གྲྭ་རིན་ཆེན་ཚུལ་ཁྲིམས་འཛིན་བཟུང་བྱས་ཏེ་གོ་ཐོས་མེད་པར་གྱུར།

རྔ་བ་རྫོང་སྣང་ཞིག་དགོན་པའི་དགེ་འདུན་པ་རིན་ཆེན་ཚུལ་ཁྲིམས་ལགས་འཛིན་བཟུང་བྱས་ཏེ་ལོ་ ༡ དང་ཕྱེད་ཀ་མ་ཟིན་ཙམ་ཕྱིན་ཡོད་ཀྱང་ད་དུང་ཁོང་གང་དུ་ཡོད་མེད་ཙམ་ཡང་ཤེས་རྟོགས་ཐུབ་ཀྱི་མེད་འདུག
དེ་རིང་འབྲེལ་ཡོད་ཅིག་གིས་འདི་གའི་གསར་འགོད་པར་གནས་ཚུལ་མཁོ་སྤྲོད་བྱས་པ་ལྟར་ན། བོད་རྔ་བ་རྫོང་ཁཱ་ཤུལ་སྡེ་བ་ནས་ཡིན་པའི་སྣང་ཞིག་དགོན་པའི་གྲྭ་རིན་ཆེན་ཚུལ་ཁྲིམས་ཞུ་བ་ཞིག འདས་ལོའི་ཕྱི་ཟླ་ ༨ ཚེས་ ༡ ཉིན་རྔ་བ་རྫོང་ཁོངས་ཀོར་མདོ་ས་ཚིགས་ནས་རྔ་བ་རྫོང་གི་ཉེན་རྟོག་པས་འཛིན་བཟུང་བྱས་རྗེས། ཁོང་གང་དུ་ཡོད་མེད་ཀྱི་གནས་ཚུལ་ཙམ་ཡང་ཤེས་རྟོགས་མ་ཐུབ་པར་ལོ་གཅིག་དང་ཟླ་བ་ ༤ མ་ཟིན་ཙམ་ཕྱིན་འདུག

རྒྱ་གར་ཧི་མ་ཅལ་གྱི་སྦིར་བོད་མི་གཞིས་སྒར་དུ་གནས་སྡོད་གྲྭ་རིན་ཆེན་ཚུལ་ཁྲིམས་ལགས་ཀྱི་གཅེན་མོ་ཀུན་བཟང་སྒྲོལ་མས་འདི་གའི་གསར་འགོད་པར། འདས་ལོའི་ཕྱི་ཟླ་ ༧ ཚེས་ ༢༧ ཙམ་ལ་ངེད་སྤུན་མཆེད་གཉིས་སྐད་འཕྲིན་བརྒྱུད་སྐད་ཆ་བཤད་པ་ཡིན། དེ་དུས་ཁོང་རང་དགོན་པ་ལ་འདུག འོན་ཀྱང་། ཉིན་ཤས་རྗེས་རྒྱ་གར་ལ་ཡོད་པའི་འབྲེལ་ཡོད་ཅིག་གིས་ངའི་གཅུང་པོ་རིན་ཆེན་ཚུལ་ཁྲིམས་འཛིན་བཟུང་བྱས་འདུག་ཅེས་བརྗོད་བྱུང་། འདས་ལོའི་ཕྱི་ཟླ་ ༨ ཚེས་ ༡ ཉིན་གྱི་དགོང་མོ་ཙམ་ལ་ཕྱི་ལོག་ནས་ཁ་ལག་བཟོས་ནས་ཕྱིར་ལོག་སྐབས་ཁོང་ཉེན་རྟོག་པས་བཙན་འཁྲིད་བྱས་འདུག ཅེས་བརྗོད་བྱུང་།

ཡང་ཁོང་མོས། སྤྱིར་ང་ཚོའི་ནང་མི་རྣམས་ཞིང་པ་ཡིན་སྟབས་ཁྲིམས་རྩོད་པ་བཙལ་ཏེ་ཡར་ཞུ་སོགས་གང་ཡང་ཤེས་ཀྱི་མ་རེད། ང་ལ་ཨ་ཞང་ཞིག་ཡོད་པ་དེ་ཁྲིན་ཏུའུ་སོགས་ལ་བལྟ་རུ་འགྲོ་སྐབས་གང་ཡང་ཤེས་རྟོགས་ཐུབ་མི་འདུག ཡང་འདི་ལོའི་ཕྱི་ཟླ་ ༣ པའི་ནང་རྔ་བ་རྫོང་གི་ཉེན་རྟོག་པས་ངའི་གཅུང་པོ་ཆུང་བ་ནོར་བུ་ཚེ་རིང་མངག་གཏོང་ཁང་ལ་འབོད་སྒུག་བྱས་ཏེ། རིན་ཆེན་ཚུལ་ཁྲིམས་ཀྱིས་རྒྱལ་ཁབ་ལ་ངོ་ལོག་བྱས་པའི་རྐྱེན་གྱིས་བཙོན་ཁང་ནང་ཡོད་པ་དང་། ཁོ་པར་ཅ་དངོས་ལྟ་བུ་སྤྲོད་དགོས་ཚེ་ཁོ་ཚོའི་ལག་ཏུ་འཇོག་དགོས་སྐོར་བཤད་འདུག་པ་དང་། བཙོན་ཁང་གང་དུ་ཡོད་མེད་དྲིས་པར་སྐབས་རེར་འབར་ཁམས་དང་། འབར་ཁམས་ཀྱི་གང་དུ་ཡོད་མེད་དྲིས་དུས་ཁྲིན་ཏུའུ་ལ་ཡོད་རེད་ཟེར་བ་ལྟ་བུ་བཤད་དེ་གསལ་པོ་གང་ཡང་བཤད་ཀྱི་མེད་པ་རེད། ཅེས་བརྗོད་བྱུང་ལ། རིན་ཆེན་ཚུལ་ཁྲིམས་ལགས་འཛིན་བཟུང་བྱས་པ་ནས་བཟུང་ཀུན་བཟང་སྒྲོལ་མ་ལགས་ཀྱིས་བོད་ནང་གི་ཁྱིམ་མི་ཚོར་འབྲེལ་བ་བྱེད་རྒྱུར་ཞེད་སྣང་སྐྱེ་ཡི་ཡོད་པ་དང་། ད་ལྟའི་ཆར་གཅུང་པོ་ཆུང་བ་ནོར་བུ་ཚེ་རིང་ལགས་ཀྱིས་ཕ་མ་གཉིས་ལ་ལྟ་སྐྱོང་བྱེད་ཀྱི་ཡོད་འདུག

མིང་བརྗོད་འདོད་མེད་པའི་དྷ་སར་གནས་སྡོད་འབྲེལ་ཡོད་ཅིག་གིས་འདི་གའི་གསར་འགོད་པར་འགྲེལ་བརྗོད་གནང་བ་ལྟར་ན། ཕྱི་ལོ་ ༢༠༡༨ ལོར་རྒྱ་ནག་གཞུང་གི་ཉེན་རྟོག་པས་གྲྭ་རིན་ཆེན་ཚུལ་ཁྲིམས་ལགས་ཀྱི་སྐད་འཕྲིན་ནང་སྔོག་བཤེར་བྱས་པ་བརྒྱུད། ཁོང་གིས་ཕྱི་ལོགས་ཀྱི་བོད་མི་ཁག་ཅིག་དང་མཉམ་དུ་བོད་དོན་གླེང་སློང་བྱས་ཡོད་སྐོར་ཉེས་འཛུགས་བྱས་ཏེ།  ཁོང་དང་ཁོང་གི་ནུ་བོ་ནོར་བུ་ཚེ་རིང་ཐེངས་གཉིས་ལ་འཛིན་བཟུང་བྱས་ཡོད་པ་དང་། སྐབས་དེར་རིན་ཆེན་ཚུལ་ཁྲིམས་ལགས་ཀྱི་སྐད་འཕྲིན་ཡང་བཀོལ་སྤྱོད་མི་ཆོག་པ་བཟོས་ཡོད་འདུག དེ་བཞིན་རྒྱ་ནག་གཞུང་གིས་གྲྭ་རིན་ཆེན་ཚུལ་ཁྲིམས་ལགས་ཀྱིས་ཕྱི་ལོ་ ༢༠༡༩ ལོའི་༧ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་མཆོག་གི་སྐུའི་འཁྲུངས་སྐར་ཉིན། ཕྱི་རྒྱལ་ན་ཡོད་པའི་བོད་མི་ཞིག་དང་མཉམ་དུ་དུས་ཚོད་གཉིས་ལྷག་ལ་ཁ་པར་བརྒྱུད་ཁ་བརྡ་བྱས་ཡོད་ལུགས་ཀྱི་བརྒྱུད་རིམ་ཆ་ཚང་སྒྲ་འཇུག་བྱས་ཡོད་འདུག

གཞན་ཡང་། རྒྱ་ནག་གཞུང་གིས་རིན་ཆེན་ཚུལ་ཁྲིམས་ལགས་ཀྱིས་སྦྲག་ཁང་བརྒྱུད་ཕྱི་ལོགས་ནས་འབྱོར་བའི་དཔེ་ཆ་གལ་ཆེན་མང་པོ་ཞིག་བོད་ནང་གི་ས་ཆ་གང་མང་ལ་འགྲེམས་སྤེལ་བྱས་ཡོད་ལུགས་དང་། སྒེར་གྱིས་གཙོ་གཉེར་བྱས་པའི་ཆད་ལྟ་བ་ཞེས་པའི་རྩོམ་རིག་དྲ་ཚིགས་ནང་བོད་དོན་དང་འབྲེལ་བའི་རྩོམ་ཡིག་མང་པོ་ཞིག་སྤེལ་ཡོད་པའི་ཉེས་འཛུགས་བྱས་ཏེ་དྲ་ཚིགས་དེ་གཏན་དུ་སྒོ་བརྒྱབ་ཡོད་པ་དང་། དེ་བཞིན་རྒྱ་གར་དུ་ཡོད་པའི་གཅེན་མོ་ཀུན་བཟང་སྒྲོལ་མ་ཤེས་ཡོན་དང་འབྲེལ་བའི་ཚོགས་འདུ་ཁག་ལ་ཞུགས་པའི་འདྲ་པར་ཁག་རང་གི་སྐད་འཕྲིན་རྒྱབ་ལྗོངས་སུ་བཞག་པ་དག་ཀྱང་ཆབ་སྲིད་ལ་འབྲེལ་བ་ཡོད་སྐོར་ཉེས་འཛུགས་བྱས་ཡོད་འདུག

གྲྭ་རིན་ཆེན་ཚུལ་ཁྲིམས་ལགས་ནི་ཁཱ་ཤུལ་སྡེ་བའི་གཉེར་བ་ཚང་ཞེས་པའི་ཞིང་པའི་ཁྱིམ་ཚང་དཀྱུས་མ་ཞིག་ཏུ་སྐྱེས་ཤིང་། ད་ལྟ་རང་ལོ་ ༢༩ ཡིན་པ་དང་ཁོང་དགུང་ལོ་དྲུག་ཙམ་ནས་རྔ་ཡུལ་གྱི་བོན་དགོན་ཆེ་ཤོས་སྣང་ཞིག་དགོན་པར་ཆོས་ཞུགས་བྱས་ཏེ་སྔགས་ཀྱི་འཛིན་གྲྭར་ཐོན་ཡོད་འདུག ཁོང་གི་ཕ་མིང་ལ་བཀྲ་ཤིས་དོན་གྲུབ་དང་ལོ་ ༦༨ ཡིན་ཞིང་། མ་མིང་ལ་མཚོ་མོ་ཟེར་ཞིང་ལོ ༥༧ ཡིན་འདུག ཁོང་ལ་ཀུན་བཟང་སྒྲོལ་མ་ཚུད་པའི་ཕ་མ་གཅིག་གི་སྤུན་མཆེད་ ༥ ཡོད་འདུག

གསར་འགོད་པ། པ་སངས་ཚེ་རིང་།