ཕྱི་ལོ་ ༢༠༢༠ ལོའི་ཨ་རིའི་བོད་དོན་རྒྱབ་སྐྱོར་ཁྲིམས་འཆར་ཨ་རིའི་གྲོས་ཚོགས་ནང་གཏན་འབེབ་བྱུང་འདུག

བོད་དོན་རྒྱབ་སྐྱོར་གྱི་ཁྲིམས་འཆར་ནང་བོད་ཀྱི་ཆུ་དང་ཁོར་ཡུག་སྲུང་སྐྱོབ་དང་བོད་མིའི་སྒྲིག་འཛུགས་ནི་བཙན་བྱོལ་བོད་མི་ཡོད་ཚང་མའི་སྒྲིག་འཛུགས་ཡིན་པར་ངོས་འཛིན་དང་རྒྱབ་སྐྱོར་གསར་པ་ཐོབ་འདུག

བོད་མིའི་སྒྲིག་འཛུགས་ཀྱི་དྲ་ཐོག་ཏུ་སྤེལ་བའི་གནས་ཚུལ་ལྟར་ན། དེ་རིང་ཕྱི་ཚེས་ ༢༢ ཉིན་ཨ་རིའི་བོད་དོན་ཐོག་འཛིན་པའི་ཕྱི་ལོ་ ༢༠༢༠ ལོའི་བོད་དོན་སྲིད་བྱུས་དང་རྒྱབ་སྐྱོར་ཁྲིམས་འཆར་ཞེས་པ་ཨ་རིའི་གྲོས་ཚོགས་ནང་ཚད་མཐོའི་རྒྱབ་སྐྱོར་ཐོབ་སྟེ་གཏན་འབེབ་བྱུང་ཡོད་པ་དང་། དེ་འབྲེལ་ཐད་བོད་ཀྱི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས། ཁྲིམས་འཆར་དེ་ནི་ཉེ་བའི་ལོ་ངོ་ ༢༠ ནང་ཨ་རིའི་གྲོས་ཚོགས་ནས་བོད་དོན་ཐོག་ལོ་རྒྱུས་ལྡན་པའི་རྒྱབ་སྐྱོར་ཁྲིམས་འཆར་ཞིག་གཏན་འབེབ་གནང་བ་ཡིན་སྐོར་གསུངས་འདུག

ཨ་རིའི་གཞུང་འབྲེལ་གྱི་དྲ་རྒྱ་ལྟར་ན། ད་རེས་གཏན་འབེབ་གནང་བའི་ཨ་རིའི་གྲོས་ཚོགས་ཀྱི་བོད་དོན་རྒྱབ་སྐྱོར་ཁྲིམས་འཆར་དེར་ཁྱོན་ཤོག་ངོས་ ༢༡ ཡོད་པ་དང་། དེའི་ནང་གི་གནད་དོན་གཙོ་བོ་ཁག་ནི། ༧གོང་ས་རྒྱལ་བ་རིན་པོ་ཆེ་མཆོག་གི་དབུས་པའི་བོད་ཀྱི་བླ་སྤྲུལ་འདེམས་སྲོལ་ནི་སྔར་རྒྱུན་བཞིན་བོད་མི་ཚོའི་ཐག་གཅོད་དང་། ༧གོང་ས་མཆོག་གི་ལམ་སྟོན་གཞིར་བཟུང་བྱ་རྒྱུ་ལས་རྒྱ་ནག་གཞུང་གིས་ཐེ་གཏོགས་བྱས་མི་ཆོག་པ་དང་། རྒྱ་ནག་གི་མགོ་འཁྲིད་སུ་ཞིག་གིས་༧གོང་ས་མཆོག་གི་ཡང་སྲིད་བསྐོ་བཞག་གི་བྱ་སྤྱོད་སྤེལ་ཚེ། ཨ་རིའི་གཞུང་ནས་ཁོ་ཚོའི་རྒྱུ་དངོས་དང་ཨ་རིར་ཡོང་རྒྱུ་བཀག་འགོག་བྱ་རྒྱུ་མ་ཟད། རྒྱ་ནག་གཞུང་གིས་༧གོང་ས་མཆོག་གི་ཡང་སྲིད་ལ་ཐེ་གཏོགས་བྱ་རྒྱུ་མཚམས་འཇོག་དང་བོད་མི་ཚོས་༧གོང་ས་མཆོག་གི་ཡང་སྲིད་འདེམས་སྒྲུག་གི་རང་དབང་སྲུང་སྐྱོབ་སླད་ཨ་རིའི་གཞུང་གིས་རྒྱལ་སྤྱིའི་རྒྱབ་སྐྱོར་འཐོབ་ཐབས་བྱ་རྒྱུ་ཡིན་པ་རེད།

དེ་བཞིན། བོད་རྒྱ་འབྲེལ་མོལ་ཡོང་ཐབས་དང་། བོད་ཀྱི་རྒྱལ་ས་ལྷ་སར་ཨ་རིའི་གཞུང་ཚབ་མ་བཙུགས་གོང་ཨ་རིར་རྒྱ་ནག་གཞུང་ཚབ་གསར་པ་འཛུགས་མི་ཆོག་པ་དང་། བོད་མིའི་སྒྲིག་འཛུགས་ཀྱི་འཛིན་སྐྱོང་དང་འབྲེལ། བོད་ཕྱི་ནང་གཉིས་ལ་དཔལ་འབྱོར་རོགས་དངུལ་གྱི་སྔོན་རྩིས་དང་། སློབ་ཡོན་རོགས་དངུལ་སོགས་ཕྱི་ལོ་  ༢༠༢༥ བར་གཏན་འབེབས་གནང་འདུག་པ་མ་ཟད། བོད་ཀྱི་ཆུ་དང་ཁོར་ཡུག་སྲུང་སྐྱོབ་དང་དམངས་གཙོའི་ལམ་སྲོལ་ལས་གྲུབ་པའི་བོད་མིའི་སྒྲིག་འཛུགས་ནི་བཙན་བྱོལ་བོད་མིའི་སྒྲིག་འཛུགས་ལ་ངོས་འཛིན་བྱ་རྒྱུ་ཡིན་པའི་དོན་ཚན་གསར་པ་གཉིས་ཁ་སྣོན་བྱས་འདུག

དེ་འབྲེལ་ཐད་བརྙན་ལམ་བརྒྱུད་སྲིད་སྐྱོང་བློ་བཟང་སེང་གེ་མཆོག་གིས། དེ་རིང་གཏམ་བཟང་ཞུ་རྒྱུ་ཞིག་ལ་བོད་དོན་ཁྲིམས་འཆར་དེ་ཨ་རིའི་སྔོན་རྩིས་ཁྲིམས་འཆར་ནང་བླུགས་ཐུབ་པ་བྱུང་སོང་ཞུ་རྒྱུ་ཡིན། ང་ཚོས་གྲོས་ཚོགས་གོང་མའི་ཆབ་སྲིད་དང་ཕྱི་སྲིད་ཚོགས་ཆུང་གི་ལས་བྱེད་མཉམ་དུ་ཡིག་ཐོག་དང་ཁ་པར་ལམ་ནས་འབྲེལ་བ་བྱེད་སྐབས། ཁོ་ཚོས་ཨ་རིའི་ཕྱི་སྲིད་དང་འབྲེལ་བའི་ཁྲིམས་འཆར་ ༡༠༠ ལྷག་ཡོད་ཀྱང་། དེའི་ནང་གལ་ཆེན་པོ་ ༣༠ ཡོད་ཟེར་གྱི་འདུག དེའི་ནང་ནས་ཀྱང་སྔོན་རྩིས་ནང་འཇོག་ཐུབ་པའི་ཁྲིམས་འཆར་དྲུག་བདུན་མ་གཏོགས་མེད་པ་དང་བོད་དོན་ཁྲིམས་འཆར་དེའི་ནང་གི་གཅིག་ཆགས་བསྡད་ཡོད། ཅེས་གསུངས་འདུག

སྤྱིར་བཏང་ཕྱི་ལོ་ ༢༠༢༠ ལོའི་བོད་དོན་རྒྱབ་སྐྱོར་གྱི་སྲིད་བྱུས་དེ་འདས་ལོའི་ཕྱི་ཟླ་ ༩ ཚེས་ ༡༣ ཉིན་ཐོག་མར་ཨ་རིའི་གྲོས་ཚོགས་འཐུས་མི་ཇིམ་སི་མེག་གྷོ་ཝན་(James McGovern) ལགས་ཀྱིས་བཏོན་གནང་ཞིང་། འདི་ལོའི་ཕྱི་ཟླ་ ༥ ཚེས་ ༢༡ ཉིན་འོག་མའི་ནང་རྒྱབ་སྐྱོར་ཐོབ་ཡོད་ནའང་། རྒྱ་ནག་གི་ཏོག་དབྱིབས་གཉན་རིམས་རྐྱེན་པས་ད་སྔ་བར་གཏན་འབེབ་བྱུང་མ་ཐུབ་པར་ལྷག་ཡོད་པ་དང་། ད་རེས་གྲོས་ཚོགས་གོང་འོག་གཉིས་ནང་རྒྱབ་སྐྱོར་ཐོབ་སྟེ། ད་ལྟ་སྲིད་འཛིན་ཊོམ་ཕུ་མཆོག་གི་མཚན་རྟགས་བསྐྱོན་པར་ཕུལ་ཡོད་འདུག

ཡང་ད་རེས་བོད་དོན་རྒྱབ་སྐྱོར་ཁྲིམས་འཆར་འདི་གཏན་འབེབ་བྱུང་བར་སྲིད་སྐྱོང་མཆོག་གིས། ཨ་རིའི་གྲོས་ཚོགས་གོང་འོག་གཉིས་ཀྱི་གྲོས་ཚོགས་འཐུས་མི་རྣམ་པ་དང་། བོད་དོན་རྒྱབ་སྐྱོར་བ་དང་བོད་རིགས་སྤྱི་མཐུན་ཚོགས་པ། རྒྱལ་སྤྱིའི་བོད་དོན་ལས་འགུལ་ཁང་། ས་གནས་གཞོན་ནུ། བོད་རང་བཙན་སློབ་ཕྲུག་ཚོགས་པ་སོགས་ནས་རྒྱབ་སྐྱོར་གནང་བར་ཐུགས་རྗེ་ཆེ་ཞུས་འདུག

གསར་འགོད་པ། སྐལ་བཟང་སྦྱིན་པ།