ཡང་སྟེང་རིན་པོ་ཆེས་༧སྐུའི་ཐུགས་བསྐྱེད་དམ་བཅའ་བཞི་ནི་མིའི་རིགས་ཁྱོན་ཡོངས་ལ་ཁྱབ་པའི་ཤེས་རིག་གི་གསར་བརྗེ་ཆེན་པོ་ཞིག་དང་ཡང་ན་སེམས་ཁམས་ཀྱི་བྱམས་བརྩེའི་གསར་བརྗེ་ཆེན་པོ་ཞིག་ལ་ངོས་འཛིན་ཞུས་ན་ཞུས་དོན་ཐུབ་པའི་དོན་ཚན་ཚང་གི་ཡོད་པ་རེད་གསུངས།
ཕྱི་ལོ་ ༢༠༢༠ ལོ་ནི་བོད་མིའི་སྒྲིག་འཛུགས་ནས་༧གོང་ས་རྒྱལ་བ་རིན་པོ་ཆེ་མཆོག་གི་བཀའ་དྲིན་རྗེས་དྲན་གྱི་ལོར་སྲུང་གཙི་ཞུ་བཞིན་ཡོད་པ་ལྟར། བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་གོ་སྒྲིག་འོག དེ་རིང་ཕྱི་ཚེས་ ༤ ཉིན་ནས་ཕྱི་ཚེས་ ༡༡ བར་བདུན་ཕྲག་གཅིག་རིང་༧གོང་ས་རྒྱལ་བ་རིན་པོ་ཆེ་མཆོག་གི་འགྲོ་བ་མིའི་བཟང་སྤྱོད་གོང་སྤེལ་དང་། ཆོས་ལུགས་མཐུན་འབྲེལ། བོད་ཀྱི་རིག་གཞུང་དང་ཁོར་ཡུག་སྲུང་སྐྱོབ། རྒྱ་གར་གནའ་རབས་ཀྱི་རིག་གཞུང་བསྐྱར་གསོ་བཅས་ཐུགས་བསྐྱེད་དམ་བཅའ་བཞིའི་སྐོར་གྱི་བགྲོ་གླེང་དབུ་འཛུགས་ཞུས་སོང་བ་དང་། བདུན་ཕྲག་གཅིག་རིང་གི་༧གོང་ས་མཆོག་གི་ཐུགས་བསྐྱེད་དམ་བཅའ་བཞིའི་སྐོར་གྱི་བགྲོ་གླེང་སྟེང་བོད་ཀྱི་ཆོས་བརྒྱུད་ཁག་གི་བླ་ཆེན་དབུ་ཁྲིད་རྣམ་པ་དབུས་པའི་རྒྱལ་ཁབ་འདྲ་མིན་ ༡༩ ནས་མཁས་དབང་དང་ཤེས་ཡོན་མི་སྣ་གྲངས་ ༡༢༠ ནས་དྲ་ལམ་བརྒྱུད་སྐད་རིགས་བཅོ་ལྔའི་ཐོག་གསུང་བཤད་གནང་གི་ཡོད་འདུག
ལས་རིམ་གྱི་ཐོག་མར་སྲིད་སྐྱོང་བློ་བཟང་སེངྒེ་མཆོག་གིས་བགྲོ་གླེང་དབུ་འབྱེད་ཀྱི་གསུང་བཤད་གནང་སྐབས། ཕྱི་དྲིལ་ལས་ཁུངས་ཀྱིས་གོ་སྒྲིག་གནང་བའི་༧གོང་ས་མཆོག་གི་སྐུའི་དམ་བཅའ་བཞིའི་སྒང་ལ་མཁས་པ་ ༡༢༠ ཡིས་དུས་ཚོད་བཏོན་གནང་སྟེ་སྐུ་ལས་བསྐྱོན་པའི་ཐོག་ནས། ༧གོང་ས་མཆོག་གི་སྐུའི་དམ་བཅའ་བཞིའི་སྒང་ལ་བཀའ་སློབ་དང་དགོངས་ཚུལ་གསུངས་རྒྱུའི་འབད་བརྩོན་གནང་བར་བཀའ་དྲིན་ཆེ་ཞུས་པ་དང་སྦྲགས། ད་ལན་ང་ཚོས་༧སྐུའི་དམ་བཅའ་བཞིའི་སྒང་ལ་བགྲོ་གླེང་གནང་དགོས་དོན་ནི། བཀའ་ཤག་ནས་འདི་ལོ་བཀའ་དྲིན་རྗེས་དྲན་གྱི་ལོ་སྲུང་གཙི་ཞུ་རྒྱུ་ཡིན་ཞེས་ལས་གཞི་ཁག་མང་པོ་ཞིག་འཆར་གཞི་ཡོད་པ་དང་། དེ་ཡང་ས་གནས་ས་ཐོག་གི་གཞིས་ཆགས་ཁག་དང་། སློབ་གྲྭ་ཁག དེ་བཞིན། ཕྱོགས་མཐའ་ཁག་ཏུ་ཡོད་པའི་བོད་མི་རྣམས་དང་བོད་དོན་རྒྱབ་སྐྱོར་ཚོགས་པ་གཙོས་པའི་འཛམ་གླིང་ཡོངས་ནང་ལས་འཆར་འདི་ལག་བསྟར་བྱ་རྒྱུའི་འབད་བརྩོན་བྱེད་ཀྱི་ཡོད་ཀྱང་། ནད་ཡམས་ཀྱི་རྐྱེན་པས་ལས་འཆར་དེ་དག་དངོས་སུ་བྱུང་མ་ཐུབ་པར་ལྷག་བསྡད་ཡོད་པས། ད་ལན་དྲ་རྒྱ་བརྒྱུད་ནས་ལས་འགུལ་འདི་བྱ་རྒྱུའི་འབད་བརྩོན་བྱེད་བཞིན་ཡོད། ཅེས་གསུངས་སོང་།
ཡང་སྲིད་སྐྱོང་མཆོག་གིས། བཀའ་དྲིན་རྗེས་དྲན་གྱི་ལོ་འདིར་སྐུའི་དམ་བཅའ་བཞིའི་ཐོག་ལ་འཛམ་གླིང་ཡོངས་ནས་མཁས་པ་ཁག་དྷ་རམ་ས་ལར་གདན་འདྲེན་ཞུས་ཏེ། བགྲོ་གླེང་ལྷུག་པོ་གནང་བའི་ཐོག་༧གོང་ས་མཆོག་གི་སྐུའི་དམ་བཅའ་བཞི་ག་རེ་ཡིན་པ་ཤེས་པའི་ཐོག་ནས་འཛམ་གླིང་ཡོངས་ལ་ཁྱབ་པ་བྱ་དགོས་ཀྱི་འདུག གང་ཡིན་ཟེར་ན། ༧གོང་ས་མཆོག་གི་བཀའ་སློབ་འདི་དག་ང་ཚོས་རྟོགས་ཐུབ་པ་ཡིན་ན། དམ་བཅའ་བཞིའི་ནང་དུ་མི་གཅིག་ཡིན་པའི་ཆ་ནས་དང་། སྤྱི་ཚོགས། ནང་མི། རྒྱལ་ཁབ་དང་འཛམ་གླིང་ལ་ཕན་རྒྱུའི་བཀའ་སློབ་གནང་གི་ཡོད་རེད། དེར་བརྟེན། བཀའ་སློབ་འདི་ཉམས་ལེན་བྱ་རྒྱུ་གལ་ཆེན་པོ་ཡིན། ཞེས་དང་། ང་ཚོས་སྤོབས་པ་བྱས་ཏེ་ཡ་རབས་བཟང་སྤྱོད་དང་བྱམས་སྙིང་རྗེ་གོང་འཕེལ་གཏོང་དགོས་པ་དང་། བོད་པ་ཞིག་ཡིན་པའི་ཆ་ནས་བོད་ཀྱི་ཆོས་དང་རིག་གཞུང་རྣམས་སྲུང་སྐྱོབ། ད་དུང་ཆོས་ལུགས་མཐུན་སྒྲིལ་དགོས་པ་དང་༧གོང་ས་མཆོག་གིས་ཨེ་ཤ་ཡ་ཙམ་མིན་པར་འཛམ་གླིང་རྒྱལ་ཁབ་ཡོངས་ལ་ཕན་ཐོགས་པའི་ཆེད་དུ་ཁོར་ཡུག་སྲུང་སྐྱོབ་དང་འབྲེལ་ནས་བཀའ་སློབ་ལམ་སྟོན་མང་པོ་གནང་གི་ཡོད་སྐོར་དང་། མཉམ་འབྲེལ་རྒྱལ་ཚོགས་ཀྱིས་ཁོར་ཡུག་གཟེངས་རྟགས་དང། ནོར་སྦེལ་ཞི་བདེའི་གཟེངས་རྟགས་སོགས་འཛམ་གླིང་ནང་སྙན་གྲགས་ཆེ་བའི་གཟེངས་རྟགས་མང་ཆེ་བ་༧གོང་ས་མཆོག་ལ་ཕུལ་ཡོད་པ་རྣམས་བོད་མི་ཚང་མས་མཁྱེན་པའི་སྒོ་ནས་༧གོང་ས་མཆོག་གི་མཛད་འཕྲིན་རྣམས་འཛམ་གླིང་ཡོངས་ལ་གོ་རྟོགས་སྤེལ་ཏེ་ཁྱབ་པ་བྱ་དགོས་པ་དེ་གལ་ཆེན་པོ་ཡིན་སྐོར། དེ་བཞིན་རྒྱ་གར་ནང་དཔལ་ན་ལཎྜའི་ལྟ་གྲུབ་བསྐྱར་གསོ་བྱ་རྒྱུ་གལ་ཆེན་པོ་ཡིན་སྐོར་སོགས་གསུངས་སོང་།
དགའ་ལྡན་ཕོ་བྲང་གི་དྲུང་ཆེ་ཡང་སྟེང་སྤྲུལ་སྐུ་རིན་པོ་ཆེ་མཆོག་གིས། སྤྱིར་བཏང་༧གོང་ས་མཆོག་ནས་ཐུགས་འགན་བཞིའི་སྐོར་ལ་བཀའ་སློབ་ལམ་སྟོན་ཡང་ཡང་གནང་གི་ཡོད། ཡིན་ནའང་ང་རང་ཚོའི་ངོས་ནས་ངོས་འཛིན་དང་གོ་བ་གང་འདྲ་ལེན་དགོས་ཀྱི་རེད་ཟེར་བ་དེ་ཡང་གལ་ཆེན་པོ་ཆགས་ཀྱི་འདུག ༧གོང་ས་མཆོག་གི་ངོས་ནས་ཐུགས་འགན་བཞི་གང་ཡིན་ཡང་། ང་རང་ཚོའི་ངོས་ནས་འདི་ལམ་སྟོན་ཆེན་པོ་བཞི་ལ་བརྩི་དགོས་པ་དེ་གལ་ཆེན་པོ་ཞིག་རེད་བསམ་གྱི་ཡོད། དེ་ཡང་ཐུགས་འགན་དང་པོ་དེ་མིའི་རིགས་ཡོངས་རྫོགས་ལ་གནང་བསྡད་པའི་ལམ་སྟོན་ཆེན་པོ་ཞིག་ཆགས་ཀྱི་ཡོད། གཉིས་པ་དེ་འཛམ་གླིང་གི་ཆོས་ལུགས་པ་ཡོངས་རྫོགས་ལ་གནང་བའི་བཀའ་སློབ་ཅིག་ཆགས་ཀྱི་ཡོད་ལ། གསུམ་པ་དེ་བོད་མི་ཡོད་དོ་ཅོག་ལ་གནང་བའི་ལམ་སྟོན་བཀའ་སློབ་ཅིག་ཆགས་ཀྱི་ཡོད་པ་རེད། བཞི་པ་དེ་རྒྱ་གར་བ་ཡོངས་ལ་བསྩལ་བའི་བླང་དོར་ལམ་སྟོན་གྱི་བཀའ་སློབ་ཆེན་པོ་ཞིག་ཆགས་ཀྱི་ཡོད་པ་རེད། བོད་མི་ཚོར་བསྩལ་བའི་ལམ་སྟོན་བཀའ་སློབ་འདི་ཆེད་དུ་བོད་མི་རྣམས་ལ་ཡིན་ཡང་། བཀའ་སློབ་ཀྱི་ནང་དོན་རྣམས་འཛམ་གླིང་གི་མི་ཚང་མས་ཞུ་དགོས་པའི་དོན་དག་ཆགས་ཀྱི་འདུག དེར་བརྟེན་ནང་དོན་ཕན་ཚུན་འདྲིས་ནས་ཡོད། ད་ལྟའི་གནས་སྐབས་ལ་༧གོང་ས་མཆོག་ནས་ཐུགས་འགན་བཞིའམ་ལམ་སྟོན་ཆེན་པོ་བཞི་ཕེབས་པ་འདི། མིའི་རིགས་ཁྱོན་ཡོངས་ལ་ཁྱབ་པའི་ཤེས་རིག་གི་གསར་བརྗེ་ཆེན་པོ་ཞིག་དང་། ཡང་ན་སེམས་ཁམས་ཀྱི་བྱམས་བརྩེའི་གསར་བརྗེ་ཆེན་པོ་ཞིག་ལ་ངོས་འཛིན་ཞུས་ན་ཞུས་དོན་ཐུབ་པའི་དོན་ཚན་ཚང་གི་ཡོད་རེད་སྙམ་གྱི་ཡོད། ཅེས་གསུངས་སོང་།
མུ་མཐུད་ཡང་སྟེང་རིན་པོ་ཆེ་མཆོག་གིས། ༧གོང་ས་མཆོག་གི་ཐུགས་འགན་བཞི་སྟེ། འགྲོ་བ་མིའི་བཟང་སྤྱོད་གོང་སྤེལ་དང་ཆོས་ལུགས་མཐུན་སྒྲིལ་གོང་སྤེལ། བོད་ཀྱི་རིག་གཞུང་དང་ཁོར་ཡུག་སྲུང་སྐྱོབ། རྒྱ་གར་གནའ་རབས་ཀྱི་རིག་གཞུང་བསྐྱར་གསོ་སོགས་ཀྱི་སྐོར་ལ་གསུང་བཤད་ལམ་སྟོན་རྒྱས་པར་གནང་ཡོད། བོད་ཀྱི་ཆོས་དང་རིག་གཞུང་གསུངས་དུས་དེ་ནི་བོད་ཀྱི་བསམ་བློ་ཡིན་པ་དང་། བོད་ཀྱི་བསམ་བློ་འདི་བརླགས་པ་ཡིན་ན། བོད་མི་ཚོར་ཆ་མཚོན་ན་སྲོག་མེད་པ་དང་གཅིག་པ་རེད། ཤ་ཁྲག་གི་རྒྱུད་པ་དང་སྐད་ཡིག་ཟེར་བ་གང་ཡང་ལྷག་ཡོད་པ་མ་རེད། བོད་ཀྱི་ཆོས་དང་རིག་གཞུང་བརླགས་པ་ཡིན་ན་བོད་པར་ཉེན་ཁ་ཆེན་པོ་ཡིན་པ་ཙམ་མ་ཟད། འཛམ་གླིང་སྤྱི་ཡོངས་ཀྱི་ཤེས་རིག་དང་འཕེལ་རྒྱས། མིའི་རིགས་ཡོངས་རྫོགས་ལ་བདེ་སྐྱིད་བསྐྲུན་ཆེད་དུ་གྱོང་གུད་ཆེན་པོ་ཞིག་སྤྲོད་ཀྱི་ཡོད། གང་ཡིན་ཟེར་ན། བོད་ཀྱི་ཆོས་དང་རིག་གཞུང་གིས་འཛམ་གླིང་ཡོངས་རྫོགས་ལ་ཞབས་འདེགས་ཞུ་ཐུབ་ཀྱི་ཡོད། ཅེས་དང་། བོད་ཀྱི་ཆོས་དང་རིག་གཞུང། ཁོར་ཡུག་འདི་བོད་པ་ཙམ་དུ་མ་ཟད་འཛམ་གླིང་ཡོངས་ལ་གལ་ཆེན་པོ་ཆགས་ཀྱི་ཡོད་པ་ལྟར། མིའི་རིགས་ཆ་ཚང་གིས་བདག་པོ་རྒྱག་དགོས་པ་ཞིག་ཆགས་ཀྱི་ཡོད་སྐོར་གསུངས་སོང་།
༧གོང་ས་མཆོག་གི་སྐུའི་ཐུགས་བསྐྱེད་དམ་བཅའ་བཞིའི་སྐོར་གྱི་དྲ་ཐོག་བརྙན་ལམ་བགྲོ་གླེང་དེ་རིང་ནས་དབུ་འཛུགས་ཀྱིས་བདུན་ཕྲག་གཅིག་རིང་བོད་མིའི་སྒྲིག་འཛུགས་ཀྱི་བརྙན་འཕྲིན་བརྒྱུད་རྒྱང་བསྲིང་གནང་གི་ཡོད་པ་ལྟར། ཉིན་རེར་བོད་མིའི་སྒྲིག་འཛུགས་ཀྱི་བཀའ་བློན་རྣམ་པ་དང་ཆོས་བརྒྱུད་ཁག་གི་བླ་སྤྲུལ་རྣམ་པ། དེ་བཞིན། ཕྱི་རྒྱལ་ཡུལ་གྲུ་ཁག་གི་མཁས་པ་རྣམས་དུས་བགོ་ཡིས་བགྲོ་གླེང་གནང་འཆར་ཡོད་པ་རེད།
བསྟན་འཛིན་ཕུར་བུ།
