྲ་བྱས་ན། བོད་མི་ཚོའི་སེམས་ཀྱིས་བཟོད་ཐུབ་ཀྱི་རེད་དམ། ཀླུ་མཁར་གྱི་སྐད་ཆའི་ནང་དུ་བོད་མི་ཚོ་འཕྲུལ་ཆས་ཀྱི་མི་(Robot)ལྟར་བྱེད་རྒྱུ་མེད་རབས་བཤད། འོན་ཀྱང་དྲིན་ཆེན་༸རྒྱལ་བ་རིན་པོ་ཆེར་གཞི་མེད་སྐྱོན་བརྗོད་བྱེད་དུས་བོད་མི་ཚོ་འཕྲུལ་ཆས་ཀྱི་མི་ (Robot)ལྟར་བཀའ་དྲིན་བསམ་ཤེས་མེད་པར་བསྡད་དགོས་རེད་དམ།
དེ་བཞིན་༸རྒྱལ་བ་རིན་པོ་ཆེ་ནི་ཆུང་བྱིས་པའི་དུས་ནས་ཡོངས་འཛིན་རྣམ་གཉིས་དང་། རིས་མེད་དགེ་བའི་བཤེས་གཉེན་དུ་མ་བསྟེན་ནས་མདོ་རྒྱུད་ཀྱི་གཞུང་ལ་ཐོས་བསམ་སྒོམ་གསུམ་འགྲན་ཟླ་བྲལ་བ་མཛད་པར་བརྟེན། མཁས་བཙུན་བཟང་གསུམ་གྱི་ཡོན་ཏན་ཉི་འོད་ལྟར་ཁྱབ་ཅིང་། མཁྱེན་བརྩེ་ནུས་གསུམ་གྱི་ཡོན་ཏན་གསེར་ས་འོག་གི་འོད་ལྟར་འཕྲོ་བ་བྱུང་བས། མི་དམངས་དཀྱུས་མ་ཚུན་ཚད་ཀྱིས་ཁོང་ནི་དོན་དམ་པར་སྤྱན་རས་གཟིགས་དངོས་སུ་བྱོན་པ་ཞིག་ཡིན་པར་ཡིད་ཆེས་བྱེད་ཀྱི་ཡོད།
སྤྱན་རས་གཟིགས་ཞེས་པའི་ལྷ་དེ་ནི། རྒྱ་ནག་གི་ཀྭན་ཡིང་ལྟ་བུའམ། རྒྱ་གར་གྱི་ལྷ་དབང་ཕྱུག་ལྟ་བུ་མ་ཡིན་པར་དགྲ་གཉེན་རིས་སུ་མ་བཅད་པར་ཚང་མར་སྙིང་རྗེས་གཟིགས་མཁན་བྱང་ཆུབ་སེམས་པའམ་སངས་རྒྱས་ཤིག་ཡིན། འདི་ནི་བོད་མི་རྣམས་ཀྱི་སེམས་སུ་༸རྒྱལ་བ་རིན་པོ་ཆེར་དད་པ་སྐྱེ་སྟངས་ངོ་མ་འདི་ཡིན་པ་ཤེས་རོགས་མཛོད།
ཡང་དད་པ་ཞེས་པའི་ཕྱོགས་གཞན་ཞིག་ནི་དང་བ་རེད། བོད་མི་ཚོ་ནི་༸རྒྱལ་བ་རིན་པོ་ཆེའི་ཐུགས་རྒྱུད་ཀྱི་བྱམས་སྙིང་རྗེ། གཞན་ཕན། བཟོད་སྒོམ་སོགས་ལ་རང་བཞིན་གྱིས་དང་བ་སྐྱེ་ཡི་ཡོད། ཡང་ན་དགའ་མོས་དང་བརྩི་མཐོང་ཡོང་གི་ཡོད། ཅིའི་ཕྱིར་ཞེ་ན། བོད་མི་ཚོ་ནི་བྱམས་སྙིང་རྗེ་དང་། གཞན་ཕན། བཟོད་སྒོམ་སོགས་ལ་རིན་ཐང་ཆེན་པོ་འཇོག་མཁན་གྱི་མི་རིགས་ཤིག་ཡིན། ཡོན་ཏན་དེ་དག་ཡོད་མཁན་ལ་དད་གུས་ཞུ་མཁན་གྱི་མི་རིགས་ཤིག་ཡིན། རིན་ཐང་འཇོག་ལུགས་འདི་ནོར་བ་རེད་དམ། ༸རྒྱལ་བ་རིན་པོ་ཆེར་བོད་མིའི་དད་པ་འཐོབ་སྟངས་ངོ་མ་འདི་འདྲ་རེད། གལ་སྲིད་བོད་མི་ཚོ་ནགས་གསེབ་གྱི་གཅན་གཟན་གཏུམ་པོ་སྤུ་ཟིང་ཟིང་དེ་ཚོ་ལྟ་བུ་ཞིག་ཡིན་ན་གཞན་གྱི་བྱམས་སྙིང་རྗེ་དང་། གཞན་ཕན། བཟོད་སྒོམ་སོགས་ལ་དང་བ་སྐྱེ་རྒྱུར་གཅིག་བྱས་ན་ཁག་པོ་ཡོད་སྲིད།
དད་པའི་ཕྱོགས་གཞན་པ་དེ་དང་བ་སྐྱེ་ཡུལ་གྱི་ཡོན་ཏན་དེ་དག་འཐོབ་ན་སྙམ་པའི་འདོད་པ་དེ་རེད། བྱས་ཙང་བླ་མར་ཡོད་པའི་བཟང་པོའི་ཡོན་ཏན་རྣམས་རང་ལ་སྐྱེ་བར་འདོད་པ་དེ་ཡང་དད་པ་ཡིན། བྱམས་བརྩེ་དང་། བཟོད་སྒོམ་སོགས་ཀྱི་ཡོན་ཏན་འཐོབ་ན་སྙམ་པ་དེ་སྐྱོན་ག་ལ་ཡིན། དེང་སང་ནུབ་ཕྱོགས་ཡར་ཐོན་ཅན་གྱི་རྒྱལ་ཁབ་ཚོས་འཚོལ་བསྙེགས་བྱེད་བཞིན་པ་གཅིག་ནི་བྱམས་བརྩེ་དང་བཟོད་བསྲན་ལྟ་བུའི་ཡོན་ཏན་དག་རེད།
ད་ལྟའི་བོད་མི་རྣམས་ཀྱིས་༸རྒྱལ་དབང་རིན་པོ་ཆེར་དད་པ་འབྱུང་སྟངས་ངོ་མ་འདི་ཡིན་པ་ཤེས་རོགས་མཛོད། ཕྱོགས་གཞན་ཞིག་ནས་བཤད་ན། བོད་མི་ཚོས་༸རྒྱལ་བ་རིན་པོ་ཆེར་དད་པ་བྱས་པ་འདི་ནི་གང་ཟག་རྒྱུས་ཡོད་ཡིད་ཆེས་འཕེར་བ་ཞིག་ལ་བྱས་པ་རེད། སློབ་མས་བླ་མ་བརྟག་ཟེར་བ་དེ་ཡང་རྒྱུས་ལོན་བྱེད་ཟེར་བའི་དོན་ཡིན།
ཀླུ་མཁར་གྱིས་དད་པ་ནི་རྒྱལ་ཁབ་དང་མི་དམངས་ཀྱི་རང་དབང་ལ་ཉེན་ཚབས་ཆེ་རབས་བཤད། དེ་ནི་མ་ཤེས་རྨོངས་པའི་གཏམ་འབའ་ཞིག་ལས་མ་འདས། རྒྱལ་ཁབ་དང་གང་ཟག་སུ་གང་གི་རང་དབང་སོགས་ལ་མཚན་ཉིད་ཚང་བའི་དད་པས་གནོད་སྐྱོན་ནམ་ཡང་གཏོང་མི་སྲིད། རྒྱུ་མཚན་གང་ཡིན་ཟེར་ན། དད་པ་ཞེས་པ་ནི་ཡུལ་ཁྱད་པར་ཅན་གྱི་ཡོན་ཏན་བྱམས་སྙིང་རྗེ། བཟོད་སྒོམ། གཞན་ཕན་ལྟ་བུར་ཡིད་ཆེས་དང་། དགའ་མོས། རང་ཉིད་ལ་འཐོབ་འདོད་ཀྱི་བསམ་པ་ཞིག་ཡིན། མདོར་ན། མཚན་ཉིད་ཚང་བའི་དད་པས་ནི་འཛམ་གླིང་སྤྱི་དང་བྱེ་བྲག་རྒྱལ་ཁབ་སོ་སོར་ཞི་བདེ་རང་དབང་དོན་མཐུན་ཡོང་བར་མཐུན་པའི་རྒྱུ་མེད་དུ་མི་རུང་བ་ཞིག་ཡིན། འོན་ཀྱང་དད་པ་བྱ་ཡུལ་ནོར་ན་ཡུལ་སྡེ་ཕུ་དཀྲུགས་མདའ་དཀྲུགས་བཟོ་བ་མཐོང་ཆོས་ཡིན། འདི་ལ་ཡོངས་གྲངས་སུ་རྨོངས་དད་ཟེར། ༸རྒྱལ་བ་རིན་པོ་ཆེས་ལན་གྲངས་དུ་མར་དུས་རབས་ཉི་ཤུ་རྩ་གཅིག་པའི་ནང་པ་བྱེད་དགོས་པ་དང་། ཆོས་ཀྱི་ནང་དོན་ལ་སློབ་སྦྱོང་བྱས་ནས་སྔོན་ལ་ཤེས་པ་བྱེད་དགོས། བླ་མ་སྤྲུལ་སྐུ་ཟེར་ཚད་ལ་ཡིད་ཆེས་མི་བྱེད་པ་སོགས་ཀྱི་བཀའ་སློབ་ལམ་སྟོན་གནང་དང་གནང་བཞིན་པ་ཡིན། མདོར་ན། བོད་རྒྱལ་ཁབ་འདིར་དབུ་འཁྲིད་ཀྱིས་མི་དམངས་ལ་བྱམས་བརྩེ་ཆེ་བ་དང་། མི་དམངས་ཀྱིས་དབུ་འཁྲིད་ལ་དད་མོས་ཆེ་བ་འདི་ནོར་བ་རེད་དམ། ཀླུ་མཁར་ཁྱེད་རང་ཉིད་ཀྱི་ཁྱིམ་ཚང་ཆུང་ཆུང་དེར་ཆ་བཞག་ན། ཕན་ཚུན་བྱམས་བརྩེ་དང་ཡིད་ཆེས་ཡོད་ན་ཡག་གི་རེད་དམ། ཡང་ན་རྟག་ཏུ་དོགས་པ་དང་སྐྱོན་བརྗོད་བྱེད་བཞིན་བསྡད་ན་ཡག་གི་རེད། ཁྱོད་ཀྱི་བསམ་བློ་གཏོང་སྟངས་བྱས་ན་ནང་མི་ཕན་ཚུན་བྱམས་བརྩེ་དང་ཡིད་ཆེས་ཡོད་ན་ཁྱིམ་ཚང་ཡར་རྒྱས་ལ་གནོད་ཀྱི་ཡོད་ངེས་རེད།
དེས་ན་ང་ཚོ་བོད་མི་རྣམས་ཀྱིས་དད་པ་བྱ་ཡུལ་ནོར་མེད་ལ། དད་པའི་བྱས་པའི་འབྲས་བུ་བཟང་པོ་ཡང་ངོམ་རྒྱུ་ཡོད།
སྨྲས་པ།
ཨུ་ཚུགས་བློ་ཡིས་དག་སྣང་མི་དགོས་ཤིང་།།
མཛད་པ་རེ་ལ་འགྲེལ་པའང་མི་དགོས་པས།།
ཚུར་མཐོང་ཀུན་ལའང་འབད་མེད་དད་པ་ཡི།།
རྟེན་བཟང་དྲིན་ཆེན་བླ་མ་རྟག་ཏུ་རྒྱལ།།
དད་པའི་ཡུལ་མཆོག་མཆོག་གསུམ་དམ་པ་ཡི།།
རང་གཟུགས་བོད་མིའི་བསོད་ནམས་བགོ་བསྐལ་དུ།།
ཤར་བའི་བླ་མའི་ཐུགས་བརྩེའི་ཉི་འོད་ལས།།
བསོད་ནམས་དམན་དག་ཅི་ཕྱིར་བྲོས་པར་བྱེད།།
ཁྱིར་རྒན་ཀླུ་བྱམས་ཀྱིས་ད་བར་༸གོང་ས་རྒྱལ་བ་རིན་པ་དང་བོད་དོན་ཁ་ཁ་གཏོང་ཐབས་བྱས་ནས་ད་བར་ཡོང་བ་རེད་་་་་སྐད་ཆ་དེ་གསར་པ་ནམ་ཡང་མ་རེད་་་་ཁོས་ལོ་ངོ་བཅུ་ཕྲག་སྔོན་ནས་ད་བར་ལས་འགུལ་དེ་རྒྱུན་འཁྱོང་བྱས་ནས་ཡོང་རེད་་་་་་ལྷག་པར་ཁོས་ལྷ་རྒྱ་རི་སོགས་གཞོན་སྐྱེས་སེམས་ཤུགས་ཅན་དེ་ཚོར་མགོ་སྐོར་བཏང་་་་་བེད་སྤྱོད་བཏང་་་་་དགུ་བཅུ་གསུམ་ཚོགས་པའི་ཚོགས་གཙོའི་གོ་མིང་འཕྲོགས་པ་སོགས་བྱས་ཡོད་་་་ད་དུང་་་་་་་ཁོའི་ཡོང་འབབ་དེད་སོང་ན་ཨ་ཞང་ཚང་གིས་སྤྲོད་བཞིན་པ་ཁ་གསལ་རེད་་་་་གཞན་ཁོས་ཨོ་སི་ཀྲི་ལི་ཡར་མི་འགྲོ་ཞེས་ཕ་རྒན་གྱི་མིང་ཐོག་ནས་མནའ་བཏབས་པ་རེད་་་་་་་་མཐའ་རང་གི་རླངས་འཁོར་རང་གིས་བཅག་ནས་སྐྱག་རྫུན་བཤད་ནས་ཨོ་སི་ཀྲི་ལི་ཡར་ཕྱིན་པ་རེད་་་་་མ་ཟད་་་་སྲིད་སྐྱོང་མ་འཐོབ་པ་ཤེས་ཀྱིན་འོས་མི་ལངས་ནས་བོད་པའི་ཆབ་སྲིད་དབུ་ཁྲིད་ཀྱི་འོས་མིང་སྤྱད་ནས་ཨ་རིའི་ནང་དུ་རྐུ་མ་རྒྱག་པར་ཕྱིན་པ་སོགས་གྲངས་མེད་རེད་་་་ད་ཕན་ཁོ་འབོད་མཁན་དང་དྲངས་མཁན་ཚང་མ་སྐྱག་ཟན་ཡིན་པ་ཤེས་དགོས་རེད་ད་་་་ང་ཚོ་བོད་ནང་དུ་ཡོད་པ་ཚོ་ངུ་མ་ཆུགས་རོགས་་་་་