བོད་མི་མང་སྤྱི་འཐུས་ཚོགས་གཙོ་མཆོག་གིས་བོད་དོན་རྒྱབ་སྐྱོར་གྱི་ཁྲིམས་འཆར་གཏན་འབེབ་བྱུང་བར་ཨ་རིའི་གཞུང་དང་གྲོས་ཚོགས་འཐུས་མི་དང་འབྲེལ་ཡོད་ཡོངས་ལ་ཐུགས་རྗེ་ཆེ་ཞུས་པ་དང་སྲིད་འཛིན་ཊོམ་ཕུ་མཆོག་ནས་གང་མགྱོགས་ཁྲིམས་འཆར་དེར་མཚན་རྟགས་འགོད་པའི་རེ་བ་ཞུས་གནང་འདུག
དེ་རིང་ཕྱི་ཚེས་ ༢༣ ཉིན་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་པདྨ་འབྱུང་གནས་མཆོག་གིས་ཨ་རིའི་སྲིད་འཛིན་གཞོན་པ་དང་གྲོས་ཚོགས་གོང་མའི་ཚོགས་གཙོ་མེག་པེན་སི་ (Mike Pence) མཆོག་ལ་འཕྲིན་ཡིག་ཞིག་བཏང་གནང་སྟེ། ཉེ་ལམ་ཨ་རིའི་གྲོས་ཚོགས་གོང་མའི་ནང་ཕྱི་ལོ་ ༢༠༢༠ ལོའི་བོད་དོན་སྲིད་བྱུས་དང་རྒྱབ་སྐྱོར་གྱི་ཁྲིམས་འཆར་ (Tibetan Policy and Support Act 2020) སྤྱི་མོས་གཏན་འབེབས་གནང་བར་ཨ་རིའི་གཞུང་དང་གྲོས་ཚོགས་འཐུས་མི་དང་འབྲེལ་ཡོད་ཡོངས་ལ་ཐུགས་རྗེ་ཆེ་ཞུས་གནང་འདུག
དེ་ཡང་ཚོགས་གཙོ་མཆོག་པདྨ་འབྱུང་གནས་མཆོག་གིས་འཕྲིན་ཡིག་དེའི་ནང་། ངས་གཞིས་བྱེས་བོད་མི་ཡོངས་དང་སྐབས་བཅུ་དྲུག་པའི་བོད་མི་མང་སྤྱི་འཐུས་ལྷན་ཚོགས་ཀྱི་ཚབ་ཞུས་ཏེ། ཁྲིམས་འཆར་དེ་ཉིད་ཨ་རིའི་གྲོས་ཚོགས་གོང་མའི་ནང་སྤྱི་མོས་ཐོག་གཏན་འབེབས་ཐུབ་པར་སྐུ་ཉིད་དང་། གྲོས་ཚོགས་འཐུས་མི་རྣམ་པར་ཐུགས་རྗེ་ཆེ་ཞུ་རྒྱུ་ཡིན་ཞེས་དང་། བོད་དོན་ཁྲིམས་འཆར་དེ་སྤྱི་མོས་གཏན་འབེབས་བྱུང་བའི་གནས་ཚུལ་ཐོས་འཕྲལ་དགའ་ཚོར་ཆེན་པོ་བྱུང་བ་དང་། ཁྲིམས་འཆར་དེ་ནི་བོད་མི་ཚོར་མཚོན་ན། ལོ་རྒྱུས་རང་བཞིན་ལྡན་པ་ཞིག་དང་གྲུབ་འབྲས་ཆེན་པོ་ཞིག་ཡིན་པ། དེ་ཡིས་ཨ་རིའི་གྲོས་ཚོགས་ནི་དྲང་བདེན་གྱི་ཕྱོགས་ལ་ལངས་ཀྱི་ཡོད་པའི་བརྡ་ལན་གསལ་པོ་ཞིག་སྤྲོད་ཀྱི་ཡོད་པ་མ་ཟད། ཨ་རིའི་གཞུང་ནས་༧གོང་ས་རྒྱལ་བ་རིན་པོ་ཆེ་མཆོག་དང་། བོད་ཀྱི་རྩ་དོན་ཐོག་འབྱུང་འགྱུར་མུ་མཐུད་རྒྱབ་སྐྱོར་གནང་རྒྱུ་ཡིན་པ་ར་སྤྲོད་གསལ་པོ་བྱས་པ་ཞིག་ཡིན་ཚུལ་བཀོད་འདུག
དེ་བཞིན་འཕྲིན་ཡིག་དེའི་ནང་། ཁྲིམས་འཆར་དེ་ཡིས་འཛམ་གླིང་གང་སར་ཡོད་པའི་བོད་མི་རྣམས་དང་། ལྷག་པར་དུ་རྒྱ་དམར་གཞུང་གི་གདུག་རྩུབ་ཅན་གྱི་སྲིད་བྱུས་འོག་དཀའ་སྡུག་མྱོང་བཞིན་པའི་བོད་ནང་གི་བོད་མི་རྣམས་ལ་རེ་བ་ཆེན་པོ་སྦྱིན་ཡོད་སྐོར་དང་། ཨ་རིའི་གཞུང་མང་གཉིས་ནས་ད་བར་བོད་དོན་ཐོག་ཆོད་སེམས་བརྟན་པོས་མཐུན་འགྱུར་རྒྱབ་སྐྱོར་གནང་བར་ཐུགས་རྗེ་ཆེ་ཞུ་རྒྱུ་དང་། བོད་ཀྱི་བདེན་མཐའ་མ་གསལ་བར་མུ་མཐུད་རྒྱབ་སྐྱོར་གནང་སྐྱོང་ཡོང་བའི་རེ་སྐུལ་ཞུས་འདུག་ལ། ཨ་རིའི་སྲིད་འཛིན་མཆོག་གིས་གང་མགྱོགས་ཁྲིམས་འཆར་དེར་མཚན་རྟགས་འགོད་པའི་རེ་བ་ཡོད་སྐོར་སོགས་བཀོད་འདུག
དེ་བཞིན་སྲིད་སྐྱོང་བློ་བཟང་སེང་གེ་མཆོག་ནས་རོའུ་ཊུར་གྱི་གཙོས་རྒྱལ་སྤྱིའི་གསར་ཁང་ཁག་ལ། བོད་དོན་ཁྲིམས་འཆར་གཏན་འབེབས་གནང་བ་དེ་ཡིས་ཨ་རིའི་གྲོས་ཚོགས་ནས་བོད་ནི་ཨ་རིའི་གནད་དོན་གལ་ཆེན་དུ་གནས་ཡོད་པ་དང་། མུ་མཐུད་༧གོང་ས་རྒྱལ་བ་རིན་པོ་ཆེ་མཆོག་དང་བོད་མིའི་སྒྲིག་འཛུགས་ལ་རྒྱབ་སྐྱོར་བྱེད་ཀྱི་ཡོད་པའི་བརྡ་ལན་གསལ་པོ་ཞིག་བཏང་གནང་བ་ཞིག་ཡིན་སྐོར་གསུངས་ཡོད་པ་རེད།
བོད་དོན་ཁྲིམས་འཆར་དེ་དང་འབྲེལ་ནས། ཁ་སང་ཕྱི་ཚེས་ ༢༢ ཉིན་རྒྱ་ནག་གི་ཕྱི་སྲིད་མགྲིན་ཚབ་པ་ཝང་ཝིན་པིན་ (Wang Wenbin) གྱིས། བོད་དང་ཐའེ་ཝན། ཧོང་ཀོང་བཅས་ནི་རྒྱ་ནག་གི་བདག་དབང་དང་ས་ཁོངས། རྒྱ་ནག་ནང་རྒྱལ་གྱི་གནད་དོན་ཞིག་ཡིན་སྐོར་དང་། ཨ་རི་གཞུང་གིས་ཁྲིམས་འཆར་དེ་དང་འབྲེལ་ནས་རྒྱ་ནག་གི་ནང་སྲིད་ལ་ཐེ་བྱུས་བྱ་རྒྱུ་མཚམས་བཞག་སྟེ། ཁྲིམས་འཆར་དེར་མཚན་རྟགས་མི་སྐྱོན་པའམ་དེའི་ནང་གི་རྒྱ་ནག་གི་མངོན་འདོད་དང་རྒྱ་ནག་ལ་དམིགས་པའི་གནད་དོན་དང་ནང་དོན་རྣམས་ལག་བསྟར་མི་བྱེད་པར་སྐུལ་འདུག་ལ། དེ་ཡིས་ཨ་རྒྱའི་མཉམ་འབྲེལ་དང་འབྲེལ་ལམ་ལ་དོ་ཕོག་སྣོན་མ་བྱེད་སྲིད་སྐོར་བརྗོད་ཡོད་པ་རེད།
བོད་དོན་རྒྱབ་སྐྱོར་གྱི་ཁྲིམས་འཆར་དེ་ཟླ་འདིའི་ཕྱི་ཚེས་ ༢༢ ཉིན་ཨ་རིའི་གོས་ཚོགས་གོང་མའི་ནང་སྤྱི་མོས་གྱིས་གཏན་འབེབས་བྱུང་ཡོད་པ་དང་། དེའི་ནང་ཨ་རི་གཞུང་གིས་བོད་ནང་གི་འགྲོ་བ་མིའི་ཐོབ་ཐང་དང་ཆོས་དད་རང་དབང་སྲུང་སྐྱོབ། ༧གོང་རྒྱལ་བ་རིན་པོ་ཆེ་མཆོག་གི་སྐུའི་ཡང་སྲིད་ངོས་འཛིན་བྱ་རྒྱུའི་འགན་དབང་ནི་མགོན་པོ་གང་ཉིད་མཆོག་དང་བོད་མི་ཚོར་ཡོད་པ། དེ་བཞིན་གལ་སྲིད་རྒྱ་ནག་གཞུང་གིས་སྐུའི་ཡང་སྲིད་ངོས་འཛིན་གནང་ཕྱོགས་ལ་ཐེ་བྱུས་བྱས་ཚེ། འབྲེལ་ཡོད་དཔོན་རིགས་རྣམས་ལ་ཨ་རིའི་གཞུང་གིས་ཨ་རིའི་ནང་ཡོང་རྒྱུར་བཀག་འགོག་དང་ཉེས་ཆད་གཅོད་རྒྱུ་ཡིན་པ་དང་། བོད་ཀྱི་རྒྱལ་ས་ལྷ་སར་ཨ་རིའི་གཞུང་ཚབ་ཁང་འཛུགས་རྒྱུའི་ཆོག་མཆན་མ་གནང་བར་དུ་་ཨ་རིའི་ནང་རྒྱ་ནག་གི་གཞུང་ཚབ་ཁང་གསར་པ་འཛུགས་རྒྱུའི་ཆོག་མཆན་གནང་མི་ཆོག་པ་སོགས་བཀོད་ཡོད་པ་རེད།
གསར་འགོད་པ། ཀླུ་མགོན་ཐར།
བོད་དོན་རྒྱབ་སྐྱོར་གྱི་ཁྲིམས་འཆར་ལ་ཨ་རིའི་སྲིད་འཛིན་གྱི་ཆོག་མཆན་ས་རྟགས་གང་མགྱོགས་ཐོབ་དགོས་པ་གལ་ཆེན་ལ་སོང་དབུས་བོད་མིའི་སྒྲིག་འཛུགས་དང་གཞུང་འབྲེལ་དང་གཞུང་འབྲེལ་མིན་པའི་ཚོགས་སྡེ་ཁག་སྤྱི་སྒེར་ཚང་མས་འབད་བརྩོན་གནང་དགོས་པ་དེ་གལ་ཆེན་ཞིག་ལ་ངོས་འཛིན་ཞུ་གི་ཡོད་།