མདུན་ངོས།
About Us
  • English
Advertisement
བོད་ཀྱི་དུས་བབ།
  • གསར་འགྱུར།
    • ༸གོང་ས་མཆོག གསར་འགྱུར།
    • བཙན་བྱོལ།
    • བོད་ནང་།
    • རྒྱལ་སྤྱི།
    • རྒྱ་ནག
    • ༧གོང་ས་མཆོག གསུང་འཕྲིན།
  • རྩོམ་ཡིག།
    • བསམ་ཚུལ།
    • སྒྱུར་རྩོམ།
  • བརྙན་མཛོད།
    • གླེང་མོལ།
    • མེ་ལོང་།
    • ང་ཡི་བཙན་བྱོལ་བ།
    • གངས་ཕྲུག
    • དྲ་བརྙན་གསར་འགྱུར།
  • ཁྱབ་བསྒྲགས།
    • གླ་ཡོད་ཁྱབ་བསྒྲགས།
    • དུས་བབ་ཀྱི་གསལ་བསྒྲགས།
  • པར་མཛོད།
    • ང་ཚོའི་པར།
    • གསང་འགྱུར་པར་རིས།
  • དཔེ་དེབ།
  • རྩོམ་སྒྲིག་པའི་གཏམ།
  • ང་ཚོའི་སྐོར།
    • བོད་ཀྱི་དུས་བབ་ཀྱི་བྱུང་རིམ།
    • རྩ་ཆེའི་གསུང་འཕྲིན་ཁག
    • English
    • Chinese
No Result
ཆ་ཚང་གཟིགས།
  • གསར་འགྱུར།
    • ༸གོང་ས་མཆོག གསར་འགྱུར།
    • བཙན་བྱོལ།
    • བོད་ནང་།
    • རྒྱལ་སྤྱི།
    • རྒྱ་ནག
    • ༧གོང་ས་མཆོག གསུང་འཕྲིན།
  • རྩོམ་ཡིག།
    • བསམ་ཚུལ།
    • སྒྱུར་རྩོམ།
  • བརྙན་མཛོད།
    • གླེང་མོལ།
    • མེ་ལོང་།
    • ང་ཡི་བཙན་བྱོལ་བ།
    • གངས་ཕྲུག
    • དྲ་བརྙན་གསར་འགྱུར།
  • ཁྱབ་བསྒྲགས།
    • གླ་ཡོད་ཁྱབ་བསྒྲགས།
    • དུས་བབ་ཀྱི་གསལ་བསྒྲགས།
  • པར་མཛོད།
    • ང་ཚོའི་པར།
    • གསང་འགྱུར་པར་རིས།
  • དཔེ་དེབ།
  • རྩོམ་སྒྲིག་པའི་གཏམ།
  • ང་ཚོའི་སྐོར།
    • བོད་ཀྱི་དུས་བབ་ཀྱི་བྱུང་རིམ།
    • རྩ་ཆེའི་གསུང་འཕྲིན་ཁག
    • English
    • Chinese
No Result
ཆ་ཚང་གཟིགས།
བོད་ཀྱི་དུས་བབ།
No Result
ཆ་ཚང་གཟིགས།

སྤྱི་འཐུས་རྒྱུན་ལས་ཀྱིས་བཅའ་ཁྲིམས་ལ་འགལ་འཛོལ་བྱུང་བ།

བོད་ཀྱི་དུས་བབ།
༢༠༢༠/༠༩/༢༡
Share on FacebookShare on TwitterShare on EmailShare on Whatsapp

ཞང་བློན།

 ཕྱི་ལོ་ ༢༠༢༠ ཟླ་ ༨ ཚེས་ ༡༧ ཉིན་སྐབས་བཅུ་དྲུག་པའི་གྲོས་ཚོགས་ཚོགས་དུས་བཅུ་པ་དེ་བཞིན་བཙན་བྱོལ་བོད་མིའི་བཅའ་ཁྲིམས་དོན་ཚན་༦ པ་དང་། དོན་ཚན་ ༤༩ པའི་ནང་གསེས་ ༢ པའི་དགོངས་དོན་ལྟར་འཕར་འགྱངས་བྱ་རྒྱུའི་གསལ་བསྒྲགས་གནང་ཡོད། དེ་ནི་ཁྲིམས་སྒྲིག་གི་དགོངས་དོན་དཔྱིས་ཕྱིན་མ་རྟོགས་པར་རང་འགར་ཐག་གཅོད་གནང་བའི་བྱས་ཉེས་ཤིག་ཡིན། གྲོས་ཚོགས་ཚོགས་དུས་བཅུ་པ་འཕར་འགྱངས་གནང་དགོས་པའི་རྒྱུ་མཚན་ཐད་སྤྱི་འཐུས་ཚོགས་གཙོ་པདྨ་འབྱུང་གནས་ལགས་ཀྱིས། རྒྱ་ནག་ཝུ་ཧན་ནས་མཆེད་པའི་ཏོག་དབྱིབས་གཉན་རིམས་ ༡༩ རྐྱེན་པས་འཛམ་གླིང་ཁྱོན་ཡོངས་ཀྱི་གནས་སྟངས་ཉིན་རེ་ནས་ཉིན་རེ་བཞིན་ཆེས་ཛ་དྲག་ཏུ་འགྱུར་བཞིན་ཡོད་པ་དང་། ལྷག་པར་དུ་དྷ་སའི་ས་གནས་ནི་༸རྒྱལ་བའི་བཞུགས་སྒར་ཡིན་སྟབས་གང་ཅིའི་ཐད་འགན་ཁུར་བྱ་དགོས་པ་དང་། གྲོས་ཚོགས་ཚོགས་པའི་དབང་དུ་བཏང་ནའང་རྒྱལ་སྤྱིའི་འགྲུལ་བཞུད་སྒོ་རྒྱ་བསྡམས་པའི་རྐྱེན་གྱིས་འགྲོ་འོང་དཀའ་ངལ་གྱི་ཕྱོགས་ནས་རྒྱ་གར་ལས་གཞན་པའི་ཕྱི་རྒྱལ་དུ་ཡོད་པའི་སྤྱི་འཐུས་མང་ཆེ་བ་ཕེབས་མི་ཐུབ་པ་དང་། རྒྱ་གར་ནང་ནས་ཀྱང་སྤྱི་འཐུས་ཅི་ཙམ་ཕེབས་ཐུབ་ཀྱི་ཡོད་མེད་རྟོགས་ཐབས་དཀའ་བའི་གནས་སྟངས་བཅས་ཀྱི་ཆ་ནས་ཐེངས་འདིའི་ཐག་གཅོད་མ་བྱས་ཐབས་མེད་བྱུང་སྐོར་དང་། ཕྱི་ཟླ་ ༩ པའི་གྲོས་ཚོགས་འཚོགས་རྒྱུ་མིན་ནའང་། དེ་འབྲེལ་གྱི་ལས་དོན་ལ་འཐུས་ཤོར་མེད་པར་འབད་སྒྲུབ་གནང་རྒྱུ་ཡིན་སྐོར་གསུངས་ཡོད། གསལ་བསྒྲགས་ཀྱི་ངོ་གདོང་ལ་བལྟས་ན་བདེན་བདེན་འདྲ་བ་ཞིག་ཡོད་ཀྱང་། དོན་དངོས་ཐོག་དེ་ནི་བཅའ་ཁྲིམས་ཀྱི་དགོངས་དོན་ལས་བརྒལ་བའི་ཐག་གཅོད་ཅིག་ཡིན། གཤམ་དུ་བཅའ་ཁྲིམས་ལ་འགལ་འཛོལ་བྱུང་སྟངས་ཇི་ཡིན་ཞིབ་ཕྲ་བརྗོད་རྒྱུ་ཡིན།

 ༡། བཅའ་ཁྲིམས་ཀྱི་འབྲུ་དོན་དང་འགལ་འཛོལ།

གོང་གསལ་གསལ་བསྒྲགས་ནང་བཀོད་པའི་བཅའ་ཁྲིམས་དོན་ཚན་དྲུག་པ་ནི། བོད་མིའི་སྒྲིག་འཛུགས་ཀྱི་ཁྲིམས་ལུགས་དང་། ཆབ་སྲིད་དབང་འཛིན་གྱི་བཀའ། སྒྲིག་གཞི་བཅས་རྒྱལ་སྤྱིའི་ཁྲིམས་ལུགས་དང་། ལྷག་དོན་བོད་མིའི་གནས་ཡུལ་རྒྱལ་ཁབ་ཁག་གི་ཡུལ་ཁྲིམས་དང་མི་འགལ་བ་བྱ་རྒྱུ། ཞེས་པ་དེ་ཡིན། དོན་ཚན་འདི་ནི་ཐེངས་འདིའི་གྲོས་ཚོགས་འཕར་འགྱངས་བྱས་པ་དང་འབྲེལ་བ་གཏན་ནས་མེད་པ་མ་ཟད། ལྷག་པར་མངའ་སྡེ་གཞུང་ནས་བཙལ་བྱོལ་བོད་མིའི་གྲོས་ཚོགས་ཀྱི་ལས་དོན་ནི་བོད་མིའི་སྒྲིག་འཛུགས་ནང་ཁུལ་གྱི་ཐག་གཅོད་ཡིན་པས་དེ་ལ་དགག་བྱ་གང་ཡང་མེད་སྐོར་བཀའ་ཕེབས་ཡོད་པས། དོན་ཚན་འདིས་གྲོས་ཚོགས་འཕར་འགྱངས་བྱེད་པའི་སྒྲུབ་བྱེད་གང་ཡང་མི་ནུས། དེ་བཞིན་བཅའ་ཁྲིམས་དོན་ཚན་ཞེ་དགུ་པའི་ནང་གསེས་༢ པར། སྤྱི་འཐུས་ཉུང་མཐའི་གྲངས་ཚད་མ་ལོངས་པར་ཚོགས་འདུ་ཉིན་གྲངས་བདུན་ལྷག་འཕར་འགྱངས་བྱེད་དགོས་བྱུང་ན་ཚོགས་གཙོ་སྦྲེལ་པོས་ཚོགས་འདུ་འཕར་འགྱངས་ཀྱི་ཐག་གཅོད་བྱ་རྒྱུ། ཞེས་པ་དེ་ཡིན། དེ་ནི་གྲོས་ཚོགས་ཀྱི་ལས་རིམ་འགོ་བཙུགས་ནས་ཚོགས་བཅར་སྤྱི་འཐུས་ཀྱི་གྲངས་ཚད་མ་ལོངས་ཚེ་ཚོགས་འདུ་འཕར་འགྱངས་ཀྱི་ཐག་གཅོད་བྱས་ཆོག་པའི་དོན་ཚན་ཞིག་ཡིན་པ་ལས། གྲོས་ཚོགས་བསྐོང་ཚོགས་བྱས་ཆོག་དང་མི་ཆོག་གི་རང་འགར་ཐག་གཅོད་བྱ་རྒྱུའི་སྐུ་དབང་ཚོགས་གཙོ་སྦྲེལ་པོ་དང་རྒྱུན་ལས་སུ་ལའང་གནང་བ་ཞིག་མིན་སྟབས། དོན་ཚན་འདིས་ཀྱང་གྲོས་ཚོགས་ཚོགས་དུས་བཅུ་པ་འཕར་འགྱངས་བྱས་པའི་སྒྲུབ་བྱེད་དུ་དེ་བས་མི་འོས་པ་ཡིན། གོང་གསལ་དོན་ཚན་གཉིས་ཀའི་འབྲུ་དོན་ལས་བརྒལ་ཏེ་གྲོས་ཚོགས་འཕར་འགྱངས་བྱས་པས། དེ་ནི་དབང་ཚད་མེད་པའི་ཐག་གཅོད་དང་། བཅའ་ཁྲིམས་ལས་བརྒལ་བའི་དོན་ཉེས་ཆེན་པོ་ཞིག་ཡིན།

 ༢། བཅའ་ཁྲིམས་ནང་མི་གསལ་བའི་གནད་དོན་ཐག་གཅོད་བྱེད་སྟངས་ལ་ནོར་འཁྲུལ།

མི་མང་པོའི་སེམས་སུ་ད་ལྟའི་ཆར་འཛམ་གླིང་ཡུལ་གྲུ་ཀུན་ཏུ་ཏོག་དབྱིབས་གཉན་རིམས་ཁྱབ་གདལ་ཕྱིན་ཡོད་སྟབས། གྲོས་ཚོགས་འཐུས་མི་རྣམས་ཚོགས་བཅར་ཐུབ་ཐབས་མེད་པ་དངོས་ཡོད་གནས་སྟངས་ཡིན་པས་རྒྱུ་མཚན་དེའི་དབང་གིས་གྲོས་ཚོགས་འཕར་འགྱངས་བྱས་པ་ནི་འོས་ཤིང་འཚམ་པ་ཞིག་རེད་སྙམ་ངེས། འོན་ཀྱང་གྲོས་ཚོགས་ཀྱི་ལས་རིམ་ནི་ཁྲིམས་སྒྲིག་གི་དགོངས་དོན་བཞིན་འགྲོ་དགོས་པ་ལས་གང་ཟག་གི་དབང་སྒྱུར་འོག་ཐག་གཅོད་བྱེད་དབང་ག་ལ་ཡོད། བཙན་བྱོལ་བོད་མིའི་བཅའ་ཁྲིམས་རིན་པོ་ཆེའི་ནང་གྲོས་ཚོགས་ཀྱི་ཚོགས་དུས་ཧྲིལ་པོ་འཕར་འགྱངས་བྱས་ཆོག་པའི་དོན་ཚན་གཅིག་ཀྱང་མེད་ལ། དེ་བས་སྐབས་འཕྲལ་རྐྱེན་ངན་དང་གནད་དོན་བྱུང་ན་གྲོས་ཚོགས་ཚོགས་མི་དགོས་པ་སོགས་ཀྱི་གནད་དོན་ནི་དེ་བས་བཀོད་མེད། གལ་ཏེ་བཅའ་ཁྲིམས་ནང་དེ་འབྲེལ་གྱི་ཐག་གཅོད་བྱེད་སྟངས་ཤིག་གསལ་མེད་ན། བཅའ་ཁྲིམས་ནང་ཁྲིམས་སྒྲིག་གཞན་གང་ཡོད་པ་དེ་རང་ལ་ཐག་གཅོད་བྱེད་དགོས་ཀྱི་ཡོད། དཔེར་ན། ཡུ་རོབ་སྤྱི་འཐུས་ཐུབ་བསྟན་དབང་ཆེན་ལགས་གྲོས་ཚོགས་ཚོགས་དུས་བརྒྱད་པ་དང་དགུ་པ་གཉིས་ལ་ཚོགས་བཅར་ཐུབ་མེད་པས་རང་བཞིན་གྱིས་སྤྱི་འཐུས་ལས་བུད་ཡོད། ཁོང་གྲོས་ཚོགས་ཚོགས་དུས་བརྒྱད་པའི་སྐབས་བོད་དོན་ཞུ་གཏུགས་ཀྱི་ལས་དོན་ལ་ཕེབས་ཡོད་པ་དང་། ཚོགས་དུས་དགུ་པར་ཏོག་དབྱིབས་གཉན་རིམས་ཀྱི་རྐྱེན་པས་ཚོགས་བཅར་ཞུ་ཐུབ་མེད། ཚོགས་བཅར་མི་ཐུབ་པའི་རྒྱུ་མཚན་ལ་བལྟས་ན་གཅིག་ནི་བོད་སྤྱི་པའི་དོན་དག་ཡིན་པ་དང་གཉིས་ནི་ནད་ཡམས་ཀྱི་དཀའ་ངལ་ཡིན་པས། རང་བཞིན་གྱིས་སྤྱི་འཐུས་ལས་བུད་ཐབས་མེད་པ་ལྟར་དུ་སྣང་མོད། བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་འདུའི་འགྲོ་ལུགས་དང་། ལས་དོན་བྱེད་ཕྱོགས་ཀྱི་སྒྲིག་གཞིའི་དོན་ཚན་བརྒྱད་པའི་ནང་གསེས་གསུམ་པར། ཚོགས་དུས་གཉིས་བསྟུད་མར་ཚོགས་བཅར་མ་ཞུས་ཚེ་ཚོགས་དུས་གཉིས་པ་གྲོལ་ཉིན་ནས་སྤྱི་འཐུས་འཕོས་པར་ངོས་འཛིན་བྱ་རྒྱུ། ཞེས་གསལ་བ་བཞིན་དེ་ལ་འགྲེལ་བརྗོད་གཞན་གང་ཡང་མེད་སྟབས། དེ་འབྲེལ་གྱི་ཐག་གཅོད་གནང་སྟེ། ཐུབ་བསྟན་དབང་ཆེན་ལགས་རང་བཞིན་གྱིས་བུད་པར་ངོས་འཛིན་དང་། ཚབ་གསར་སྤྱི་འཐུས་བསྐོ་གཞག་གནང་ཡོད། གལ་ཏེ་གྲོས་ཚོགས་ཚོགས་དུས་དགུ་པར་ཏོག་དབྱིབས་གཉན་རིམས་ཀྱི་རྐྱེན་པས་ཚོགས་བཅར་མི་ཐུབ་པ་དེ་ཁྲིམས་མཐུན་རྒྱུ་མཚན་ལ་ངོས་བཞེས་གནང་གི་མེད་ན། ཚོགས་ཐེངས་བཅུ་པའི་སྐབས་སུའང་ཁྲིམས་མཐུན་རྒྱུ་མཚན་ལ་ངོས་བཞེས་གནང་ཐབས་མེད། གལ་ཏེ་ཁྲིམས་མཐུན་རྒྱུ་མཚན་ལ་ངོ་བཞེས་གནང་ན་ཐུབ་བསྟན་དབང་ཆེན་ལགས་འཕོ་འགྱུར་བཏང་བ་དང་དེའི་ཚབ་ཏུ་སྤྱི་འཐུས་གསར་པ་བསྐོས་པ་ནི་ཁྲིམས་འགལ་ཡིན།

 ༣། བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་འདུའི་འགྲོ་ལུགས་དང་། ལས་དོན་བྱེད་ཕྱོགས་ཀྱི་སྒྲིག་གཞིར་འགལ་འཛོལ།

 བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་འདུའི་འགྲོ་ལུགས་དང་། ལས་དོན་བྱེད་ཕྱོགས་ཀྱི་སྒྲིག་གཞིའི་དོན་ཚན་བརྒྱད་པའི་ནང་གསེས་གསུམ་པར། ཚོགས་དུས་གཉིས་བསྟུད་མར་ཚོགས་བཅར་མ་ཞུས་ཚེ་ཚོགས་དུས་གཉིས་པ་གྲོལ་ཉིན་ནས་སྤྱི་འཐུས་འཕོས་པར་ངོས་འཛིན་བྱ་རྒྱུ། ཞེས་གསལ་ཡོད། དེས་ན་གྲོས་ཚོགས་ཚོགས་དུས་དགུ་པ་དང་ཚོགས་དུས་བཅུ་པ་གཉིས་བསྟུན་མར་ཚོགས་བཅར་མ་ཐུབ་པ། བྱང་ཨ་རིའི་སྤྱི་འཐུས་པདྨ་ཕྱག་མཛོད་ཚང་། ཡུ་རོབ་སྤྱི་འཐུས་ཟམ་མདོ་བྱམས་པ་བསྟན་འཛིན། ཨོ་གླིང་སྤྱི་འཐུས་གདོང་འདུས་སྐྱིད་འཛོམས། མདོ་སྨད་སྤྱི་འཐུས་རྒྱ་རིགས་ཐར། མདོ་སྨད་སྤྱི་འཐུས་བཀྲ་ཤིས་དོན་གྲུབ། མདོ་སྟོད་སྤྱི་འཐུས་རྡོ་རྗེ་ཚེ་བརྟན་བཅས་རང་བཞིན་གྱིས་བུད་པར་ངོས་འཛིན་བྱ་དགོས་ནའང་དེ་འབྲེལ་གྱི་ཐག་གཅོད་གང་ཡང་གནང་མེད། གོང་གསལ་སྤྱི་འཐུས་རྣམས་གྲོས་ཚོགས་སྐབས་དགུ་པའི་ལས་ཉིན་ཆ་ཚང་ལ་དགོངས་པ་ཞུས་པ་དང་། གྲོས་ཚོགས་ཚོགས་ཐེངས་བཅུ་པར་ཡང་ཚོགས་བཅར་ཐུབ་མིན་ཚོགས་གཙོ་སྦྲེལ་པོར་སྙན་གསན་ཞུས་ཡོད་སྟབས། དོན་དངོས་ཐོག་ཚོགས་དུས་གཉིས་བསྟུད་མར་ཚོགས་བཅར་མི་ཐུབ་པར་ངོས་འཛིན་བྱ་དགོས་པས། ཁྲིམས་སྒྲིག་གི་དགོངས་དོན་བཞིན་ཐག་གཅོད་གནང་དགོས་པ་ཡིན། གོང་ཞུས་ལྟར་དེ་ལྟའི་ཐག་གཅོད་མ་གནང་ཚེ་སྤྱི་འཐུས་དབང་ཆེན་ལགས་རང་བཞིན་གྱིས་འཕོས་པར་ཐག་གཅོད་གནང་བ་དེ་ཁྲིམས་འགལ་ཆགས་ཡོད་པས། ཁྲིམས་སྒྲིག་འགལ་འཛོལ་གྱི་ནག་ཉེས་ཆ་ཚང་ཚོགས་གཙོ་སྦྲེལ་པོ་དང་སྤྱི་འཐུས་རྒྱུན་ལས་ཚོས་འཁུར་དགོས།

༤། གྲོས་ཚོགས་མ་ཚོགས་པར་གྲོས་ཚོགས་ཀྱི་ལས་དོན་སྤེལ་བའི་མགོ་རྙོག

 ལོ་རེའི་ཟླ་གསུམ་པའི་ནང་ལོ་འཁོར་སྔོན་རྩིས་ཀྱི་གྲོས་ཚོགས་དང་ཟླ་དགུ་པའི་བོད་མིའི་སྒྲིག་འཛུགས་ཀྱི་ལས་དོན་ཁག་ལ་རྟོག་ཞིབ་བྱེད་པའི་གྲོས་ཚོགས་བསྐོང་ཚོགས་བྱེད་ཀྱི་ཡོད། སྐབས་བཅུ་དྲུག་པའི་ཚོགས་གཙོ་སྦྲེལ་པོ་དང་རྒྱུན་ལས་ཚོས་ཚོགས་འདུ་བཅུ་པ་འཕར་འགྱངས་ཡིན་ཞེས་གསལ་བསྒྲགས་བྱས་ཡོད་ནའང་དེའི་ལས་དོན་སྒྲུབ་བཞིན་པ་ནི་མགོ་རྙོག་ལུང་པ་གང་ཡིན། བཙན་བྱོལ་བོད་མིའི་བཅའ་ཁྲིམས་དང་མི་མཐུན་པ་དང་། བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་འདུའི་འགྲོ་ལུགས་དང་། ལས་དོན་བྱེད་ཕྱོགས་ཀྱི་སྒྲིག་གཞི་དང་མ་མཐུན་པར། བོད་མིའི་སྒྲིག་འཛུགས་ཀྱི་ལོ་འཁོར་ལས་བསྡོམས་ལ་རྟོག་ཞིབ་དང་དྲི་རྩད་བྱེད་བཞིན་པ་དེ་སུའི་ཐག་གཅོད་ཡིན་ནམ། ལས་བསྡོམས་དང་འབྲེལ་བར་སྤྱི་འཐུས་སྒེར་གྱི་དྲི་བ་བཏོན་པ་དེ་དག་ཚོགས་གཙོ་བརྒྱུད་ནས་གྲོས་ཚོགས་ལ་དྲིས་པ་ཞིག་མིན་སྟབས། དྲི་བ་དེ་དག་གྲོས་ཚོགས་ཀྱི་དེབ་ཐེར་ནང་འགོད་ནུས་པའི་དབང་ཚད་སུ་ལ་ཡོད། ཡང་འཛིན་སྐྱོང་བཀའ་ཤག་ནས་གྲོས་ཚོགས་མ་བརྒྱུད་པའི་དྲི་བ་དེ་དག་ལ་ལན་འདེབས་གནང་ཡོད་དམ་མེད། གལ་ཏེ་ལན་འདེབས་གནང་ཡོད་ན་དུས་རྒྱུན་སྤྱི་འཐུས་རྒྱུན་ལས་དང་སྤྱི་འཐུས་སྒེར་གྱི་དྲི་བ་དྲིས་པ་དེ་དག་དང་གཅིག་མཚུངས་མིན་པའི་ཁྱད་པར་ཇི་ལྟར་འབྱེད་དམ།

 ༥། བཙན་བྱོལ་བོད་མིའི་ཆེས་མཐོའི་ཁྲིམས་ཁང་གིས་ཁྲིམས་མཐུན་ཐག་གཅོད་གནང་དགོས།

 བཙན་བྱོལ་བོད་མིའི་བཅའ་ཁྲིམས་ཀྱིས་ཆེས་མཐོའི་ཁྲིམས་ཞིབ་ཁང་ལ་གནང་བའི་འགན་དབང་ནང་། བཙན་བྱོལ་བོད་མིའི་བཅའ་ཁྲིམས་ཀྱི་ཚིག་དོན་འགྲེལ་བརྗོད་བྱེད་ཕྱོགས་ལ་རྟེན་པའི་རྩོད་གླེང་ལ་་་ཞིབ་འཇུག་དང་། སྟངས་འཛིན་བྱ་རྒྱུའི་དབང་ཆ་ཡོད། ཞེས་གསལ་བ་བཞིན། སྐབས་བཅུ་དྲུག་པའི་སྤྱི་འཐུས་ཚོགས་གཙོ་དང་རྒྱུན་ལས་ཀྱིས་བཙན་བྱོལ་བོད་མིའི་བཅའ་ཁྲིམས་ཀྱི་འབྲུ་དོན་ལ་ལོག་འགྲེལ་དང་། ཁྲིམས་སྒྲིག་དང་འགལ་བའི་ལས་དོན་རིམ་པར་སྤེལ་བར་ངེས་པར་དུ་ཁྲིམས་དང་མཐུན་པའི་འདྲི་རྩད་དང་ཁྲིམས་མཐུན་གྱི་ཐག་གཅོད་ནན་པོ་གནང་དགོས་སོ། །

འབྲེལ་ཡོད་གསར་འགྱུར།

"Vocational training” programmes threaten Tibetan identity, carry risk of forced labour, say UN experts.© Unsplash/Aden Lao
Mobile App

རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཐོག་བོད་མི་ལས་བཟོ་བ་རྣམས་ཀྱི་ཐོབ་ཐང་གླེང་སློང་གནང་། 

ཆུ་ཚོད་ ༦ སྔོན་ལ།
བོད་མི་མང་སྤྱི་འཐུས་ཚོགས་གཞོན་སྒྲོལ་མ་ཚེ་རིང་མཆོག་གིས་བཅར་འདྲིར་ལན་འདེབས་གནང་བཞིན་པ། ༢༠༢༣།༩།༢༧ དུས་བབ་ཀྱི་པར།
Mobile App

བོད་མི་མང་སྤྱི་འཐུས་ཚོགས་གཞོན་མཆོག་ནས་གཞི་རིམ་མི་མང་ལས་འགུལ་བར་ཐུག་འཕྲད་གནང་།

ཆུ་ཚོད་ ༧ སྔོན་ལ།
Mobile App

ཡུ་རོབ་ནང་པའི་མཐུན་ཚོགས་ཀྱིས་༧སྐུའི་ཡང་སྲིད་དང་འབྲེལ་བའི་བསྒྲགས་གཏམ་སྤེལ།

ཆུ་ཚོད་ ༨ སྔོན་ལ།
གཞི་རིམ་མི་མང་གི་ལས་འགུལ་ཚོགས་པའི་རྒྱུན་ལས་ཚེ་བརྟན་ཕུན་ཚོགས་ལགས། ༢༠༢༣། ༩། ༢༦ བོད་ཀྱི་དུས་བབ་ཀྱི་པར།
Mobile App

ཁང་པ་སྟོང་པ་ཞིག་ལ་འབོད་སྐུལ་ཞུས་ནས་བསྡད་ཚེ་ཏག་ཏག་བསྡད་མི་འདུག

༢༠༢༣/༠༩/༢༦
Uyghur Scholar Rahile Dawut [Photo: Uyghur Human Rights Project]
Mobile App

ཡུ་གུར་གྱི་སློབ་དཔོན་ཆེན་མོ་ཞིག་ལ་ཚེ་བཙོན་གྱི་ཁྲིམས་ཐག་བཅད།

༢༠༢༣/༠༩/༢༥
EU trade chief Valdis Dombrovskis speaks at the Bund Summit in Shanghai on Saturday. Photo: Reuters
Mobile App

འཛམ་གླིང་གི་ཚོང་ཤག་ཆེ་ཤོས་གཉིས་ཀྱི་འབྲེལ་བ་ཇེ་སྡུག་ཏུ་འགྲོ་ཉེན་འདུག 

༢༠༢༣/༠༩/༢༥

མཆན། 13

  1. སྐལ་བཟང་ཚེ་རིང་། says:
    ལོ་ 3 སྔོན།

    གྲུབ་འབྲས་འདི་རེད།
    https://trimzin.net/wp-content/uploads/2020/09/%E0%BD%86%E0%BD%91%E0%BC%8B%E0%BD%A0%E0%BD%82%E0%BD%BA%E0%BD%A3%E0%BC%8B%E0%BD%82%E0%BE%B1%E0%BD%B2%E0%BC%8B%E0%BD%90%E0%BD%82%E0%BC%8B%E0%BD%82%E0%BD%85%E0%BD%BC%E0%BD%91%E0%BC%8B%E0%BD%96%E0%BD%80%E0%BD%A0%E0%BC%8B%E0%BD%81%E0%BE%B1%E0%BD%96.pdf

    Reply
  2. གཞུང་པ་ཚེ་དབང་བསོད་ནམས says:
    ལོ་ 3 སྔོན།

    རྒྱལ་བ་ལྔ་པ་དང་ཟླ་བ་ལྔ་པ་མ་ནོར་བའི་ཐོག་ནས་མཆན་བཀོད་རྒྱུ་དེ་གསར་ཤོག་ཀློག་མཁན་ཚོའི་ལས་འགན་ཆེ་ཤོས་དེ་ཡིན་པའི་ངོས་འཛིན་ཞུ་གི་ཡོད།

    Reply
  3. མཛོ་སྒང་མཁྱེན་རབ་དབང་ཕྱུག says:
    ལོ་ 3 སྔོན།

    མི་མང་པོ་ད་དུང་ཡང་འཁྲུགས་འདུག དབང་ཆེན་ལགས་གནས་དབྱུང་གཏོང་མཁན་དེ་སྤྱི་འཐུས་རྒྱུན་ལས་རེད། གྲོས་ཚོགས་མེད་པ་བཟོ་མཁན་དེ་ཡང་སྤྱི་འཐུས་རྒྱུན་ལས་རེད། ནོར་ཡོད་ན་ནོར་མཁན་དེ་རྒྱུན་ལས་ཚོ་རེད། ཕུད་དགོས་ན་རྒྱུན་ལས་ཚོ་ཕུད་དགོས།

    Reply
  4. རིགས་ཀྱི་བུ། says:
    ལོ་ 3 སྔོན།

    ད་རེས་ཆེས་ཁྲིམས་ཞིབ་པ་དག་གནས་དབྱུང་གཏོང་དགོས། མཐོའི་ཁྲིམས་ཞིབ་ཁང་མགོ་རྟིང་སློག་པའི་དུས་ལ་སླེབས་སོང་། ད་བར་དྲང་བདེན་མིན་པའི་བྱ་སྤྱོད་སྤེལ་བར་མང་ཚོགས་ཀྱིས་ངོ་རྒོལ་རྒྱག་པའི་དུས་རེད།

    Reply
  5. མཐུ་སྟོབས་དབང་ཕྱུག་གཡུ་ཐོག་ says:
    ལོ་ 3 སྔོན།

    ཆེ་མཐོའི་ཁྲིམས་ཞིབས་ཁང་ལ་ཆེ་མཐོང་དང་གུས་བརྩི་ཡོད་པ་དང་དགོས་པ་ཡོངས་གྲགས་རེད་། འོན་ཀྱང་ཁྲིམས་དཔོན་རྣམས་དགོས་ངེས་ཀྱི་གནས་ཚད་དང་དྲང་ཚུགས་ལྡན་པ་མེད་པར་རྟེན་ཁ་མཆུ་ ༢༠ ཟེར་བ་དེ་ འཛིན་སྐྱོང་བཀའ་ཤག་ཕམས་ཉེས་བཟོས་པ་བོད་ཀྱི་ལོ་རྒྱུས་ནང་དང་པོ་ཆགས་པ་མ་ཟད་བོད་མང་ཚོགས་ཀྱི་སེམས་ཁར་རྨ་ཁ་ཆེན་པོ་བཟོས་པ་དང་དགྲ་དགའ་གཉེན་སྡུག་ཀྱི་གནས་སྟངས་ཆགས་ཚར་ཙམ་ཡིན་མོད་། རྩ་བའི་མང་གཙོའི་ལམ་སྲོལ་ནང་ཆེ་མཐོའི་ཁྲིམས་ཞིབ་དང་གྲོས་ཚོགས་འཛིན་སྐྱོང་བཀའ་ཤག་བཅས་མང་གཙོ་ཀ་བ་གསུམ་དབང་ཚད་འདྲ་མཉམ་ཡིན་དགོས་ཀྱང་ང་ཚོ་བཙན་བྱོལ་སྒྲིག་འཛུགས་ནང་དེ་ལྟར་མ་བྱུང་བར་ཆེ་མཐོའི་ཁྲམས་ཞིབ་ཁང་དང་གྲོས་ཚོགས་ནས་བཅའ་ཁྲིམས་དགོངས་དོན་ཞེས་ཁ་ལ་ཁྱེར་བ་ཙམ་ལས་ལག་བལྟར་མ་གནང་བ་མ་ཟད་དེ་མུར་སོ་སོས་འདོད་མོས་བཞིན་དབང་ཆ་སྒེར་སྤྱོད་ཐོག་ཐག་གཅོད་དྲང་བདེན་མ་གནང་བ་ཟུར་བལྟས་ལེབ་མཐོང་ཡིན་པ་ལྟར་ད་རིས་ཞང་བློན་གྱིས་ཆེད་བརྩོམ་དེས་གོ་དོན་བསྐྱར་ནན་གནང་འདུག་།
    དེ་བཞིན་ཡོ་རོབ་སྤྱི་འཐུས་སྐུ་ཞབས་ཐུབ་བསྟན་དབང་ཆེན་ལགས་དགོས་དོན་གང་ཡང་མེད་ཁར་ཟློག་ཏུ་མེད་པའི་དངོས་་ཡོད་གནས་སྟངས་ལ་གཏིལ་འབྲུ་ཙམ་ཡང་དགོོངས་བཞེས་མེད་པར་དབང་ཆ་ལོག་སྤྱོད་ཀྱིས་ཕྱིར་འབུད་གནང་བར་མང་ཚོགས་ནང་ཧ་ལས་པའི་སེམས་འཚབས་དང་བློ་ཕམ་བྱུང་ཡོད་ཀྱང་གྲོས་ཚོགས་ཀྱི་ཚོགས་གཙོ་མཆོག་གཙོས་པའི་སྤྱི་འཐུས་རྒྱུན་ལས་རྣམས་སྣང་མེད་ཐོག་ལྷོད་ལྷོད་བློ་བདེའི་ངང་བཞུགས་ཡོད་། ད་རིས་ཞང་བློན་གྱིས་དགོངས་ཚུལ་ལམ་ཆེད་བརྩོམས་འདིས་ལྷོད་ལྷོད་བློ་བདེའི་ངང་བཞུགས་ཐུབ་ཐབས་མེད་པ་བཟོས་འདུག་།
    སྤྱིར་བཙན་བྱོལ་བོད་མིའི་བཅའ་ཁྲིམས་གནད་དོན་གལ་ཆེན་མང་པོའི་ཐོག་ཁ་གསལ་གོ་བདེ་མེད་ཁར་ཕྱག་བལྟར་གནང་མཁན་རྣམས་ནས་དྲང་བདེན་དང་བག་ཡོད་མེད་པའི་ཧོལ་རྒྱུགས་ཀྱི་ཐག་་གཅོད་མང་པོས་རང་རེའི་སྤྱི་ཚོགས་ནང་དཀའ་ངལ་དང་རྙོག་གླིང་མང་དག་ཞིག་ཡོངས་བཞིན་པ་ཡོངས་གྲགས་ཡིན་པར་བརྟེན་ཚང་མས་དགོངས་པ་རྒྱ་ཆེ་དང་ཟབ་བཞེས་དགོས་པའི་དུས་ལ་སླེབས་འདུག་གོ་།།།

    Reply
  6. ཉི་མ་རང་གྲོལ། says:
    ལོ་ 3 སྔོན།

    ད་རྒྱུན་ལས་དམར་པོ་ཟེར་ནའང་འདྲ། ཆོས་རྒྱུད་ཁག་གི་སྤྱི་འཐུས་ཐད་ལ་བགྲོ་གླེང་བྱེད་རན་འདུག

    Reply
  7. མིག་དམར་ཚེ་རིང་། says:
    ལོ་ 3 སྔོན།

    ཞང་བློན་ཟེར་བ་འདི་ཆེས་མཐོའི་ཁྲིམས་ཞིབ་ཁང་གི་དྲུང་ཆེ་བཀྲ་ཤིས་རྒྱ་འཚོ་ཟེར་བ་དེ་ཡིན་པ་ཡོངས་གྲགས་རེད།
    ནམ་རྒྱུན་གྲག་འགུལ་མེད་པར་གོ་སྐབས་རེག་པ་དང་བསྟུན་ཏེ་སྤྱི་ཚོགས་དཀྲུག་ཐབས་བྱས་ན་ཡག་པོ་ཡོད་པ་མ་རེད།

    Reply
  8. ཀུན་དགའ། says:
    ལོ་ 3 སྔོན།

    ཆེས་མཐོའི་ཁྲིམས་ཞིབ་ཁང་གིས་ཇུས་གཏོགས་མེད་སར་ཇུས་གཏོགས་བྱེད་ཀྱི་འདུག སྤྱིར་བཏང་མང་གཙོའི་ཀ་བ་གསུམ་འདྲ་མཉམ་རེད། ཕན་ཚུན་ལ་དབང་ཚད་ལས་བརྒལ་བའི་ལས་དོན་སྤེལ་ཆོག་གི་མ་རེད། སྔོན་ཆད་བཀའ་ཤག་གིས་སྤྱི་ཚོགས་ཀྱི་ལྷིང་འཇགས་དང་༧རྒྱལ་བའི་ཐུགས་དགོངས་དཀྲུག་སྲིད་པར་དགོངས་པ་ཆེ་བཞེས་ཀྱིས་ཁྲིམས་ཞིབ་ཁང་གི་དྲང་བདེན་མིན་པའི་ཐག་གཅོད་དེར་མི་འདོད་བཞིན་དུ་སྡུག་སྲན་བྱས་པ་རེད། ད་རེས་བསྐྱར་དུ་ཁྲིམས་ཞིབ་ཁང་འདུག་ཚོད་མ་ཟིན་པར་བོད་མི་མང་སྤྱི་འཐུས་ལ་ཧམ་བཤད་བྱས་ཏེ་མང་གཙོའི་སྒྲིག་སྲོལ་དང་ཁྲིམས་སྒྲིག་གི་འབྲུ་དོན་ལས་བརྒལ་བའི་ལས་ཀ་བྱས་ན་རྒྱ་ཡན་དུ་གཏོང་ཐབས་ཡོད་མ་རེད།

    Reply
  9. ལྷ་སྲས། says:
    ལོ་ 3 སྔོན།

    ཆེས་མཐོའི་ཁྲིམས་ཞིབ་ཁང་ཧམ་པ་ཆེ་དྲག་བཞིན་འདུག ས་མཚམས་ལ་བརྒལ་ཏེ་མང་གཙོའི་སྒྲོམ་གཞི་རྡོག་རོལ་གཏོང་གི་འདུག

    Reply
  10. ནུབ་རིའི་གསེང་ཕྲུག says:
    ལོ་ 3 སྔོན།

    གནད་དོན་འདིའི་ཐད་སྤྱི་ཚོགས་ཁྲོད་ལབ་གླེང་མང་དག་ཞིག་འབྱུང་བཞིན་འདུག་ལ་སྐབས་དེ་དུས་བཙན་བྱོལ་བོད་མིའི་སྒྲིག་འཛུགས་ཀྱི་ཁྲིམས་སྒྲིག་ཁག་ཕྱོགས་བསྒྲིགས་ཟེར་བའི་ནང་དུ་དེ་འབྲེལ་བཙན་བྱོལ་བོད་མིའི་བཅའ་ཁྲིམས་རིན་པོ་ཆེའི་འབྲུ་དོན་གསལ་བར་བལྟ་ཀློག་བརྒྱུད་ད་ཡོད་བོད་མི་མང་སྐབས་བཅུ་དྲུག་པའི་སྤྱི་འཐུས་ཚོགས་གཙོ་གཙོས་རྒྱུན་ལས་རྣམ་པའི་གནང་སྟངས་དེ་བད་དེ་ཁྲིམས་འགལ་ལ་སོང་འདུག དེར་བརྟེན་ང་ཚོ་གཞིས་བྱེས་མི་མང་ངོས་ནས་ཀྱང་མིག་རྣ་གཟེངས་སུ་གྲེང་སྟེ་ཆེས་མཐོའི་ཁྲིམས་ཞིབ་ཁང་གི་ཐག་གཅོད་ལ་ལྡིར་ནས་ཡོད།

    Reply
  11. བཀྲ་ཤིས། says:
    ལོ་ 3 སྔོན།

    སྒྲིག་འགལ་འདི་འདྲ་བྱུང་ཡང་ད་དུང་ཁུ་སིམ་མེར་སྡོད་པ་གང་འདྲ་རེད། སྤྱི་འཐུས་རྒྱུན་ལས་ནས་མང་ཚོགས་ལ་དབུ་སྐོར་ཆེན་པོ་བཏང་འདུག ད་ཆེས་མཐོའི་ཁྲིམས་ཁང་ནས་དགོངས་པ་བཞེས་དགོས་འདུག

    Reply
  12. ཉི་མ་རང་གྲོལ། says:
    ལོ་ 3 སྔོན།

    སྐབས་བཅུ་དྲུག་པའི་ཚོགས་གཙོ་སྦྲེལ་པོ་དང་རྒྱུན་ལས་ཚོས་ཚོགས་འདུ་བཅུ་པ་འཕར་འགྱངས་ཡིན་ཞེས་གསལ་བསྒྲགས་བྱས་ཡོད་ནའང་དེའི་ལས་དོན་སྒྲུབ་བཞིན་པ་ནི་མགོ་རྙོག་ལུང་པ་གང་ཡིན། བཙན་བྱོལ་བོད་མིའི་བཅའ་ཁྲིམས་དང་མི་མཐུན་པ་དང་། བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་འདུའི་འགྲོ་ལུགས་དང་། ལས་དོན་བྱེད་ཕྱོགས་ཀྱི་སྒྲིག་གཞི་དང་མ་མཐུན་པར། བོད་མིའི་སྒྲིག་འཛུགས་ཀྱི་ལོ་འཁོར་ལས་སྡོམ་ལ་རྟོག་ཞིབ་དང་དྲི་བརྩད་བྱེད་པ་དེ་སུའི་ཐག་གཅོད་ཡིན་ནམ། ལས་བསྡོམས་དང་འབྲེལ་བར་སྤྱི་འཐུས་སྒེར་གྱི་དྲི་བ་བཏོན་པ་དེ་དག་ཚོགས་གཙོ་བརྒྱུད་ནས་གྲོས་ཚོགས་ལ་དྲིས་པ་ཞིག་མིན་སྟབས། དྲི་བ་དེ་དག་གྲོས་ཚོགས་ཀྱི་དེབ་ཐེར་ནང་འགོད་ནུས་པའི་དབང་ཚད་སུ་ལཡང་མེད་དོ།།

    Reply
  13. འཇམ་དབྱངས་གྲགས་པ། says:
    ལོ་ 3 སྔོན།

    ཞང་བློན་ལགས་ནས་གནད་འགགས་ཆེ་བའི་དཔྱད་རྩོམ་དཔེ་མེད་ཅིག་བྲིས་འདུག
    ཁྲིམས་ཞིབ་ཁང་གིས་ངེས་པར་དུ་ལག་བསྟར་གནང་རོགས།

    Reply

དཔྱད་མཆན་སྤེལ། Cancel reply

Your email address will not be published. Required fields are marked *

སྤྱི་ཚོགས་དྲ་གནས།

ཁྱབ་བསྒྲགས།

དྲ་ངོས་ཀྱི་གནས་ཚུལ་ཚང་མའི་པར་དབང་བོད་ཀྱི་དུས་བབ་ལ་ཡོད།

གློག་འཕྲིན།

editor@tibettimes.net | office@tibettimes.net

ཁ་པར།

+91-98823-47075 | +91-92189-38041 | +91-81972-44372
No Result
ཆ་ཚང་གཟིགས།
  • གསར་འགྱུར།
    • ༸གོང་ས་མཆོག གསར་འགྱུར།
    • བཙན་བྱོལ།
    • བོད་ནང་།
    • རྒྱལ་སྤྱི།
    • རྒྱ་ནག
    • ༧གོང་ས་མཆོག གསུང་འཕྲིན།
  • རྩོམ་ཡིག།
    • བསམ་ཚུལ།
    • སྒྱུར་རྩོམ།
  • བརྙན་མཛོད།
    • གླེང་མོལ།
    • མེ་ལོང་།
    • ང་ཡི་བཙན་བྱོལ་བ།
    • གངས་ཕྲུག
    • དྲ་བརྙན་གསར་འགྱུར།
  • ཁྱབ་བསྒྲགས།
    • གླ་ཡོད་ཁྱབ་བསྒྲགས།
    • དུས་བབ་ཀྱི་གསལ་བསྒྲགས།
  • པར་མཛོད།
    • ང་ཚོའི་པར།
    • གསང་འགྱུར་པར་རིས།
  • དཔེ་དེབ།
  • རྩོམ་སྒྲིག་པའི་གཏམ།
  • ང་ཚོའི་སྐོར།
    • བོད་ཀྱི་དུས་བབ་ཀྱི་བྱུང་རིམ།
    • རྩ་ཆེའི་གསུང་འཕྲིན་ཁག
    • English
    • Chinese

Welcome Back!

OR

Login to your account below

Forgotten Password?

Retrieve your password

Please enter your username or email address to reset your password.

Log In

Add New Playlist