ཨ་རིའི་སྲིད་འཛིན་འོས་བསྡུ་ཆེན་མོ།

འདི་ལོའི་ཨ་རིའི་སྲིད་འཛིན་འོས་བསྡུ་ཆེན་མོ་དེ་ཉིད་འཆར་ལ་ཉེ་བའི་ཕྱི་ཟླ་ ༡༡ ཚེས་ ༣ ཉིན་གནང་གཏན་འཁེལ་བ་ལྟར། ད་ལྟའི་ཆར་དམངས་གཙོ་ཚོགས་པའི་སྔོན་འགྲོའི་འོས་མི་འདེམས་སྒྲུག་གི་ལས་རིམ་ཡོངས་སུ་མཇུག་བསྒྲིལ་ཏེ། ཉེ་ཆར་ཟླ་འདིའི་ཕྱི་ཚེས་ ༡༧ ནས་ ༢༠ བར་གྱི་དམངས་གཙོ་ཚོགས་པའི་སྲིད་འཛིན་འོས་བསྡུའི་རྒྱས་འཛོམས་ཚོགས་འདུའི་ (Democratic National Convention) སྟེང་། ཨ་རིའི་གྲོས་ཚོགས་གོང་མའི་འཐུས་མི་དང་། ཨོ་བྷོ་མའི་དུས་སྐབས་ཀྱི་སྲིད་འཛིན་གཞོན་པ་ཇོ་བྷའེ་ཌེན་ (Joe Biden) གཞུང་འབྲེལ་སྒོས་དམངས་གཙོ་ཚོགས་པའི་སྲིད་འཛིན་འོས་མིར་བསླངས་ཡོད་ཅིང་། གྲོས་ཚོགས་གོང་མའི་འཐུས་མི་དང་འདི་ལོའི་དམངས་གཙོ་ཚོགས་པའི་སྲིད་འཛིན་འོས་མིར་ལངས་པའི་ཀ་མ་ལ་ཧ་རི་སི་ (Kamala Harris) སྲིད་འཛིན་གཞོན་པར་མིང་འདོན་བྱས་ཡོད་པ་རེད། དེ་བཞིན་སྤྱི་མཐུན་ཚོགས་པའི་གཞུང་འབྲེལ་སྲིད་འཛིན་འོས་མི་ཊོམ་ཕུ་དང་། ད་ལྟའི་སྲིད་འཛིན་གཞོན་པ་མེག་པེན་སི་བསྐྱར་དུ་སྲིད་འཛིན་གཞོན་པར་མིང་འདོན་བྱས་ཡོད་པ་རེད།

སྤྱིར་འདི་ལོའི་ཨ་རིའི་སྲིད་འཛིན་འོས་བསྡུ་དེ་དཔལ་འབྱོར་དང་། སྤྱི་དམངས་འཕྲོད་བསྟེན། སྨན་བཅོས་སྲིད་བྱུས། རྒྱལ་སྲུང་བདེ་འཇགས་སོགས་ཀྱི་གནད་དོན་ཐོག་འཁོར་བཞིན་པའི་སྐབས་དེར། རྒྱ་ནག་ཝུ་ཧན་ནས་མཆེད་པའི་ཏོག་དབྱིབས་ནད་ཡམས་དང་། འདི་ལོའི་ཕྱི་ཟླ་ ༧ པའི་ནང་མཆེད་པའི་ཨ་རིའི་ནང་གི་མི་རིགས་ནག་པོའི་འཐབ་རྩོད་ལས་འགུལ་གཉིས་ཀྱིས་འོས་བསྡུའི་ཁ་ཕྱོགས་ལ་འགྱུར་བ་ཆེན་པོ་ཐེབས་བཅུག་ཡོད་པ་རེད། དེ་བཞིན་དབྱེ་ཞིབ་པ་ཚོས་ནད་ཡམས་འདིས་ཨ་རིའི་དཔལ་འབྱོར་ལ་དོ་ཕོག་ཤུགས་ཆེན་པོ་ཐེབས་ཡོད་སྟབས། དཔལ་འབྱོར་གོང་འཕེལ་གཞི་རྩར་བཟུང་སྟེ་སྲིད་འཛིན་ལས་ཡུན་གཉིས་པའི་འདུར་རྒྱུག་ནང་ཞུགས་པའི་ད་ལྟའི་སྲིད་འཛིན་ཊོམ་ཕུ་ལ་མཚོན་ནའང་། རང་གི་འོས་བསྡུའི་དྲིལ་བསྒྲགས་དང་སྲིད་བྱུས་བཅས་པར་མནོ་བསམ་ཐེངས་གཉིས་པ་མ་བཏང་ཐབས་མེད་ཆགས་ཡོད་པ་རེད། གཤམ་ནས་ལས་ཐོག་སྲིད་འཛིན་ཊོམ་ཕུ་དང་སྲིད་འཛིན་གཞོན་པ་ཟུར་པ་བྷའེ་ཌེན་གཉིས་ཀྱི་དཔལ་འབྱོར་དང་འཕྲོད་བསྟེན། དེ་བཞིན་ཨ་རྒྱའི་འབྲེལ་ལམ་བཅས་པར་ལྟ་ཕྱོགས་དང་སྲིད་བྱུས་ཅི་བཟུང་སྐོར་ངོ་སྤྲོད་ཀྱི་ཚུལ་དུ་བཀོད་ན། 

ཕྱི་འབྲེལ་སྲིད་བྱུས།

སྲིད་འཛིན་ཊོམ་ཕུ་ཡིས་ཕྱི་ལོ་ ༢༠༡༦ ལོའི་འོས་བསྡུའི་སྐབས་ཨ་རི་དེ་ཨང་དང་པོ་འཇོག་རྒྱུའི་འབོད་ཚིག་འོག འདྲ་མཉམ་མིན་པའི་ཚོང་འབྲེལ་མཚམས་འཇོག་དང་། ཨ་རིས་ད་བར་མནའ་འབྲེལ་དམག་དོན་ལས་གཞིའི་ནང་མ་དངུལ་ཕོན་ཆེན་སྦྱིན་ཡོད་པ་ལྟར། མནའ་འབྲེལ་རྒྱལ་ཁབ་གཞན་ཚོས་ཀྱང་དེ་ལྟར་བྱ་དགོས་པའི་བསྒྲགས་གཏམ་སོགས་སྤེལ་ཏེ། འདས་པའི་ལོ་བཞིའི་ནང་ཨ་རི་དང་མནའ་འབྲེལ་རྒྱལ་ཁབ་ཚོའི་བར་གྱི་འབྲེལ་ལམ་དེ་ཇེ་སྡུག་ཏུ་སོང་ཡོད་པ་རེད། བྷའེ་ཌེན་གྱི་དྲིལ་བསྒྲགས་སྐབས་ཊོམ་ཕུ་ཡི་ཨུ་རུ་སུ་དང་། ཨི་རཱན། ཨབ་གྷན། བྱང་ཀོ་རི་ཡ་བཅས་ལ་འཛིན་པའི་ཕྱི་འབྲེལ་སྲིད་བྱུས་མང་དག་ཅིག་ལ་སྐྱོན་བརྗོད་དྲག་པོ་བྱས་ཡོད་ཅིང་། ལྷག་ཏུ་ཊོམ་ཕུ་ཡི་སྲིད་བྱུས་དེ་དག་གིས་ཨ་རིས་རྒྱལ་སྤྱིའི་སྟེང་ཐོབ་པའི་སྣེ་འཁྲིད་ཀྱི་གནས་བབ་དེ་ཤོར་ཡོད་པ་དང་། ཨ་རིའི་མནའ་འབྲེལ་རྒྱལ་ཁབ་ཀྱི་མཉམ་འབྲེལ་དམག་དོན་སྟོབས་ཤུགས་ཀྱང་ཉམས་ཉེས་སུ་སོང་ཡོད་ཚུལ་སྐྱོན་བརྗོད་བྱས་ཡོད་པ་རེད། དེར་བརྟེན་བྷའེ་ཌེན་གྱིས་མ་འོངས་པར་རང་ཉིད་སྲིད་འཛིན་དུ་འཁོད་མཚམས། ཊོམ་ཕུ་ཡི་ཕྱི་འབྲེལ་སྲིད་བྱུས་དེ་དག་རྩིས་མེད་བཏང་སྟེ། ནེ་ཊོ་དམག་དོན་སྒྲིག་འཛུགས་ (NATO) ཀྱི་སྟོབས་ཤུགས་བསྐྱེད་རྒྱུ་ཡིན་སྐོར་བསྒྲགས་ཡོད། དེ་བཞིན་ཕྱི་ལོ་ ༢༠༡༨ ལོར་སྲིད་འཛིན་ཊོམ་ཕུས། ཨ་རི་ཨི་རཱན་གྱི་རྡུལ་ཕྲན་མཚོན་ཆའི་ལས་གཞི་མཚམས་འཇོག་གི་ཆིངས་ཡིག་ (Iran Nuclear Deal) ནས་ཕྱིར་འཐེན་བྱས་ཡོད་པ་དེར། བྷའེ་ཌེན་གྱིས་ཨི་རཱན་དང་ཕྱི་འབྲེལ་གྱི་ལམ་ནས་ཆིངས་ཡིག་ནང་བསྐྱར་ཞུགས་ཡོང་ཐབས་བྱ་རྒྱུ་ཡིན་སྐོར་སོགས་བསྒྲགས་ཏེ། རྒྱལ་སྲུང་བདེ་འཇགས་ནི་ཁོ་པའི་མ་འོངས་འཛིན་སྐྱོང་གི་དམིགས་ཡུལ་གཙོ་བོ་ཞིག་ཡིན་སྐོར་བརྗོད་ཡོད་འདུག

 རྒྱ་ནག

རྒྱ་ནག་དེ་འདི་ལོའི་ཨ་རིའི་སྲིད་འཛིན་འོས་བསྡུ་ཙམ་མ་ཟད། རྒྱལ་སྤྱིའི་ཁྱོན་ཡོངས་ནང་བློ་འཚབ་བྱ་ཡུལ་ཞིག་ཏུ་གྱུར་ཡོད། ཕྱི་ལོ་ ༢༠༡༦ ལོའི་འོས་བསྡུའི་སྐབས་སྲིད་འཛིན་ཊོམ་ཕུ་ཡིས་ཨ་རྒྱའི་ཚོང་འབྲེལ་ཆ་སྙོམས་མེད་པ་དང་། རྒྱ་ནག་གིས་ཨ་རིའི་འཕྲུལ་རིག་ཤེས་བྱ་རྐུ་འཁྱེར་བྱེད་ཀྱིན་པའི་གནད་དོན་ཤུགས་ཆེར་བསླངས་ཏེ། འདས་པའི་ལོ་བཞིའི་རིང་རྒྱ་ནག་གི་ཚོང་ཟོག་ལ་སྒོ་ཁྲལ་སྣོན་མ་འགེལ་ཐབས་དང་། རྒྱ་ནག་གི་བཟོ་ཚོང་ཁང་སྐོར་ཞིག་ཨ་རིའི་ཁྲོམ་ར་ནས་ཕུད་ཐབས་སོགས་བྱས་ཡོད་ལ། རྒྱ་ནག་དེ་ཨ་རིའི་ཚོང་དོན་འགྲན་ཡ་ཙམ་མ་ཟད། ཕུགས་རྒྱང་རིང་པོའི་འཐབ་བྱུས་ཁ་གཏད་ཅིག་ཏུ་ངོས་འཛིན་བྱས་ཡོད་པ་རེད། འདི་ལོ་གཅིག་པུར་མཚོན་ན་ཊོམ་ཕུ་ཡིས་ཨ་རྒྱའི་ཚོང་དོན་གྲོས་མོལ་མཚམས་བཞག་སྟེ། རྒྱ་ནག་ལ་མུ་མཐུད་སྒོ་ཁྲལ་བསྣན་ཡོད་ཅིང་། ད་དུང་སྲིད་འཛིན་ཀྱི་བཀའ་རྒྱ་བསྒྲགས་ཏེ་ཧོང་ཀོང་གི་དམིགས་བསལ་རྒྱལ་སྤྱིའི་ཚོང་དོན་ལྟེ་གནས་ཀྱི་གནས་བབ་ཕྱིར་འཐེན་དང་། རྒྱ་ནག་གི་འཕྲུལ་རིག་བཟོ་ཚོང་ཁང་ཆེ་ཤོས་ ZTE དང་ཧྭ་ཝེ་ (Huawei) སོགས་བཀག་སྡོམ། རྒྱ་ནག་ལ་ཁ་གཏད་ཀྱི་རྒྱལ་སྤྱིའི་མཐུན་ཚོགས་གསར་འཛུགས། ཐའེ་ཝན་དང་འབྲེལ་ལམ་ཤུགས་ཆེར་བཏང་སྟེ་ལྷོ་རྒྱ་ནག་རྒྱ་མཚོའི་ཁུལ་དུ་དམག་དོན་བྱ་འགུལ་ཤུགས་ཆེར་སྤེལ་བ། དེ་བཞིན་ཨ་རིའི་ཧུ་སི་ཊོན་གྲོང་ཁྱེར་དུ་ཡོད་པའི་རྒྱ་ནག་གཞུང་ཚབ་ཁང་སྒོ་བརྒྱབ་ཏུ་བཅུག་ཡོད།

ཊོམ་ཕུས་སྣེ་ཁྲིད་པའི་ཨ་རིའི་འཛིན་སྐྱོང་གིས་དུས་ནས་དུས་སུ་རྒྱ་ནག་ལ་ཁ་གཏད་ཀྱི་སྲིད་བྱུས་མཁྲེགས་པོ་བཟུང་བའི་རྐྱེན་གྱིས། ཨ་རྒྱའི་འབྲེལ་ལམ་དེ་ཆེས་གཉན་འཕྲང་ཅན་གྱི་གནས་སྟངས་ནང་ལྷུང་ཡོད། གལ་ཏེ་ཊོམ་ཕུ་སྲིད་འཛིན་དུ་བསྐྱར་འདེམས་བྱུང་ཚེ། ཁོ་པས་མུ་མཐུད་རྒྱ་ནག་ལ་ཁ་གཏད་གཅོག་ངེས་ཡིན། སྤྱིར་ཨོ་བྷ་མའི་དུས་སྐབས་སུ་ཨ་རིས་རྒྱ་ནག་ལ་ད་ཐེངས་ལྟ་བུའི་སྲིད་བྱུས་མཁྲེགས་པོ་བཟུང་མེད་ཀྱང་། ད་ལྟ་རྒྱལ་སྤྱིའི་ཁྱོན་ཡོངས་སུ་རྒྱ་ནག་ལ་ངོ་རྒོལ་དང་ཁ་གཏད་ཀྱི་རྦ་རླབས་འཕྱུར་བཞིན་པའི་སྐབས་དང་། ལྷག་ཏུ་ཨ་རིའི་ནང་ཏོག་དབྱིབས་ནད་ཡམས་ཀྱི་རྐྱེན་པས་ཨ་རིའི་མང་ཚོགས་ཀྱིས་རྒྱ་ནག་ལ་ལྟ་སྟངས་ཇེ་སྡུག་ཏུ་སོང་ཡོད་སྟབས། རྒྱ་ནག་གི་དྲང་བདེན་མིན་པའི་ཚོང་འབྲེལ་ལ་ཁ་གཏད་ཆེད། མནའ་འབྲེལ་རྒྱལ་ཁབ་དག་དང་ལག་རྡང་སྦྲེལ་ནས་ཊོམ་ཕུ་ལས་ཀྱང་ཐབས་བྱུས་བཟང་བ་གཏིང་རྒྱུ་ཡིན་སྐོར་བརྗོད་འདུག ཡིན་ན་ཡང་། ཨ་རིའི་འཛད་སྤྱོད་པ་དང་ཞིང་པར་གནོད་འཚེ་ཆེན་པོ་ཕོག་ཡོད་སྐོར་བསྙད་དེ། ཊོམ་ཕུ་ཡིས་རྒྱ་ནག་ཐོག་བཀལ་བའི་སྒོ་ཁྲལ་རིགས་ཕྱིར་འཐེན་བྱ་རྒྱུ་ཡིན་སྐོར་བསྒྲགས་འདུག

དཔལ་འབྱོར་སྲིད་བྱུས།

ཊོམ་ཕུ་ཡིས་ནད་ཡམས་ཀྱི་ཛ་དྲག་གནས་སྟངས་ལ་མ་ལྟོས་པར་རྒྱལ་ཡོངས་ཀྱི་ཚོང་དོན་བྱ་འགུལ་གང་མགྱོགས་སྒོ་འབྱེད་དགོས་པའི་ལམ་སྟོན་བྱས་ཡོད་ཅིང་། དཔལ་འབྱོར་བསྐྱར་གསོ་ཡོང་ཆེད་གཞུང་རང་ནས་དུས་གཅིག་ཏུ། ཚོང་དོན་ཚན་པ་དང་། མི་སྒེར། ས་གནས་སྲིད་གཞུང་བཅས་ལ་མ་དངུལ་ཨ་སྒོར་ཐེར་འབུམ་མང་པོ་འགྲེམ་འཇོག་བྱས་ཡོད། གཞན་ཡང་ལས་མི་གླ་དངུལ་ནས་དཔྱ་ཁྲལ་ཉུང་འཁྲི་ལ་སོགས་པའི་རོགས་དངུལ་བགོ་འགྲེམ་ལས་གཞི་ཤུགས་ཆེར་སྤེལ་ཡོད་པ་རེད། ཇོ་བྷའེ་ཌེན་ལ་མཚོན་ན། ཁོའི་སྲིད་གཞུང་གིས་ཐོན་ཁུངས་གཙང་བའི་གློག་ནུས་ཚན་པ་དང་། བཟོ་སྐྲུན་ཚན་པ། དེ་བཞིན་བདེ་དོན་ཚན་པ་བཅས་ལ་མ་དངུལ་ཕོན་ཆེན་བཏང་སྟེ་ལས་ཀ་གསར་པ་སྐྲུན་ཐབས་བྱ་རྒྱུ་དང་། ཊོམ་ཕུས་ཕྱི་ལོ་ ༢༠༡༧ ལོར་ཕྱུག་བདག་དང་བཟོ་གྲྭ་ཆེ་ཁག་གི་ཚོང་ཁྲལ་གཅོག་རྒྱུའི་སྲིད་བྱུས་དེ་རྩིས་མེད་བཏང་སྟེ། དེ་ལས་ལྡོག་སྟེ་ཚོང་ཁྲལ་སྤར་རྒྱུ་ཡིན་སྐོར་བརྗོད་ཡོད་ལ། ཨ་རིའི་ད་ཡོད་ཀྱི་རྒྱལ་ཡོངས་ཀྱི་ཉུང་མཐའི་ཕོགས་དངུལ་ཆུ་ཚོད་རེར་ཨ་སྒོར་ ༧།༢༥ དེ་ ༡༥ ལ་སྤར་རྒྱུའི་ཁས་ལེན་བྱས་ཡོད་འདུག གཞན་ཡང་ཊོམ་ཕུ་དང་བྷའེ་ཌེན་གཉིས་ཀས་རྒྱལ་ནང་གི་ཐོན་སྐྱེད་གོང་འཕེལ་ཐད་ཤུགས་སྣོན་བརྒྱབ་རྒྱུ་ཡིན་སྐོར་བརྗོད་ཡོད་ཅིང་། ལྷག་ཏུ་བྷའེ་ཌེན་གྱིས་དེའི་ཆེད་དུ་ཨ་སྒོར་ཐེར་འབུམ་ ༧༠༠ ལྷག་གཏོང་རྒྱུ་ཡིན་སྐོར་བརྗོད་ཡོད་འདུག དེ་བཞིན་ཨ་རྒྱའི་ཚོང་དམག་དང་འབྲེལ་ཊོམ་ཕུས་ཕྱོགས་གཉིས་ཀྱི་ཚོང་འབྲེལ་ཆ་སྙོམས་དང་། ཨ་རིའི་བཟོ་ཚོང་ཁང་ཁག་ལ་གྱོང་གུད་མི་ཐེབས་རྒྱུའི་ཆེད་ཡིན་ཡང་། བྷའེ་ཌེན་གྱིས་ཊོམ་ཕུའི་སྲིད་བྱུས་དེས་ཨ་རིའི་འཛད་སྤྱོད་པ་དང་ཞིང་པ་ཚོར་གྱོང་གུད་ཆེན་པོ་ཐེབས་ཡོད་སྐོར་སྐྱོན་བརྗོད་བྱེད་ཀྱི་ཡོད་པ་རེད།

 གཞིས་སྤོའི་སྲིད་བྱུས།

ཕྱི་ལོ་ ༢༠༡༦ ལོའི་སྲིད་འཛིན་འོས་བསྡུའི་དྲིལ་བསྒྲགས་སྐབས་ཊོམ་ཕུ་ཡིས་རྒྱལ་ཡོངས་ཀྱི་ལས་ཀ་སྲུང་སྐྱོབ་དང་རྒྱལ་སྲུང་བདེ་འཇགས་ཆེད། ཕྱི་མི་ཨ་རིར་སྐྱབས་བཅོལ་ཞུ་ཕྱོགས་ཐད་ཚད་བཀག་དང་ཁ་ཆེ་རྒྱལ་ཁབ་ཀྱི་མི་སེར་རྣམས་ཨ་རིར་སླེབས་རྒྱུ་བཀག་སྡོམ་བྱ་རྒྱུ་ཡིན་སྐོར་བསྒྲགས་ཡོད་ལ། ད་ལྟ་མུ་མཐུད་སྲིད་བྱུས་དེ་ལག་བསྟར་བྱེད་མུས་རེད། ཡིན་ན་ཡང་། བྷའེ་ཌེན་གྱིས་རང་ཉིད་སྲིད་འཛིན་དུ་བདམས་ཐོན་བྱུང་ནས་ཉིན་བརྒྱའི་ནང་ཚུད་ལ། ཊོམ་ཕུ་ཡིས་གཏན་འབེབ་ལག་བསྟར་བྱས་པའི་གཞིས་སྤོས་སྲིད་བྱུས་དེ་དག་རྩིས་མེད་བཏང་སྟེ། ཨ་རི་དང་མེག་སི་ཁོའི་ས་མཚམས་གུ་ཡངས་དང་། དེ་བཞིན་ཨ་རིའི་ནང་སྐྱབས་བཅོལ་ཞུ་རྒྱུའི་མིའི་གྲངས་ཚད་ལ་ཚད་བཀག་མེད་པར་བཟོ་རྒྱུ། གཞན་ཡང་ཊོམ་ཕུ་ཡིས་ཕྱི་ལོ་ ༢༠༡༧ ལོར་དངོས་སུ་ལག་བསྟར་བྱས་པའི་ཁ་ཆེ་རྒྱལ་ཁབ་མི་ཉུང་བའི་མི་སེར་རྣམས་ཨ་རིར་ཡོང་རྒྱུ་བཀག་སྡོམ་གྱི་སྲིད་བྱུས་དེ་རྩིས་མེད་གཏང་རྒྱུ་ཡིན་སྐོར་བསྒྲགས་ཡོད་པ་རེད། གཞན་ཡང་བྷའེ་ཌེན་གྱིས་སྲིད་འཛིན་ཊོམ་ཕུ་ཡིས་མེག་སི་ཁོ་དང་ཨ་རིའི་ས་མཚམས་སུ་བསླངས་ཟིན་པའི་རྩིག་གྱང་རྣམས་རང་སོར་བཞག་སྟེ། གསར་དུ་བརྩིག་རྒྱུ་མཚམས་འཇོག་བྱ་རྒྱུ་ཡིན་སྐོར་བརྗོད་ཡོད་འདུག

སྨན་བཅོས་སྲིད་བྱུས།

སྤྱིར་ཨ་རིའི་ནང་སྤྱི་དམངས་འཕྲོད་བསྟེན་སྨན་བཅོས་ཚན་པ་དེ་མང་ཚོགས་ཀྱི་དོ་འཁུར་བྱ་སའི་གནད་དོན་གལ་ཆེན་ཞིག་ཡིན་པའི་ཐོག འདི་ལོའི་ནད་ཡམས་ཀྱི་རྐྱེན་པས་གནད་དོན་དེ་སྔར་བས་ཚ་ཚ་འུར་འུར་དུ་གླེང་སློང་བྱེད་ཀྱིན་ཡོད་ལ། དེའི་ཐད་ཊོམ་ཕུ་དང་བྷའེ་ཌེན་གཉིས་ཀྱི་ལྟ་ཕྱོགས་ཀྱང་ཧ་ཅང་མི་མཐུན་པ་ཞིག་རེད། བྷའེ་ཌེན་གྱིས་ཨ་རིའི་མི་མང་ཡོངས་ལ་རིན་མེད་ཐོག་ནད་ཡམས་འགོས་ཡོད་མེད་བརྟག་དཔྱད་བྱ་རྒྱུ་དང་། དེ་བཞིན་ནད་པ་རྗེས་འདེད་ཀྱི་བྱ་འགུལ་ཆེད་མི་གྲངས་འབུམ་ ༡ གསར་དུ་གླ་རྒྱུ་སོགས་པའི་འཆར་གཞི་འཐེན་ཡོད་པ་རེད། སྤྱི་ཡོངས་ནས་བྷའེ་ཌེན་གྱིས་ཨ་རིའི་ཕྱུག་བདག་དང་བཟོ་ཚོང་ཁག་ཆེ་ཁག་ལ་ཚོང་ཁྲལ་བསྣན་ཏེ། དེའི་མ་དངུལ་གྱིས་རང་ཉིད་སྲིད་འཛིན་གཞོན་པའི་དུས་སྐབས་སུ་གཏན་འབེབ་བྱས་པའི་ཨོ་བྷ་མ་སྨན་བཅས་ལྟོ་སྐྱོང་ལས་གཞི་ (Obamacare) དེ་ཉིད་ཚགས་ཚུད་དུ་གཏོང་ཐབས་བྱ་རྒྱུ་དང་། འབྱུང་འགྱུར་ལོ་བཅུའི་ནང་དེའི་ཆེད་ཨ་སྒོར་ཐེར་འབུམ་ ༧༥༠ གཏང་རྒྱུའི་ཁས་བླངས་ཡོད། དེ་བཞིན་ཨ་རིའི་ནང་སྨན་རྫས་ཀྱི་རིན་གོང་མར་གཅོག་རྒྱུ་དང་། གཞན་ཡང་སྨན་བཅོས་ལྟ་སྐྱོང་གི་ལོ་ཚད་དེ་ ༦༥ ནས་ ༦༠ ལ་མར་གཅོག་རྒྱུའི་ཁས་ལེན་བྱས་ཡོད་པ་རེད། ཊོམ་ཕུ་ལྟ་བུར་མཚོན་ན་ཕྱི་ལོ་ ༢༠༡༦ ནས་བཟུང་ཨོ་བྷ་མ་སྨན་བཅོས་ལྟ་སྐྱོང་ལ་སྐྱོན་བརྗོད་ཤུགས་ཆེན་པོ་བྱེད་མཁན་ཞིག་ཡིན་ལ། སྤྱི་མཐུན་ཚོགས་པས་གྲོས་ཚོགས་བརྒྱུད་སྨན་བཅོས་ལྟ་སྐྱོང་ལས་གཞི་དེ་རྩིས་མེད་གཏོང་ཐབས་བྱས་ཡོད་ཀྱང་ལམ་ལྷོངས་བྱུང་མེད། ད་ལྟ་སྲིད་འཛིན་ཊོམ་ཕུ་ཡིས་ཨོ་བྷ་མ་སྨན་བཅོས་ལྟ་སྐྱོང་ལས་གཞི་ལས་རིན་གོང་ཆུང་ཞིང་ལེགས་པའི་སྨན་བཅོས་ལྟ་སྐྱོང་ལས་གཞི་ཞིག་སྤེལ་རྒྱུའི་ཁས་ལེན་བྱས་ཡོད་པ་རེད།

གོ་ལའི་གནམ་གཤིས་འགྱུར་ལྡོག

འདས་ལོའི་ཨོ་གླིང་གི་མེ་སྐྱོན་དོན་རྐྱེན་སོགས་ཀྱིས་རྒྱལ་སྤྱིའི་སྤྱི་ཚོགས་ནང་གོ་ལའི་ཚ་དྲོད་དང་འབྲེལ་བའི་གནད་དོན་མང་པོར་དོ་སྣང་ཤུགས་ཆེན་པོ་སླེབས་ཡོད་ཅིང་། ཨ་རིར་མཚོན་ནའང་འོས་བསྡུ་ནམ་ཡིན་ལ་ཅུང་གུ་ཡངས་ཀྱི་ལྟ་ཕྱོགས་འཛིན་པའི་དམངས་གཙོ་ཚོགས་པས་གོ་ལའི་ཚ་དྲོད་ཀྱི་གནད་དོན་དེ་གཙིགས་ཆེར་བཟུང་སྟེ། འོས་བསྡུའི་སྐབས་དེའི་ཐད་ལངས་ཕྱོགས་དང་སྲིད་བྱུས་བརྟན་པོ་འདོན་གྱི་ཡོད་པ་ལྟར། འདི་ལོར་བྷའེ་ཌེན་གྱིས་འཆར་ལོ་བཞིའི་ནང་ཨ་སྒོར་ཐེར་འབུམ་ ༢༠༠༠ གཏང་སྟེ། ཕྱི་ལོ་ ༢༠༣༥ བར་ཨ་རིའི་རྒྱལ་ཡོངས་ཀྱི་གློག་བརྒྱ་ཆ་ ༡༠༠ ཐམ་པ་ཐོན་ཁུངས་གཙང་མའི་གློག་ནུས་སུ་འགྱུར་ཐུབ་པ་བྱ་རྒྱུ་དང་། དེ་བཞིན་གཞུང་ནས་དུག་རླངས་མི་འདོན་པའི་འགྲིམ་འགྲུལ་རླངས་འཁོར་བཟོ་སྐྲུན་ཚན་པར་རོགས་སྐྱོར་ལས་གཞི་སྤེལ་རྒྱུ། གཞན་ཡང་ཕྱི་ལོ་ ༢༠༡༥ ལོར་བཞག་པའི་པེ་རི་སི་གནམ་གཤིས་སྤྱི་ཆིངས་ཀྱི་དམིགས་ཚད་འགྲུབ་ཆེད། ཨ་རི་དེ་བསྐྱར་དུ་གོ་ལའི་གནམ་གཤིས་འགྱུར་ལྡོག་གི་ཐད་མགོ་འཁྲིད་ཀྱི་ནུས་པ་འདོན་ཐབས་བྱ་རྒྱུ་ཡིན་འདུག ཡིན་ན་ཡང་། ཊོམ་ཕུ་ལ་མཚོན་ན། འདི་ལོའི་སྲིད་བྱུས་བསྒྲགས་གཏམ་ནང་གོ་ལའི་གནམ་གཤིས་སྐོར་དམིགས་བསལ་སྲིད་བྱུས་མེད་ཅིང་། ལྷག་པར་དུ་ཨོ་བྷ་མའི་སྐབས་སུ་བཞག་པའི་པེ་རི་སི་གནམ་གཤིས་སྤྱི་ཆིངས་དེས་ཨ་རིའི་བཟོ་གྲྭ་ཁག་ལ་གྱོང་གུད་ཆེན་པོ་ཕོག་ཡོད་སྐོར་བརྗོད་དེ། སྤྱི་ཆིངས་དེ་ནས་ཕྱིར་ཐོན་ཟིན།ཉེ་ཆར་ཨ་རིའི་ཨེན་བྷི་སི་ (NBC) གསར་ཁང་། ཝོལ་སི་ཀྲི་ཏི་གསར་ཁང་ (WSJ) གིས་ཚོད་དཔག་བསམ་ཤོག་བསྡུས་པའི་གྲུབ་དོན་ལྟར་ན། ཨ་རིའི་མི་མང་གིས་ཆེས་དོ་འཁུར་བྱ་སའི་གནད་དོན་ནི་དཔལ་འབྱོར་དང་། རྒྱལ་ཁབ་གཅིག་སྒྲིལ། མགོ་འཁྲིད་འཇོན་ནུས་ཅན། འཕྲོད་བསྟེན་སྨན་བཅོས། ཏོག་དབྱིབས་ནད་ཡམས་བཅས་ཡིན་འདུག་པ་དང་། དེ་དག་ཁྲོད་ནས་གནད་དོན་ཕལ་ཆེ་བའི་ཐད་མི་མང་གིས་ཇོ་བྷའེ་ཌེན་ལ་ཡིད་ཆེས་བྱེད་ཀྱི་འདུག་ཀྱང་། དཔལ་འབྱོར་ཐད་ཊོམ་ཕུ་ལ་རྒྱབ་སྐྱོར་ཤུགས་ཆེ་བ་བྱེད་ཀྱི་ཡོད་འདུག དེ་བཞིན་སི་ཨེན་ཨེན་གསར་ཁང་གི་དྲ་རྒྱར་བཏོན་པའི་འོས་བསྡུའི་ཚོད་དཔག་བསམ་ཤོག་ཁག་མི་འདྲ་བ་ལྔའི་ནང་། ཊོམ་ཕུ་ལས་ཇོ་བྷའེ་ཌེན་ལ་སྲིད་འཛིན་འོས་བསྡུ་འཐོབ་རྒྱུའི་བརྒྱ་ཆ་མང་བ་ཡོད་འདུག དབྱེ་ཞིབ་པ་མི་ཉུང་བས་ཕྱི་ལོ་ ༢༠༡༦ ལོར་ཊོམ་ཕུ་ཡི་འགྲན་ཡ་ཧེ་ལ་རེ་ཁི་ལིན་ཊོན་ (Hillary Clinton) ལ་ཊོམ་ཕུ་ལས་རྒྱལ་ཡོངས་ཀྱི་འོས་ཤོག་མང་བ་ཐོབ་ཡོད་ཀྱང་། ཊོམ་ཕུ་ལ་མངའ་སྡེའི་འོས་བསྡུའི་ལྷན་རྒྱས་ (electoral college) མང་བ་ཐོབ་པའི་རྐྱེན་གྱིས་སྲིད་འཛིན་དུ་བདམས་ཐོན་བྱུང་བ་ལྟར། འདི་ལོ་ཡང་ཊོམ་ཕུ་ཡིས་ཕྱོགས་སུ་མ་ལྷུང་བའི་མངའ་སྡེ་ (swing state) སྐོར་ཞིག་རང་ཕྱོགས་སུ་བཀུག་སྟེ། བསྐྱར་དུ་སྲིད་འཛིན་གྱི་རྒྱལ་ཁ་འཐོབ་མ་སྲིད་པ་མིན་སྐོར་རྗོད་ཀྱིན་འདུག

པ་སངས་ཚེ་རིང་གིས་བསྡུ་སྒྲིག་བྱས།