འདས་པའི་བདུན་ཕྲག་གཅིག་རིང་རྒྱ་གར་ནང་ཏོག་དབྱིབས་གཉན་རིམས་འགོས་པའི་བོད་མི་ ༤༥ འདུག

བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ནས་ཏོག་དབྱིབས་གཉན་རིམས་ན་ནས་དྲག་ཚར་ནའང་ཀླད་པ་དང་གློ་བ་འཕྲོ་བརླག་ཏུ་ཕྱིན་པའི་དཀའ་ངལ་ཡོང་གི་ཡོད་པ་ཆེད་མཁས་པས་རྗོད་ཀྱི་ཡོད་པས་བོད་མི་ཚོས་མུ་མཐུད་ཁ་རས་གྱོན་པ་དང་འདུ་འཛོམས་རིགས་གནང་རྒྱུ་མེད་པའི་འབོད་སྐུལ་གནང་འདུག ཁ་སང་ཕྱི་ཚེས་ ༡༧ ཉིན་ལ་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་ཏོག་དབྱིབས་གཉན་རིམས་ལས་དོན་ཚོགས་ཆུང་གི་གསར་འགོད་གསལ་བསྒྲགས་གནང་བ་ལྟར་ན། འདས་པའི་བདུན་ཕྲག་གཅིག་ནང་ཀ་ལི་མིན་ཀྲོང་(Clementown) ནས་མི་ ༥་དང་། དྷ་རམ་ས་ལ་ནས་ ༡༡། སྦེལ་ཀོབ་ནས་ ༡། བདེ་སྐྱིད་གླིང་ནས་ ༣། ལ་དྭགས་ནས་ ༢། མེའུ་ནས་ ༡༨། སིམ་ལ་ནས་ ༡། མཚོ་པདྨ་ནས་ ༤  བཅས་བསྡོམས་པའི་མི་ ༤༥ ལ་ཏོག་དབྱིབས་གཉན་རིམས་འགོས་ཡོད་འདུག

གསར་འགོད་གསལ་བསྒྲགས་ཐེངས་ ༣༨ པའི་ཐོག་འཕྲོད་བསྟེན་ལས་ཁུངས་ཀྱི་དྲུང་ཆེ་དཔལ་ལྡན་དོན་གྲུབ་ལགས་ཀྱིས། འདས་པའི་ཕྱི་ཟླ་ ༣ པ་ནས་ཕྱི་ཟླ་ ༡༢  བར་གྱི་ཟླ་བ་བཅུ་ཙམ་ལ་སྒེར་གྱི་སྒྲིག་འཛུགས་དང་། བོད་མིའི་སྒྲིག་འཛུགས་ཡོངས་སུ་རྫོགས་པའི་ངོས་ནས་བོད་མིའི་སྤྱི་ཚོགས་ཚང་མ་ལ་སྒྲིག་འཛུགས་སོ་སོའི་ནང་ལ་དམ་དོན་ཤུགས་ཆེན་པོ་བྱས་པའི་ཉེར་ལེན་ལ་བརྟེན་ནས་ཏོག་དབྱིབས་གཉན་རིམས་ ༡༩ ཁྱབ་བརྡལ་མ་འགྲོ་བའི་ཆེད་དུ་ཐུགས་ཕན་ཆེན་པོ་བཟོས་ཡོད་རེད། དེ་ནས་ཕྱི་ཟླ་ ༡༠ དང་ ༡༡། ༡༢ བཅས་ཀྱི་ནང་ལ་ང་ཚོའི་སྒྲིག་འཛུགས་དང་མི་འབོར་ཆེ་ས་སོགས་ལ་དཀའ་ལས་གང་ལ་གང་འཚམ་ཞིག་འཕྲད་པ་རེད། སྔོན་མ་ཕྱི་ཟླ་ ༩ ནང་ལ་དཀའ་ངལ་བྱུང་བ་དེ་ཚོ་དེང་སང་གང་ལ་གང་འཚམ་ཡག་པོ་ཆགས་ནས་ས་གནས་ཁ་ཤས་ཕལ་ཆེར་ནད་པ་གཅིག་ཀྱང་མེད་པ་ཆགས་པའི་གནས་སྟངས་བཟང་པོ་ཆགས་ཡོད་རེད། ཡང་ས་གནས་ཁ་ཤས་ལ་དཔེར་ན་དྷ་རམ་ས་ལར་མཚོན་པ་ཡིན་ན། འདས་པའི་བདུན་ཕྲག་གཉིས་གསུམ་ནང་ལ་ནད་པ་བཞི་བཅུ་ཞེ་གྲངས་ཐོན་པའི་གནས་སྟངས་བྱུང་ཡོད་པ་དང་། དེ་བཞིན་ས་གནས་གཞན་ལའང་གནས་སྟངས་དེ་འདྲ་ཐོན་པ་བྱུང་ཡོད་རེད། ཁྱོན་བསྡོམས་ས་གནས་ ༣༦ ནང་ལ་ནད་པ་ ༡༤༠༠ ནང་ནས་དྲག་སྐྱེད་ཀྱི་བརྒྱ་ཆ་ ༩༠ ཆགས་ཡོང་གི་འདུག  ད་དུང་ཡོང་རྒྱུའི་ཟླ་བ་ ༥ ལྷག་ནང་ལ་སྒྲིག་འཛུགས་དང་སྒེར་ཚང་མའི་ངོས་ནས་སྔོན་འགོག་བྱ་རྒྱུ་དེ་གལ་ཆེན་པོ་རྩི་བའི་ཐོག་ནས་ཁ་རས་གྱོན་པ་དང་ལག་པ་ཡང་ཡང་འཁྲུད་དགོས་པ་སོགས་མུ་མཐུད་ནས་བྱེད་དགོས་སྐོར་སོགས་བརྗོད་འདུག

ཡང་ཁོང་གིས། ད་ལྟའི་སྤྱི་ཚོགས་ནང་གི་གནས་སྟངས་ལ་བལྟ་ཡོང་དུས། མི་མང་པོ་ཞིག་གི་སེམས་ནང་ལ་ན་ཚ་འདི་ན་བ་ཡིན་ན་དྲག་འགྲོ་ཡི་ཡོད་རེད་བསམ་པ་ཏན་ཏན་ཤུགས་ཆེན་པོ་ཡོད་པ་འདྲ་བོ་འདུག  དེ་འདྲ་རྩ་བ་ཉིད་ནས་ཡིན་ས་མ་རེད། ན་ཚར་བ་ཡིན་ན་ན་ཚ་འདི་གཞན་དང་མི་འདྲ་བར་དྲག་ཚར་བའི་རྗེས་སུ་མི་སོ་སོའི་ལུས་ཁམས་ཀྱི་ཟུང་ཤུགས་དང་བསྟུན་ནས་ཁ་ཤས་ཀླད་པ་འཕྲོ་བརླག་བཏང་བ་དང་། ཁ་ཤས་གློ་བ་འཕྲོ་བརླག་བཏང་བ་སོགས་ནད་གཞི་འདི་དྲག་ཚར་བའི་རྗེས་ལའང་མི་དེ་ལ་སྐྱོན་ཞིག་རྒྱག་གི་ཡོད་ས་རེད། འཛམ་བུ་གླིང་སྤྱི་མཚུངས་ཀྱི་ཚན་རིག་དང་མཁས་པ་ཚང་མས་རྩོམ་བྲིས་པའི་ནང་ལ་ན་ཚ་དེ་དྲག་སྐྱེད་ཕྱིན་ཚར་བའི་རྗེས་ལ་མི་དེའི་མི་ཚེའི་ནང་ལ་གློ་བ་དང་ཀླད་པ་སོགས་ལ་སྐྱོན་བརྒྱབ་སྟེ། མཇུག་གི་མི་ཚེའི་ནང་ལ་གནོད་སྐྱོན་ཆེན་པོ་ཐེབས་ཀྱི་ཡོད་པ་འདི་གསལ་པོ་ཡིན་ཙང་། ཚང་མས་དགོངས་པ་བཞེས་དགོས་པ་འདི་གལ་ཆེན་པོ་འདུག་ཅེས་གསུངས་སོང་།

ད་དུང་དགོངས་པ་བཞེས་དགོས་པ་ཞིག་ལ། རང་ངོས་ནས་ག་ཚོད་ཐུབ་ཐུབ་ཀྱིས་ནང་མི་ཕྱི་ལ་ཕེབས་མི་དགོས་པ་གཙོ་དོན་དང་ཕྱི་མི་ནང་ལ་ཕེབས་མི་དགོས་པ་གཙོ་དོན། དེ་བཞིན་ང་ཚོའི་ཆོས་ཕྱོགས་ཀྱི་བྱ་བ་ཤུགས་ཆེན་པོ་དེ་འདྲ་དགེ་འདུན་པ་མང་པོ་འཛོམས་རྒྱུ་དང་སྤྱི་ཚོགས་ཀྱི་བདེ་དོན་ཆེད་ཚོགས་འདུ་ཚོགས་ནས་མི་མང་པོ་འཛོམས་པ། དེ་བཞིན་སྐྱེས་སྐར་བཏང་བའི་སྐབས་སུ་གྲོགས་པོ་གྲོགས་མོ་མང་པོ་སྐད་བཏང་ནས་ཞལ་ལག་མཆོད་པ་དང་སྒེར་གྱི་ཐུགས་སྤྲོ་གཏོང་བའི་རིགས་མ་གནང་རོགས་ཞེས་འབོད་སྐུལ་ཞུ་ཡི་ཡོད།   མ་གནང་རོགས་ཞེས་འབོད་སྐུལ་ཞུས་དགོས་དོན་ནི། སྒེར་གྱི་འཕྲོད་བསྟེན་ཡག་པོ་ཡོང་ཆེད་ཡིན་པ་བརྗོད་པ་དང་། གལ་ཏེ་དེ་འདྲ་གནང་བ་ཡིན་ན་ད་ལྟ་འདས་པའི་བདུན་ཕྲག་གཅིག་གཉིས་ནང་ལ་བལྟས་པ་ཡིན་ན། གནས་ཚུལ་མང་པོ་ཞིག་སྐྱེས་སྐར་བཏང་བའི་མཇུག་འབྲས་ལ་ན་ཚ་ཁྱབ་བརྡལ་ཕྱིན་ཡིན་པ་དང་། ཞབས་བརྟན་དང་སྤྱི་རིམས་ཚོགས་པའི་ཉེར་ལེན་གྱིས་ན་ཚ་མང་པོ་ཐོན་ཡོད་པ་འདྲ་བོ་འདུག

རྒྱ་གར་དང་བལ་ཡུལ་ནང་ད་བར་དུ་ནད་གཞི་ཕོག་པའི་བོད་མི་གྲངས་ ༡༤༢༡ བྱུང་བའི་ཁྲོད་ནས་མི་ ༡༢༧༦ དྲག་སྐྱེད་དང་། མི་ ༣༥ འདས་གྲོངས། ད་ལྟ་ནད་ཀྱིས་མནར་བཞིན་པ་ ༡༡༠ ཡོད་འདུག དེ་མིན་གྱི་ཕྱི་རྒྱལ་ཁག་ནང་ནད་གཞི་ཕོག་པའི་མི་གྲངས་ ༢༡༣ དང་། དྲག་སྐྱེད་བྱུང་བ་ ༡༦༥། འདས་གྲོངས་ཕྱིན་པ་ ༩། ད་ལྟ་ན་བཞིན་པ་ ༣༩ ཡོད་འདུག

བསྟན་འཛིན་ཕུར་བུ།