ཆབ་སྲིད་བཙོན་ཟུར་ཨ་ཀྱཱ་ཀྱཱ་ལགས་ཀློད་གྲོལ་ཐོབ།

བོད་རྔ་བ་རྫོང་རྨེའུ་རུ་མའི་རུ་ཆེན་དང་པོ་ནས་ཡིན་པའི་བོད་ཀྱི་ཆབ་སྲིད་བཙོན་ཟུར་ཨ་ཀྱཱ་ཀྱཱ་ལགས་ཀྱི་ལོ་ལྔའི་བཙོན་འཇུག་དུས་ཡུན་རྫོགས་ཏེ་ཀློད་གྲོལ་ཐོབ་ཡོད་འདུགའདི་གའི་གསར་འགོད་པར་གནས་ཚུལ་འབྱོར་གསལ་ལྟར་ན།  ཕྱི་ལོ་ ༢༠༡༦ ལོར་རྔ་བ་རྨེའུ་རུ་མའི་རུ་ཆེན་དང་པོ་ནས་ཡིན་པའི་བོད་ཀྱི་ཆབ་སྲིད་བཙོན་ཟུར་ཨ་ཀྱཱ་ཀྱཱ་ལགས་ཀྱི་ལོ་ ༥ རིང་གི་བཙོན་འཇུག་དུས་ཡུན་ཚང་སྟེ་བཙོན་གྲོལ་ཐོབ་ཡོད་པ་དང་། ཨ་ཀྱཱ་ཀྱཱ་ལགས་དང་ལྷན་དུ་ལོ་དེར་རྔ་བ་ནས་བོད་མི་གཞན་ ༩ ལ་བཙོན་འཇུག་ཁྲིམས་ཐག་བཅད་ཡོད་པ་རྣམས་ད་དུང་ཡང་བཙོན་གྲོལ་འཐོབ་མེད་པ་རེད།

འདི་གའི་གསར་འགོད་པས་ཁ་པར་བརྒྱུད་ཀིརྟིའི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་ཀ་ཉག་ཚེ་རིང་ལགས་སུ་ཆབ་སྲིད་བཙོན་ཟུར་ཨ་ཀྱཱ་ཀྱཱ་ལགས་ག་དུས་ཤིག་ལ་ཀློད་གྲོལ་ཐོབ་པ་དང་དུས་ཡུན་ག་ཚོད་ཅིག་གི་རིང་བཙོན་འཇུག་བྱས་ཡོད་སྐོར་དྲིས་པར་ཁོང་གིས། བོད་མི་ཨ་ཀྱཱ་ཀྱཱ་ལགས་ཟླ་འདིའི་ཕྱི་ཚེས་ ༡༢ ཉིན་བཙོན་གྲོལ་ཐོབ་སྟེ་ཕྱིར་ཕ་ཡུལ་རྔ་བར་འབྱོར་ཡོད་པ་དང་། ཁོང་དངོས་སུ་བཙོན་གྲོལ་ཐོབ་པའི་ཉིན་མོ་ནི་ཕྱི་ཚེས་ ༡༠ དང་ ༡༡ གང་རུང་ཞིག་ཆགས་ཀྱི་ཡོད་པ་རེད། སྤྱིར་བཏང་ཁོང་ལ་ཕྱི་ལོ་ ༢༠༡༦ ལོར་བཙོན་འཇུག་ཁྲིམས་ཐག་བཅད་ཡོད་ཀྱང་། སྐབས་དེར་འཛིན་བཟུང་བྱས་པའི་གྲྭ་འབྲུག་སྒྲ་ལྟ་བུ་ཡིན་ན་ཁྲིམས་ཐག་མ་བཅད་པའི་ལོ་ ༡ གོང་ནས་འཛིན་བཟུང་བྱས་ཡོད་པ་དང་། ཨ་ཀྱཱ་ཀྱཱ་ལགས་ཁྲིམས་ཐག་མ་བཅད་པའི་ཟླ་ ༥  གོང་ནས་འཛིན་བཟུང་བྱས་ཡོད་སྟབས། ཨ་ཀྱཱ་ཀྱཱ་ལགས་ཁྱོན་ལོ་ ༦ མ་ཟིན་ཙམ་བཙོན་འཇུག་བྱས་ཡོད་པ་རེད། ཅེས་བརྗོད་བྱུང་།

ཨ་ཀྱཱ་ཀྱཱ་ལགས་སུ་ཕྱི་ལོ་ ༢༠༡༦  ཟླ་ ༡༢ ཚེས་ ༦ ཉིན་རྔ་བ་འབྲིང་རིམ་མི་མང་ཁྲིམས་ཁང་ཟེར་བས་ལོ་ ༥ བཙོན་འཇུག་ཁྲིམས་ཐག་བཅད་པ་དང་། ཁོང་ལ་ཁྲིམས་ཐག་གཅོད་དོན་ནི་ལོ་དེར་བཙན་བྱོལ་ནང་༧གོང་ས་མཆོག་གི་༧སྐུའི་གྱ་སྟོན་སྲུང་གཙི་དང་འབྲེལ། ཁོང་གིས་༧སྐུའི་གྱ་སྟོན་སྲུང་གཙི་དང་ཉེ་འཁོར་བོད་མི་རྣམས་ལ་བརྒྱུད་སྐུལ་བྱས་ཡོད་པའི་ཉེས་མིང་འོག་བཙོན་འཇུག་ཁྲིམས་ཐག་བཅད་པ་ཞིག་ཡིན་འདུག

ཨ་ཀྱཱ་ཀྱཱ་ལགས་ནི་ཕྱི་ལོ་༢༠༡༡ ལོར་བློ་བཟང་ཕུན་ཚོགས་ལགས་ཀྱིས་སྐུ་ལུར་མེར་སྲེག་གནང་སྐབས་ངོ་རྒོལ་སྐད་འབོད་གནང་བའི་རྐྱེན་གྱིས་འཛིན་བཟུང་གིས་ལོ་ ༣ ལྷག་བཙོན་འཇུག་ཁྲིམས་ཐག་བཅད་པའི་ཆབ་སྲིད་བཙོན་ཟུར་ཞིག་ཡིན་པ་དང་། ད་ལོ་ཁོང་རང་ལོ་ ༤༠ ཙམ་ཡིན་འདུགགཞན་ཡང་སྐབས་དེར་ཨ་ཀྱཱ་ཀྱཱ་ལགས་དང་ལྷན་དུ་ཁྱོན་བོད་མི་ ༡༠ ལ་རྔ་བ་རང་སྐྱོང་ཁུལ་འབར་ཁམས་འབྲིང་རིམ་མི་མང་ཁྲིམས་ཁང་ཟེར་བས་ལོ་ ༥ ནས་ ༡༤ བར་གྱི་བཙོན་འཇུག་ཁྲིམས་ཐག་བཅད་ཡོད་པ་དང་། ཁོང་ཚོ་ནི་གྲྭ་འབྲུག་སྒྲ་ལགས་དང་། བློ་གྲོསལགས། བློ་བཟང་དགེ་འཕེལ་ལགས། བློ་བཟང་མཁས་གྲུབ་ལགས། དེ་བཞིན། སྤྲོ་ཚིགས་ཚུལ་ཁྲིམས་ལགས། བོན་ཁོ་སྐྱིད་ལགས། ཚུལ་ཏེའམ་ཚུལ་ཁྲིམས་ལགས། ཏཱ་རེ་སྐྱིད་ལགས་བཅས་ཡིན་པ་དང་། ཁོ་ཚོ་དེ་སྔོན་ཕྱི་ལོ་ ༢༠༠༨ དང་ཕྱི་ལོ་ ༢༠༡༡ སོགས་སུ་རྔ་བའི་ནང་སྐད་འབོད་ངོ་རྒོལ་དང་རང་ལུས་མེར་སྲེག་གི་དོན་རྐྱེན་དང་འབྲེལ་འདྲིས་ཡོད་པའི་ཉེས་མིང་འོག་བཙོན་འཇུག་བྱས་མྱོང་བ་ཤ་སྟག་ཡིན་པ་རེད།

གསར་འགོད་པ། སྐལ་བཟང་སྦྱིན་པ།

འབྲེལ་ཡོད་གནས་ཚུལ།    བོད་མི་བཅུ་ལ་ལོ་ ༥ ནས་ ༡༤ བར་གྱི་ཁྲིམས་ཐག་བཅད།