རྒྱ་ནག་གི་རྒྱལ་སྲུང་བློན་ཆེན་བལ་ཡུལ་ནང་གཞུང་འབྲེལ་སྐོར་སྐྱོད་དུ་སླེབས་ཡོད་པ་དང་བལ་ཡུལ་གཞུང་གིས་བོད་མི་འདུས་སྡོད་ཆེ་ཁུལ་དམ་དྲག་ཆེན་པོ་བྱེད་ཀྱི་འདུག
དེ་རིང་རྒྱ་ནག་གི་རྒྱལ་སྲུང་བློན་ཆེན་ཝེ་ཧྥིང་ཧི (Wei Fenghe) ཟེར་བ་བལ་ཡུལ་ནང་ཉིན་གཅིག་རིང་གཞུང་འབྲེལ་སྐོར་སྐྱོད་དུ་སླེབས་ཡོད་པ་དང་བསྟུན། བལ་ཡུལ་གཞུང་གིས་བོད་མི་འདུས་སྡོད་ཆེ་སའི་ས་ཁུལ་མཆོད་རྟེན་བྱ་རུང་ཁ་ཤོར་གཡས་གཡོན་དང་། འཕགས་པ་ཤིང་ཀུན། འཇོ་ལ་ཁེལ་བསམ་གྲུབ་གླིང་གཞིས་ཆགས་དང་། དེ་བཞིན་བོད་པའི་ལས་ཁུངས་ཁག་གི་སྒོ་འགྲམ་དུ་དམག་མི་དང་ཉེན་རྟོག་པ་བགོ་འགྲེམ་བྱས་ཏེ་བོད་མིར་དམ་དྲག་ཆེན་པོ་བྱེད་ཀྱི་ཡོད་འདུག
འདི་གའི་གསར་འགོད་པས་ཞལ་པར་བརྒྱུད་བལ་ཡུལ་དོན་གཅོད་ཚུལ་ཁྲིམས་རྒྱ་མཚོ་ལགས་སུ། བལ་གཞུང་གིས་བོད་མིར་དམ་དྲག་ཇི་ལྟར་བྱེད་ཀྱི་ཡོད་མེད་བཀའ་འདྲི་ཞུས་པར་ཁོང་གིས། རྒྱ་ནག་གི་བདེ་སྲུང་བློན་ཆེན་བལ་ཡུལ་དུ་སླེབས་ཀྱི་ཡོད་སྟབས། ཁ་སང་ཉིན་གྲངས་གཉིས་གསུམ་གོང་ནས་ཁོ་ཚོས་མངོན་གསལ་དོད་པོ་མེད་པའི་སྒོ་ནས་བོད་མི་ཚོས་ག་རེ་བྱེད་ཀྱི་ཡོད་མེད་དོགས་ཟོན་ལྟ་རྟོག་བྱེད་ཀྱི་འདུག་ལ། དེ་རིང་དངོས་སུ་དམག་མི་གང་ས་གང་དུ་བཀྲམས་འདུག དེ་བཞིན་ང་ཚོའི་བོད་མི་གཞིས་སྒར་རེ་ཟུང་ནང་གཞིས་མི་ཕྱི་ལོགས་ལ་བསྐྱོད་མི་ཆོག་པ་དེ་འདྲའང་བཟོས་འདུག གཞན་ཡང་མཆོད་རྟེན་ནང་དམག་མི་དང་ཆས་གོས་དཀྱུས་མའི་སོ་བ་མང་པོ་བཀྲམས་ཡོད་འདུག ཅེས་འགྲེལ་བརྗོད་གནང་བྱུང་།
ཡང་མཆོད་རྟེན་བྱ་རུང་ཁ་ཤོར་གྱི་ཉེ་འཁྲིས་སུ་གནས་སྡོད་བོད་མི་ཞིག་གིས་འདི་གའི་གསར་འགོད་པར་འགྲེལ་བརྗོད་བྱས་པ་ལྟར་ན། དེ་རིང་ཞོགས་པ་ནས་མཆོད་རྟེན་བྱ་རུང་ཁ་ཤོར་གྱི་སྐོར་ར་དང་རྒྱལ་སྒོ་གཡས་གཡོན་དུ་དུས་རྒྱུན་དང་མི་འདྲ་བར་དམག་མི་དང་ཉེན་རྟོག་པ་ཕོན་ཆེན་འགྲེམ་འཇོག་བྱས་འདུག་པ་མ་ཟད། མཆོད་རྟེན་བྱ་རུང་ཁ་ཤོར་གཡས་གཡོན་དུ་ཡོད་པའི་རང་བཙན་ལས་ཁུངས་ཀྱིས་མཚོན་པའི་བོད་པའི་ལས་ཁུངས་ཁག་གི་སྒོ་འགྲམ་དུ་ཉེན་རྟོག་པ་རེ་ཟུང་ལངས་ཏེ་དོགས་ཟོན་ལྟ་རྟོག་བྱས་ནས་བོད་མིར་དམ་དྲག་ཤུགས་ཆེན་པོ་བྱེད་ཀྱི་ཡོད་འདུག
ཁ་སང་བལ་ཡུལ་གྱི་ཕྱི་སྲིད་ལྷན་ཁང་གི་གསལ་བསྒྲགས་ལྟར་ན། དེ་རིང་རྒྱ་ནག་གི་རྒྱལ་སྲུང་བློན་ཆེན་ཝེ་ཧྥིང་ཧི་ཟེར་བས་ཕྱོགས་གཉིས་ཀྱི་འབྲེལ་ལམ་ཡར་རྒྱས་ལ་དམིགས་ཏེ། བལ་ཡུལ་གྱི་སྲིད་བློན་ཤར་མ་ཨོ་ལི་ (Sharma Oli) དང་ཐུག་འཕྲད་བྱ་རྒྱུ་མ་ཟད། བལ་ཡུལ་གྱི་སྲིད་འཛིན་ལྕམ་ཌེ་ཝི་བྷན་དྷ་རི་ (Bidya Devi Bhandari) དང་། དེ་བཞིན་བལ་ཡུལ་གྱི་དམག་སྤྱི་པུར་ན་ཅཱན་དྷ་ར་ཐ་པ་ (Purna Chandra Thapa) དང་ཐུག་འཕྲད་བྱས་ཏེ། དེ་རིང་ཕྱི་དྲོར་རྒྱ་ནག་ལ་ཕྱིར་ལོག་བྱ་རྒྱུ་ཡིན་འདུག
ཉེ་ཆར་ཕྱི་ཚེས་ ༢༧ ཉིན་རྒྱ་གར་གྱི་ཕྱི་སྲིད་དྲུང་ཆེ་ཧར་ཤ་ཝར་དྷན་ (Harsh Vardhan Shringla) གྱི་བལ་ཡུལ་ནང་ཉིན་གྲངས་གཉིས་རིང་གཞུང་འབྲེལ་སྐོར་སྐྱོད་ཐེངས་དང་པོ་དེ་གྲུབ་མ་ཐག བལ་གཞུང་གིས་རྒྱ་ནག་གི་མཐོ་རིམ་མགོ་འཁྲིད་ཝེ་ཧྥིང་ཧི་ཟེར་བས་སྐོར་སྐྱོད་བྱ་གཏན་འཁེལ་ཡོད་སྐོར་གྱི་གསལ་བསྒྲགས་སྤེལ་ཡོད་ལ། དབྱེ་ཞིབ་པས་འདས་པའི་ལོ་ཤས་ནང་བལ་ཡུལ་གཞུང་གིས་རྒྱ་གར་དང་རྒྱ་ནག་གི་མགོ་འཁྲིད་གདན་འདྲེན་ཞུས་ཏེ། ཕྱོགས་གཉིས་ཀར་བསྟུན་མཁས་དང་ཤུགས་རྐྱེན་ལྗིད་སྙོམས་བཟོ་ཡི་ཡོད་སྐོར་འགྲེལ་བརྗོད་བྱེད་ཀྱི་འདུག
འོན་ཀྱང་ད་ལྟའི་སྲིད་བློན་ཨོ་ལི་ཡིས་སྣེ་ཁྲིད་པའི་བལ་ཡུལ་གཞུང་དེ་སྔར་གྱི་སྲིད་གཞུང་དང་མི་འདྲ་བར། རྒྱ་གར་ལ་ཁ་གཏད་ཀྱིས་རྒྱ་ནག་གི་ཕྱོགས་ལ་གཞོལ་ཆེ་བའི་རྣམ་པ་མངོན་གསལ་དོད་པོ་ཐོན་ཡོད་ཅིང་། འདས་ལོའི་ཕྱི་ཟླ ༡༠ པའི་ནང་རྒྱ་ནག་གི་སྲིད་འཛིན་ཞི་ཅིན་ཕིན་བལ་ཡུལ་དུ་གཞུང་འབྲེལ་སྐོར་སྐྱོད་དུ་སླེབས་ཏེ། བལ་ཡུལ་ལ་འཛུགས་སྐྲུན་ཡར་རྒྱས་ཀྱི་ལས་གཞིའི་ཆེད་ལོ་གཉིས་ནང་ཁྱོན་བལ་སྒོར་ཐེར་འབུམ་ ༥༦ སྦྱིན་རྒྱུའི་ཁས་ལེན་བྱས་ཡོད་པ་རེད། ཞི་ཅིན་ཕིན་གྱི་སྐོར་སྐྱོད་དེ་ནི་འདས་པའི་ལོ་ངོ་ ༢༣ ནང་བལ་ཡུལ་ནང་རྒྱ་ནག་གི་སྲིད་འཛིན་ཞིག་གིས་གཞུང་འབྲེལ་སྐོར་སྐྱོད་བྱས་པ་ཐེངས་དང་པོ་ཡིན་འདུག
གསར་འགོད་པ། པ་སངས་ཚེ་རིང་།
